فرق تسد

سياسة

1- السلطة تتلاعب على أوتار الطائفية والقبلية والمذهبية

2- يجب تعزيز القانون ليلجأ المواطن الكويتي لسلطة القانون ولا يلجأ لطائفيته

3- الكل يعتز و يفتخر بأصلة و نسي أنه مواطن كويتي

تتداخل الأحداث و بدون ما نشعر بدأنا نتمزق داخليا و نجد السلطة بدأت تتراقص علي أنغام معزوفتها العشرة

لاتوجد مصداقية بالقرارات لذلك سوف يلتصق المواطن الكويتي لصقة عنزروت بقبيلتة

ما أدري والله أعلم، بس مو كأن إذا كل واحد متشتت بين هذا و ذاك ، وولاءه لأشخاص راح يضعف الديرة

وبالتالي يصبح أسلوب الحكم علينا سهل ، لأن أصبحنا شعب بسرعة يثار إذا أحد تعدي علي قبيلته و إلا أصله

إختفت كلمة الكويتي و ما قمنا إنشوفها إلا علي الحملات الإعلانية و علي المنتجات الإستهلاكية

هل أصبح المواطن الكويتي سلعة يتاجر بها؟؟؟؟؟

إصحوا يا شباب الكويت ، خلوننا وراء كلمة وحدة

كويتيين و بس

ما الحل؟

الخمسة و نريدها الآن

التوقيع

مواطنة كويتية

---------------------------------------------------------

قصة قصيرة حقيقية

أريد أن أسرد لكم قصة حدثت لي شخصيا

كنت خارج البلد عندما كنت صغيرة فلا توجد هناك فرق بين المواطن .

دخلت المدرسة و كنت بسن 6 سنوات

سئلت هذا السؤال :

هل أنت شيعية وإلا سنية

طبعا كان الجواب أني كويتية ، لأن هذا الجواب التي كنت أجاوبه لما كنت خارج بلدي

لم يرق لهم الإجابة ، فذهبت أسأل الوالدة ، يمّا أنا مو كويتية؟؟؟

تقول إيييه يمة كويتية لييش؟؟؟

أقولها يسألوني بالمدرسة إنتي شيعية والا سنية

جان إتجاوب الوالدة ، قوليلهم سنية

خلصنا من هالقصة و طبعا ما كنت أدري شنو الفرق بين هالكلمتين

و طبعا من كان يسألني هي شيعية.

ليييش؟؟ كان في وقتنا إن الشيعة ما يرافجون السنة ، بس مادري ليش و لما الحين مادري ليش

المهم

إنتقلت لمدرسة ثانية بالمتوسطة و كان السؤال التالي:

شنو أصلج؟

و طبعا كنت طالعة فيها و قلت لها كويتية سنية

جان تقوللي لألألألأ

أصلج أصلج !!!

جان أقولها هذا شي يديد يعني!!! خليني أرجع البيت و أقول حق أهلي شنو أصلي !!

كلمت أمي عن هالسالفة جان تضحك ، جان تقوللي قوليلهم عنزية

و أنا مادري شالسالفة!!!

جان أرد اليوم الثاني و أقولهم أنا كويتية – سنية – عنزية

جان يقولون ما تتكلمين إبدوي و نص كلامج إنجليزي

و بعدين رديت نقلت السؤال حق الوالدة – جان إتجاوبني – إحنا حضر مو بدو

فصار مسماي الحين :

كويتية – سنية – عنزية – حضرية

لاحظوا شغلة غريبة ، ليش من صغرنا يرضعون إعيالهم هالكلام و في سن صغير؟؟

فالسلطة عندنا الصراحة ما تنلام إذا الشعب يعزز هالمفاهيم !!!