Thursday, June 29, 2006

يالله ياسيفه

النتايج

يا خال
يا بوثنتين
الله يستر و يحميج يا الكويت


لورميتم كل كنوز الدنيا تحت قدمي مارضيت ،
ولا عن الحق تخاذلت يوما أو حتي أبيت ،
وعن طريق الأصلاح يابلادي ما أنحنيت ،
أقسم بربي يوم 29 يونيو 2006 لن أبيعك يا كويت

Wednesday, June 28, 2006

sale

مراسلنا من لندن الأخ العزيز

haamoor


يقول أكو تنزيلات في لندن

إللي عندا طلبات يكتب لسته حق هامور ويا لفلوس محولة بالجنيه الإسترليني
عشان ما يتدبس بفرق تحويل العملة

Monday, June 26, 2006

driver!

في موضوع حبيت إنكم إتشاركوني فيه، ريايلنا بالكويت بخير و نعمة الحمدالله، بس لما يسافرون برة سواء حق الدراسة أو حق السياحة ما يتفونعون وايد،إتلاقيهم شقردية و يشيلون يحطون.

شإللي خلاني أكتب هالبوست

ولد الفقر سايقنا إللي بلبنان ، شايب عمره 60 سنه ، كل ما أقوله سو هذا يخترع! جني طالبة منه شي حرام!

بوفارس زهبت لزبالة و إنتوا بكرامة، ممكن إتصعدها فوق عند الحاوية بالسيارة لأني ما أقدر أوديها

بوفارس: أنا بدك إياني أشيل لزبالة !

أنا إيي ليييش يبا ما إتشيلها ، كان أحد يشيل إزبالة بيتك من قبل

بوفارس: إييي ولا عمري شلت زبالة

أنا: ألحين بتشيلها معاي ، جرب شي يديد بحياتك، و بعدين تبي الدبيين ( الذبان) يترس المكان؟

ترا بعدين النظافة من الإيمان ، و إنتوا معروفين بالنظافة.

بوفارس: إييه والله كلامك صح

مرينا علي واحد بالشارع قاعد يمسح أرضيت بيتهم

قعد بوفارس يضحك عليه

أنا: لييه بوفارس عم تتضحك علييه؟

بوفارس: شووو رجال عم يكنس الأرض !

أنا: إييي لييش ما يكنس الأرض، يمكن عايش وحيد و ما عندة أحد يكنس الأرض، يعيش بالغبرة يعني؟ و بعدين الحركة بركة

بوفارس : لا ه يا عم ، هيدي شغلت نسوان مش شغل لرجال

أنا ( أدري قاعدة أحن علي راسة) : و شو شغل لرجال؟

بوفارس : لرجال بيجيبو مصاري

أنا : الحريم بلبنان بيجيبو مصاري أكثر من لرجال ( طبعا ما فهم قصدي شنو قاعدة ألمح عليه)

بوفارس:لاه يا عم الشغل إتخلق للرجال .

مرة إخترع يوم دخل البيت و لقاني صاعدة أركب لمبات بيتنا المحروقين ، فضحني عند ريلي، مرتك و مرتك .

يعني منصدم ليش أعرف أسوي أشياء وايد ، ألحين بسبب ظروف معينة ، ما عندما خادمة، فوضع طبيعي إن نشتغل إبييدنا ، إنعرف الوقت إللي إندلل نفسنا في و الوقت إللي المفروض تشتغل فيه، الحمد الله عمرنا ما حسينه بنقص و إحنا كويتيين و خدامنا أكثر منا، أصلا نستمتع لما نشتغل بيدنا لأن هالشي فاقدينا بديرتنا .

الحمدالله علي الخير و النعمة و الله لا يحوجنا حق أحد

عرفتوا ليش لبنان ليما ألحين متخلفة ، من تخلف شعبها

إللي عندة سؤال أسأله حق بوفارس قولولي ، لأن الريال حدة نكته و ماكو منطق بالحياة

Sunday, June 25, 2006

Saturday, June 24, 2006

إتصال أثلج صدري


يالي إتصال من الكويت الساعة 11 بالليل و كان موضوعة مؤثر جدا

ماراح أدخل بتفاصيل المكالمة ، بس هالإنسانة حبت إتوصل رسالة حقي ، إشكثر أنا غالية عندها رغم إللي صار و إللي راح يصير .

أول شي إنصدمت من وقت المكالمة

ثانيا قلت ليش إنطرت الين ما سافرت و قالت هالكلمة

معني أشوفها وايد و تقريبا كل يوم

بس الأحلا من هذا كل

التعبير عن الحب إللي خلاني صج صج صج أقول الدنيا لما ألحين بخير

طول عمري متمردة علي الحياة

طول عمري ما أواطن إفرازات مجتمعنا من حش و قرض بالعالم ، و غصبن عليك إتحش و إتجاري لأن صار الموضوع عادي هالسالفة.

علي الرغم من الوظيفة الجديدة لحريمنا و هي الوصاية علي تصرفات الآخرين ، قمت أسمع من هني و يطلع من إهناك.

تتصل علي وحدة عشان تقوللي أحب إنج إتعرفين إن علي رغم الكلام إللي سامعتة و يمكن راح تسمعينه ، فأنا ماراح أتخلي عنج و صداقتج الواحد يفتخر فيها .قلبج عمره ما عرف الحقد .

أحس إن ما عندي سالفة اليوم ، بس حبيت أقول كلمة بحق هالإنسانة إللي لا تقرا بلوق و لا تدخل النت

أحبج وايد و يا رب الله يباركاج بعيالج و يسخر ريلج حقج

إدعولها بالخير ، تراها تستاهل



ترا بيني و بينكم

درجة الحرارة 24

هاهاهاهاها

وااااااااي وناااااااااااااسة !!

Thursday, June 22, 2006

i reached the sunset



الحمد الله وصلت بالسلامة
و مجابلة هالمنظر الحلو
قلت خل أصور لكم إياه تشاركوني غروب الشمس

مراسلتكم من لبنان
ريــما

يالله سهل دربنا



كنت مسافرة لبنان شهر مايو ، حلو الحتشي؟

خالتي أم ريلي تبي أحد يوديها لبنان فأنا دقيت الصدر ، هذا الكلام صارله أقل من شهر ، الإنتقاد الحين من الجماعة إللي عندي بالبيت .

هاااااااو توتش ياية ! شوديتش؟ ليييش إنتي ؟

إنزين ، بنتي بتروح ويا يدتها شهرين ، مو لازم أنا أشوف الوضع بما إن أول مرة إتسافر وياها؟

يمكن إتمل، يمكن ما تبي تقعد ؟

المهم / في تدخلات خارجية لوقفي من هذه السفرة و تم تغيير الحجز إلى حجزين منفصلين .

و ها يا ريما يالله إمشي ويانا ، بما إني دعلة بالسفر و مو كل أحد يقوللي تعالي أيي ، فحجزت بنفس يوم رجعت الجماعة ، على أساس أنا وحدة أحب عيشت الحرية .

المفروض أقعد أسبوع من خميس لي خميس ، جان أمي إتقرر إنها إتروح لبنان حزة الإنتخابات و هو اليوم الوحيد إللي لقت في حجز ، و قررت بناء علي خالتي .

أنا توهقت يوم قالت الوالدة إشدعوة قعدي ويانا إشوي .

المشاكل بدت من هالنقطة .

أولا ما رضوا يعطوني إجازة غير إللي خذيتها فيا خصم أو شي ثاني مادري شنو ما قررت .

الشباب إللي المفروض راح يقعدون في بيت أهلي ، راح يضطرون يقعدون عند أبوهم إللي إحتمال كبير إن ما راح يعرف يتصرف إذا إرتفعت حرارة أحد .

صرت بين حانة و مانه ، بس توكلت على رب العالمين و حجزت يوم 22

صار ألف شي و لوية و عفسة بس إستقر الراي علي يوم 22 و صرنا بس 4 إللي بنروح

العفسة سبتها الإنتخابات ، فتغير الجدول .

بما إن ريلي ماله شغل بالإنتخابات ، فنشغل بشغله و مباريات كاس العالم.

أنا : ها طرشت المندوب إيبلنا التذاكر؟

زوجي: وييييييييييييه تو الناس ليش مستعيلة ، كل مرة أييبهم قبل السفر بيوم

بعد عشرين يوم و باقي 5 أيام علي موعد 22

أنا: ها خلصنا من سالفة التذاكر؟

زوجي : وييييه ذكرتيني خل أدق عليي

و طبعا إنشغل و عمك أصمخ

زوجي: ريما ، بقولج خبر مو زين بس لا إتحاتين كل شي بيصير أوكي.

أنا: هااااو شالسالفة !

زوجي : عادي إتروحين سياحية؟

أنا : إيييييييييي من أمه شنو يعني؟ خو كلها 50 دينار فرق بين التذكرتين !

زوجي : ترا التذاكر تكنسلت لأنا ما صدرناهم نسيت و لهيت بالشغل و البلدية

أنا : ميخالف حصل خير

زوجي : بس ترا حتي السياحية مو أوكي قاعدة أحاول فيها

أنا بس قاعدة أحش بيني و بين نفسي : أشوفة يقوللي سياحية عبالة بقولة لأ ، لو لقالي بسرداب الطيار و بين لجناط هم بروح!

تاريخ 21 الصبح :

أنا : ترا السفرة باجر ، بس حبيت أذكرك يعني إن إخنا لما ألحين علي الويتنق

زوجي : لا لا أكيييييييييييد ، بس عقب الساعة 12 الظهر

( مادري لييش بس عديتها و ما سألت )

رجعت البيت لقيت خالتي :

ها خالتي وين الجواز مالج؟

هااااااااا ، مادري ؟

أنا : لا الله يعافيج دوريييه

إتحوس إتدوره و ما تلقاه ، و تتصل تليفون علي بنت إختها إللي آخر مرة سافرت وياها و ما إترد علي التليفون.

المهم ، حوووسة و فلم و ما طلع الجواب إن عندها إلا بالخمس .

العصر الساعة 5 :

طبعا المبارات بادية و نطرت بين الشوطين عشان أكلمه

أنا : ها زهبت لفلوس ؟ صرفهم المندوب؟

زوجي : في سوال ودي أطرحه عليج؟

أنا : تفضل

زوجي : ليييش إذا بدت مبارات من أول 10 دقايق إتميليت حق فريق معين

أنا : ( بمشي وياه ، عشان سوالي ما يضيع ) والله إللي لعبه حلو طبيعي بتميل وياه

زوجي : لا والله مو شرط بس …………….. إلخ لمدة 20 دقيقة

و أنا قلبي يطبخ

أنا : ممكن إتكلم المندوب إييب جواز الخادمة من المكتب

زوجي : إييييييييي تعالي ذكرتيني ترا ما رحت المكتب أوقع الشيك ، خل أدق على المحاسب يطرشلي إياه ، إلا جم سعر تذاكركم ؟

أنا : إشدرانييييييي !!!

زوجي : إيييه أشونج ذكرتيني لحظة خل أدق

أنا : وااااااااي من صجك!

زوجي : إيييه شنو المكتب غصبن عليهم بينطروني عشان أستلم التذاكر

أنا : أقوووول بروح الصالون أسوي شعري

رجعت البيت الساعة 9 :

زوجي : يالله يبنالج التذاكر بعد إشتبين

أنا : عساك عالقوة إنشاء الله

أتفحص التذاكر و إلا أشوة كل شي أوكي

اشوف الجواز مال الفليبينية ، و إلاااااااااااااااااااا

واااااااااااااااااي لااااااااااااااااااااااااااااااااااااااااااااااااا

لييييييييييييييييييييييش يعني !!!!!!!!!

منتهيييييييييييييييييييييييييييييييييييييييييييي !!!!

زوجي : لا يبا مو قاعدة تقرين الجواز عدل ! ناديها تقراه !

أنا ( بس عاد طلع الوجه الآخر صبرت و طولت بالي بما فيه الكفاية)

أنا ما أعرف أقرا جواز منتهييييييي!!!! ليييييييييييش يعنيييييي !!!

Valid until

إشيلبيله هاذا بالله فهامية ! إمأمنني علي عيالك و ما أعرف أقرا جواز !

بعدين إستوعبت إن إللي فيني قهر و حرة تعوذت من إبليس

دقيت علي خالتي ،

خالتي فليبينيتج ما تقدر إتسافر منتهي جوازها

خالتي : إيييه عادي إنجدده إهناك

أنا ( يا وييييييل قلبي ) : خالتي ما تقدر تطلع من الكويت بجواز منتهي

خالتي : شسوي أنا يعني ، أبي أروح و إهيا وياي

أنا : يا إنكنسل السفرة ، يا إنروح إبروحنا

خالتي بس بعد 20 دقيقة صمت بالهاتف : خليني أفكر

الساعة 11 باليل :

خالتي ياتلينا فوق و سوت إتصالاتها و ربعها و قالولها بالمطار مندوب من السفارة راح يدخل الخادمة .

إلي ألحين ما أدري إشبصير ، ما سويت لجناط ولا لي خلق أسوي شي

كتبت بوست عشان يخف التوتر عني إشوي

Tuesday, June 20, 2006

خرابيط



في وايد أشياء كانوا أهالينا يقولون لا إتسوون هالشي ، بس ما ندري لييش، و إنم إنسويها لأن تعودنا عليها.

مثال :

إذا صار الليل ما يصير إنطق الكرة بالطوفة.

إذا لقينا لنعال و إنتوا بكرامة مقلوبة لازم نركض إنعدلها ، ماني قادرة أتخلص من إن لنعال إتكم علي الله ! شاااكوااا

ما يصير ناكل سمك و نشرب لبن مع بعض، ترا يصير فيكم بهق!

المقص ما يصير نفتحه و إنسكرة إييب النحس !


شنو أشياء إتحسون إنها خرابيط برابيط بس لما ألحين إتسوونها ؟

eshrayik tefta7ligk blog?



HaaMooR said...

Reema... Thanks for the gift again :P

ma gelteelena to whom you are VOTING ?? haaa :P this Q for all the Beautifull ladies who post in Reeemas blog :D

yeah.. and WHY ?


( agoool tarra tarra gaaal ladies o beautifull ! so la jeyaker wala reyayeel yejawboon )

بتبناك إليما تفتحلك بلوق

Monday, June 19, 2006

the flower mal S.S


the S.S flowers :/

it's not for me , but it's for my brother in law ( 7amaay ) coz he did his eyes , no glasses anymore

but this flower came to me to him :p
rezgy

the S.S - he is the spy to everything i do bel net
and if i cross the limit he will tell to my husband

he is our family friend


Mashkooor S.S

p.s ( my birthday 18th july )


Sunday, June 18, 2006

contest


and the gift goes to !
HaaMooooooooooooooooR

Bravooooooooo

send me your e-mail , so you can get the gift

Friday, June 16, 2006

ثقة زايدة إشوي بلعروس


البارحة كنت رايحه عرس ويا الوالدة ، طبعا كالعادة فيني تحلطم علي بعض العادات و الأعراف علي عروس الكويت.

أول شي العرس هالأيام صاير ما يونس و مادري الصراحة شنو الحل بهالموضوع، نفس الناس ، نفس الأغاني إللي من سنين الطواعين و أقصد السامري و السبب إن الحريم لكبار يحبون القصار و أغاني القصار . مع إن صوته مافي من الفن ، الجسمي وايد أحلا .

المهم ما علينا ، ليييش قاعدة أكتب البوست؟

الصراحة من سنتين مارحت حفلات بسبب الحمل و الولادة و الرجيم و ساعات عسارة إن ماكو بدلة حلوة و رخيصه و أقصد رخيصة أقل من 500 دينار و طبعا غير المكياج و التسريحة و إكسسوارات البدلة.

مو بخل ، بس إذا زاد المبلغ أزيدهم إشوي و أشتري ساعة

أممي تتحلطم علييي هاهاهاهاها

أنا مدمنة ساعات
:) < ==( بقلد المرشح الشرهان )؛ المهم شطيت

المناظر إللي قاعدة أشوفها بالعرس بصراحة إمضيقة خلقي وايد .

ويوووه حلوة من هالبنات لصغار بس الله لا يوريكم لجسام و لا اللبس !

بتقولوون ولييييييييين ردينا علي اللبس !

إنزين مو مدحا فيني بس أنا أحب إن ما يطلع فيني عيييب بالبدلة ، يعني هالأيام زايدة جم كيلو ، ليييييش أشتري بدلة إتطلع الخواصر !

يا جماعة في مشكلة في هالبلد، الثقة الزايدة !

إشذنب الناس يشوفون هالمناظر و يتكلمون و أدري و أعطيكم إياها إن بالعرس ذنوب من راسك ليييه ريلك.

و سوووري بكمل إهني أقصد بالبلوق ، عشااااااااان إصحا يا نايم .

عيل وحدة وزنها والله و بدون مبالغة فوق ال150 كيلو و ترقص شرقي! لييييييييش يعني! شالثقة! لا المصيبة أكو تصوير ! كل هذا مزاج يعني و الله الصدر واصل ليييه الفخذ ! و مزلط و الحالة حالة!

هالبنات لصغار إللي أمهاتهم إقتلوا البراءه فيهم ، إتلاقيها 16 سنة و السدر طالع كل بالشارع و لا راقصة بشارع محمد علي.

وإلا إللي لما ترقص تكون إهيا بوادي و الطقة بوادي آخر .

وحدة أمس صغيرة بدلتها حمرة و الظهر عاري و مبين اللونجري مالها علي هيللو كيتي !

وحدة ظهرها متروس شحم و حاطتلي قلب يتدندل ، بكون إتقلد دعاية شانيل 5

هاهاهاها تعالوا فكرة حق حملة نبيها خمسة ، بس عاد نبي ظهر نيكول كدمن مو هذي!

العرس متناقض يا ضعيفة يا متينة و الوسط صج صج ينعدون عالأصابع .

دخلت العروس ويا زفة رياييل و مادري شنو هالمديل اليديد إللي راجعين فيييه مرة ثانية، إنزييين يالحريم لبسوا إحجاباتكم.

في بنات لازم يكونون داخلين ويا العروس ، إتلاقيهم إلبسوا الشالات ( مو متحجبة )

فجئة ويا الطق الحامي مال الرياييل إتقوم ترقص جدامهم بالشال !

يعني الشال يا أمي أهوا الحاجب ! و الفتحات والضيج إللي بالبدلة إختفوا!

إكتشفت شغلة يديدة ؟ ليييش المتحجبة بالعرس تلاقي بدلتها أكثر شي متفصخة ؟

ممكن سؤال ، ليييش لي قالوا عرس معناها كل شي يجوز؟

صراحة كلمة حق أمي ، العرس صار آثام من الحش أكثر من إنها وناسة من كثر التهول إللي قاعدين يهولونا بنفسهم على أبو إن عرس !

عندي فكرة مشروع من بعد هالحديث الطويل، و أهوا تبني البنات قبل الدخول للعرس

يعني بالإنجليزي

Personnel shopper

شكر خاص لأختي و صاحبتي لوير لتبنيها فكرة دخولي العرس بتميز ممثلات الأوسكار

لوير محد مثلي و كل من شافني قاللي ستايل يديد أوروببي

و الشعر و الماك أب طلع مثل مذيعات روتانا

و طبعا ما جعل هذا كل ينجح القوام المتناسق عشتوااااااا هاهاهاهاه

إييي بمدح نفسي

القالب غالب

والله إذا الجسم حلو ، أي شي ينلبس حلو ، بس إذا الجسم مو متعوب علييي والله لو بدلة بوتيغا ما تزها عليييه .

ودي أسوي مسابقة بقلد عتتووووج
شنو البدلة إللي فوق بالصورة؟

ممنوعة يا لوووير من الإجابة!؛



دعاء فض المجلس

سبحانك اللهم و بحمدك اشهد ان لا اله الا انت استغفرك و اتوب اليك

Tuesday, June 13, 2006

دينين بس بعد الإنتخابات



الكلمة المتداولة في المقار الإنتخابية هالأيام إهيا كلمة الفساد

و طبعا الكل قام يفسر على كيف كيفة معني هالكلمة و ما تحملة من مواضيع قد لا تكون خافية

خل نوقف عندها إشويه

مقتطفات من إللي حاصل بالمقار الإنتخابية:

  1. إختلاط الجنسين بصورة ملفتة للأنظار و مع إحترامي للكل أصبحت المرأة و إهنيي أتكلم عن إللي أعمارهم فوق ال 21 سنة و في شهود إن البطاقات المدنية تثبت هالشي ، المرأة الكويتية للأسف لبسها لا يعكس إحترام المكان إللي داخلتله. أتكلم عن التنانير القصيرة ، الجينزات الضيجة ، بلوزات دلعة و حفر ، مو قاعدة أتكلم عن الحريم المحترمات إللي هدفهم إصلاح البلد.
  2. نبيلة العنجري ورولا دشتي بناء علي شهود عيان، إدخلت عليهم الدوانية بدون لا إحم ولا دستور ،ولا إستإذان من صاحب الدوانية .
  3. دخول بنات علي الأماكن المخصصة للرجال في المقار الإنتخابية بحجة إن يبون يقعدون بالصف الأول و يسإلون و يبونة وجها لوجه و رزوا البطاقات إنهم من سكان هالمنطقة.
  4. المقارات إللي منعوا فيها لختلاط إتلاقيها فاضية .
  5. جمال العمر ، دفع 70 دينار علي كل بنت تقعد في مقره.
  6. 20 مرا من سكان الجابرية أصحاب الشقق إتصلوا علي مرشح ليعرض عليهم خططه الإنتخابية داخل شقتهم .
  7. تقعد بالمقار الإنتخابية ، البلوتووث شغال و الخوات مو بالبال إشقاعد يقول.
  8. الكل قام يروح ندوات مقار إنتخابية من الدوائر إللي يدرون إن الشباب فيها أهل خير و نعمة .
  9. المقار الإنتخابية صارت للأسف مكان للقزززز

يايلي ريلي متهول من ربعه إللي بعضهم راح و شاف ، والبعض قاعد يشتغل ويا المرشح ، و قاللي كلمته :

عرفتي ليييش ما بقيتج إتروحين؟

السؤال الحين :

وييين إلسانكم يالديننين علي هالفساد ، وإلا شاطرين بس إتحطون حيلكم علي برامج ستار أكاديمي!!

ألحين أشوف عاجبكم الوضع عشان مصلحتكم و إتخافون تتكلمون تخسرون أصوات.

عاجبكم حال الديرة المايل هذا!!!!!

Monday, June 12, 2006

مشروع هوشة


أول مرة أحس إني طالعة من طوري بالشارع ، عادتا أحب أسوق و عشقي للسياقة صج صج ما راح يفهمها أحد ، المهم عازميني على عرس و إذا أحد يبي يقثني يعزمني علي عرس ، الصراحة عيزت أعتذر و إعيزت أمي إترقعلي بس بالنهاية هذا العرس صادف إن يوم الخميس و قلت إذا ما لقيت البدلة إللي علي مزاجي ماني رايحة – شطيت عن الموضوع الأصلي .

المهم من السبت قاعدة أعابل بالشوارع أدور بدلة و لوازم البدلة و الحالة حالة مع هالحر و الزحمة و المشوار بو 30 دقيقة صار يبيلا ساعتين إبسبة الزحمة .

من الساعة 6 أنا بالشارع وألحين الساعة تسع و يدق التليفون و أنا بالسالمية .

ألو ؟ ها وينج أبي عشا خللي الطباخ يسويلي

أنا : إنت وين قاعد ألحين؟

زوجي العزيز : أنا بالبيت قاعد أطالع مبارات.

أتصل تليفون علي الطباخ و كالعادة ، ماكو و ماكو – السايق برة فما يقدر إييب لغراض

أنا : ترا الطباخ ما عندة لحم مفروم ، يصير أييبلج شي من برة أنا بالسالمية

زوجي: إيييه أبي فلافل من كناري

أنا : هااااااااااا حوليييي ألحين!!!!

زوجي: إيييه مشتهي من كناري

أنا : إنشاء الله

و بدأت رحلة العذاب من السالمية ليه حولي، و مشكلة كناري إن مكانه عسر و لفة الفوق تحت ما توصلة ، وللييييييييييييين يعني لازم أدخل الجابرية عشان أوصله!

المهم وصلت ، قمت و دقيت علي ريلي

زوجي : أووووووله توج توصلين يالله أنا يوعان

أنا: إنشاء الله والله المكان زحمة و ناطرة الريال يطلعلي!

الساعة عشر و لما ألحين قاعدة أهذر بالتليفون ويا بولعيال – وصل العشا – جان أقولة يالله بعابل بالدرب زحمة مو مال أسولف و أسوق ما أركز عدل.

و الله وكيلكم توني طالعه من الفاتق مال كناري وإلا هذيك الحرمة إللي سيارتها شفر موديل قبل الغزو – سودة و طاق عليها مطر و مو غاسلتها !

جان تطلعلي مادري من وييين و أدق هرن و أترك!!

مالي مكان عشان أوخر

يا تدعمني يا أنا أدعم إللي يمي !

لزمت بريك و مدقر سيارتها بوسط سيارتي!

جان أعصب و أقولها وخري!!!

رجعي ورا خل أمشي!!!

و الله تعطيني هذيك النظرة إللي قلت الحين إبتنزل من السيارة و إلا يتكمل دوسة و تخفسلي السيارة!

جان أعيد الحركة مرة ثانية إبييدي رجعي رجعي!!!

( تذكرت وحدة بهاللحظة - إختي و حبيبتي لووير - هاهاهاها - آآآآآآآآآخ وينج - يعني يكون بقلدها بتناجر )

جان إتقرب من سيارتي!!!

أنا إهنيي ذلييت و قام قلبي يرقع!

و يا ويهج إذا مو قد الهوشة لييش رازة ويهج و داقة هرن و إمأشرة بييدج!!!

فجأه قمت أرجف و هذي إتخزني جنها عتوي لي طالعك بليلة مافيها قمرة - وااااااي خزتها نقصتني !!

ما وعيت إلا يوم إرجعت بسيارتها ورا

أنا إهنييي جان أدووووووووووووس خفت ترجع و إترد تكفخ السيارة عليييي

المهم الحين أنا حدي خايفة جان أرفع التليفون علي ريلي و أنا غشيانة ضحك!!!

إلحق !

السالفه كيييت و كيييت

زوجى العزيز علي برادة : دامج مو قد الهوشات لييش رفعتي حسج عالمرا!!

دامج مو قد إنج تفتحين الباب و تنزلين ، لييش داقة هرن و إمتركة حق المرا!!

إنتي مو مال هوشات ، إنتي حدج تضحكيين

إحتفظت بالإجابة لنفسي و قعدت أضحك علي عمري

هاهاهاهاهاهاهاهاهاهاه

صج صج أول مرة أخاف من وحدة إتخز عسا ما أحلم فيها اليوم

أبي أحد ينفخ إب- بطني من الخرعة


Friday, June 09, 2006

نازل إب أي دائرة؟

اجمل رجل في العالم كويتي

الشاب الكويتي احمد زبيدي من الكويت يحصل على لقب اجمل رجل في العالم، وهو ابن 25 عاما ويعمل في مجال عرض الازياء.
إن اعطاءه لقب اجمل رجل في العالم لم يكن صدفة، فهو اختير على يد هيئة مكونة من 55 خبير تجميل خلال منافسة كانت مع اكثر من 30 شخصاً من العالم، ولكن هيئة التحكيم اقرت بان الزبيدي هو الاجمل في العالم. وقد تسلم مبلغاً قدره مليون دولار بعد التتويج كتدعيم لعمله في مجال عرض الازياء.
(نقلا عن موقع بانوراما

alwatan news paper

Tuesday, June 06, 2006

هوشة رقم واحد

أنا : هلا والله بوفلان إشلونك شخبارك؟
بولعيال: والله بخير الحمد الله ، ها شالمسج اللي دازتلي إياها ، إفتتاح مقر الفارس؟
أنا : إييه والله بس حريم و الريال جنتل حدة ، ما عبركم و قال ليديز فيرست.
بولعيال : ترا ماكو روحة إنسي
أنا : ليييييييييييش!!! كل حريم و ماكو ولا ريال والريال رفيجك و مرته من عمر جيرانا بالشاليهات !!
بولعيال : لما أشوف الوضع عنده، ما أبي إتروحون أماكم مسخرة مثل إللي صارت عند ديوان واحد من الربع، خلط حريم و رياييل ، مو من سلكنا و لا أرضاها علي، إنتي ما إتمثلين روحج ألحين ، إنتي إتمثليني أنا ، شيقولون لييه قالوا مرت إفلان قامت إتروح من مقر ليه مقر!!؛؛
أنا : و من قال بروح من مقر ليه مقر ، أولا هذا نازل بمنطقتنا و ثانيا قالوا بس حريم و ثالثا بشوف توجه ، ما يصير أعطيه و أنا مادري إشبسوي! مشاري العنجري ماشي حالة بس الصوت الثاني وين بيروح! ويين المصلحة الوطنية ، بس عشان هذا يصيرلنا و هذاك ولد خالت عم أم أبوي أصوتله! لا ما أعرف جيذيه !!
بولعيال : الحين بتفهميني كل إللي نازلين إتهمهم مصلحة البلد، وإلا اللي قاعدين يصوتون يبون واحد يتكلم عن الإصلاح و الفساد، يا حبيبتي المشكلة إن صاير المجلس برستيج حق البعض والبعض الثاني عشان يخلصون مصالحهم ، أنا أقولج منو الزين و صوتيلة ، و بعدين لازم إتعرفين شغلة، لازم واحد من عندنا يطلع و واحد من الفيحا يطلع و هذا إتفاق .
أنا : شنوووو !! أعطي مقطوع! ليييش و شنو يعني إتقوللي أصوت حق فلان ، لييش أنا مالي رااي !!
بولعيال: يوبا رايج علي العين والراس بس قاعد أعطيج الزبدة ، أنا أدرى منج بهالمواضيع و شفتي من جم أسبوع منو يايلنا الدوانية و شنو قاعد يتكلم عنه ، و جان تبن أييبلج أشرطة شوفي و حكمي علي الريال.

وبعدين تعالي !! خذيتيني بشراع و ميداف ، إنتي مو بتسافرين! و ماراح ترجعين إلا لما إتخلص لنتخابات! يعني علي لويتج هذي و بوفلان إتصل و شوف الوضع و بالتالي ماراح إتصوتين !!
صج حريم ، تبون إتروحون حق بلاغة الشف و إنتي بما إن مافيج بلاغة شف، فإنتي بتروحين عشان تكتبين بالبلوق إنج رحتي !!

أنا : وااااي إشفييك بتثقف ! مايصير الكل راح و أنا مادري شالطبخة!
إنزين إشمعنه الفارس يتروحين ! إشفيهم الباجي ما تبين إتروحين ! حتي المقار الإنتخابية صار فيها ناس راقية ! عشان سكان منطقة و منطقة !
أنا : إيييه شوديني حق الخنة ! و بعدين ما أحب ناس عفا عليهم الدهر ، أبي دماء جديدة .
بولعيال : يتفهميني ألحين إن فجئة بتدورين دماء جديدة .
أنا : واااااااااااي بس بس ماني رايحة هونت !
أنا : ( أدق تليفون علي الصالون ، أبي موعد حق شعري بسويه )
بولعيال : إيييه أحسنلج خلج من الإنتخابات و خرابيطها و ردي علي تزهلقج .
أنا : ( بس بيني و بين نفسي – المشكلة مو فينا ، المشكلة في الرياييل و طريقتهم في إختيار المرشح ، و يبي يفرض إللي قاعد يصير علينا – إنزين أنا مستقلة و أهوا مع مصلحتة و منو راح يوقف وياي – أقوله ثقافة – يقوللي يا عمي يا مصلحة يا بطيخ ، راعي هالدوانية شقول و إحنا وراه كبيرنا ولازم نسمع كلامة ، الشياب ما يبون يعطون فرصه للشباب و الرياييل ما يبون المرا تدخل في هالمعترك من باب الحشجارة و العادات والتقاليد )

و يستمر مسلسل المرأة والإنتخابات

Sunday, June 04, 2006

summer blues!!!

الجو حار و الكويت معتمدة إعتماد كلي علي القهاوي والمطاعم والسينمات ، مليت من هالحياة أبي شي يديد ماصارات
يعني ليه أمتا ديرتنا مافيها إلا مارينا مول إللي قمت أسمع المحلات إسم إسم ، شوكليت بار مع الحر قام إييب حارج ،
و الدوام ماكو شي صخة والكل ما عنده إللا يتبخر الساعة 8 بعد ما يتريق و يقرا الجرايد بالتسع بعدين يرد يشرب قهوة عند واحد من الربع و بعدين يأذن و يروح يصلي و طبعا بعد الصلاة ما تدري وين يروح ، نرجع إنطق الكرت و إنروح إبيوتنا إنتغدي و إنام الظهر و
هم ما خلص النهار ، أقوم أدرس و بعدين أشوف نفسي وين بروح هالحزة ، العالم كلهم لاهين بالإنتخابات
يعني النفر شنو يسوي؟؟؟
أبي إقتراحات صيفية
indoors activeties
غير التلفزيون و غير الفيديو لأن يبيلة خلق و حدي ذايق خلقي بدون سبب وجيه
أنا أدري حنيت ، بس والله مو بيدي ، أنا وحدة وايد يعنيلي الجو الحلو لأني أحب الطلعات و ويا الحر كل شي ماله إزهوة ، لا لبس ولا مكياج ولا حتي شعر ، مادري كل ما أروح السوق ألاقي هدوم ما تصلح حق جونه الجميل المنعش
لا تقولولي سافري لأن شهر 7 ماكو أحد بالقسم إلا أنا
جهزت الصالة حق مباريات كاس العالم
إللي مبرد علي شو إختي العزيزة نونا إللي متحملتني و متحملة تحلطمي
بسميها حماّلة أسية ريما بالصيف
يالله أخليكم علي خير لما موودي يتعدل
ما أحب لما مزاجي ينقلب بدون سبب
إتهقون شنو السبب؟؟؟
no not PMS
إتعرفون لما يصير الواحد بلا موديل و بلا شعور
يقولون نكته حلوة و ما إتضحكه
يسمع واحد صاير فيه شيء و عادي عندة ما يتأثر من الموقف
يعني عندا الشعور متساوي بالفرح والحزن؟؟؟
أمبيه أنا مو جيذيييه
والله الكبر شيين
وأهم شي إن حتي الصورة مو راضي يسويلها أب-لوود
لا حول الله ولا قوة إلا بالله العلي العظيم

Friday, June 02, 2006

message in a bottle


الله سبحانه عليم بعباده، خبير بما تكنه صدورهم، يعلم خائنة الأعين وما تخفي الصدور، جعل الله سبحانه صفاء القلب مسلكا إلى جنته سبحانه.

فمن القلب تنبعث عواطف الرحمة في الكون، ومن القلب تتولد دوافع الإشفاق على الناس بدعوتهم إلى الخير والفلاح والقلوب الصافية تغفر زلات الناس وتصل الأرحام وتدفن الأحقاد والضغائن.

تلك القلوب الطاهرة هي قلوب المؤمنين الصادقين، أما القلوب المريضة فقد قال الله تعالى في هاذ: "في قلوبهم مرض فزادهم الله مرضا".

وتطهير القلوب وصفاؤها من حب الظهور والكبرياء والانتقام ومحاسبتها محاسبة دقيقة ومستمرة يكون بالمداومة على طاعة الله وذكر الله، خاصة تلاوة القرآن التي تجلب الطمأنينة الحقيقية، كذلك خشية الله سبحانه وتعالى القائل: "من خشي الرحمن بالغيب وجاء بقلب منيب".

إن صفاء القلب كإصغاء الأذن فإذا أصغى إلى غير حديث الله لم يبق فيه إصغاء ولا فهم لحديثه،‏ كما إذا مال إلى غير محبة الله لم يبق فيه ميل إلى محبته‏.‏ فإذا نطق القلب بغير ذكره وطاعته لم يبق فيه محل للنطق بذكره كاللسان‏.

إن المسلمين إذا صفت قلوبهم وخلصت نياتهم ونصح بعضهم بعضاً وأحب بعضهم بعضًا زالت بينهم المنافسات والحسد والبغضاء وأصبحوا مجتمعين وأصبحت قلوبهم مجتمعة مؤتلفة لم يكن بينهم حقد ولا فرقة واجتمعت كلمتهم على ما يحبه الله تعالى وهو ما يريده الله منهم في قوله تعالى: "واذكروا نعمة الله عليكم إذ كنتم أعداءً فألف بين قلوبكم فأصبحتم بنعمته إخواناً".

إن إصلاح القلب وتزكية الروح وتصفية الباطن هي الأصل في الدين لأن القلب إذا صلح والباطن إذا طهر والروح إذا تزكى يكون السلوك وفق ما أمر الله تعالى بشأنه، ومن ثم تخضع جوارحه للاستسلام وتنقاد أعضاؤه لامتثال أوامر الله واجتناب نواهيه.

إنه ليس أروع للمرء من أن يعيش سليم القلب خاليا من وساوس الضغينة وثوران الأحقاد باعتماد القلب على الله والتَّوكُّل عليه وحسن الظنِّ به سبحانه وتعالى فإِنَّ المتوكل على الله لا تؤثِّر فيه الأوهام إذا رأى نعمةً تنساق لأحدٍ رضيَ بها وأحسَّ فضل الله فيها وفقرَ عبادهِ إليها، وإذا رأى أذى يلحق أحداً من خلق الله رَثَى له ورجا الله أن يفرج عنه ويغفر ذنبه، وبذلك يكون مستريح النفس من نزعات الحقد بتخليص القلب من الصِّفات المذمومة كالحسد والبغضاء والغلِّ والعداوة والشَّحناء.