Tuesday, April 21, 2009

لأول مرة بالتاريخ دورة المعينين الجدد لديناصورات الوزارة

من زمان ما خذيت دورة تدريبيه بالوزارة ، بسبب عدم ملاءة الدورة لي
مثال بسيط : outlook 2007
و أجهزتنا لما الحين فيها office 2003
و بما إني من الموظفين اللي سنه تعيينهم 1996
يعني حجلت الأولي و التالي
مع دخول السنة الماليه الجديده بالوزارة اسم الله عليهم بدت تظهر الدورات
و الله مسؤولي ما قصر
يا ريما إختاري اللي ايوزلج
أو كي
و الله و أختار : دورة مهارات الإتصال و المفاوضات

صج اني ماخذتها مع بدايت حياتي المهنيه كدورة متكاملة بس قلت مفاوضات هذي يديده علي.
المدة 3 أيام

قدمت طلب الترشيح و سافرت
على أساس أول ما أرجع انشاء الله يومين أداوم و بعدين الدورة تبتدي

و أنا برة و إلا إتييلي مسج من الدوام ( ترا دورتج تمددت من 3 أيام لي أسبوعين و راح تبدي بأول يوم دوام لج من الساعه 8:30 )؛

حلو أو كي عادي علم

ييت الدوام
شربت قهيوتي
و الله و أروح إدارة التدريب

وين الدورة قالوا كاهي
و إلا شنو اسم الدورة؟؟
( دورة المعيننين الجدد )

و الله و إسمي موجود اسم الله عليه مرزوز بورقه الحضور و الغياب

سألت المسئوله ، قالت أنا مالي شغل الترشيح إييلج من إدارتج
المشكله مكاني مهيت الحين
لا مسئول و لا مسئول بالإنابه عشان أكتب مذكرة الغاء الدورة لعدم ملاءمتها
قلت يالله ميخالف غلطتي ما سألت
أدش الدورة و إلا كل واحد هناك سواء بنت أول ريال ما تجاوز السنه بالوزارة
يعنييييييييييييييييييييييييي الزبده
أنا أكبر وحده فيهم
و لما المحاضر يكلمنا يكلمنا على أساس إنا يهال تونا متوظفين
هههههههههههههههههه
هههههههههههههههههه

أنا لا شعوريا إتييلي الضحكه
اشدعوة ما قاللي الدكتور انتي بتضحكي لي
قتله دكتور راح أكلمك ورا المحاضرة ليش
إيييييي ما أبي أفشل روحي و أقوله أنا عكرة من سكان الوزارة القدامي !

و فقرة التامينات الإجتماعيه
الكل يسأل اشلون و جم يستقطعون
و أنا سؤال جم باقيلي على التقاعد
يقوللي مستعيله على شنو؟؟؟؟
أقوله عمري 35 و مشتغله 11 سنه الحين!
يعني حسبلي إياها باقيلي إنشاء الله 5 سنين على التقاعد
هههههههه

الشي الحلو بالموضوع
إني أقوم الصبح الحين و عندي شعور اني توني يديده
و أنا باقيلي 5 سنين إنشاء الله و أشلع من هالتخلف اللي إحنا في