Thursday, March 29, 2007

old days











لكل منا همومه

كم أحن للماضي

لقدماي الخاليتان من أي قيد

كان همي أن ألعب مع كلبي

كيف أجعله يركض خلفي

نسمات الربيع كانت تداعب خدي

تتداخل خصلات شعري

تحجب رؤيتي لطريقي

كم أحن للماضي

لحضن والدي

لحكايات كان يرويها

من أساطير الزماني

كيف لطير أن يتكلم ويحاكي

و أميرة تتوه في الوادي

كم أحببت هذا العالم

محميه من عبث الناس

كم إشتقت لأبي

لحضنه

لحمايته

لأمانه

لخوفه

لحرصه

لإبتسامته بوجهي

كم أحن للماضي

حيث لا معني للأحقاد

إبتسامتي

كانت لا تفارق شفاتي

كم أحن للماضي

حين أخلد في سباتي

و الفراشات تحوم حول رأسي

و آيه الكرسي التي تغلفني و تحميني

و قبله علي جبيني قبل أن أنام

ينتابني شعور غريب

بقتل مشاعري

بقتل روحي

حجب أفكاري

لماذا؟

كي لا أأذي أحبابي

وتستمر حياتي



Monday, March 26, 2007

Romantic scene



عند مغيب الشمس

جلسنا

تسامرنا

ينظر إلي

بإبتسامة طفل خجول

كيف لي أن أغضب بعدها

يتأملني كأني قطعه حلوي

يلعقني

بشفتاه

يذوب بعدها بسحري

لسانه يداعب لساني

تتلاقي أرواحنا بهذه النقطه

أغمض عيناي

يغرس يديه بشعري

يقترب مني

يسمعني أنين حبه لي

جنته من نوع آخر

لن تراها إلا عيناي

لن تحسها إلا شفتاي

لأنه حبيبي أنا

وقلبي أنا

و مشاعري أنا

Saturday, March 24, 2007

spring spring



Is it so small a thing
To have enjoy'd the sun,
To have lived light in the spring,
To have loved, to have thought, to have done...

Happy Spring days every one !

Saturday, March 17, 2007

تألم .. حتى تتعلم







هذه حكمة منطبقة على كل الناس

لو ان كل من عضه الزمن بنابه قال : آآآآه

منهم من تكون آهه علي شكل صرخة

منهم من تكون آهه علي هيئة دمعة صامتة

منهم من تكون آهه تمرداً على ماحوله .. وصداماً مع من حوله

منهم من تكون آهه متجمدة علي عتبة انتظار لا يدري متي ينتهي

ومنهم من تكون آهه درساً له لتقول بالنيابة عنه

علمتني الحياة أن أتلقى ... كل ألوانها رضاً وقبولاً..!!

علمتني الحياة أن لها طعمين ... مراً وسائغاً معسولاً ..!!

الحياة مدرسة والقليل من ينجح فيها بتفوق

فلابد من العثرات فتمتلئ شهادات تجاربنا بدوائر حمراء

تعطينا الخبر بأننا سقطنا !!

لكن الأهم أن لانستمر في تلوين تلك الشهادات بذلك اللون المزعج !!

فلكل جواد .. كبوه !!

فلنشد السرج على ظهره من جديد ولنشد عزمه

فلازال هناك أمل في الفوز في ماراثون الحياة

لينسى بعدها تلك الكبوة المؤلمة ,, !!

لا احد من البشر لا يوجد في قاموسه أكثر من كلمة ( آآآه ) واحدة

ويختلف طرحها وشرحها .. باختلاف المواقف

وباختلاف وسائل الإفصاح والتعبير

وتبقى ( آه ) الصدى الأمين الحائر .. وأحيانا الصدى الحزين الجائر

تبقي بصرختها .. وبدمعتها الصامتة .. وبغموضها

وبتمردها .. وبتجمدها وحيرتها

تبقي الوجه الأول الشاكي الموجع للإنسان ... كل إنسان

وعلى الرغم من ظلالها الحزينة .. فان وجود الوجه الثاني

حيث البسمة .. لايمكن صرفه.. ولا التعامل به .. ومعه

الا إذا اقترن بوجهه الأول الباكي الشاكي .. والسبب في غاية البساطة

السبب .. ان من لم يتألم ..لا يمكن له أن يتذوق طعم السعادة

لهذا تألم .. حتى تتعلم








منقول

Monday, March 12, 2007

يوم الجرد العالمي





كل سنه بنفس هالوقت يصير عندي إستنفار بالبيت

يوم التوزيع العالمي للخماجير إللي بالأدراج

و يا شين إذا حسيت إن كل هالتعب و توزع الخلاجين إتحس إن كبتك لما الحين متروس!

طلع العيب مو من الكبت!

العيب فيني!

ما أحب أحد يجيس أغراضي ، كتبي ، مجلاتي ، وايرات قديمه يمكن أحتاجهم بيوم

ميمعه أوراق بنتي من المدرسه لما كانت 3 سنين

رسوماتها

شخابيطها

ما أقدر أوزع و إلا أقل!

يعورني قلبي

سؤال؟

المجلات ، ليش إميمعتهم؟

علب التليفونات الفاضيه ليش بمكانهم؟

أفلام و سيديات علي أيام ويندوز 311؟

مودم اللخمة و إنتي حاطه wi-fi!

ديسكات قديمه فلوبي متروسه فايروسات ليش لما الحين محتفظه فيهم؟

ريموتات و براغي ؟

ميداليتي الأولي حق سيارتي الأولي ليش محتفظه فيها و هي مكسورة؟

موبايلات أبيض وأسود ليش لما الحين موجوده؟

خرده و عملات قبل لا إتحول حق يورو ليش لما الحين بالدرج؟

أول جنطه ماركه هديه أبوي لي حق الجامعه ليش لما ألحين موجوده و أتحلي عليها؟

عدة الحداق مالتي ليش لما الحين أبطلها و أتذكر لما أبوي يودينا بطراد اليوسفي 21 قدم فايبر ؟ مع إني من تزوجت ما طلعت حداق

مكياج ووحمر من عمر الدنيا ما أستخدمهم بس أتحلي علي شكلهم مسطرين!

600 ألف نوع سشوار ، شي سيراميك و شي حق الكيرلي و شي يوم كان شعري طويل و شي لما كان شعري قصير

مع إنني كل مالي خلق و أروح الصالون أسوي شعري!

أمبيه!!

ليش يا ريما ليش؟

ليه متي يعني؟؟؟؟

ما أدري ليش أجرد ، مع إني أتخلص من 1% من اللي موجود عندي أصلا!

Wednesday, March 07, 2007

kuwaiti needs







الواحد شنو يبي من هالدنيا

يسوي لآخرته؟

الصحة؟

أمان؟

إستقرار؟

يشوف عياله بصحه وعافيه و أدي أمانته إتجاههم؟

يرضي إللي حواليه؟

يحقق طموحه؟

يلقى الحب ؟

الناس يفهمونه صح؟

تكون نفسك بدون مجاملات؟

تلاقي أحد وياك عالحلوة والمرة و ما يكسر فيك؟

ما إتصادف ناس متروسين عقد و تبتلش إتفهمهم؟

إتحط راسك علي المخدة بدون الإحساس بتأنيب الضمير؟

تلقي العين إللي تفهمك بدون النطق بحرف واحد؟

يبي يضح من قلب ويا ناس تحبه؟

ليش صارت العفويه و البساطه نقمه علي صاحبها؟

هل الحريه تستحق أن تكون في قمة الهرم؟ أي آخر شي الواحد يبيه؟

بس تعبت البح و أتحلطم


وينك يا هرم الحاجات

يبيلك إعادة نظر لو إن يطبقونك بالكويت


Monday, March 05, 2007

spanish final exam result!






فى الإمتحان يكرم المرؤ أو يهان

بحمد الله و بعد التوفيق من الله و بعد جهودي الدراسيه

تم إجتياز الإختبار النهائي لمادة اللغة الأسبانيه المستوى الأول

بنتيجه مشرفه

94%

SO !!!!

HEEEEEEEEEEEEE

YYAAAAAAAAAAAAAAAAAAAAAAAA

EN ESPAÑOL !!!

VIVAAAAAAAAAAAA

REEEEEEEEEEMAAAAAA

Friday, March 02, 2007

shopping in dubai




الحمدالله علي سلامتي و تو ما نورت الكويت

الصراحه صراحه

دبي تطورت تطور مذهل ، تفاجئت يوم رحت إهناك

خبري فيها من 5 سنين و كل ما أحد يقوللي عنها أقول جن مو وقتها لأن الجو عندي شي مهم و أساسي بالسفرة .

ما أحب الحر و الرطوبه

الإقامه :

فندق كمبينسكي – شي مو طبيعي الصراحه

سبب إختاري للفندف أهوا المول إللي من تفتحون باب اللوبي إلا دخلتوا لعالم الخيال

ثلج و تزحلق

ماركات أشكال و أرناق

قهاوي علي كيف كيفكوم

مطاعم

سينمات مو من عشاقها وايد

جمعيه إشكبورها يصلح حق أمي إتموت علي الجمعيات

للمعلومات عن المول :

http://www.malloftheemirates.com/

أوصيكم التركيز بالمول

إشلون؟

تدخلون علي السايت إللي بعطيكم إياه هذا

و إنتوا من الغرفه إتخططون شنو تبون تشترون و من وين؟و وين بتغدون و إلا تشربون قهوة

http://www.malloftheemirates.com/planYourDay.asp

عشان إتريحون الرياييل و تكون عارفين وين بتروحون بالضبط ، لا يكون التخطيط عشوائي

أول شي إتمرون فيرجن

تشترون جميع أنواع الجرايد ومجلات عشان الريال يقعد بالقهوه و إنتوا إتفرفرون علي راحتكم.

الوعد الساعه 2 حق الغدا بالمكان لفلاني

إللي بيكمل سوق لا ياكل إلا سلطه

و أكلوا الريال عيش و مرق من الهندي و لبن عشان ينام الظهر ، تستغلون الفرصه عدل.

ممنوع إصطحاب الأطفال لو كانت الرحلة 4 أيام أو أقل

إختيار الوقت المناسب للتفتيحات

ما أنصح الروحه فترة التنزيلات

لا إتأجرون سيارة عشان ما يقول الريل يالله مأجرين سيارة و إنتوا كل بالسوق

صراحه أحييهم علي كل شي

البنيه التحتيه لإمارة دبي

التنظيم

الترتيب

النظافه

أول مرة أرجع حق ديرتي و أحس إن ديرتي الصراحه من العصر المتحجر

أقوي المجمعات عندنا ما إتي ربع من مجمعاتهم الدايخه

مارينا مول؟

سوق شرق؟

الصالحيه؟

الكوت إللي لما ألحين ما شفته؟

الرايه؟

ذي أفينيو؟ إللي أتمني إن يكون بمستوا المحلات الموجوده هناك

صراحه ما حسيت إن في فرق بين سوق لندن و سوق دبي

الفرق بالسعر؟

والله إللي يتحطونه علي الوزن أروح دبي أبرك

ولا مع القانون الجديد لطيران بريتش ( درجه سياحيه 23 كيلو – درجه جي قطعتين و 23 لكل قطعه )

أنا أطلع من الكويت و جنطتي 25 كيلو !

أنا ما أقول إلا

الله يهنيهم و يسعدهم علي ديرتهم

بنوها بقلبوبهم و صج ماكو حسد

حسافه و الله

عليج يا الكويت

راحت عليج خلاص

لطيور طارت بأرزاقها






شارع الماركات
نهايته قهوة أرماني
أحلا باستا و أحلا كاباتشينو





فندق كمبنسكي








إحم إحم
هارفي نيكيلز
3 طوابق
يخرع حده !؛