Friday, November 03, 2006

it's hard to be a mother !





كنا معزومين على العشا ويا جماعة أصحابنا أجانب من أوروبا، فجأه و إلا بنتهم إدخلت علينا و إتبشر أمها :

Mom ! mom ! I got my period !

طبعا أنا طقتني البوهة! إشتبي هذي قليلة الأدب! هذا وقته!

الأم :

Wooooooow you become a young lady now! You have to take of your self don’t let any man touch you, you may get pregnant!

أنا ( قاعدة أفكر ) : بسسسسس هذا إللي الله قدرت عليه و إتوصينها عليه، خايفه عليها إتحمل!

إللي دار في راسي حزتها .

أتخيل لو أنا قايله هالكلام جدام أهلي ،و إلا لو بنتي بتييلي يوم و بتقوللي يما و يما ........

شبقول و إشبرد عليها؟

إحنا من يوم إحنا صغر كان هالكلام ممنوع إتداوله، و أصلا فشلة و عيب حتي جدام ربيعنا!

من منظور علمي بحت:

ليش الكلام في هالموضوع شديد الحساسية ليما ألحين؟ أنا أم الحين و لازم أستعد إشلون بجاوب و إشلون بقولها و إشلون وماِلون و إهيا وحيدتي و أنا أصلا ما عندي خوات فكان الموضوع صعب إني أفتحه مع أي أحد.

قاعدة أطالع الأم الأجنبيه خذت الموضوع بعقلانيه و تفتح إشوي بسبب مجتمعهم .

هذا الشي إللي قاعدة أتكلم عنه ما أتجرأ و أكتبه بالعربي صراحة ، شكله غلط أصلا

بس لو بننظر من وجهة نظر علميه ، ليييش إنخاف إنتكلم عنه، مع إن شي طبيعي و الله حطة بالمرا و معناها إنها بنت تقدر إتييب أحلا شي بالدنيا و أهما الأطفال .

هذا الشي دليل صحة و عافية و الحمد الله .

و أنا قاعدة أكتب عن هالموضوع طرا علي جم وحدة أو واحد راح يعلق علي هالبوست و جم واحد راح يعصب لما يقراه ، و جم واحد راح يقوللي إييي و الله شنسوي إذا بناتنا إسألونه هالسؤال.

يمكن الرياييل ما يدرون عن هالنقطة ، و أحب أوضح عشان تتضح الرؤيه إشكثر الموضوع يخرع.

أول من البنت إتقوم إتهستر و ما تدري شنو فيها ، إنقوم إحنا إللي أمهاتنا شارحين لنا بوقت نضحك عليها لأنها ما تدري شنو فيها.

أول ما إتييلها البنت إتهستر بجي ، و في ناس يغمون عليهم و يطيحون و في بنات ألم و بالمستشفي.

أنا ما أدري عن جيل الحين إشلون مبلتعين و إلا خدايوو نفسنا .

بس صج ودي أعرف إشلون راح أتعامل مع هالشي ويا بنتي

و في أي سن أبدي أقولها ، و أي المواضيع أناقشها، ما أبيها تسمع من برة ، أبيها تكون تحت إنظري و تاخذ الكلام الصح مني ، ما أبي تشويش أفكار ، ما أبيها إتخاف من هالشي مثل ما كنا إنخاف و نبجي ، لازم إتعرف إن هالشي طبيعي و الله حاطة في البنت عشان اليهال. يعني مو عبط .

صج لما البنت تكبر جدام عيوني وايد تساؤلات في راسي و إشلون بجاوب

ما أقول إلا الله يلهمني الحكمة في الإجابة و طولت البال في سماعها و يصبرني علي سوالفها

أمييييييييييييييين يا رب العالميييين




27 comments:

Mohammad Al-Yousifi said...

هممم

ماني شايف ان الموضوع يخوف و بالعكس المفروض تزهبين الدوا قبل الفلعة

حاولي تدورين كتب عن هالموضوع بالأمازون يمكن عندهم الاجانب كتب اطفال تشرح تغيرات مرحلة المراهقة

او انك تفاتحينها بالموضوع

و بعدين ترة كلش مو عيب و الأحاديث الشريفة و القرآن متروس هالمواضيع , عن الحيض و النكاح و هالأشياء اللي للأسف المجتمع سواها عيب بس بالدين اهي أشيا عادية

the tooth.fairy said...

ريمة لا تسوين نفس امي

:P

الوالدة الله ايسلمج من النوع اللي الويه يقط الوان و تحمر قبل لا تفتح الموضوع اصلا

راح تحس بغرابة اذا فتحتي الموضوع قبل السالفة بمدة طويلة

و أوافق "كله مطقوق" الكتاب فكرة سليمة

بس لا بد من الحوار

بس مو جنة تو الناس؟ ولا جم عمرها الحين

lawyer said...

ههههههههههههههه

ريما

انا كل ما شفت بنتج قلت لها
هاااااااا يتلج العاده !!

تعطيني نظراااااااات هذي يعني شنووووو

!!


قلت لا بالله كدينا خير

شوفي
مصيبتي كانت ان يتني الدوره و امي مسافره
!!

منووووووو عابل فيني !

ابووووووووووووووووي

و لما ردت امي من السفر قلت حق ابوي متى بتقولها !!

قالي انتي قوليلها !!

دشينا الدار انا و ابوي على امي
جان اقولها
يما يما يما يما

لبحه
اخر شي قالتلي و صصصصصصصمه
تصمج ما تشويفيني اسوي الجنطه اشتبيييين

يمااااااا يتني العاده !!

امي اللللللللللللللف مبرووووووووك

الف مبوووووك

و تلمني و تبجي
و تقول حق ابوي وااااي
حبيبي يا نا الوقت الي شفنا فيه بنتنا اتييلها العاده!!!

هااااااااو طاع هذيلي احتفلووا في نفسهم و اكشتوا فيني


لازم تعلمين بنتج
انا ليش بنات خالي الايتام
اسم الله عليهم كانوا صغار و انا تبينيتهم في هالموضوع

ابشرج جيل هالوقت كل شي يعرف

بس اهم شي راح تعلمينها النظافه الشخصيه و بس

و اشلون انها راح تخصص ملابس داخليه خاصه لهالفتره

cozy said...

LOL ..... Thats why i always say WE NEED SEX CLASS !!!!
لو عندنا في المدارس جان ارتحنا للبنات وثاني للشباب مثل ما قلتي الوقت تغير و وقت الحيا راح !! فمالج الى اتمهدين لها من قبل لا توصل هالمرحله بس بشكل علمي واضح من غير لا اتكونين خايفه او مستحيه والاهم انج واثقه من نفسج ! انا استغرب من هالموضوع ليش عيب !؟ يعني اسير في كل اببنات مو عند ناس معينين فليش صار عيب اهوه شي صحي بحت ومن رحمت رب العالمين ان اعطى البنت هالشي

Unknown said...

انا اقول ماكو افهر من بنات هاليومين بالمدرسة كل شى يعروفون ويستهبلون لا تخافون عليهم بس انتوا ديروا بالكم وماكو الا العافية :)

عبدالله الظفــيري said...

اولا اسف على عدم زيارتي لبلوغج وحمدلله على السلامه ادري متاخره بس ياليت تعذريني ريما :(
اشتقت لسوالفج فقلت لازم امر واشوف شنو جديد ريما
انشالله تكونين استانستي بالسفره وغيرتي جو وريحتي نفسيتج..
اما على اسبوع المرور فهذا الموضوع حتى بنات وشباب الي بعمر 12 سنه يعرفونه مادري ماخذين دروس ببطون امهاتهم والا شسالفه ؟؟
بس الحمدلله ان عندنا بناتنا تستحي تقول هالسوالف جدام اهاليهم والا امهاتهم مانبي نصير مثل الاجانب لان نحس عندنا ادب وحسن التربيه لعيالنا صج ان عيال هالوقت صايرين اخس من الاجانب بس لازم نعلمهم ترى عاداتنا وتقاليدنا ودينا احسن بمليون منهم مهما كانوا .. انا اتوقع بعد جم سنه راح يصير عادي عندنا تصير هالسوالف والبنت ادش على الام والابو والاخوان وايدها بايد البوي فريند وتعرفهم عليه .. الله يستر علينا

Яeema said...

بسم الله الرحمن الرحيم و به نستعين



cafe namlet

أشكر تفتحق بتقبل الموضوع من ناحيه علميه

و إجتماعيه


;)



kitty

والله ما أدري شنو مناهجهم و في أي سن ، لانها بدت تسأل

ليش فاطرة
ليش مو صايمه
شنو هذا
و ليش تعبانه

قاعدة أعطيها علي قد السؤال

و بصفه عامه

مثل سالفة الولادة
كانت خايفه عبالها بيشقون بطني


فلازم الشرح البسيط
و هذا واجبي كأم إني أعلمها



طبعا إنتي شايله إيدج من الموضوع ، هههههههه

الحمد الله علي كل شي

Яeema said...

killa ma6goog

كلامك عدل ، لازم أعرف إشلون بأسلوب ميسط

أبدي بالمقالات إللي بالنت


thank you ma6goog ;)






butterfly

إهيا 8 سنين الحين بس ما أدري هالشي يبيلي أفكر فيه إشوي

بس أسإلتها إهيا خلتني أفكر

Яeema said...

lawyer

مرة ثانيه قوليلها بالإنجليزي

هههههههههههههههههههههه

راح تفهمها أكييييييييييييد


صاجة النظافه أهم شي

بس في مفهوم قديم ما أدري مر عليج و إلا لأ!!؛

إذا الوحدة يايتها ما إتغسل راسها؟






cozy !

i bet you dont need it , they give it to you in the bottle with your milk :PPPP


المشكله إن هالشي عييييييب
و الفرند مو عيب

هههههههههه
المشكله حتي بين البنات ما يدور

Яeema said...

myth

أولا أحب أشكر المشاركه مع إن الموضوع بارع علي قولتج


و لو سمحتي ممكن تحترمين أي تعليق موجود عندي؟


أنا منبه من قبل لأن ماله حق أي معلق إن يعلق علي كومنت مو عاجبه و لو صار الكومنت في بلوقج مسحيه



و ترفعوا بالتفكير إشوي و فهمي الغرض الأساسي من الموضوع


ليييش ما إتييلج الدورة؟


أصلا الواحد يحمد ربه إن بصحة و عافيه

Яeema said...

mishari

مو عشان فهرين ما تبي يفهمون الموضوع غلط

أحب أتأكد المعلومة و إشلون واصله لها ، إنت ما إتحس فيها لأنك أبو ، بس الأم إتحاتي كل شي بويها


و الله دايرة بالي عيل في أحد يحاتي من الحين

إكبرت بنتي و أسإلتها إكبرت وياها




عبدالله الظفيري

ما بين لخوان أسف و مريت علي بلوقك أمس و قريت المواضيع القديمه إللي طافتني بس ما مداني أعلق


بس صاير رومانسي بلوقك يونس
هههههههههه


الحمد الله علي كل شي وايد إستانست و غيرت جو و كسرت الروتين و تعلمت أسباني إشوي
ههههههههه

عبدالله أنا وياك علي الحيا
بس ما تدري ليش عيب هالموضوع؟

مع إن والله موضوع حيوي و مهم الواحد يفهمه عدل


أنا ما قلت إتقول حق الأمه كلها ، إتقوللي أنا

إحنا المشكله إن بين الأم و بنتها عيب ما ينطرح


أشونه أمي كانت واعيه لهالشي و كنت أشرح حق البنات إللي ما يعرفون شنو يسوون


و كل من يقوللي يا بختج إن أمج تقولج ، بحكم إني بنتها الوحيدة

يعني نفس ظروف بنتي



ترا فقدتك صج
لا تطول علينا بالتعليقات

Яeema said...

myth

الخير بكلامج ، إللي بينا و بينج كلامج ، فأرجو الواحد بس ما يخبط بالكلام ، لأني لا أنا أعرفج و لا إنتي إتعرفيني عشان أعذرج


دايما أقول البلوق مثل الساتلايت
في الزين و في الشين بنظر إللي يقرا و يطالع


بدليل إن كل إللي علقوا إفهموه من وجهت نظر بريئه

و أنا كتبت إن الموضوع ماراح يعجب الكل لأن جريئ بس ما فيه قلة أدب و لا جرح لأي عقليه قارئ

هذا الشي حاله حال الولادة و إلا الوحدة الحامل عادي تمشي بالشارع مو فشله؟

لو بتطالعينها من منظور نهائي للعمليه الأساسيه


أنا عندي هالموضوع أردي من الدورة


بس سبحان الله كل هالأشياء نعمه من رب العالمين بس العيب فينا و في تفكيرنا


الله لا يحرمنا من الدورة و إهيا بالنهايه للحمل و بقاء خلق الله بالأرض



ألف الحمد الله لك يا رب ترا والله النعمه زواله


إنتي شوفي شيصير فينا إذا راحت و إلا تأخرت

تكرهين عمرج

مونوبوز و حر و قته

nice said...

هالايام الجو حلو ومن جم يوم طق المطر
شنو علاقته بموضوعج
ولا شي
بس موضوع للنساء فقط اعتقد جذيه :)

سالفة قلب said...

اجابة الام كانت اجابه مبنيه على

عادات مجتمع تفشت فيه مثل هذه العلاقات

المحرمه في ديننا

استغرابك من صراحة الام جعلني أتذكر

موقف

الصحابه حينما دخل عليهم شاب وهم

جلوس عند النبي صلى الله عليه وسلم

يستأذن النبي عليه الصلاة والسلام

بالزنا!!!!!!! وكيف بلغت به الجرأه

في ذلك .فقام الصحابه يهاجمون قوله

فأسكتهم الرسول صلى الله عليه وسلم

وأخذ يعالج الموقف من خلال فهم

نفسية هذا الشاب


ووضع يده الشريفه على صدره واخذ

يخاطبه : اترضاها لأمك؟؟ لأختك؟؟

لخالتك؟؟؟

بعدها هدأ الشاب واستوعب الامر

واصبح هذا الفعل اقبح مايكون عنده

نلاحظ ان الرسول صلى الله عليه وسلم

لم ينطق بكلمة هذا فعل محرم

او هذه كبيره


الامر المؤثر في هذا الموقف

طريقة ادارة المواقف الصعبه

والوصول الى فهم النفسيه قبل

الاجابه على السؤال

يجب أن نفهم قبل ان نجيب

المغزى من وراء اي سؤال

والتوضيح يجب ان يكون مناسبا للسن

وعلى الام و الاب ان يكونوا على أتم

الاستعداد للاجابه على اي سؤال

حتى لا يضطر الابناء على البحث عنها

عن طريق قنوات خاطئه

3ajayeb said...

ليش ما نحاول نشرح حق عيالنا بالطرق العلميه مثلا : مثل ما احنا نقدر نتكلم على الجهاز التنفسي والعصبي بكل حريه وبدون أي تحفظ نكلمهم عن الجهاز التناسلي بنفس الطريقه مع الشرح ... سهل جدا .... مثلا لما تحوشهم انفلونزا نشرح لهم عن الجهاز التنفسي بدأً من الأنف الى الرئه بطريقه مبسطه على حسب سن البنت او الولد ... واذا نبي نشرح لهم عن الدوره الشهريه نوضح لهم شنو اهو الجهاز التناسلي ...بعد شنو حاله حال أي جهاز بالجسم .... وسلامتكم

3eShTaw said...

eee wallaaaaah 9edagtay yoom geltay its hard to be a mother. everything is hard. bas ana atwaqa3 wallah a3lam enna banat hal ayam mayenkhaf 3alehom. 3ala 7asab ma asma3 3an el banat hal ayam oo a7walhom fe el medares fa hatha mawthoo3 jedan motadawal fee el sa7at el deraseyah :) yakhteech aslan el 6alabah oo el 6alebat 9ayreen eykhar3oon walla. 7amatee el sghera etsolefle 3an sowalef el banat bel thanaweya walla akhtere3. shay mo 6abe3e walla. sowalefhom oo el mowathee3 eli ey7achoon feha oo ta9arofat`hom. allah yer7am ayamna oo ayam el 3achayef :) lat7ateen hal mawthoo3, inshalla 7azat`ha God will give you million 6areqa etkalmeen feha bentech. oo kelesh kelesh lee tewahagtay dezeha 3ala wa7da men khawatech wella 3ala lawyer or kitty wahgehom :P

نون النساء said...

لوووول

ماعليج
صاجين إللي قالوا بنات هالوقت
يعرفون كل شي

اذكر وحده من جماعتنا متعلقة فيني حيل
ومرات تقوللي شغلات ماتقولها لامها
يوم ابلغت ياتلي
صلب الحديث انحرف حق شغلات اخرى مالها شغل باللي كنت اسولفلها فيه
انا اعيوني جذي @@


اتشفلت منها اتصدقين...
جان اقولها
يبا انا اللي اتعلم منج مو انتي اللي اتعلمين مني
شهالأسئلة احرجتيني
جان تقوللي عااااادي خلج فري

انتي يالقملة اتقوليلي خلج فري
@@

طائر بلا وطن said...

صباح الخير

موضوع جدا مهم و ضروري و من وجهة نظري
ان هالأمور محتاجة أحد يمسكها و يواجهها
بموضوعية و عن دراسة احسن من نترك الحبل
على الغارب أو نحط راسنا بالرمل

موجة البحر ياية ياية

:

لا أنا و لا انتي و حتى اغلبنا اذا مو كلنا
احد خذانا من ايدنا و علمنا و هو قصده
يفهمنا و خايف علينا بحجة العيب و المستحى
أو الخوف من انهم يفتحون عيوننا على اشياء
في حين نفس الأشخاص اللي المفروض يروبننا
و يفهومننا يدرون في قرارة نفسهم انه
احنا قاعدين نستقي المعلومات من مصادر
غلط و بطريقة غلط يمكن تكون لها ابعادها
الخطرة و عواقبها الوخيمة سواء من عقد
نفسية
أو مفهايم غلط تحكم حياتنا فيما بعد
أو حتى انحرافات اخلاقية خصوصا في فترة المراهقة

تناقض .. خصوصا اذا كان الوالدين من جيل
الشباب امثالج و زوجج لأن الكبار من جيل
أبوي و أبوج كانوا على نيتهم و بساطتهم
و حياتهم تحكم انذاك

:

أنا الصراحة ما قريت بس شفت اكثر من برنامج
حواري و شفت دكاترة ملتزمين دينيا يدعمون
هالتوجه و يطالبون انه يدخل كمنهج بعد
ملحق بالتربية الأسلامية


و استقاء المعلومات من استاذ فاضل أو والدين
الابن أو البنت اكيد أفضل من صديق أو فلم

تعليم متوازن .. تثقيف .. تدعيم اخلاقي


و نقطة مهمة .. لوير مو تزعلين :) .. أنا
ضد أن نرمي بكلمات كبيرة على الأطفال بحجة
التسلية او المزاح .. ما نقطها إلا و احنا
قدها و قادرين نتحمل مسئولية توصيلها
للطفل هذا اذا كان طبعا عمره يتناسب
و ضرورة فهمه للكلمة هذي

و ضد كلمة .. ان اعيال هالوقت يعرفون
كل شي .. على الأقل و لنفترض انهم يعرفون
كل شي ليش ما نكون طرف او مصدر يفهم
و يصحح اذا ما دعت الحاجة

و أخيرا لازم نكون مثقفين و مهيئين عشان نقوم
بهالدور .. و لا ما سوينا شي لأن مصادرنا
كانت غلط بالأساس


آسف اني طولت .. بس موضوع حساس

Dr. Saleh said...

Just a week back my 10 years old son asked his Mom how a woman conceives a baby? And his Mom answered that some thing comes out of the man and enter the 'ba6en' women, and then she will conceive a baby.
Then my son asked me how?
And here comes the obstacles of our culture to answer such questions
then I diverted his thinking how the sperm propagate and fertilize
the egg to the end of the process.
I wished if I can answer my son correctly, I can not. why? I do not know.

lawyer said...

طائر بلا وطن انت اخو عزيز و تمون و تدري اني اتقبل منك

لان اعرف قصدك و طريقتك و اعرفك عدل

:))

ام الحفيز said...

ريم

بنات هالوقت يعلمون امهم الزحير
يمااااااه يمااااه من بنات هالوقت لالالالا يعرفوووون كل شي وينشدون حتى عن عرج الابط ليش ناقز.....وي اسمالله عليهم فيهم بلاغة الشف وحب الاستطلاع ولا اشحسبالج انا وانتي ماكلينها تجعم وتكسر مياديف يوم كنا باعمارهم وهذا عيب وهذا ما يجوز وهذا حجي حريم ودشي داخل مالج قعده مع الكبار؟؟؟اشوناااه ما تدمغنا ولا تسبهناااه
من هالجعـــــــــــــام
لا تقولين لي ولا اقولج بنات هالوقت اسمالله عليهم موسوعه يعرفون كل شي...بس عاد المسبهات والمدوكرات الله يرحمهم برحمته ويبصرهم
لا تحاتين وانا اختج....هذا سهل المشكله اذا ياتج يوم وقالت لج ابي اخذ هذا ويطلع لا مو من مواخيذكم ولا هو سنع شتسووووين حزتها؟؟؟

LiTTLE BiG said...

hi reema :)
3endy question :p
did u go to maki elmarina yesterday ?!
LoL cheny dahsa 3ar'9 :p

DiLLi O MiLLi said...

عزيزتي ريما

ما يحتاج كل هالخوف ترى المسأله بسيطه.. اللي يختب ويتدوده هو اللي يكبر الموضوع ويخليه جنه شي مو طبيعي

لما تييج بنتك أسم الله عليها وتقولج أول شئ خذيها ولميها وبوسيها وقوليها مبروك حبيبتي كبرتي وبعدين بس عطيها بعض المعلومات مثل كم يوم ممكن تضل وممكن تحس بألم بالبطن وكيفية الأغتسال وأسأليها أذا عندها أسئله وردي على أسئلتها وبس الباجي راح تدرسه في المدرسه.
أنا والدتي دراستها علم النفس وهذي كانت طريقتها معانا ، وخواتي طبقوها مع بناتهم.

تذكرت ردة فعل بنت عمي السنه كنا متجمعين في البيت جان تدخل علينا أختها وتقولها ترى بنتج بالحمام والظاهر أن يتها ؟؟؟؟ ما وعينا ألا بنت عمي حطت أيدها على ويها وشتغلت سمفونية البجي !! طالع هذي الأم؟!! سكتناها وقلنالها تروح تشوف بنتها

الله يبلغك فيها وتشوفين ذريتها آآميين يا رب

الحجيه said...

السلام عليكم جميعا
أخت ريم ليش تستغربين دينا ما في مثله دين يحث على الحياء والحياء زينت البنت عندنا في حديث ‏عن ‏ ‏أبي هريرة ‏
‏عن النبي ‏ ‏صلى الله عليه وسلم ‏ ‏قال ‏ ‏الإيمان ‏ ‏بضع ‏ ‏وسبعون ‏ ‏شعبة ‏ ‏والحياء ‏ ‏شعبة ‏ ‏من الإيمان
---------------------
أما كيفية التعامل مع الموضوع في اعتقادي طالما الأم قريبه من بنتها بحيث تكون هي الأم والأخت والصديقة ماراح يكون أي مشكله نهائيا .

Kuwaiti said...

هلا ريما شلونج
ياجماعه ماتبون تتريقوون ؟؟؟

انا والله اأيد كلام (الحجيه) لآن صج الحياء من الدين
واأيد انه تكون الأم صديقة البنت تبوح لها بكل اسرارها وانه الأم لازم اذا حست انه البنت وصلت لين مرحلة البلوغ تقعد معاها وتفهمها على قد عقلها شنو هذي المرحلة وشنو عليها انها اتسوي
انها بتكبر وانها بيصير لها تغيرات بجسمها ....... الخ الخ طبعا انتو يالبنات ادرى

بس اهم شي انج من الحييين تبديين تتقربيين لها اكثر

Sharbil said...

مرحبا ريما

والله هالايام التلفزيون والنت و الاصحاب بيعلمو كل شي وبعتقد هالشي رح يسهل عليكي لان بنتك راح يكون عندها خلفيه بالموضوع

:)
شربل

Sharbil said...

مرحبا ريما

والله هالايام التلفزيون والنت و الاصحاب بيعلمو كل شي وبعتقد هالشي رح يسهل عليكي لان بنتك راح يكون عندها خلفيه بالموضوع

:)
شربل