Saturday, January 26, 2008

أقدر أقول الحين الحمدالله على البلاغ عيالي الشباب كبروا

كنا كلنا متيمعين قبال التلفزيون و كان البرنامج على محطة الوطن ، مادري شنو البرنامج و أقصد إسمه بس كانوا بنتين حلوين قاعدين بمطعم ماكي و قاعدين يتكلمون عن السوشي



حلو؟

واحد من الشباب ( 3 سنين ) قرب يم التلفزيون و يكلم أخوه ( 5 سنين )

شعرها وايد حلو

الأخو: إييي شعرها وايد حلو تبي نفسه؟

لصغير: إشلون آخذه أحط إيدي بالتلفزيون و آخذه؟

الأخو الكبير: لأ ما يصير بس روح حبه ( هذا الصايع ولدي )

الصغير: إنزين بس الكهربا ما تسويلي شي؟؟

ألخو الكبير: لأ هذا مو بلاك هذا بس تلفزيون ما يسوي شي ، شووف شووف ( قاعد يلمس الشاشه بيده عشان أخوه لصغير يصدقه! )

الصغير : يروح يركض يحب المذيعه!

الأخو الكبير: شفت ما قتلك ما يكهرب



طبعا أنا إهني طقتني البوهه! من صجهم هذيييييييييييييييييييل!!! هاهاهاهاهاها وااااااااااااي شقبر بعمري !

تو الناس على المراهقه !!!! لي راهقوا شسوي فيهم!!!

قمنا نتطالع أنا و أبوهم و عيونا إتحجي من طريقه الحوار البريئ إللي صار بينهم



أضحك؟؟ أبجي؟؟ وااي شسوي؟؟؟

طبعا ما تكلمت ولا كلمه

طالعت أبوهم و قتله ترا الشباب عليك مالي شغل

هاهاهاهاهاها





Wednesday, January 23, 2008

خدمة المواطن والموظف

رحت أجدد جوازي يكون بعتمد على نفسي

لأن زوجي يومه عن ألف

و أتفاجأ إن ممنوع !

لازم الزوج!

و توقيع الزوج

و موافقة الزوج



ويييييه

عيل وين حقوقنا السياسيه إذا جواز ما أقدر أجدده



رجعت بخفي حنين

و دقيت على الزوج



مبروك عليكم

ما نقدر نشك خيط بإبرة إلا فيكم



عيل مندوب يقدر يجدد جوازي و أنا لأ



ليش يعني؟؟

السؤال

إللي متعانده ويا ريلها؟

ما تقدر تهج و تسافر وعليه عليها؟؟؟

هاهاهاهاهاها

بس تصدقون يكن حاطين هالقانون عشان يخففون الهوشات





يجب أنا نطالب بمعاملتنا بالمثل



حرني اليوم هالقانون !



Tuesday, January 22, 2008

I miss you

marbella

ديرة تفتك من لبحة الدوام

لبحة الناس إللي حواليك ومواجيبهم

أكسجين تتنفسه

تمشي حافي مو لابس عادي ماكو مشاكل

تضحك يضحكون وياك و أهما ما يعرفون لغتك

أجابل هالمنظر الحلو و يمي القهوة

التلفون لا رنه و لا ربع مسج

قمه بالهدوء و الإسترخاء

حرية و إنطلاق

---------

لا إتعذر بإحتياجك

كلنا ناقص حنان

كلنا طفل يتمنى

أي شخص يحضنه

نبني الدنيا و حنا

نوقف بنفس المكان

للأسف ينقص وفانا مع مرور الأزمة

إهداء

لاتخاف

Sunday, January 20, 2008

باقي جم شهر و ينتهي جوازي

و بما إني فوق الثلاثين ( صلاحية الجواز بتصير 10 سنين ) قلت أغيره الحين قبل زحمة الصيف و أزهب الفيز .



رحت الأستوديو

إرتزيت بالكرسي

و بدى يصور


قاللي مدام أي نوع فيزا؟؟

قتله أي ديره


و إلا إنصدمت إن ديره من الدير ممنوع تضحك بالصورة حق فيزتهم!

من صجك إنت؟؟

إييي أوامر من السفارة

و الا إييبلي الورقه و إلا صاج الريال

المهم

كل ما إيي بيصور لا شعوريا أضحك!

يقوللي المصور : don’t smile

و يتصلط علي ضحك ما أدري من وين

كل نكته بايخه إتزاوللي و أضحك !؛

المهم خذا اللقطه


الحين ييه دورة فيزة ثانية

أوروبا

مدام : smile little

وااليييييييييييين

مساعه عشان ياخذ الصورة حقي ما بقى موقف مأساؤي ما تذكرته الحين يقوللي إبتسمي؟؟


خلصنا من الفيزا 2

و إنتهت ببتسامة الموناليزا

إللي على ورب


الحين صورة الجواز

الخلفية زرقة و إبتسامة على كيف كيفكم

و رديت أتذكر كل شي حلو مرة ثانيه


عقب ما خلص تصوير

لو سمحت مرة ثانيه صور الجواز أول

و لي تعبت من التصوير و بدى علي التعب

تالي صور حق الفيزا إللي بدون ابتسامه

ليييش بادي بالعكس!؛


حرني نقزني من إبتسمي لي زعلي

هاهاهاهاها





Monday, January 14, 2008

مع البرد قعدة البيت تحلا هالأيام

مع القعده والبلعه الواحد يحط باله على الخدم شوي



اليهال حواليني و بنتي ماسكه اللاب توب من صوب

وولدي على الكمبيوتر الثاني شابك

و أنا معاهم بالنت



فجأه يعنا كلنا



فنزلت حق الطباخ تحت أقوله يسويلنه شي



فجأه و إلا شنو المنظر!!!!!



الطباخ عنده لاب توب!!

أنا ما إستوعبت السالفه!!!

لأ قويه شويه – طباخ ولاب توب!!!! من وين و ليييييييييييييش!!!

جان أقوله: محمد من ماله الكمبيوتر؟؟

الطباخ: مال أنا مادام

ريما: شتسوي في؟؟؟ إتعرف تشغله؟؟

الطباخ:مادام ، أنا أستخدم إنترنت مشان أكلم الهند

ريما: ما إستوعبت اللاب توب عشان أستوعب إن طباخنا يشبك!!!!!

نعم ما أسمع؟؟؟ شنو يعني إتكلم الهند؟؟؟

الطباخ : أنا ولدي موجود بالمسنجر و أنا يسوي كلام وياه و أكو فيديو بعد

ريما : ( فى هاللحظه إستحيت أطلب منه يسويلنا همبرجر و بطاط هههههههههههههههههههههههههه )

إنزين محمد ، سولنا العشا ، محمد من وينلك خط تليفون؟؟

الطباخ: هذا مال إتصالات

ريما: إييييي خير إنشاء الله

رحت فوق مو مستوعبه إللي شفته ، دقيت على زوجي ، بو يوسف!!!!!

طباخنا يشبك إنترنت و يكلم أهله بالمسنجر!!!!

زوجي: قاعدة إتقشمرين صح؟؟؟

ريما: قسما بالله مو قاعدة أتقشمر!!!! شفتا بعيني!!!!

زوجي: إشلون ووين و من وينله!!!

ريما: ما أدري تعال شوفه بنفسك

  • - - -

زوجي: محمد صج عندك لابتوب؟؟

الطباخ: إيي بابا و أكو إنترنت بعد

زوجي: بس إنترنت و إلا شي ثاني؟؟

الطباخ: لا بابا أكو أكتب كل أكل ، هذا مجبوس دجاج ، مرق سبزي ، مكرونات

زوجي: شنو اللابتوب موديله؟؟

الطباخ : عادي مو غالي رخيص بس واجد زين HP

زوجي: من يايبلك إياه؟

الطباخ: هذا ولدي علمني كل شي موجود

زوجي: . . . يالله بروح أنا



_ _ _

زوجي: أم يوسف

ريما: نعم؟

زوجي : أقولج دوريلج على طباخ غيرة من الحين

ريما: ليييييييييييييش؟؟؟ ما يبي يشتغل عندنا؟؟

زوجي : والله الإحتياط واجب ، شكله طموح الريال و مو مال يطبخ حق عيالج همبرجر و بطاط







The end

Sunday, January 13, 2008







مع نسمات الجو البارده

تم إفتتاح خيمتي الموقرة

و بدايه الجلسات الحريمية البحتة و مناقشه ما يدور في أروقه الدوام من تقاييم و قوانين يديده تم تطبيقها دايخه في دوامنا فى الآونه الأخيرة.

وحديث المجتمعات الكويتية البعيدة عن الأجواء الرسمية من فلانة نخطبت و التفيتيحات و الموضه فى الربيع .



صارت الساعه 9 و إلا وحده تصرخ

غيرواااا التلفزيوووون يالله البرنامج بدا لا يطوفنا شي



تقريبا كنا 7 بنات ، ولا وحده فينا سمعت عن هالبرنامج



شيطلع البرنامج؟؟

تراه له هدف يعني مو عبط حاطينه



الهدف:

تخريج مواهب جديده فى فن الرقص الشرقي من خلال منافسات من مختلف الدول منها – مصر وسوريا ولبنان والمغرب والبرازيل وروسيا و أوكرانيا وكوستاريكا وفرنسا .



لجنة التحكيم :

نجوى فؤاد و سيمون أسمر و مدرب الرقص ظاظا ونادرة عساف و إيميليا زيدان

( غير أول أثنين ما أعرف ترا – إللي يبي يبحث عنهم و خصوصا ظاظا هذا ههههههه )



تقليد :

البرنامج هو النسخه العربيه من البرنامج الأمريكي

You think you can dance??



بعد تبون سخافه أزيد من جذي؟؟؟

أقولكم

إنها مبادرة من قناة الـ"LBC" الفضائية اللبنانية لإحياء الرقص الشرقي أو لإحياء عصر الجواري من خلال برنامج إختار القائمون عليه اسم "هزي يا نواعم".

والجائزة الأولي 50 ألف دولار



في سؤال محيرني؟؟؟

ليش البرنامج بادي من نوفمبر 2006 و أنا توني أفطن عليه؟؟

ليش صاير عليه تعتيم ؟؟؟

الحريم وينهم عنه؟؟؟

و ليش المجلس ما تكلم عنه؟؟



أقولكم شي

إنتوا بس دخلوا youtube

كتبوا هزي يا نواعم

و شوفوا الهوايل



ما أقول إلا الحمدالله على نعمة العقل والدين

يا ربي لا تبلينا











Saturday, January 12, 2008

هذيان بالحلم

كان يا مكان في قديم الزمان كان في حاكم يحب ديرته وايد

الشعب يحب بعضه و ماكانت بينهم أي مشاكل لأن مشكله كل واحد كانت تعبر عن حال كل واحد بالمدينه

كبرت الديرة و تعددت المذاهب و بدا الناس يحسدون بعضهم البعض

الغني ما يساعد الفقير

والتاجر إللي صار له سنين بالديرة قام يحارب أي تاجر صغير

إنتقلت الديرة بعد إكتشاف مصدر قوي للدخل من ديرة فقيرة إلي ديرة غنيه

و بدى الطمع وياها

وصارت الديرة مثل روايه على بابا و الأربعين حرامي

المغارة ما تتوزع إلا على فئه قليله

بدينا بالثمين

الوكالات العالميه محتكره على ناس معينين

و مجلي الشوري طلع

بس بالنهايه فى تنميه و صلاح للمجتمع و إستثمارات لليوم الأسود

و صارت الديرة تلقب بدانه الخليج

*

*

الغزوا

تكاتف و روح حلوة

*

*

كان الحوار كل يدور و منصب بهدف واحد

إرجاع الأرض لأصحابها



رجعت الديرة

و رجعت معاها أمور ماكانت بالحسبان

رجعت بتفكك بالروح

إرجعت و المصالح كانت الهدف الأول لكل خطوة بناء

و كأن حب الديرة إنتهى من قلوبهم بأول يوم تحرير



أصبحت الديرة ملاذ الكل لكيفيه الإستفاده من الوضع



التجار الكبار فلوسهم خارج البلد

مافي مصداقيه لبقاءها



أثبتنا للعالم أننا شعب يتففن بالكلام

بدون النيه لتطبيق أي شي ينقال



بالغزو كنت أستمع لرئيس من الرؤساء و هو يلقي خطابه الذي كان يسعدني سماعه من كميه المفردات المستخدمه لرفع الروح المعنويه فقط لا غير

و ما بين جم يوم يصكنا بخاط ثاني أحلا من الأول

إلي أن أستمعت لتصريحات الرئيس الأمريكي جورج بوش

و ختم تصريحه بثلاث كلمات



Wait

See

And learn



و كانت هي الأمل



كان عمري 16 سنه بذاك الوقت

و لكن كانت هالثلاث كلمات لها الأثر الكبير بقلبي



3 كلمات و فعل

خلصني يا بوش



إللي خلاني أكتب هالبوست



تصريحات ربعنا الكويتيين

من صغيرهم لي كبيرهم

كلام بكلام

مفردات عجيبه وغريبه

مصطلحات نسمعها لأول مرة بحياتنا ما تتناسب و مستوي إللي يستمعون

مصطلحات أكاديميه بحته



بالنهايه ياريت في فايده

أصبحنا أحسن ناس نسوي لجان و دراسات

و حتى الدراسات يتم تطبيقها بعد ما يترسها الغبار 10 أمتار

و تصير ما تتناسب ووضع الديرة الحين







إللي حارني تمرير قانون دايخ أشتغلنا لمحاربته من أول يوم أشتغلت بمكاني

و من كثر ما القانون ما يترقع

تم رصد ميزانيه لقانون جديد

و بدائل المشروع

يعني لاحظوا

5 خيارات

هم ما عجبهم

لأن القانون يضر بمصالحهم الخاصه

و تم تمرير التعديل على القانون إللي أصلا أصدر من سنه 1955

من 55 توهم يفسرون الماده الأولي في و يطبقونه سنه 2007



يعني بذمتكم مو شي يحر؟؟؟



وربي لاعت جبدي أبي إجازة طوييييييييييييييييله

و أرجع و إلا المجلس منسوف نسف نووي

أزيدكم من الشعر بيت

إذا في إقتراحات قدموها الحين

لأن ستار أكاديمي راح يبدي الأسبوع الياي

و النواب الللي بالي بالكم راح يهدون كل شي و يجابلونه

و الفساد و طلابه الفساد





*****

و قمت من النوم مخترعه من الحلم إللي توني حلمته

عساه على خير









Tuesday, January 08, 2008







ظاهرة موجوده و بديت الاحظها وايد بدوامي

*

*


سالفة قعدني و أقعدك

*

*

يوم كنا بالثانوية كانت الوالدة مهمتها الشي التقعد من النوم


بس من دشينا الجامعه خلاص

أكو منبه

و حق الدوام نفس الشي


أول سالفه قعدني و أقعدك تستخدمها البنت حق الولد عشان تبين إهتمام شويه في

يعني مو كل هذا التزام


الحين الشي اليديد

بين البنات و لا بنات كبار

*

*

أنواع الدقات

أول دقه حق صلاة الفجر

متخيلين إن في بعضهم متزوجين

و يدقدقون على بعض الساعه 3 و أربع؟؟ ( صلاة الفجر بالصيف تختلف عن الشتا )

*

*

ثاني نوع دقه

حق الدوام

متخيلين وحده مو ملتزمه و الثانيه صاحبتها ملتزمه شو و يدقدقون على بعض يالله ما يمديج و ما يمديج

و ساعات تلاقونهم الأثنين مو ملتزمين

بس شايلين عمرهم



إنزين إللي بوصله

لي متي بدق على البنت ؟؟

الدوام الحين مع قانون التأمينات اليديد يا عشرين سنه خدمه

أو لما المرا يصك عمرها 45 سنه


هل معقوله بقعد عشرين سنه أقعد البنت؟؟؟


ثالث نوع دقه :

حق أذونات التأخير و التأخيرات إللي بو 8:30 الصبح


متخيلين اللبحه من الصبح؟

الواحد يالله ولبه يقوم نفسه


الله يعين كل وحده تقعد و الله يعين إللي ما تقوم و مو ملتزمه


منو مهمته بهالدنيا يقعد؟؟؟


Sunday, January 06, 2008

الجو حلو ماشاء الله

معناته الواحد يقدر يسوي إللي يبي ما عدا السباحه


تذمر الناس زايد

و صايرة ما أتحمله

غلقه

ظيقت خلق

ماكو شي نسويه !


أستغرب منهم ! في أحد بالشتا ما يعرف شسوي

والله لو يروح يطلق رويلاته بالواجهه بس الواحد يحس بوساعة الصدر

ألف الحمد الله على كل شي



------


سالفه ضحكتني


رايحه ويا الأهل ( زوجي ) محل إلكترونيات

و أنا أتمشي و إلا يرن الموبايل

و إلا باشو صبيناّ

ماما هذا أرامكس يجي ، يجيب صندوق


أنا عارفه شنو إللي واصل ، عدسه حق كاميرتي

جان أستانس و بطلت حلجي و ما سكرته

هذي جذي و بصور جذاك

والعدسه فيها عزل مو طبيعي و دشيت بتفاصيل مالها أول ولا تالي


فجأه أشوف ويه زوجي و هو مبتسم

يقوللي :

أم يوسف؟

ملاحظ شغله فيج

إنتي وااايد بعيده عن هموم المواطن الكويتي

أنا: ليييش إشفيه المواطن الكويتي مافي إلا العافية

زوجي: إنتي تروحين الجمعية؟؟

أنا: لأ ليش؟ نفس اللسته من سنين ما تغيرت

زوجي: تدرين جم وصل سعر كرتون البيض؟ تدرين إن الحليب إرتفع سعره؟ ووايد أشياء بعد زادت بالمقابل؟؟؟

أنا : هههههههههههههههههههه لأ والله ما أدري

بس بذمتك مو جذي أحسن؟؟؟ لا أقرا جرايد و لا أشوف تلفزيون و حتي البلوقات إللي تتكلم عن السياسه و الدين هونت عنهم

صدقني جرب طريقتي و راح تشوف ديرتك أحلا ديرة ينعاش فيها


*

*

*

فوق البيعه:

لو الله يفكنا من حسد إكباريه الديرة جان ديرتنا سالمه

بس إللي عنده فلوس ما يبي غيرة يكون عنده فلوس

لا قانون سنع

ولا ناس عندها ضمير

ولا حب لتراب هالأرض


فحمدت ربي إني على قولت القايل


بعيد و سعيد




Friday, January 04, 2008

Tuesday, January 01, 2008

And Every One Remove His Mask


at the end of the party
evey one wish to each oher a happy new year

from here :

I wish you the best on the year 2008