Thursday, November 09, 2006

talking out !



وايد إتييلي لحظات أتعسر فيها بدون سبب و ما أحب أجابل أحد و أتصدد وودي أقعد بروحي و تلاقون تليفوني مسكر ، المشكله يكون الزعل بدون سبب ، فجئه متلخبطه نومتي ألاقي نفسي ما أدري شلون .

أحس إن عليي حمل إني أخش هالمشاعر، لأن مالهم ذنب إللي عايشين وياي إنهم يتحملون شي ماله سبب واضح.

بنفس الوقت كل هالضغط يزيد همي هم ، إذا كنت متضايقه أحب أجابل الكمبيوتر ، ألهي نفسي ، أطرش عيالي بيت أهلي ، لييين إتيي موعد النومه ، أطرش السايق إييبهم و علي طول ينامون.

أدري بايخه الحركة ، بس من صجي ما أقدر أتحمل شي والود ودي أجابل النت و أقرا و أقرا لين يروح كل إللي فيني ، أو بالأحري لما تصير الساعه وحدة باليل و آخذلي بنادول نايت و غصب أخدر نفسي عشان أنام.

كل هالأشياء محد يدري فيها ، لأني أحط كل طاقتي إن محد يحس باللي فيني ، لما أزعل أحب أن محد يشيل همي إلا نفسي ، أحس بقوه إذا بجيت بروحي ، أو إني فكرت بروحي بطريقه تسعدني للتخلص من هالشعور.

في يوم من الأيام كنت قاعدة ويا دكتورة صاحبتي، و قلت لها ليش فجئه الواحد تكون حياته مستقرة و عنده الحمد الله كل شي بس في ساعات قليله يحس إن الدنيا ظيجه بعينه ؟

و بعد 600 سؤال إسألتني إياه إطلعت بالنتيجه:

تقوللي الدكتورة ، هذا يعتمد علي شخصيتج ، إنتي إنسانه مستقله و إجتماعيه و طول عمرج يهمج إن الناس تكون سعيدة ، بس ناسيه عمرج و إنتي شنو تبين بهالدنيا ، ضحيتي و قعدتي بالبيت و هدمتي مستقبلج بسبب عيالج و مدارات صحتهم، إنتي من النوع إللي الطموح عنج عالي بس محد راضي يسمعج و يتبني أفكارج ، بسبب إن البيت كلهم معتمدين عليج بالتفكير و التدبير فلهيتي بأمور الحياة و نسيتي تبنين مستقبلج ، تعتبرين الزواج و اليهال أداء واجب و إن هذا مو حد طموحج ، و الصراع إللي فيج كإنسانه تبي تصير شي بالمجتمع و بين بيتج و عيالج إللي ما تقدرين إنج إتخلين عن مسؤوليتج إتجاهم.

إستوقفتي جمله من كلامها ، يعني صج ليش إحنا كأمهات مطالبين إن إتحمل مسؤوليه لعيال و البيت و اليهال والزوج و الخدام و الكهربجي و الطباخ كامله مكمله.

في بالي عدة مشاريع و زوجي دايما يقوللي لفلوس مو مشكله بس إشلج بعوار هالراس ، شوفيني أنا لاني قادر أسافر ويا الناس و أداوم حتي أيام الجمع لأن القطاع الخاص مسؤوليه كبيرة و ما أتوقع إن عندج الوقت إنج بتجابلين بيت و زوج و تفتحين لج بيزنس ، نطري إشوي لما عيالج يكبرون و أنا مستعد أدعمج و مو لازم يكون فيه ربح ، خليه تسليه.

طبعا أمشي وياه و إن كلامه صح ، بس بداخل نفسي مو مقتنعه ولا 1 % من إللي يقوله ، بس ما أقدر أعاسر لأن صج عندي عيال و يبيلهم مجابل و تدريس و هذي بحد ذاتها مسؤوليه.

وايد أفتح عيني الصبح أحس إني مو الشخص المناسب في المكان المناسب.

ساعات أقول يا ليتني ريال عشان أكرف وأحقق بعض من هالطموح إللي أحسه ذابحني بداخلي .

أحتاج للتغيير و بديت الخطوة الأولي ، بس هم مو برضي من زوجي العزيز و هو تعلم لغه جديدة ، أول شي لقيته يقوللي إنتي مو فاضيه لهالدرجة إنج تبين إتعلمين لغه ووراج مسؤوليات و بيت و تدريس و خدام .

إستوقفته للحظة

و متي كان التعليم و الثقافه لملىء الفراغ؟

و لو بطالع نفسي راح أكون طول عمري مشغوله ترا ، ترا باجر مسؤولياتي تكبر و يا الأحفاد و مشاكل عيالي . و إشبسوي أنا ليه صار عمري 60 و أدرس لغه؟ شستفدت أنا أستخدمها 5 سنين و أموت؟

أحب إنك تحترم هالقرار لأني راح أسوي شي يسعدني من داخلي و يوسع مداركي باجر .

و أعتقد إني وصلت لسن أقدر أقرر إذا هالشي راح ينقص من واجباتي أو لأ و إشفيها إذا نقص بهالشهرين يعني مو نهاية العالم ، ما راح أدرس العمر كله ، كلها فترة مؤقته و أرجو إنك تساعدني و تشجعني ، مو أحسنلي من مجابل شي مو مفيد؟

و ترا باجر ليه بغيت كلمه تستخدمها بالبنك بتنيحس عليك و أخليهم ينصبون عليك .

( طبعا كل هذا كان علي طريقة ضحك عشان أسوي إللي براسي )

في أشياء فعلا يسويها الإنسان لإسعاد نفسه و في فترة مؤقته ، عشان بالنهايه يسعد غيره

و طبعا سويت إللي براسي و سجلت بالكورس ، و تفاهمنا علي الوقت و علي الفترة ووافق عليها ، و قاللي خلنا إنشوف شآخرتها وياج .


My wish list :

  1. to open a boutique of clothes ( less than 60 KD for each piece and they look like MARNI look ! ).
  2. continue with my piano courses that I stopped because of the sound
  3. to have an e-news paper with all the ( good thinking ) articles to fix the mentality of a Kuwaiti ( ----- ) head !
  4. to live in the moon so no one can blame me for anything !


A goal without a plan is just a wish.

إنتهت فضفضتي ......

30 comments:

EsTeKaNa said...

مرة قريت بيت شعر وعجبني:
ما للخطا في بعض الأحيان تفسير
!!أحيان نزعل ناس نشري رضاهم
.
.
مو بس أخطائنا،مشاعرنا،احساسنا،وحتى انقلابات مزاجنا المفاجئه مالها دايما اسباب مقنعه ومحدده
وجود ناس حولج في لحظات العساره وخاصه اذا ناس يحبونج راح يفرض عليج اعطاء تقرير مفصل عن اسبابج المقنعه للعساره
واذا امتنعو عن هذا السؤال تقديرا لمشاعرج ..ايضا راح تحسين بتأنيب الضمير لانج ضيقتي خلقهم عليج
!!
ضغطج على نفسج راح يتعبج ريما
نفسي عن روحج..دام القلوب اللي معاج تحبج اهم الزم انهم يحضنون بوحج وتعبيرج عن نفسج صدقيني
تأملي بحياتج مرة ومرتين وثلاث،استمتعي بانجازج كونج ام لاطفال مميزين وزوجه رجل طيب،وصديقه بنات طيبات
احم احم
:pP~
انا اشجعج وفخورة بخطوتج حق تعلم اللغه،وراجعي نفسج أكثر وأكثر بتشوفين في قصور في جوانب وايد للحين ما تعلمناها وانطلقي ،كل انجاز راح يحسسج بنشوة سعاده مو طبيعيه
مممممم
نكمل قرقه بعدين
:)

Wafa said...

قبل الوظيفة كانت طلباتي كثيرة نبي نطلع نبي نتمشى ودي أروح وأطلع وزوجي طبعاً يكون ماله خلق طلعات بوسط الأسبوع لأنه يكون مشغول وتعبان وكنت أغلب الوقت متضايقة ونفسيتي سيئة

لكن والله التغيير وشغل الوقت يغير حتى النفسية

love nature said...

Hiii...I love to work its better than spending the time in other stuff ...but u have to be organized and choose the right time so kidz wont be left out ...a7la shay ur goal lool ;)

ANGEL^HEART said...

ماقدر الومج كلش شعور طبيعي وحلو عشان مانمل حياتنا ونكرها

بس بذكرج انه انتي انجزتي بحياتج فكري انج انجزتي بوقت الي في وايد ناس راح عمرهم واهم ماقدر يسون شي صدقيني بتحسين براحه

انا بعد عندي جم مشروع ودي اسويهم واشترك وياج بفكره البوتيك بس حدي محتاره شلون والي موقفني احس هالشغله يبيلها تفرغ وسفر دايم ولاشرايج؟؟

بوست حلو رغم اني حسيت فيه شويه حزن وهم واتمنى احساسي مو بمحله
الله يوفقج وان شاءالله تحققين كل اللي تبين :)

Reflections said...

Hmm..
Ekhtee Reema.. i know how u feel o Wayed e7oshny halSho3oor.. 7ata law akon eb Qemmat Za7mat el7ayat, eyeeny Sho3oor enny aby asawe Shay a7eba! Something i Enjoy doing it,.. Tara 3omer elBet wel3yal ma Yogfon eb Wayh el6omoo7 or stops u from doing something u like,, it just depends on the Person him/herself, Manage the time, and Go ahead..

o ahanneeCh 3ala Qararech .. As long as u see it right!

Good luck, bs 3ad whats the language Nawreena ? :)

me said...

one of the biggest mistakes in the arab world mainly is that its an assuption and a fact of life that the house,kids, o 3ala gooltich 7ita el kahrabchi mas2oliyat el mara...wil rayal bs ekid!!!! wil dinya tamshi wil mara ma waraha ela hal ashya2e...6ayeb what about her,,,her own thing,,,malha rab???
she should have her life 2 with the other stuff

but

if u dont fight 4 ur rights no one will offer it and give it 2 u..so el 3'ala6 min el 7areem..
gd luck :)

ReLaaaX said...

قولي آمين


عسى الله ييسر لج أمورج .. ويعيينج بتحقيق أهدافج



أما عاد to live in the moon so no one can blame me for anything !



تمنيتها قبلج ، وليلحين ناطرة صاروخي يخلص عشان اروح ، لأن FuLL OPSTioNs ;p

lawyer said...

لي متى احنا نعيش عشان نسعد الناس

تعبنا وايد تعبنا

لي متى اطالع عيون الي حواليني و اشوفهم سعيدين او راضين


صج صج ريما شوفي

انا اعتقد ان الكورس
هذاتقدرين اتنسقين فيه بين بيتج و اعيالج

لكن مو شرط اتنسقين الكورس ويااااا عروس الناس
و استقبالات
ووالده
و طلعه مني و مناك

يا ربي ثلاث ارباع الكويتيات يلهون نفسهم في المواجيب لانهم فاضين

انتي مو فاضيه
طااااااااااف
كل شي

اهم شي الله بيسألج عن عيالج
و اعيالج اناشاء الله مو مقصره في حقهم

nice said...

حققي الي تبينه وان كان ضئيل الحين
على الاقل ترضين فيه نفسج سنيورا

Kuwaiti said...

ريما انا ويااج في
E-News

Kuwaiti said...

شوفي ريما
اغلب الناس لهم اهداف وطموح يبون يوصلون لها او اشياء يبون يسونها بحايتهم بس يعيشون ويرحلون عن الدنيا وهم لم يحققو اي شي

انا مثلا احب الشغل بس عندي اشياء غير ودي اعملها ودي اعيش بعيد عن المدنية ودي انه يصير عندي مزرعه وعندي ماعز وجمال واقعد اعيش الحيات الفطريه البحته
اللي تكون النومه بعد صلات العشاء
والله راح تكون الحياة حلوه بس انشاء الله راح احقق هذا الشي

حلم غرييب صح :)

7osen said...

ليش تخشين شعورج

متضايقه ،، خلي الناس اللى حواليج كلها تدري انج متضايقه

عيشي اللحظه بصدق

******
وعلى فكره ترى تربيه الاولاد والاهتمام فيهم ومداراتهم والاهتمام بالبيت وبالزوج وبالعائله هذااا شيء عظيم
وعمل ما يقل اهميه عن اكبر نجاح على مستوى العمل والاعمال

الام مدرسه اذا اعددتها اعددت شعب طيب الاعراق

تأكدي انج اذا كرستي حياتج حق عائلتج ونجحتي انج تخلين حياتهم سعيده هذا اهم من اي نجاح ثاني 0

بالتوفيق

Charisma said...

بخلاصه

ما كل ما يتمناه المرء يدركه تجرى الرياح بما لاتشتهى السفن

بس لا تستسلمين
اى فرصه ترفيه وفضفضه ووناسه
شى يدخل السرور الى نفسج
ريمه قو اهاااااد لا تترددين فى انج اتسوينه
ادااااااااااد لنا اداد

mishari said...

مع انج ما تمرين بس انا احسن منج
سمعينى عدل مدل
اول شى وظيفة المرأة فعلا هي اعدا وتربية
بس ؟؟؟
مو معانته مايكون عندها طموح لانها بشر واى انسان يطمح ان يحقق ذاته
وهالشى مو سهل ومو موجود عند كل واحد شوفى يمكن اقدر انصحج انج تاخذين اجازة لمدة سنة من غير راتب وجربى تشتغلين فى مكان خاص فى هالسنة وراح تعرفين الفرق
الشغلة الثانية
كلام زوجج صح ريما هم بس مرة ثانية
لو نظمتى وقتج بالشكل الصحيح راح الوضع غير بمعنى ان مثلا سااعات الكمبيوتر تقل وتستغلينها فى مشروع معين ومو بالضرورة محل او شى
يمكن يكون هواية عندج
رسم
خياطة
اى كان
بس شرط يكون فيها مردود مادى لان واقع الانسان ما يستمتع بالهواية عدل الا اذا كان فيها مردود ولما يكون المردود مادى يكون الذ خصوصا معاج انتى لانج تموتين على الفلوس :p

C U
:D

PearL said...

هالحالة قاعدة امر فيها الحين
صايرة حشاج ( زفت) مع الكل

والكل ملاحظ ان صايرة نفسية واخلاقي مش ولا بد

و هالحالة وايد تمر فيني
مادري ليش
:(

snowflake said...

أنا هالحاله تمر علي وااااايد
و كل ما أجرب شي يديد تخف (هوايه يديده مثلا) و بعدين ترد مرة ثانية

المشكله إنج تحسين إن الحاله يتلج بدون سبب بينما سببها يكون تراكم من مجموعة أسباب صغيره
و المشكله لما تبين تتكلمين مع أحد لمجرد الفضفضه تبين أحد يسمعج و بس.. يبدي عااد يعطيج حلول من طقت
لا تفكرين.. لا تحطين في بالج
...
يربي من قال أبي حل؟؟؟


زين سويتي على الأقل منتي خسرانه شي
و تقدرين توفقين بين بيتج و أي شي ثاني خاص فيج.. قدها و قدود :)

Anonymous said...

Hi Reema, ana ma3aach ina ilmalal mawjood o yethba7 ba3ad, bs agoolich shai jez'a ekbeer min ilmalal e7na elsibab feeh.ilkasal o ilkhoof min shai yedeed .bs e7na dayman enta3athar bebait wel yahal bs wagt il9ijiya entaradad.ilyahal esmilah 3alaihm belmadaaris lain ilsa3a 2.30 o ma yoo9lon ilbait ela bilthalaath o yanamoon bilthiman ya3ny ma3a ilhomeworks ma ag3ad ma3aahom ila a couple of hours. ya3ny ma3a tantheem ilwagt you will have plenty of time to work or do somthing new without effecting your responsibilities towards the kids and the house.bs yabeelich tashjee3 ely mmo3tham ilbanaat ye7a9loona min tashjee3 refejaat'hm mo reyayeelhm ely bs ye7ab6oon,so why not do somthing bs ma3a wa7da min rab3ich 3ashan etshaj3on ba3ath.o bilnisba lilqamta ....kilma wa7da....harmonaat. lol

Smile said...

شكرا .. هذه اللي انا مرات احس فيه .. تسجيل في جمعيه خيريه .. واول عمل لي كان في رمضان

الله يسعدج ويوفقج ان شاء الله

بالديسار said...

سيدتي
بصفتي رجل غير تقليدي أقصد لي دور كبير في البيت
أعتقد أن يمكنك عمل كل شيئ بوجود شوية تعاون من نصفك الآخر. أما عن مقدار السعادة الشخصية عندما يحس الإنسان أنه يحقق شيئاً فهو لا يقدر بثمن

ودمتي بخير

The Simper said...

i always liked the way u think.. what ur saying is stuff that u can find it in so many homes and families.. but u write it and script it in a nice and readable and very arranged way :)

kalamich kila 3adil.. and ur thinking with ur mind more than ur heart.. and doing what is good for ur kids.. and inshala inshala u will see it with SUPER RETURNS o good "fawa2id" inshala from ur kids..

what u see right now as wasting time and not following ur dreams.. is a great job.. and i call it investment.. and with each right investment.. there is excellent returns..

and as i said few lines above.. wish u the best of returns :) social ones ;);) not monetary.. :P

for the monetary u work with them on ur self :D:D:D

Q's
1. piano? what other instrument would u learn if there are no pianos? (don't say keyboards!)

2. what language.. and what is after that one ;)?

3. el boutiqe.. mafeeh shay for men? ;) ya3ni mashtiri mina??? :P

4. 3ad moon alah ehadach ;)?


:D

snowflake said...

ياااااااا بعد عمري والله توني أشوف ال
links

حبيبتي والله
THANK YOU SOOOOOO VERYYY MUCH:*

NewMe said...

جوفي في وقت من الاوقات
كانت حياتي تدور حول اسعاد كل من هم حولي
وياما كنت اجي على نفسي عشانهم
وما وعييت على روحي الا وانا نص
الاشياء اللي اتمناها وابيها ما حققتها
يوم استوعبت وين صرت قلت الحق نفسي
في البداية كنت ما الاقي وقت لان روتيني
عودني اني مشغولة بفلان وعلان
ويم قررت شوي شوي تبدل روتيني
وصار عندي وقت وطويل بعد حقي بروحي
اسوي فيه كل اللي ابيه
نظمي وقتج وزوجج حتى لو مشغول لازم يحط ايده معاج
واليهال بعد نظمي وقتهم وخل ينامون من وقت
بتلاقين الوقت وفجأة ٢٤ ساعة بتكفيج بزياده
السالفة يبيلها تنظيم واعاده تأقلم مع النظام اليديد
اتمنى لج كل التوفيق في اللغة اللي تدرسينها
وكل شي تتمنين تحقيقه
بس ما قلتي شتدرسين؟
دومي بحب
تحياتي

Mamloo7a Q8ia said...

حبيبتي ريما المشكله ان احنا نحب الكل اكثر من انفسنا وهذا طبع صعب ان احنا نقدر نغيره وهذا اللي يخلينا نتنازل عن كل احلامنا للغير
بس انا اقول لج اذا حصلت لج فرصه تقدرين تحققين فيها جزء من احلامج لاتترددين في اغتنامها والاستفاده منها
الله يسمح بالج ويحقق لج كل ما تتمنينه
ويخلي لج زوجج وعيالج وتشوفينهم في احسن حال وهذا انجاز ما بعده انجاز

myth said...

Simple wish list, you can do it.

PS: i'll blame you even if you're on the moon :P

الحجيه said...

السلام عليكم جميعا

حبتج العافية وابعد عنج الضيجه وربي أنشا لله يطمن بالج وإحنا بعد نحبج ونقدر مشاعرج يالريم الحياة دائما أشبها بالبحر مد وجزر وكل واحد يعمل فيها حسب قناعته بس ودي أقول أن أفضل استثمار بهذه الدنيا أولادنا مهما أهملنا أنفسنا لرفعتهم أنشاء لله ما راح يضيع أنا معاج ميه بالميه شعور نسيان النفس أو إهمال طموحها شعور مُزعج وكريه بس ألحظه ألي نذكر أن الإهمال من أجل أبنائنا نحس براحة ضمير عجيبة أن الحمد لله ما قصرنا معاهم التقصير بنفسي أفضل من أن اقصر مع أولادي وزوجي ؛ وكوني متأكدة أخت ريم أن تعبج ما راح يضيع و أنشاء لله العيال بيذكرون هالشيء وبيكونون لج سند وعون باكر و أنشاء لله ربي يطرح فيهم الخير والبركة ويجعلهم من الصالحين الأتقياء الأقوياء بالله عندها بأذن الله بتكونين مرتاحة ومطمئنه جدا وبالأخير ودي أقول شيء يخليج ترتاحين بأذن الله الأولين أهلنا شقولون اعمل يا راعي العمل كل عامل يلقى ما عمل و أنشاء لله ما سويت إلا الخير كله

3eShTaw said...

u know whats funny. ana oo refejtee kena 6al3een el arbe3a yemee3 oo getlaha bel 7arf el wa7ed " astaghfar allah bas elmafrooth allah kan yakhlegne rayal " LOL. et`thakrenee eb nafse ya reema. zain sawetay khathetay el course. taghyeer. meshkela etha kan 3endech 6omoo7 oo malegatay tashjee3. kha99a men shareek 7ayatech. marrat eykoon ma3ahom 7ag bas ham marrat wed`ha el wa7da enazojha ey3azez 6omo7at`ha oo ohwa eli yedfa3ha enha et7aqeq hal 6omo7at. shrayeech ena gelt bashtereek bel GYM chan eygoole men wenlech wagt !!! oo ur kids oo ur home oo blah blah blah... bas shda3wa ya3nee, hal sa33a bel yoom eli bakheth`ha 7ag nafse ehya eli bet3a6el el bait wel kids !!! ana kent meqtar7a 3ala 9adeqte snow flake ena ensawee support groups bel kuwait 3ashan elwa7ed yegdar eyfathfeth eli eb galbah. ashwa 6e7na 3ala hal blogs wella chan menba6een :)
allah eywafgech inshalla oo tefre7een be3yalech.

tweety said...

أولا أنا وحدة ما اتشره عليج , صج استانس لي مريتيني بس حتى لو ما مريتي بمر عليج , بعد اهي مو قانون لازم اتعلقين على كل موضوع يمكن في اشياء ما تهمج , ويمكن ما عندج وقت


ثانيا

وايد أفتح عيني الصبح أحس إني مو الشخص المناسب في المكان المناسب.

صدقيني ان حتى انا المشكلة مو لأن عنج مسئوليات ويهال احنا كمجتمع ما عندنا التشجيع انج اتكونين انتي وتحققين ذاتج علما انج اذا تجاهلتي نفسج ورغباتج ماراح تقدرين تأدين دورج أو مسئولياتج على أكمل وجه
لأنج راح تحسين انج مستنزفة ومتجاهلة لكيانج

سوي اللي تحسين انه يحقق ذاتج
وصدقي انه عيالج بيكونون فخورين فيج وريلج بعد
وانتي نفسج راح تقدرين تعطينهم كل اللي يحتاجونه من كل قلبج

White Wings said...

ما قدرت أعلق على البوست الأخير فعلقت هنا
سيدتي، تحملين نفسك أكثر مما تحتمل، وأصعب شيئ ان يمثل الانسان على نفسه ويلعب دور لا يناسبه
تبدين انسانية فوق عادية، طموحة ولكن مخلصة جداً فتؤنبين نفسك على كل تصرف وكل قرار ويبدو أن أي قرار تأخذينه في صالح نفسك تؤنبين نفسك عليه
رحمة بنفسك الرقيقة، عطيها لتعطيك وكفي عن الضغط هذا، ولا تدعي أسرتك تصبح حملاً ثقيلاً ولكن سنداً وسبب سعادة
كل الود، من زوجة وأم الى زوجة وأم
أفهمك سيدتي

neelaah said...

ريما
احيانا الانانيه
خصوصا للنفس و في المشاعر تكون مفيده

تركي عنج المجاملات
الناس في البدايه ممكن تزعل
بس مع الوقت راح تتفهم

واللي ما يتفهم بالطقاق

اسوأ شعور كنت امر فيه و انتي الحين تمرين فيه اهو شعور
الكيكه
اني اكون كيكه و كل من يبي مني قطعه

الله يعينج
وتجاوزي هالشي ..لاني ادري انج قويه
و راح تتجاوزينه

الحجيه said...

السلام عليكم جميعا
يالريم ما للإنسان غير الله سبحان الله الرحمن الرحيم الكريم الحنان المنان المجيب الغفور اللطيف

ما من مسلم تصيبه مصيبة فيقول كما أمره الله أنا لله وأنا إليه راجعون ، اللهم أجرني في مصيبتي واخلف لي خيراً منها إلا أخلف الله له خيراً منها

(رواه مسلم632/2)


دعاء الهم والحزن

ما أصاب عبداُ هم ولا حزن فقال ( قولي يالريم) : اللهم إني(أمتك) عبدك (أبنت) ابن عبدك ابن (أبنت) أمتك ناصيتي بيدك ماضِ في حكمك ، عدل في قضاؤك أسالك بكل اسم هو لك سميت به نفسك أو أنزلته في كتابك ، أو علمته أحداً من خلقك أو استأثرت به في علم الغيب عندك أن تجعل القرآن ربيع قلبي ، ونور صدري وجلاء حزني وذهاب همي " . إلا أذهب الله حزنه وهمه وأبدله مكانه

فرحاً
رواه أحمد وصححهالألباني.لكلم الطيب ص74

اللهم إني أعوذ بك من الهم والخزن ، والعجز والكسل والبخل والجبن ، وضلع الدين وغلبة الرجال ". كان رسول الله صلى الله عليه وسلم يكثر من هذا الدعاء
وإنشاء الله ربي بعينج ويطمن بالج