Friday, December 29, 2006

to be a blogger you have to .....





مواصفات صاحب البلوق:

باله طويل

أعصابه بالفريزر

كل شاق الحلج من الضحك علي التعليقات

يسمع من إهني و يطلع من هناك

لي تعدو خصوصيته و طريشوا إيميل يكشت فيهم

دايما يدعي الغباء حق إللي ببلغون شفهم بحياته

ما يعاسر

يفهم إن كل التعليقات صحيحه بالنسبه حق إللي كاتبها بس

لا يتعب حاله بالشرح لأن الموضوع دايما ما يسوى بالنهايه

إذا أذوووه وايد يكشت بالبلوق بكبرة و يروح يحجز مساج في سبا تايم

لا يلبح وايد ، لأن ماراح يقدرون و لا راح يفهمون إللي بيكتبه البلوقير

يستانس إذا الناس إفهموه غلط ، معناها ضبط الكذبه و إنه روائي صادق

يتبع سياسه ( إشعلي أنا من الناس و إشعلى الناس مني )

يحط في باله إن الناس كل مبحلقه عيونها و في بالها كلمه ( من صجها هذي تكتب جذي؟ ).

يدري إن الناس إتظهول و إتسوي النون و ما يعلمون لأنا من بيئات مختلفه

لازم يعرف إن أكو فئه إذا ما قدرت إتسوي فإنها إتهد و إتدقر

لازم يعرف إن الناس إللي فاضيه و ما عندها شغل وايد

لازم إتعرف إن لك حياة ثانيه غير البلوق

لازم إتعرف إن البلوق بيتك و مكانك و إللي تبي إتسوي فيه سو و إللي مو عاجبه ما يشوف شر و لا إتضع وقت بتربيته

إللي بيحكم علي شخصيتي وتربيتي و ثقافتي من بلوقي الصراحه ما عنده سالفه

و أخيرا و ليس آخرا

إحنا كويتيين ، لي إيدنا تدخلت بشغله للأسف خربناها

و إللي علي راسه بطحه يحسس عليها

و البقاء للصبور و ليس الأصلح


أمانينا تسبق تهانينا
وفرحتنا تسبق ليالينا
وعيد مبارك علينا وعليكم

Monday, December 25, 2006

Devotion







بدأت أحبك فعلا

قالها لي

و في قلبي ألم وفرحه

كيف لي أن أواجه كلماتك تلك

صداقه قديمه

بموقف جديد

أثبتَ لعقلي أنك ((رَجُلي))

تسمعني إياها

تؤكدها علي سمعي

((بدأت أحبك فعلا))

بدأت أتذكر أيامنا

وكيف أني لم أنتبه لك

كنت إختيارك

وكان قرارك دايما

فرضت نفسك

وتربعت علي عرشي

أصقلت عقلي ببطئ

تقرأ لي كلمات أعجبتك

مقالاتٌ تشٌد عقلك

تشركني بأفراحك

لا تظهر لي أحزانك

أحببتك بلا وعي مني

بلا مسؤليه

وبلا عقل

لأنك ببساطه

لا تترك مجال للعقل بالتفكير



Sunday, December 24, 2006

no comment





قريت مقاله عن العماله باليابان و كيفيه التدرج الوظيفي و قانون التقاعد

الشي إللي شدني أهوا:

العامل معاشه أكثر من الإداري

( ما شاء الله مثلنا بالضبط)

يعني واحد مهندس يشتغل في معمل و يكرف ياخذ مثلا 3 آلاف دينار

و مديره إللي فوق قاعد مرتاح على المكتب ياخذ 1500 دينار.

قانون التقاعد حق المهندس مثلا

سنوات الخدمة 30 سنه مثلا و الإداري 40 سنه

بند المكافآة :

كل ما إرتفع السلم الوظيفي كل ما قلت المكافئه

( لا إله إلا الله نفسنا بالضبط – المسؤول عندنا علي توقيعه الكريم ياخذ 20 ألف و الموظف إللي يكرف ياخذ 300 )


Thursday, December 21, 2006

قناعة أب





الزواج مشكله هالأيام من كثرة المشاكل الماديه و التعصب الفكري بين الرجل و المرأه ، كل من له شخصيته و كل من له رايه بالهدنيا .

قاعدين ويا جماعه أصحابنا ، زوج وزوجته و بنتين علي ويه زواج .

الزوج نص كويتي و نص أجنبي

الزوجه بنت خالته و أجنبيه بس صارت كويتيه

الزوج عمره بنهايه الأربعين ، بس ماشاء الله عليه قمه بالتفائل ، له أسلوب بالحياة غريب و عجيب ، من أقعد وياهم أكره عمري تالييي

ههههههههههه

الله يهني على هالتفاؤل

( بيني و بينكم قتله عن سالفه القاري بالكويت – تدرون شنو رد عليي؟؟ - قاللي تبين إتسوقين قاري بهلجلحه و بين إللي يسوي و إللي ما يسوي بين صبيان و عمال؟؟ لا أنا ما أرضي عليج ! لا يبا أوعدج إتتين عندنا و أنا إللي أشتريلج القاري و أخليج إتمشين بين الورد و الحدايق إنتي و زوجج و عيالج )فا إقتنعت مابي قاري خلاص يسوه النطرة .

أرجع لموضوعي

قاعدين إنتكلم عن السن المناسب للزواج و قعد يسألنا إشلون زوجي و أنا تزوجنا بسن صغير نوعا ما و سنا كان 22 سنه .

علي جنب خذتني زوجته و قعدت إتقوللي عن واحد متقدم حق بنتها و إن البنت إتحب هالولد .

لييش أقول ولد؟ لأن عمرة 25 سنه

و الأبو رافض إن بنت من بناته تاخذ ريال أقل من سن الثلاثين ، و المشكله الحين الأبو معند علي هالسالفه؟

قلت حق الأم ترا أبوها عنده وجهة نظر ، ما إتشوفين الكويت هالأيام الطلاق سهل

الشباب مو نفس أول يتحملون المسؤوليه .

سن الثلاثين في ميزة يمكن ما إتلاقينها عند إللي أصغر ( و هذا مو تعميم و لكن من وجهة نظري )

شاب الثلاثين يعي تماما علي أي قرار يقوله و يكون ملتزم في ، و بنفس الوقت متحمل نتيجه هالقرار ، و حتي بينه و بين نفسه ما يدور في باله أفكار يمكن الزوجه لو تدري عنها راح تنحاش من بيتها.

جيل الشباب قام يعاني من وقت فراغ بسبب إنشغال الزوجه عنه ، فأصبح منهم نوعين :

الدين و إللي يخاف ربه : إتلاقي متواجد بالصيف بالبحر و الدواوين و بالشتا إتلاقونهم بالبر

إللي نص و نص : إتلاقيهم يا ويا ربعه بشقق و ما يندري أي نوعيه إتييلهم ، و إلا النادي و إلا الدواوين إللي لا إتودي و لا إتييب

مو معقوله بجابل مرته 24 ساعه/ 7 أيام بالأسبوع.

( عشان إتصدقوني لما أقول ماكو نشاطات مشتركه بين الزوجين بالكويت )

طريقه حياتنا تختلف الريال ما يحب لا مطاعم و لا سوق ، فا وييين بيروح؟؟

نقطه ثانيه أحب أثيرها بهالموضوع.

ليش الرجل ليه صار فوق الثلاثين و لما ألحين ما تزوج يكون قرار زواجه هم صعب؟

الخبرة و المواقف إللي صادفته بالحياة خلته يتصور و يشوف حياته إشبتكون بعد الزواج.

زوجه بيداريها

عيال بأمن مستقبلهم و دراستهم

حياته بروحه و إشلون راح يتغير هالشي بيوم و ليله

الأم و الأبو كلهم بحيرة ، هل يزوج بنته و بعد سنتين يلاقيها عنده؟

الريال زين و من عايله محترمة و البنت إتحبه

بس عيبه إن صغير بالسن بالنسبه حق الأبو

بيني و بينكم ، أنا إشوي تعاطفت و يا الأبو يوم قال إن الريال في هالسن يدوب قاعد يبني حياته و بيكون لاهي بمستقبله و هذي فرصته لأن سن الشباب ما يتعوض، الشاب مهندس و بشركه خاصه و دق صبح و عصر ، يعني مشغول حده

زائد إن عنده مسؤوليات إتجاه والدته لأن وحيد أمه و أبوه .

ما أدري إشلون أختم هالبوست

بس أنا قمت أأيد زواج الرجل فوق الثلاثين

Sunday, December 17, 2006

إكتشاف خطير !!! ما أقدر أعيش بالكويت !!؛








شعور غريب إييلي من يدخل ( فصل الشتا) ، ودي أسوي وايد ناشاطات خارجيه بس المصيبه في عاداتنا و تقاليدنا.

أحس روحي مقيدة ، لأني بنت ، لأني أم ، لأني كويتيه ! لأني بنت فلان ، لأني زوجه فلان !

لييييش الريال بالسفر يصير إنسان ثاني !

ليش ما إنسوي الأشياء إللي إنحبها بديرتنا بدون خزني و أخزك .

لما أروح الصالحيه بترينق سوووت و ماكو مكياج إشحقه أمه لا إله إلا الله يخزوني من فوق ليه تحت جنه مو عاجبهم؟

بروح أقييييس هدووووووووم !! ليييش أكشخ؟؟ ليييش ألطخ بدله المحل بالحمرة الحمرة؟؟؟

أبي قااااري ( دراجه هوائيه ) ، ميته أسوق قاريييي من عند الممشي إللي يم مارينا مووول

أقول حق زوجي أبي أشتري ، يقوللي وديه الشاليه!

ليييييييييش الشاليه!!!

ليييش أطق درب ساعه عشان أبي أتمشي 30 دقيقه!!

ودي أروح الجمعيه مثل برة أشتري خبز و أرجع!!!

يقوللي لااااااااا ينيتي رسمي عليييييي

L

بطلع ويا زوجي ريوق الصبح ، أفتح الموضوع .

الرد من قبل زوجي العزيز : إنتي من صجج بقوم 9 عشان بطني؟ إكلي أي شي!!

وااااااااااي و ليييش بالسفر إتقويمني الساعه 6 إنتريق؟؟؟

يبا بالسفر جبنتهم غييير و بيضتهم غييير و حليبهم و توستهم غير!

يايلي شعور هالأيام بعدم الإنتماء لهالديرة ، أحس بكبت مقيده بالعادات و التقاليد ، أحس إن مافيها شي نقدر إنسوي بسبه مدارات الناس!!!

وين في شي إنسوه أنا و زوجي ويا بعض و الناس ما تنقد؟؟؟

لا أحب سينما ، الأفلام مقطعه و لاعنين خير القصه و هم قمته مو مال جو حلو برة

المطاعم و القهاوي متنه متنه من البلعه !

و من نقعد ويا ربوعنا و إلا فلان و فلان

بااااااااااااااااااااااس إشعليكم من الناس إنتوا!!!

إللي متحجبه و تبي تلبس ليقننج مشتهيه كيفها!!

و إللي ماسك إيييد مرته كييييييييييييفه !!

و إللي جسمها لوعه و لابسه جينز و مطلعه البلاوي كيفها !!!

شوفوا و إستانسوا !! بالعكس أصلا إمسوين جو بالقعدة

بس لا تتكدرون و يكون شغلكم الشاغل

و تنتقل السالفه بطريقه بايخه

التعليق وقت الشي و بس خلاص إنسوا!!

صرنا بالكويت الحمد الله و الشكر إنفكر بالوناسه برة ، من الكبت إللي عايشينا

و لا إتقولولي إشعلي من الناس ، ما أقدر برستيجي ما يسمح.

ما إتلاحظيون في مقوله متداوله حق إللي يبي يسافر هالأيام؟

أبي ديرة مافيها كويتيين

مع إن برة مو قاعدين إنسوي شي غلط ! بس البساطه مو محصلينها بديرتنه

و المصيبه إللي دايم أتنح عندها ، إن كل الدنيا فاهمه هالموضوع غلط

إني أبي أسوي شوووو أو إني ببين حق الناس إني متحررة

والله إللي يدخل مخي ويشوف إشلون إن هالأشياء التافه الحمد الله أنا بعيده كل البعد عنها.

بس مثل ما دايما أقول

ماراح أربي خلق الله

يا يتقبلني ، يا ما يشوف شر ، خل يكون همه الناس

Monday, December 11, 2006

زواج






هالأيام البلوغيرز إسم الله عليهم لبحه علي الأصيل و إللي مو أصيل و بما إني ما كنت أكتب أي تعليق لأن الموضوع الصراحه وايد حساس و في مجادلات كثيرة، و طبعا أنا من مؤيدين المثل إن حلاة الثوب رقعته منه وفيه.؛

لكن إللي ما يدرون عنه كثير من الناس إن الموضوع بالكويت الحين مو سالفه أصيل و بس!!!؛

الموضوع أكبر من جذييييه

المشكله بعد الزواج

التوافق الجنسي بالفراش

بالفراش ما يعرف الأثنين أصيل

و لا جامعي

ولا فلوس

ممكن إنعرف شغله أساسيه؟؟؟؟

إشلون إنعرف إن إحنا لايقين علي بعض؟؟؟

إشلون الحياة راح تستمر إذا هالشي ما صار أو كي بالنسبه للزوج و الزوجه؟؟ مع إن الأشياء الباجيه ماشيه عدل و حياتهم العمليه ناجحه ؟؟؟

إشلون إنفهم الأثنين إن الفراش يعتبر السر الخفي و بنسبه 99% من السعادة الزوجيه؟؟؟؟

أنا ما أدري إشكثر في بلوغيرز متزوجين و فعلا يفيدوني بهالموضوع

البنات بالدوام عندنا و رده فعل البعض:؛

ما شفت أحد بعد أول بيبي و كثرة الأمور الروتينيه قاعد يستمتع

طبعا ما أقدر أثير الموضوع مه زملائي و أشوف ردة الفعل

بس صج بدا يعقدني الموضوع

ليش الزوجات بدوا يفقدون هذه الرغبه مع زحمة الروتين اليومي

و بالتالي قاعدة إتأثر سلبي علي الزوج

إللي يبي يتزوج مرة ثانيه

و إللي عنده صاحبه و يروحلها

و إللي قام ينحاش من البيت و يجابل ربعه

و إللي عنده إشويه فلوس إكثرت سفراته

يعني إذا الزوجه ما خذها من بيت أهلها بدون سابق تجربه بالمعاشرة الجنسيه

إشلون إتكون خووووش وحدة؟؟؟

إذا الزوج ما يعلم ؟ ما يتصارحون

إشدراها؟؟؟

بس شطيت عن الموضوع الأصلي

إللي ياب الطاري النسمات الباردة و قاموا الريايل يتشكون إن حريمهم إمقصرين بهالبرد


Sunday, December 10, 2006

a message




Dear blogers

I don’t know what is going on with me lately, I just lost the feeling of writing, and that makes me feel bad a little.

Spanish

Estimado blogers

que yo me puse sabe lo que pasa conmigo recientemente, acabo de perder el sentimiento de escritura, y eso me hace me siento mal un poco.

بالعربي

ليش الواحد يفقد الإحساس بالكتابه فجئه؟؟

و إذا إستن يكتب ألف موضوع ؟؟


Wednesday, December 06, 2006

بطاقات




وصلتي جم بطاقه إلكترونيه إتمني لي الشفاء ، فأحب إني أشكر من دزهم لأني ما أعرف من منو الصراحه بس وايد إستانست.

كان في موضوع تناقشت في مع بعد زملاتي بالدوام على طاري البطاقات .

كنا قاعدين بالدوام ، و مكتب لتدقيق الحسابات قام يوزع علينا بطاقات تهنئه للعيد كعادته كل سنه و تكون البطاقه بأسماءنا الشخصيه.

الموقف شنو؟

إستلمت بطاقتي جان أضحك أقول ياريته من معجب ( طبعا دايما لازم إتعرفون فيني طبع – أحب أتحرش بالناس إللي حوالي – و خصوصا الحتشرييين )

سألت سؤالي المعتاد علي الحتشرين:

لو ياتلكم هالبطاقه من معجب مجهول ، غرضه بس الإطراء و الثناء عليج ، أول 5 ثواني من قرائتج للبطاقه، شنو الإحساس إللي إييلج؟؟؟؟

لاحظوا إن هدفي من السؤال الشعور قبل التفكير!

الأجوبه :

الأولي : أختبص و أحس إنني خنت ريلي إذا كملت بقراءة البطاقه.

الثانيه: أنا مو رومانسيه ، فماراح أحس بأي شي إتجاه هالبطاقه.

الثالثه: أشك شنو يبي مني و شنو غرضه / و إشمعنه أنا؟؟؟

الرابعه : أستانس أول شي ، بس بعدين أفكر إشوي إشمعنه أنا و ووين شافني يعني هل الكلام أنا المقصودة فيه و إلا ياتلي بالغلط؟؟؟؟

شباب و شابات

لو صادفكم نفس الموقف ، معجب أو معجبه مجهوله الهويه ، شنو بتكون ردت الفعل الأولي قبل التفكير .

ليش البطاقات الصجيه وقعها غير عن البطاقات الإلكترونيه ، يعني إتخوف إزياده ؟؟؟

هدفي بحلل نفسياتكم




-----------------------------------------------------------------------------------------------







أحب أبارك حق ربعي

Tweety

Teasty_barry

Kitty

كأفضل مدونات إجتماعيه

و أنا الأسوأ !!!!!!!

حتي و أنا مريضه ما إرحموني

هههههههههههههههههه

أنا كسرت خاطر عمري

L

I am a loser !!!

50 vote good blog

26 vote worset bloger

Who do I believe????

بس والله زووووووووغه الفار

ههههههههههههههههههههههههههههههههههه



Tuesday, December 05, 2006

fever :(





وزائرتي كأن بها حياء ............ فليس تزور إلا في الظلام

فرشت لها المطارف والحشايا .......... فعافتها ونامت في عظامي

يضيق الجلد.. عن نفسي وعنها ....... فتوسعه بأنواع السقام

إذا ما فارقتني.. غسّلتني ....... كأنا عاكفان على حرام...!

كأن الصبح يطردها فتجري ........ مدامعها بأربعة سجام

أراقب وقتها من غير شوق .......... مراقبة المشوق المستهام

ويصدق وعدها.. والصدق شر ......... إذا ألقاك.. في الكرب العظام

أبنت الدهر.. عندي كل بنتٍ ........... فكيف وصلت أنت.. من الزحام

جرحت مجرحاً.. لم يبق فيه ......... مكان للسيوف.. ولا السهام

ألا.. ياليت شعر يدي أتمسي ........... تَصَرَّفُ في عِنان أو زمام


Sunday, December 03, 2006

Speechless

Love is like air

You don’t see

You don’t touch it

You feel it

You can’t live without it

Friday, December 01, 2006

why do men love bitches





سمعنا قصص يشيب لها الراس من بنات رايحين فيها و ياخذون أحس الناس .

علي بالي الموضوع هذا بس بالكويت صاير مع إن الكويت صغيرة و الخبر ينتشر بسرعه الهوا.

ليش كنا إنحافظ علي عمرنا ، علمونا أهالينا إن البنت سمعتها مثل الجبريت، إذا شبت مرة بس بعد ما إتشب مرة ثانيه.

تعلمنا الحيا و إن إنزل راسنا و إحنا نمشي، ما إنجابس الريايل و صوتنا يصير واطي.

الزواج و الحب قسمه و نصيب و لكن المشكله بهالعيايرة البنات إللي مو مخلين حق البنات الزينين منفذ.

يدودهوون الريال من أول ما يشوفونه و يسووله خطط و يطب علي ويها !!!

لا برضاه بعد

المصيبه إني شفت ناس يايبين لسته و إمسوين عليها يمعه: إنتي تبين فلان؟ و إلا فلان؟ لا هذي أمه شريه ما ينفع، لا هذا حمار فلوس ، لا هذا خروف ينقاد بسرعه

و للأسف شفت بعيني إن الريال طااااب و الله في أسامي ما أتخيل يوم إن بتصير زواجته جذيه علي خطة البنت راسمتها و خصوصا لما يكون للبنت مميزات ، جمال و أصل و فلوس ، بس هم ما تبي أي أحد تبي نقوه و بالفرازة .

ليش إنقلبت الآيه عندنا بالكويت؟ ليش العاجل دمها ثقيل و ما إتونس؟

و أنا قاعدة أطالع التلفزيون هذاك اليوم و إلا يتكلمون عن كتاب مسوي زيطه و زمبليطه بالأمريكا!!!

Why do men love bitches

معناها المشكله عامه مو بس بالكويت ، يعني تخيلوا إن بأمريكا يحبونهم و هي دوله متحررة و سهل إن يتعرف و ماكو مشاكل يعني !!!

عيل إحنا عيالنا مسلمين و عارفين دينهم و عاداتنا و تقاليدنا ركضه ورا هالبنات!!

و بعدين يقولون ليش الشباب ما يبون يتزوجون

و هالبنت ساحرته

تبون الصج ، ما أشره علي البنات كلش لا الشينه قبل الزينه

أشره علي إللي معطينهم ويه الصراحه

ماشين و مغيبين عقلهم

أنصحكم يا البنات بقراءة الكتاب ، شي مضحك و مبكي بنفس الوقت