Wednesday, June 24, 2009

أريد حلا

تخيل من صباح الله خير توك ياي من البيت و إبتسامتك المصطنعه على ويهك تقول يالله ميخالف انشاء
الله اليوم يكون حلو ، و تلاقي هالورقه على مكتبك.
( لاحظتوا البدليات بالمذكرة؟ المدير مو قاريها عدل )

من زمان ما حازيتكم صح؟
كان يا مكان في قديم الزمان يوم أول ما توظفت بالوزارة كان الوضع جدا مريح ، كل واحد عنده مكتب و كرسي ضيف و المكتب مافي إلا موظفين إثنين بس و كل واحد زقرتي عنده خط تليفون بروحه.
من قبل خمس سنين تمت التوسعه و تغيير المكاتب من مكاتب خاصه إلا مكاتب وحدات منفصله
( partitions )

كان الوضع شوي مافي خصوصية و مالك كلمة بالتليفون و لا إذا يالك أحد تقدر تاخذ راحتك بالكلام وياه والريوق صار علينا بالحسرة الكل يطالعك و شاشة كمبيوترك سبيل للرايح والياي.
الحين 2009

الموده اليدية الحين ، سياسة التوظيف على كرسي
شنو يعني؟


يعني يوظفونك بس بشرط؟
ترا ما عندك لا مكتب و لا كمبيوتر ولا خط تليفون

حدك كرسي
و عادي تيي ثاني يوم و إلا الكرسي ماخذينه منك

فتخيلوا الوضع تكدس بالموظفين
الكمبيوتر يقعد عليه 3 موظفين بالتناوب
فإكراما منك تخليلهم المكتب و تقوم عشان الباجي يستخدمونه

وين تروح؟
يا تقعد على مكتب غيرك من زملاءنا بالقسم
أو
اتروح اتريق بالكافتيريا
أو تروح عند أحد تتريق
يعني موجود و مو موجود

بالصيف
و ماكو شغل شنو قاموا يسوون المسؤولين اسم الله عليهم
فجأه تدور ورقه ياخذون الحظور والغياب
و ياويلك إذا أنت مو موجود على مكتبك أقصد كرسيك
فصارت ربكه بالدوام
و لازم على كل حركة حتى إذا حمام و إنتوا بكرامة مسؤولنا يدري
يمكن فى اللحظه تمر الورقه ؟؟؟؟

و فعلا صار ما لا يحمد عقباه
مرت الورقه أمس
و اليوم أكو مثل هالورقه على مكاتب 6 موظفين

الضحك وين؟
قام كل موظف يكتب بالأجنده إن راح الحمام بهالساعه عشان ما ينسى
من ضمن أجنده المواعيد عنده

ههههههههههههههههه

و تأتيكم الصدمة
التاريخين الموجودين بالورقه هي ساعة دخول الحمام للموظفه صاحبه هذي الورقه
مو صج صح؟؟؟؟؟
لا هذا اللي صار
عشان تعرفون شلون الشغل صاير
و أهم شي إن يتوقيع مدير الإدارة

Saturday, June 13, 2009

أنت هنا

قاعدة أنطر الساعة عشان نطق الكرت
و فجأه شد انتباهي لوحة ارشادات السلامة
إذا صار حريق شنو أقرب مخرج طوارئ
حلو؟؟؟
قعدت أتمقل باللوحه و ما عرفت أنا ويني؟؟
كل خطوط
رحت حق مفتاح الخريطه أشوف
و إلا أكو إنت هنا
بس بسلامتهم مو حاطينا
إنت وينك يالخريطه
شوفوا بنفسكم
و ترا لي يومكم ما أدري وين أنا بهالخريطه
و أنا صاحيه ما ثبت
فما بالكم في حريق و متدودهين؟؟؟
تخيلوا المنظر



Thursday, June 11, 2009

quest net ( شركة النصب و الإحتيال )

في يوم من أيام الصيف الحارة كنا رايحين صديقتي و أنا حق سوق شرق

و إحنا قاعدين نمشي و إلا تطلع لنا هالبنت من محل و إلا صابغه الشعر خطوط أحمر و أسود

استغربنا منها و طبعا كعادتنا ككويتيين التعليق المستمر مع القهقهات

خلصنا؟ لأ طبعا

دشينا محل و قاعدين نطالع المعروض

و إلا هالبنت دشت المحل نفسه

و يايه مجبله علينا

( يا ساتر )

الحوار:

البنت: لو سمحتوا؟ ممكن أقولكم شي؟

ريما ( طافكم النظرات بيني و بين رفيجتي و أستعدادنا للزفه اللي بتييلنا لأن أول مرة نمصخها بالتعليقات و كان صوتنا جدا واضح )

ريما: نعم؟؟

البنت: ماشاء الله عليكم شكلكم حدا حلو و ستايلش ممكن أعرف إنتوا من بناته؟

ريما : لأ طبعا ماني قايله و ليش تبين تعرفين؟؟

البنت: لا أنا مشبه عليكم إنكم من بيت ( فلان )

ريما: لا مو من هالعايله

البنت: عيل انزين أكيييييييد إنتوا ويانا بالبزنس

ريما: أي بزنس؟؟؟؟؟؟؟؟؟؟؟؟؟؟؟؟؟؟

البنت: ما تعرفون أي بزنس؟؟؟؟ البزنس العالمي ! لا لا مو معقوله ما سمعتوا عنه

ريما : تكلموا أي بزنس و أي عالمي !

البنت: هذا البزنس اللي إييبلكم 45 ألف بالأسبوع!

ريما: ( من شاف شكلج ما شاف 45 بالأسبوع ) لا ما سمعت عنه

صديقتي : لا لا إحنا عندنا بزنسنا الخاص

البنت: شنو بزنسكم؟؟

صديقتي : bakery

ريما : ( مع نظرات مليانه عبط ) بيكيري؟؟ ههههههههههههه

البنت : اشفيكم ترا أنا مو قاعده أضحك وياكم ، أنا إنسانه محترمة و أشتغل مخرجه

ريما : مخرجه وين؟؟

البنت : شوفوا أنا ما عندي وقت الحين يالله عطوني أرقام تليفوناتكم و بعدين أنا أدق عليكم و أقولكم

ريما : نو سووووري حبيبتي ما نعطي أرقامنا حق ناس ما انعرفها ز بعدين تعالي قبل لا تروحين قوليلي شنو البزنس مالج؟؟؟

البنت : اسم البزنس ( كويست نت ) سمعتوا في؟؟

ريما : لا ما سمعت

البنت : انزين أنا بعطيج رقم تليفوني سجليه عندج

ريما : الحين بزنس و 45 الف و ما عندج بزنس كارد تعطينا

يالله ييبي رقمج

والله ما هدتنا الا لما خذيت رقمها

طبعا ما اتصلت و مسحته على طول الصراحه خفت

معلومات من النت

منقول _

هذه الشركة، وغيرها كثير، تعمل وفق مفهوم "التنظيم الهرمي pyramid scheme"، ويسمى أحياناً التسويق الشبكي " network marketing" أو التسويق متعدد الطبقات "multi-layer marketing--MLM". وهذا النوع من التسويق يصنف من حيث المبدأ ضمن صور الغش والاحتيال التجاريbusiness fraud . وقد تناولته دراسات وأبحاث وكتب، تحذّر من هذه الشبكات والوهم والتغرير الذي توقع فيه أتباعها، فتجعلهم يحلمون بالثراء السريع مقابل مبالغ محدودة. وفي نهاية الأمر تصب هذه المبالغ في جيوب أصحاب هذه الشركات والمنظمات، ولا يحصد الأتباع سوى السراب. ولذلك تمنع قوانين العديد من الدول التنظيم الهرمي بشكل أو بآخر. كما تحذر الأجهزة الرسمية الجمهور من الوقوع في مصيدة هذه الشبكات بعد تغليفها بصورة جذابة من خلال الزعم بأنها فرصة لتسويق منتجات مفيدة للجمهور، تعليمية أو غير ذلك.
كما أن هناك شركة تعمل في نفس المجال، تسمى سكاي بز skybiz.com ، وهي شديدة الشبه بشركة كوست من حيث نوعية المنتجات وآلية التسويق ونظام العمولات، مقرها الولايات المتحدة ولها فروع عبر العالم. هذه الشركة رفعت وزارة التجارة الأمريكية ضدها قضية تتهمها فيه بالغش والاحتيال على الجمهور، وصدر قرار المحكمة بولاية أوكلاهوما في 6/6/2001م بإيقاف عمليات الشركة وتجميد أصولها تمهيداً لإعادة أموال العملاء الذين انضموا إليها.
إن هذا الموقف ضد شركات التسويق الهرمي مبني على قناعة في معظم دول العالم بأن هذا النمط من التسويق ما هو إلا صورة من الصور الاحتيال والتغرير بالناس. سنبيّن فيما يلي كيفية عمل هذه الشبكات، ثم نبيّن مكمن الخلل فيها.

Saturday, June 06, 2009

home sick !



خل أقولكم حقيقه تفاجأت فيها توني الأسبوع اللي فات

صارلي جم يوم ما أدري شفيني من أطلع من البيت تحوشني دورة و أشوف الشارع يلف فيني

ما داوت آخر يوم من الأسبوع قلت بروح أسوي تحليل دم

راسي ماني قادرة أشيلة من المخدة

رحت حق دكتوري

و بعد تقريبا ساعتين اطلت نتيجه تحليلي

سليمة 100%

الحمد الله

أوكي دكتور شفيني عيل!

قاللي انتي من الأشخاص للي تتأثر بدرجة الحرارة و أييلج هبوط

فلا تتعرضين لدرجات الحرارة العاليه

أو من حر لي برد و العكس صحيح

طبعا أول ما سمعت الخبر من العياده لي سماعة التلفون

زوجي العزيز ، بقولك خبر يطمنك وااااااااااااااااايد

شفت لما كنت تعيب علي تقوللي اشدعوة ما اتحملين الحر عادي

أشدعوة مولوده في القطب الشمالي

و كنت تضغطني ضغاط عبالك انني ضب؟؟؟

أبشرك من الحر اييلي هبوط و حاااد بعد

معناها مواعيدك اتمشيها وياي مع درجات الحرارة

جان تبي سيراميكه الحين بعد المغرب

تبي أشوف طوفه بانيها أصلي الفجر و نطلع

خلصنا؟؟؟

يالينا هالويك أند

خميس و جمعه ما طلعت

قلت بروح السبت البحر

و طبعا العايله رايحه قبلي البحر يوم الجمعه و يقولون أم المرادم عجييييييييييييييييييييبه و باردة

أقوم الصبح و إلا غبار!

يا ربي لييييييييش!

اشبسوي بالويك أند

ما أحب أسوي أي نشاط داخل البيت

ما أحب التلفزيون

ولا أحب الأفلام

والبلوغيرز صاير دعلة

يا ربي أدعيك من كل قلبي ويا الصحه والعافيه نبي جو حلو

مليت من الأفنيو والمجمعات والبلعه

أصلا مع الحر الواحد ما يشتهي ياكل

بديت أحس بالهوم سك من ديرتي

والله مو زين وراي عيال قاعدين يشوفون حالتي

مو معقولة الحكومة تعطينا 32 يوم بالسنه اجازة

يا تطول المده شهرين و الشهر الثاني بدون راتب راضيه

يا تسويلنا شي غير المجمعات التايهه اللي مافيها إلا محلات الشايع!

مارينا نفس أفنيو نفس الفنار

ليش مايعطون فرصه للمستثمرين يسوون ريزورت مسكر

في حمام سباحه كبير

شاليهات و سما صناعيه الواحد ينعزل فيه اشوي

مو معقوله النفسيه بتصير زفت على طول جذى!

بالنهايه اختار نمط شخصيتك اللي تقدر تعيش فيها بالكويت

Workaholic

Shopaholic

Gaazaholic

Dayinholic

Computer addict

أما الوسطي اللي مثل حالتي تحوشه حاله عدم الإندماج بهذه الأنماط

يومين قاعدة بالبيت و هذا ثالث يوم بسبة الجو الحار والغبار .

في اقتراح بس مادي إذا ينفع و إلا لأ

الواحد يضبطله دكتور يعطيه حبوب هلوسه

لي شاف درجة الحرارة 50 يقول

اللللللللللللللللللللللللللللللللللللللللللللللللللللللللللللللله خل أطلع كوتي أخاف برد

لي شاف ناس تتهاوش بالمجلس على أشياء سخيفه و تايهه

يقول اييييييييييييي ياحليلهم قاعدين يتهاوشون عشان يسوولنا مكان حلو حقنا و حق الأجيال القادمة و مشاريع التنميه

عشان لما اتشوف سلوى المطيري على تلفزيون محترم يعكس الديرة و الأشكال اللي فيها و توجه هالقناة

تقول والله اتصدقون عندها هدف بالدنيا؟؟؟

شكلي أنا اللي هلوست بدون هالحبوب



Wednesday, June 03, 2009

wrong number





نعم حبيبتي

بدون وعي منه

أسمعها و تخترق أسماعي

كانت صدفة بحتة

أخطأت اتصالي

و أنعشت روحي

المتلهفه لسماع احساس صادق

قل ما نجده بهذا الزمان

ذهبت عنه بدون إستإذان

قطعت اتصالي

لأبقي ذاكرة هذه الكلمة في بالي

هنيئا لها من هي حبيبته

Tuesday, June 02, 2009

أغنيد عبدو هابه فيها عساها على خير


هلا بالي له الخافق يهلي من الفرحه وروحي به تهلي


اذا شفته ولو بالنفس ضيقه تفرج كل همي واضمحلي


رفيع الشان عن درب الدنايا نضيف العرض عن ماعاب جلي


واذا صفا بدرب الحب وافي واذا عاهد بوعده ما يخلي


انا في عالم الاحلام هايم مدام اني بظله مستظلي


واذا جد النوى سامرت طيفه قرير العين وانور به محلي


ملك من كل حسن مايريده تخيل وافظل الباقي على الى


يحسبون انهم بالزين أيه وهم حاشو الا مايخلي


احسب الحب حب قد مظالي واثر ماكان من حب تسلي


الين الله رماني في طريقه ذقت الحب صدق وطحت كلي