brain storm

العلاقات الإنسانيه من أصعب التعاملات فيها بالدنيا ، وايد يحرني لما أشوف عيال ديرتي مو مستانسين ، أو مفرغين طاقاتهم في المكان غير الصحيح. والله إن يحز بالنفس .

أتوقع راح يكون كلامي على أجزاء مطوله عشان أعطي كل موضوع حقه.

ليش الرجل يطالب بالرومانسيه و أهوا كل البعد عنها بسبب مشاغل الحياة اليوميه، و بعدين إييي تالي اليل و يقول و الله إنتي مو رومانسيه و إلا إنتي باردة.

"طبخن طبختيه يا الرفله إكليه"

الحوار مهم بهالأمور، صاروا الحريم ماديين بسبب أن مو لاقين من يحتويهم، فتفريغ الطاقات تكون بعدة جوانب، الدوام، البيت ، و بعد ما ينامون اليهال طلعة عشا أو قهوة لتجديد النشاط ، و إللي عنده أكثر من ياهل و تدريس يخليها ويك إند.

أعترف إن الماديات لها دور أساسي لإستقرار الحياة و البال .

المال سند و أمان للمستقبل بإذن الله طبعا ، بس الشعور إن ماراح أحتاج أحد فهذا نص الهم راح ، أو إن إذا يالي ولدي و عيونه إللي تزرزر و يبي شي و ما أقدر أعطيه إياه لأني أنا أبوه و مسؤول عنه فهذا بروحه هم.

كل إللي بقوله إهي مقدمه للمواضيع إللي فعلا ودي أتكلم عنها و إللي أحس إنها راح تساعد وايد ناس في التعامل بالمستقبل ويا الناس إللي نحبهم .

كلنا عيزنا من حياتها و نحتاج التغيير للأحسن.

الحمدالله بعد مرور 10 سنين زواج ، أتوقع إني وصلت لمرحلة النضج في التعامل مع زوجي، أهل زوجي و عيالي .

شللي خلاني أبي أكتب في هالمواضيع ؟

كنا قاعدين أنا و زوجي نحلل الناس إللي حوالينا و إشلون إنا لعقول صارت صغيرة و الخلق ضيج و الكل يبي يهج من بيته ، سواء مرا و إلا ريال بعد ما صارت الأجواء باردة و حلوة .

قعدت أقوله عن القصص إللي مريت أنا فيها أو ربعي مرو فيها ، و كذلك حدث هالشي بالنسبه عن قصص ربعه و الجيل إشلون إن صار ما يتحمل المسؤليه و يبي كل شي إييله بارده مبردة.

ضحكتني سالفه قالها واحد عندهم بالمزرعه و الناس مستانسه بره و يا دله القهوة إللي على الفحم.

يا فلان ! هاااا إشرايج بالجو الحين مو مال بر؟

والله يا بو فلان الجو مال معصيه

هههههههههههههه

لا حول ولا قوة إلا بالله

ضحكت الصراحه ، بس سبحان الله طبيعة الريال غير

لو قايلينها حق بنت جان قالت مال قعدة عشا علي لشموع

فراح أكتب لكم مواقف في البوستات اليايه إنشاء الله نحاول إن نساعد نفسنا إنا نعيش بهدوء و إستقرار نفسي .

و بالنهايه أعترف ، إن كل أثنين لهم ظروفهم و بيأتهم و عقلهم للتعامل مع الموقف، بس الواحد بالنهايه يكبر عقله و يواجه و يتحمل مسؤليه قراره.

و دمتم بحب جميعا