Thursday, September 28, 2006

رمضان حلو بصلة الرحم




من خلال زياراتي لأهلي و أصحابي خلال الشهر الفضيل لاحظت خصلة الله يهداهم بايخة ، وصرت مع الوقت صج ما أتحمل هالنوع من الكلام.

التشره الزايد عن اللزوم.

نسينه أشباهج، ما قمنا إنشوفج ، محد ياي عيال إلا إنتي ، و أدري أكيد من محبتهم الزايدة لي و إلا لو ما أهمهم ما تشرهوا ، بس عاد يقولك من تشره تكره.

يعني إحنا مو مثل أول أعترف ، ما إنشوف بعض إلا بعرس و إلا عزا أو وحدة والده.

إنزين أنا من الجيل لصغير فمعناها ما أقدر أعزمهم و أسوي يمعات و أنا في بيت حمولة، فيبقي الدور علي لكبار ، أهما إللي لازم إيمعونا علي الأقل مرة بالشهر و بالويييك إند عشان يراعون إن ورانا يهال و دراسة . أنا مو قاعدة أتكلم عن أهلنا لقراب ، أتكلم عن عيال عمي و عيالهم و خصوصا إني يايه من عايلة كبيييرة وااااااااااااايد و الله أمس شفت ولد عمي الكبير ما عرفته، لو أشوفه بالشارع راح أعرفه من زوجته ، لأني أصادفها بموجب.

صلة الرحم حلوة ولازم الواحد يحرص عليها، بس صج المشكلة فينا و الكلافة الزايدة و طريقة الإستقبالات و التزهلق الزايد عن اللزوم.

إشفيها ليه سيرنا بجينز وبلوزة ؟

وكل واحد إييب طبق و إنتيمع يوم خميس من أول كل شهر؟

بنتي لما تكبر ما راح إتعرف عيال عمي و عيالهم مع إنهم يمكن يتصادفونها بأي مكان.

تذكرت مرة يوم كنت بالجامعة ، دخل علي زميلي بالكلاس و كان وياه رفيجة ، جان يقوللي :

ريما ؟ تدرين منو إللي وياي؟

قتله لا والله منو؟

جان يقوللي معاج فلان لفلاني ولد عمج

أنا: هاااو إشلون ولد عمي بس مو نفس إسمي؟

جان يقوللي القصة إن يدتي كانت ماخذه ولد عمها قبل لا تاخذ يدي ، و يابت ولد واحد وتوفي زوجها و خذت يدي تالي! فا أبوه أخو أبوي من الأم !

فأهوا ولد عمي بس مو نفس إسمي !

تخيلوا كنت بالجامعة و أكتشف هالمعلومة ومن واحد غريب!

يعني صج مو شي يحر؟ مو لازم إنعرف بعضنا بعض؟ حريم و رياييل وليش صار برمضان إنتيمع و لي صار العيد كل واحد خذا إعياله و قب من الديرة و عذرة الزحمة.

Tuesday, September 26, 2006

ذكريات حب قديم

قاعدة أسمع مارينا أف أم و قاعدين يتكلمون عن الحب الصعب ، يالله صباح خير ، مالي خلق أفكر بهالموضوع.

بس صج طري علي بالي كتابة عن شي ما أدري إذا صادفكم بحياتكم.

القصة الحين: ( حلم ها مو صج - مجرد قصة )

أحب واحد و أموت عليه و عطيته كل ما أقدر أعطيه من حب و حنان و إهتمام ، حبيييته صج و أهوا حبني علي قولته و كنت أشوف تصرفاته صج إتبين إن يحبني و في بعض الأحيان أحس إن يمشي معاي بس إذا إحصلتله فرصة لعب يقوم فيها فكان أول من يبادر فيها.


مشكلتي وياه إني أحبه ، بس ما أقدر أستمر وياه، والمشكلة الثانية إني أدري إنه يحبني و دايما يحاول إن إللي بينا ما يروح، بأسلوب حربي ، الكر والفر.

يرووووح يهف ما أدري عنه و فجئة أسمع قصة ما أدري من ويين إتبينلي الأسباب كلها و سبب إنه راح وكانت الأخبار إتييلي بالصدفة.

ما أدري هل يبي يشوف إشكثر غالي عندي؟

مو قاعدة أقولك إني أحبك و أموت عليك إشمالله هالتغلي !

تصرفاتي إتبين ، بعيوني ، بصوتي ، بضحكتي لما أسمع صوتك ، الوقت إللي قاعدة وياك و أسمعلك .

المصيبة فيني إني أمل و مافيني صبر علي الدوخة و عوار الراس يعني مو مالت حب ، وعندي أنسحب بهدوء لا أكرهه بعدين بسبب مواقف تصيل بينا و أخلي حبه بيني و بين نفسي و أستمتع فيه و أتحلي علي هالحب إللي بداخلي و أعيد الذكريات الحلوة بس بروحي .

لأن دايما عندي صعب إني أعامل إنسان أحبه و أحس إن أهوا مو عارف شنو يبي، يوم يحب و يوم يخاف إن يحبني ويوم ما يبيني بحياته و يوم أنا كنت كل حياته.

أسمع أخبارة من ناس و أفرح وايد ليه شفته ناجح بشغله و أشوفه و أتحلي عليه من بعيد ليه بعيد .

أحبه بس ما أقدر أستمر وياه ، تقوللي صديقتي إنتي ما إتحبينه و إللي يحب يصبر ، كنت أتحاوش وياها ، فهمي أحبه و أموت عليه ، بس كرامتي ما تسمحلي إني أستمر .

هدينا بعض ، لا تواصل ولا مكالمات و تعرفت علي ناس .

مر الوقت و مرة ثانية كنت شي حلو بحيات أحد ، ضحكتي غير و سوالفي مو نفس باجي البنات ، صرت شي حلو بحياته ، بدينا نتقرب ، ما أقدر يمر يوم ما أسمع صوته، ملى حياتي .

ساعات أقعد بيني و بين نفسي، هذا أنا ما تغيرت، سوالفي و روحي ما تغيرت

ليييش قلبي ما فيه إلا واحد. لييش عايشه علي ذكري أيام راحت

سؤال؟

أنا ما تغيرت ، أسلوبي و كلامي نفسه

ليييش أكون عند الشخص إللي أحبه عادية

و أكون عند أحد ثاني واااااااااااااااااااااااااااااااااااااااااااااااو وايد وااااااااااااااااااااااااو

بس قلبي مو معاه

مو شي غريب؟

Monday, September 25, 2006

no more breakfast


يا حلو رمضان يوم الجمعة

ليييييش؟ سمعوا هالقصة

أنا من النوع إللي أقدس النومة ، ولازم بالعطل أفخ أنام ليييييه الساعة وحدة الظهر.

أيام لعزوبية:

كنت أتفنن بالسهر ، أقرا و أشوف أفلام و أسنع كبتي ألف و 600 مرة

أحووووس بالدار و أرسم و ما يبقي خمجورة ما أطلعها و لا يبقي شريط ما أسويله ميكس .

كان الوالد الله يطول لنا بعمرة يتفنن إن يقعدنا الصبح عشان إنتريق ، بيض مع بصل و طماط، خبر إيراني مسمسم،جبن أبيض مخلوط بدقوس قراش، قيمر و عسل، لبنة و زيتون .

ليييش قاعدة أسرد لكم المنيو؟

لأن كل هذا ما يعادل نومة 4 ساعات زيادة بالفراش، وخصوصا بالشتا، يعني مو مالكم أمل أقوووم عشان آكل!!!!

لييييييييش ماكو شغل! و لييييش لازم أقوم الساعة 8 آكل و أرد أنام! إذا قمت طارت النومة.

و إستلموا تحلطم و بووووز من صباح الله خير و ساعات أواصل عشان ما أتعسر علي أبوي ، وما أقوله إني مواصلة ! عشان أفتك من الحنه علي الريوق.

تزوجت و قلت بفتك من ريوق الجمعة هذا إللي أحسة ماله موديل.

زوجي نفسي ما يتريق ، يفج ريجة بحليب و قهوة ، وتالي إذا ياااع كلا و إذا لأ خلاه ليييه الغدا .

بس من قرادت حظي يوم الجمعة يبي ريوق متأخر الساعة 10

لا حول ولا قوة إلا بالله ، وراي وراي ، وبما إني خبرة صرت بريوق يوم الجمعة فصارت عادة عندي إن أقوم آكل بيض وياهم ويا عيالي وزوجي.

أوميتا ما أكل ريوق الجمعة هذا؟

إذا ريلي من غير شر مسافر

ألللههههههههههههههههه ، وناااااااااااااااااااااااااااااااااسة !!!!

أقووووم بالوحدة علي راحتي !!!! أقولهم إيبولي قهوتي بالفراش !!!

جرايدي نظاف أوون لاين أقراهم ، يعنييييي عز عز عز و أوبهة !

فا برمضان لييييش أحب يوم الجمعة ؟؟؟؟؟؟

لأنه ماكووووووووووووو ريووووووووووووووووووووووووق

فراح أستمتع إني أنام و أقوم علي راحتي

من الحين متزهبتلة و ناوية نية الشر علييه

باعيييييض المخدة إنشاء الله

Sunday, September 24, 2006

دعاء



اَللّهُمَّ قَرِّبْني فيهِ اِلى مَرضاتِكَ ، وَجَنِّبْني فيهِ مِن سَخَطِكَ وَنَقِماتِكَ ، وَ وَفِّقني فيهِ لِقِرائَةِ اياتِِكَ ، بِرَحمَتِكَ يا أرحَمَ الرّاحمينَ .

Saturday, September 23, 2006

مبارك عليكم الشهر




اَللّهُمَّ اجْعَلْ صِيامي فيهِ صِيامَ الصّائِمينَ وَ قِيامي فيِهِ قِيامَ القائِمينَ ، وَ نَبِّهْني فيهِ عَن نَوْمَةِالغافِلينَ ، وَهَبْ لي جُرمي فيهِ يا اِلهَ العالمينَ ، وَاعْفُ عَنّي يا عافِياًعَنِ المُجرِمينَ


Friday, September 22, 2006

blog and the city !



عالم البلوق أول ما بدي إنحصر علي المستخدمين للشبكة و إللي أصلا كان عندهم صفحات ، و كانت يطلق عليها المنتديات، بس شنو مشكلة المنتدي أن ما يضم إلا هالجماعة إللي مشتركين.

ييييه العم قوقل و أنشأ الموقع و خل الجماعة بجربه وحدة ، بطريقه واضحة و تركيز أكثر علي الموضوع. يووووزيير واحد و باسس وووورد واحد.

المستخدمين:

كان شعور حلو إن محد يعرفك و تكتب إللي تبي، خرابيطك ومغامراتك و الدقات إللي إتسويها ، يومياتك و مذكراتك و بعد شي مهم رايك و قراءاتك و أشياء وايد إتحبها.

المعلقين:

أحلا شي بالدنيا في هالعالم، والله العظيم شعور الناس و تفاعلهم وياك يخلي عندك إلتزام إتجاهم.

ساعات تنحرج إن ما عندك وقت لزيارة مدوناتهم، وساعات تنحرج إن إللي كاتبينا صعب إن الواحد يفهمة، سواء شعر أو سياسة أو مواضيع متخصصة.

بس يعني ودك إتعلق عندة لأن تبي إتبين إن هالشخص قريتله و إتعزة.

البلوق:

المفروض المذكرات تكون سر و الشخصية مو معروفة، عشان ما يفقد الموضوع حلاوته، خصوصا إن الإذا عرفنا هالشخص ، راح ننسب الموضوع لذاته، فنقول والله هذا ليبرالي لييش يقول جذيه؟ و إلا هذا دين لييش قال جذاك.

الكويت:

الكويتيين أكثر ناس يحبون بلاغة الشف و يحوسون علي إن يظهرون الشخصية. و هالعالم صغير، فتمت الكشف عن هويات كثيرة.

البلوقيرز خارج النت:

ما عندي فكرة عن الشباب و شنو يدور بينهم لأني ولا مرة ناقشت شخص وربعه عندهم بلوقير.

بتكلم عن شلتنا، نقعد و إنسولف عن الدنيا و مافيها ، و فجئة و إحنا ما إنكون قاصدين هالشي، قريتوا فلان؟ موضوعه كان حلو و يحليله دمة خفيف.

طبعا إللي ويانا و مو بلوغير شتقولون؟ شنو ؟ شنو الموضوع؟

و تبدأ السالفة و خصوصا إذا كان الموضوع جد شويه و في تشعبات و آراء مختلفة ، فصار له الفايدة .

أحلا شي في هالعالم إن بدون قصد قام يقرب الناس بطريقة حلوة

قولولي بلييييز إشلون لبلوق أثر عليكم؟

هل فعلا إتناقشون المواضيع خارج نطاق النت


تحديث : إهداء إغنيه


Wednesday, September 20, 2006

blog

الساعة 5:40 دقيقة ، الأربعاء

تليفوني و إلا 10 ميسيد كووووولز!

واااااااااي خالتي!!!! إشفيهم!!! مو عادتها!!!! و أرفع التيليفون و أدق مبايلها ما كانت بالبيت!!!!

الوسواس إشتغل !!

ألوووو ! خالتي!! عسا ما شر!!!

خالتي : إنتي وينج؟ نايمه؟

ريما: إيييه خالتي كنت نايمة ، خييير؟

خالتي: نايمه و ربعج بيولج الحين!

ريما : خالتي ربعي بيوللي فوق السبع مو ألحين

خالتي: إنزيييين قومي غسلي و بدلي يالله يمديييج!

ريما ( قلبي منقرف بعرف السالفة بس تطمنت إن خالتي وضعها طبيعي بالتليفون ) :

إييي إنشاء الله خالتي

خالتي: تدريين لييش أنا داقه عليج؟

ريما: لأ ، خير؟

خالتي : هذا إللي تكتبون فيه إنتي و ربعج و كل إمجابلينه شنو إسمه؟

ريما: إيييه خالتي هذا مثل جريدة بالإنترنت ، و الناس تقراه و تعلق عليه.

خالتي: إييييه ، أنا بكتب موضوع ترا و بشوف الناس إشبتقول عنه

ريما (بس طاقها عقر بقر) : خالتي إبتكتبين موضوع؟

خالتي: إييييه شنووو إشفيني ، ترا أنا أمي كانت شاعرة و الكتابه في دمنا

ريما: إييي خالتي أدري ، بس إستغربت من الموضوع بس

خالتي : سمعي و قوليلي رايج ، موضوعي أبييج تطبعيللي إياه و إتحطينه بالإنترنت

ريما ( بس قامته ضحكتي ) : إيييه خالتي شنو موضوعج؟

خالتي : الموضوع عن الضمير ، هل هو نعمة أم نقمة ؟

ريما ( إقعد!) : والله حلو الموضوع إيييه والله خالتي ودنا إنعرف ، يالله كتبيه بورقه و أنا أنشرلج إياه

خالتي : إيييه راح أكتبه ، يالله مع السلامة

ريما: الله يسلمج خالتي

خالتي: تعالي إلا بقولج؟ ليييش ما إتييوون المعرض إنتي و ربعج عندنا؟

ريما : خالتي بنشوف مسلسل و بنطلب عشا بيتزا و قاعدين بترينج سوتات يعني مو حول كشخة و ترزز بالمعارض.

خالتي: وييييييييييييه إنتي كل جذيييه ، يالله كيييفج ، مع السلامة

ريما : الله يسلمج

دقيت علي أختي و حبيبة قلبي لويير ، لحقي علييييي ، لحقي علييييي

بلوقي صار خمط مخامط يا لوير كل من يبي يكتب في بلوقي! ما صار لي خصوصيه كلش فيييه .

لوير : ليييييش إحنا مالنا سر؟ ليييش إمشاركين أهالينا بكل شي

ريما : إشدراني! زوجي يقوللي بكتب / خالتي تقوللي بكتب إشهالحالة!

هاهاهاهاهاهاهاهاهاهاهاهاهاها

لوير : خلاص يبا إخذي أرضيه منهم علي كل بوست

ريما : إتصدقيييييييييين!!!!!! مخج تجاري !!!

Sunday, September 17, 2006

حبيت نفسي فيك


وتبدا غربتي ويا نفسي ، مع كل مشاغل الحياة ،زحام، وناس

أبقي وحيدة بداخلي

و أنتظر أمل إني أسعد نفسي وياك

سؤال دايما يدور بداخلي


شنو السعادة

من وين ألقي الفرح الحقيقي و أنا لاهيه أبرر لفلان و أسعد فلان و أواسي فلان؟

ألحق سراب ، الكمال في الحياة

أضحك ويا الناس و أنصح فلان و أسمع فلان

وفي النهايه أحس بغربه معاهم، غربه مشاعر و غربه إحساسك بداخلي

فراغ ما ينميلي إلا بهواك

أسمع صدي حبك

صوتك

همسك

الحقيقة غير

والخيال غير

وحيدة ويا الناس

كنت سر من الأسرار

كنت كل السعادة بدنيتي

بس للأسف دايما ما تكتمل فرحتي

رحلت

حبيت شي واحد فيك

مشاعري فيك

مشاعري فيك

مشاعري فيك

ما كنت السبب

كنت عذري لحبي

و جيت بطريقي

حبيتك

ورحلت

و بقي حبي لك

By Reema

Saturday, September 16, 2006

إهداء الي صديقتي لوير


توجهت إلى حكيم لأسأله عن شىء يحيرني

فسمعته ً يقول : "عن ماذا تريد أن تسأل؟"

قلت :"ما هو أكثر شيء مدهش في البشر؟"

فأجابني :"البشر! يملّون من الطفولة ، يسارعون ليكبروا ، ثم يتوقون ليعودوا أطفالاً ثانيةً"

" يضيّعون صحتهم ليجمعوا المال ،ثم يصرفون المال ليستعيدوا الصحة"

" يفكرون بالمستقبل بقلق ، وينسَون الحاضر، فلا يعيشون الحاضر ولا المستقبل"

" يعيشون كما لو أنهم لن يموتوا أبداً ، و يموتون كما لو أنهم لم يعيشوا أبداً"

مرّت لحظات صمت ....

ثم سألت :"ما هي دروس الحياة التي على البشر أن يتعلّموها؟"

فأجابني:

"ليتعلّموا أنهم لا يستطيعون جَعل أحدٍٍ يحبهم،كل ما يستطيعون فعله هو جَعل أنفسهم محبوبين"

"ليتعلموا ألاّ يقارنوا أنفسهم مع الآخرين "

"ليتعلموا التسامح ويجرّبوا الغفران "

" ليتعلموا أنهم قد يسبّبون جروحاً عميقةً لمن يحبون في بضع دقائق فقط، لكن قد يحتاجون لمداواتهم سنوات ٍطويلة "

" ليتعلموا أن الإنسان الأغنى ليس من يملك الأكثر، بل هو من يحتاج الأقل"

" ليتعلموا أن هناك أشخاص يحبونهم جداً ولكنهم لم يتعلموا كيف يظهروا أو يعبروا عن شعورهم"

" ليتعلموا أن شخصين يمكن أن ينظرا إلى نفس الشيء و يَرَيَانِه بشكلٍ مختلف"

"ليتعلموا أنه لا يكفي أن يسامح أحدهم الآخر، لكن عليهم أن يسامحوا أنفسهم أيضاً"

قلتُ بخضوع : "شكراً لك،

Wednesday, September 13, 2006

العن أبو الثقة زيييييييييييييين

انا لوير

خلووني انا الي ابدي في السالفه و اقصلكم القصه الي صارتلنا اليوم بحياتي ما صرت بهالجرأه مثل ما كنت الليله في ستاربكس

انا و ريما و كيتي رحنا ستاربكس ..و احنا تونا مسترسلين في السوالف و الا هذاك الطفس الياهل الي عمره 16 سنه

صابغ شعره بردقاااني لونه خابط جنه لحيه تيس محنيه .. و لابس على ظهره غيتااار !! وسحب الغيتار من ظهره و على اوله ماكو يدن يدن

و صصصصصصصصصصصصصصصصصك راس ام يابتنا احنا و الا قاعدين

شوي و الا يييه قعد و بسط يمنا.... هااااااااااااااااااو يا حافظ من صجك انت !! و لا همه الاخ ... انا اصوت على رفيجه الي يمه اقول يا الاخ

خل هذا يقصر على حسه صك راسنا!!!!

نشااااااااااااااااااااز!! العن امن يابت الطرب الي انتو فيه ....و الناس الي حوالينا يضحكون و انا اتقرطم بالحجي ...بسولف .. ريما لا تعليق غشيانه من الضحك ..

و كيتي بتسوووووووووولف و هذا يشوش عيلها ..

دش واحد زووووقه ..ارتزيت انا التفت على رفيجاتي قلت لهم ترا انا بغازل ..هدووني ,,لا أحد يحاجيني .. كيتي تطييح على ريما من الضحك ..

كيتي : يما فطييييييييييييييم حبيبه قلبي الي بتخز ريال ما تجابله جذي و تسبل بعينها !!

لوير: هووووووووووو ما اشوووووف....وفي شي صااك راسي ألا و هوو ه الي ينشز على كتر

كيتي : واااااااااااااااااااااااي يشوش علينا ما يخلينا نحجي ...هذا عدووله ولد خالتي قماشه...

لوير : اسفل في الياهل و رفيجه و اقوله الله يعافيك ترا صك راسنا ..خو لبنان و ضربوها و ستار اكاديمي ماكو ..لا يطلع موهبته على افانا !!

و في هذا الاثناااااااء يطلع المزيون من ستار بكس

انا لوير : واااااااااااااااااااااااااااي قميظه راح المزيون وييييييييييييييينه عمى بعينه هذااااااا ما خلاني اتهنى طااااااااااار الريال

و في بنات قاعدين على كتر يمنا صغار اعمارهم تتراوح ما بين 15 لي 17 اقولهم يا بنات الله يعافيكم هذا الي صك راسنا لكم ؟؟؟؟

اخاف رفيج وحده منكم و زعلانه عليه ..و قايلها بيصير رومانسي ..تكفووووون ردو عليه فكونا!!!!

البنات غشيانين من الضحك ....لألألألألألألألألأ مو لنا مو لنا والله مالنا شغل فيه ...

اتحلطم عليه ....

اقول حق البنات قومو قومو يا حيل الله ما كنا اشحلونا امسدحين في الصاله خلو القهاوي حق اليهاال مو لنا

اسحب بطل الماي و اقوله : ترا والله صكيت راسنا و لوعت جبدنا صووتك ظييييييييم و الناس كلها تضحك عليك

يرد علي بحركه خايسه يحط اصابعه بمخه كيفي كيفي كيفي كيفي .......

كيتي و ريما يضحكون

نمشي

و يشيل قشه الاخ و يطلع ورانا

هوووووووووووووووووووووووووو لحقنا

صك راسنا و لحقنا

رفيجاتي يخافون

انا اجيك على الجوتي لألألأ اشوه زين يبرد القلب حق الكفخه

و دلاقاتي يدد مو مشققه عادي افصخ افصخ الجووتي اذا لزم الامر

نروووووووووح السياره و نقفل البيبان على نفسنا

نركب و الاخ ورانا لازق في الباب

انا غشيانه من الضحك

ريما تتحدث :

أنا طبعا في هالمواقف ما أدري شسوي بس أضحك و طبعا أول شي طرا عليييي إني أكتب عنه بوست و تذكرت يوم قلت عن اليراعة و الثقة الزايدة في هالأشكال .

ما أعبر لازم الحس الصحفي يضرب في مخي ، وااااااي أبي أوثق إشلون!!!

ما إستشرت أحد، قمت و قتله لو سمحت ، صورة

هاهاهاهاهاهاهاهاهاهاها

والله المسكين جبر بخاطري يعل الله يجبر بخاطره و عطاني بوووز ويا الغيتار

جااااااااااااااااك جاااااااااااااااااااااااك

كيتي تقوولنا و بصووت عالي انشاء الله انشاء الله بدش التاريخ من اوسع ابواااااااابه بوصي عليك ملحنين يتبنونك.


Sunday, September 10, 2006

MEN


يايلنا رمضان و لازم نستعد حق شي خطر!!!!!!

الرياييل!!!

إييييه ، إللي يدخن وخر عنه و إللي يشرب قهوة وخر عنه و إللي يسهر بالدواوين و يايلك من صباح الله خير نفسه بخشمه و بوزه شبرين هم وخر عنه.

أحب أعرف سواء برمضان و غير رمضان ، شنو إللي يعسر الريال؟

ليه ياتلي طلعة قبلها بنص ساعة بسرعة بسرعة بدلت و طلعت؟

ليه طلعت يومين ورا بعض مع ناس غير بس المكان نفسه؟

ليه نمت يوم الجمعة ليه الساعة 12 الظهر؟

ليه طرا علي باله طلعة الساعة 8 و فجئه أنا برة ويا البنات؟

تعلمت إن شيين ما أسأل عنهم لأنها صفة مشتركه للعسارة الكويتيه

جم يدخلك فلوس بالشهر؟ ووين رحت ومن ويم ياي ؟

( بصيغة الإستجواب )

سؤال لمعشر الرجال

شنو إللي يعسرك سواء من زوجتك و إلا صديقتك ؟

Wednesday, September 06, 2006

أفكار

عندما تتبلور الفكرة داخل أعماق قلبك قبل عقلك ، و تكبر ككرة الثلج عند سفح الجبل ، تبدأ صغيرة متواضعة و تجدها أعظم مما كانت ،تكبر و تكبر و تنسج القصه داخل أعماقي ،أساطير ممزوجه بالخيال ، و عند خروجها بشكل أحرف و كلمات ، تبدأ رحله العذاب ، كأنها مولود خرج للتو من بطن أمه ، يصرخ ليستنشق نفحات الهواء و كأنها نشوة العاشق بلقاء حبيبه.

تصطدم الفكرة بالحياة ، فيزيد إنبهارها ! ماذا فعلت و لماذا العتب؟

لم أتكلم بعد ، لدي الكثير لأقول

أنا من يجد عندي كل متمرد ملاذه ، أنا من يختفي ورائي الملحد ، أنا من يريد عن طريقي الصعود للمجد ، ويجد السياسي أكاذيبه عندي ، والخجول الشجاعة، فأنا من أوصل المشاعر و الحب للعاشقين و المغرمين.

نعم ، تبدأ بفكرة ، و تنتهي بكلمة

from my memory book



تمنيت شوفها قالت الأيام محال
قالت إنت في ديرتك وهي في ديرتها


قلت ليش البعد أبي الوصال
قالت وصالك معها يمكن يعذبها


قلت خليه سرا بعيد عن العذال
قالت أسرارك يا زين من يسرقها


أنا فارس بشعري ونثري خيال
أستل قلمي وأشعر شعر وأطربها

لا توقفي صخرة لي في شوف الغزال
خلني أرجع ديرتي و أمدحها وأذكرها


بكل خير وأحسن الصفات والخصال
خيرة بنات الكويت وأحسن أهلها


فيها صفات الدلال والجمال
يالله إحفظ ريــما و أسترها


Tuesday, September 05, 2006

نزار قباني


أعنف حب عشته

تلومني الدنيا إذا أحببته

كأني .. أنا خلقت الحب واخترعته

كأنني أنا على خدود الورد قد رسمته

كأنني أنا التي

للطير في السماء قد علمته

وفي حقول القمح قد زرعته

وفي مياه البحر قد ذوبته

كأنني .. أنا التي

كالقمر الجميل في السماء

قد علقته

تلومني الدنيا إذا

سميت من أحب .. أو ذكرته

كأنني أنا أهوى

وأمه .. وأخته

هذا الهوى الذي أتى

من حيث ما انتظرته

مختلف عن كل ما عرفته

مختلف عن كل ما قرأته

وكل ما سمعته

لو كنت أدري أنه

نوع من الإدمان .. ما أدمنته

لو كنت أدري أنه

باب كثير الريح .. ما فتحته

لو كنت أدري أنه

عود من الكبريت .. ما أشعلته

هذا الهوى . أعنف حب عشته

فليتني حين أتاني فاتحاً

يديه لي .. رددته

وليتني من قبل أن يقتلني .. قتلته

هذا الهوى الذي أراه في الليل

على ستائري

أراه .. في ثوبي

وفي عطري .. وفي أساوري

أراه .. مرسوماً على وجه يدي

أراه .. منقوشاً على مشاعري

لو أخبروني أنه

طفل كثير اللهو والضوضاء ما أدخلته

وأنه سيكسر الزجاج في قلبي لما تركته

لو أخبروني أنه

سيضرم النيران في دقائق

ويقلب الأشياء في دقائق

ويصبغ الجدران بالأحمر والأزرق في دقائق

لكنت قد طردته

يا أيها الغالي الذي

أرضيت عني الله .. إذا أحببته

هذا الهوى أجمل حب عشته

أروع حب عشته

فليتني حين أتاني زائراً

بالورد قد طوقته

وليتني حين أتاني باكياً

فتحت أبوابي له .. وبسته

وبسته .. وبسته



Sunday, September 03, 2006

comments!

أنا قايله ماني كاتبه بوستات
بس حصل تجريح لشخصي و أحب إنكم تشاركوني فيه


حتي الذكريات صارت خيانه


البوست هو

علي البال :



عبدالله الظفيريsaid...

اسف اخت ريما على الي راح اقوله يمكن يجرح بس انا بقول الحقيقه وياليت تقرينها اذا اعجبتج اعجبتج واذا لا كيفج... انتي على كلامج الحين متزوجه وعندج يهال ..يعني هالقصه مالها داعي تذكرينها لانها يسمونها خيانه للزوج من نوع ثاني انتي تذكرتي الحب ونسيتي انج متزوجه ويايبه يهال منه واهوا له حق عليج يعني شنو يكون موقفج لين اهو يشوف هالكلام شيكون شعوره.. اعيالج لين يكبرون ولا سمح الله شافوا هالموضوع انا ما اقولج الحب عيب بس لين تستقرين لازم تنسينه خلاص تسوين عليه دليت وفورمات فوقه لازم تحسين بشعور زوجج وعيالج.. واسف على هالكلام بس هذي الحقيقه واتمنى تتقبلينها بصدر رحب

12:10 AM



ماراح أعلق و أترك لكم الموضوع

لأني مشغوله هاليومين


Friday, September 01, 2006

back to school




أعتذر عن الكتابه و سوف أكتفي بالقراءة والتعليقات
أحتاج أعدل نومتي
أحتاج ما أفكر منو إللي علق عندي و لازم أرد عليه لأن فشلة ما أرد
أحتاج أجابل نومة اليهال و تسبحهم
أحتاج أستعيد طاقتي حق اللبحه و الحنه بصوت واطي و رتم متكرر و بطيء
i will miss you all
but i know my brain wont get any good idea's to talk about