صيروا أميرات بأخلاقكم

لكل منا حلمه و أهدافه

يختلف باختلاف سنه

يوم كنت 16 كان هدفي التفوق

و يالنا الغزو و غير مفاهيم معينه فيني

من التفوق القوي اللي يبهذل النفسيه الي التخرج بنسبه تأهلني لدخول كليتي

يوم كنت 18 دخلت الكليه أبي الوناسه مابي التفوق!

أبي تكون لي نشاطات و معارف و بنفس الوقت مو هدفي لوحة شرف

لأن في وقتنا الوظيفه تنياب بالواسطه مو بالمؤهلات

يوم كنت 22 اشتغلت بالواسطه وبالمكان اللي أبيه

كان هدفي اثبات للمسؤولين المفروضه عليهم اني ترا استحق هالمكان

و فعلا تفوقت من اول سنه و ما خذيت جهد كبير لإثبات ذاتي .

( لان اهداف و طموح اللي وياي كان من الإحباطات يكاد لا يذكر)

5 أشهر و تزوجت و تغيرت الحسبه نهائيا!

هدفي استقرار و بناء بيتي .

بعد أولادي الله يحفظم

صرت انسانه غير بكل ما تحملة هذه الكلمة من معني

صرت القدوة و المربيه و المضحيه و مسؤولة نشر السعاده بالبيت

دايما لما أسترق لحظات مع نفسي و أفكر بأنانيه بعيدة عن واقعي

أقول كم انسان ناجح في عملة سعيد مع أسرته؟

كم انسان جمع كل هذه الثروات و حرم أولاده فرصه اللقاء معهم كل يوم؟

كم مسؤول ناجح بعملة و خسر الكثير من كانوا يحبونه؟

كم زوجه ناجحة بعملها و لكن عن دخولها بيتها تدرك ان السعاده بالبيت و ليس المكتب؟

كم منا الحين حقق كل أهدافه بس هم مو سعيد بحياته؟

كم منكم يقول الآن ( هذي اشفيها اتشوف كل واحد ناجح بشي بس فاشل بالأمور الأخري بحياته؟ )

لأن هذا الصج!

ما يصير ننجح بكل شي

ولهالسبب

ولأنني قررت أني أوقف دائرة العمل و الطموح و الأهداف عندي

راح آخذ نفس عميق

أستمتع بخيرات الله اللي منها علي والحمدالله من صحه و عافيه

أستمتع مع أولادي

أستمتع بالجو الحلو اللي انشاء الله بشايرا هلت هالأيام

أستمتع مع أصدقائي القدامي اللي ولهت على قعدتهم

أعيش حياة الأميرات

المرفهات

الراقيات

البعيدين

كل البعد عن توافه الأمور و أمور القيل و القال والحش و القرض بالناس

بعيدة عن النجرة والحنة واللويه اللي بالشغل اللي كل ما أشوف هالشي اتيلي الضحكه

مو صعب اننا نتغير للأحسن

أكتب بوستات تفلسف اشوي هدفها والله نشر السعاده على اللي يدش و يقرا

مع ان أدري لو بتصيرون أميرات راح اتكونون

Drama queen

هههههه

هالبوست أهداء لمن اهداني هالمسج :

الي ( هـ... )

الله يهنيج على هالروح الحلوة

وعلى الإبتسامة الجميلة

والطاقة الإيجابيه اللي تنشرينها على اللي حولج

و يكثر من أمثالج .

عسا ربي يقدرني و اتكون هذي الفكرة عني مع كل اللي حواليني و معاشريني عن قرب J

كلمات بسيطه بكتابتها و لكنها تعني الكثير بالنسبة لي

أشكر كل من عطاني الفرصه اني أدخل قلبه و أمنحه السعاده الحقيقيه