Friday, March 31, 2006

الحب الكويتي

لاحظت شي غريب بمجتمعنا الكويتي، تناقض غريب للإعتراف بالحب للطرف الثاني.

أحبك بس إنت حبني أول! ياه إشلون يعني؟

إتييلة البنت ، فلان ترا أنا أموت عليك

فلان : ثبتيلي إنج أتحبيني. ( لازم تسمع كلامة وتصيع إشوية عشان تثبت إنها إتحبة ، جنة ما يدري إن الحب عند المرا مو مشروط بفعل معين )

المتزوجين :

الزوجة : فلان ترا أحبك و أموت عليك ( زواج و تزوجته ووظيفة و عندها يعني ماكو مصلحة)

الزوج : إتحبيني و كل إشوي رايحة الصالون و إلا رايحة السوق و الا مطعم! ( واااااي أجابل الطوفة عشان إتعرف إني أحبك! )

بدت المشاعر تكون مشروطة بعمل أو بفعل ، لغة التحاور والتصريح بالحب إختفت - ليش – إذا صرحنا بالحب صرنا مراهقين .

صار الحب للأسف مربوط بالجنس بالنسبة لبعض الرياييل.

و عشان محد يقول مو الكل جذيه أقول مو الكل ، بس 99.9% من رياييل الكويت .

أنا حاطيني إهنييه عشان أطالب بإعادة طريقة الحب علي زمن عبدالحليم و عمر الشريف .

والله يا جماعة صار فيننا فراغ عاطفي من حريم و رياييل! الكل قام يشتكي

كل من قام يكابر بالحب مادري ليش!

و الغلط من الأثنين

والله الحب شي جميل و التصريح فيه للطرف الثاني يخللي الحياة أحلا

ما إتخيلون عيون البنت إذا إنقال لها كلمة حلوة طالعة من أعمق أعماق القلب!

ما يقال في الحب :

في الحب ننسى كرامتنا ، وفي الغيرة ننسى الحب

الإهمال يقتل الحب ، والنسيان يدفن الحب

الحب لا يقتل ا حد إنما يعلقه بين الحياة والموت

الدموع تروي الحب والبسمات تنعشه

الحب هو أجمل سوء تقدير بين اثنين

لا أحبك لأنك مصدر راحتي وإنما أحب راحتي لأنك مصدرها


ندين للحب بحياتنا . . وبموتنا أيضا
من يحب . . يحب إلى الأبد

إهداء لمشاري

القلوب الساهية

بصوت عبدالله رويشد


22 comments:

Unknown said...

والله يا ريما الناس ما صار عندها حيا علشان جذى ماكو حب الحب شى راقى ان الانسان يحب علشان تكون نهاية هالحب شى شريف لكن الحاصل الحين تجارب كثيرة حتى نصل الى المغفل اللى ممكن تصيده
الحب الحين تغير بعد مفاهيم المادة
والفلوس والامور السخيفة الثانية بدت تطغى على مجتمع المظاهر اللى نعيشه
الحين زمن اليسا ونانسى اللى والله ما كنت افرق بينهم الا توه الحين
والعيشه صارت ماصخة ومشكلتج انج كتبتى هالبوست وانا متضايق يعنى ما راح اخلص فمان الله

3ateeja said...

والله يا وخيتي يا ريما توني مسيره على ارفيجتج ناديا وهذرت عليها ذيج الهذره لين راسها انبط من كثر هذرتي
المهم خلينا بسالفتج
شوفي يا وخيتي لما تحطين المسمى الصحيح على اي شغله تتضح الصوره لج
فالحب انواع ترى
في حب مصلحه وبمجرد ان تزول المصلح يزول الحب!!!!
وفي حب من طرف واحد هذا اقشر لاتقربين منه
وانواعه عديده
الريال يختلف عن المرأه في طريقة حساباته لنقاط الحب
وخلي بالج زين
الريال ما يحتاي تقولين له احبك اكثر من مره ووايد ..اهوه طبعه جذي
كلا بينيله انج ما راويتيه كل حبج ...
مو اربع وعشرين ساعه احبك واموت عليك وتقعدين له على طرف القنفه تحبني ..ودامك تحبني ليش ما تسمعني حجي حلو ...بالنسبه له هذا شي قمه في المللل
الريال يحب الثناء وما يحب تبيني له انج مستغنيه عنه بالمره
والحب ..يقع في القلب ..صح لكن له افعال تبرهنه
يعني في مره تحب ريلها تحط على ظهره ديون مثلا
وفي ريال يحب مرته يغلط او يعايرها بأهلها
وجد كلامج صحيح في رياييل وايد يربطون كلمة احبك بالجنس
اخاف تقولين عتيجه ظلمتنا بس هذا الصج
لأن في الكثيييييييييير من النساء ما يقولون لرجالهم كلمة احبك الا في الفراش ..وكلام حلو
ولا قعدت الصبح قالتله ماكو طماط ماكو بطاط ماكو دياي ..سيارتي يبيلها بيمه ....
جم مره بلكويت الصبح تقول حق ريالها صباح الخير يا مشمش طري مبلول
المشكله ان احنا يالحريم نعتقد ان الريال يفهم شنو اللي في بالنا او في قلبنا
لكن ترى جد جد مايفهم الا لما نقول له
اهوه طبيعته جذي يختلف عنا ...
واذا الريال ما قال خل زوجته تقول
شوي شوي يتطبع فيها
عندي وحده ريلها ما يقول لها كلمه حلوه ...قبل
كانت اهي تثني على نفسها جدامه
مثلا اذا طبخت طبخه سنعه وخالتها ام ريلها امدحتا ...اهي تقول حق روحها جدامه واشكره ..يزاج الله خير يا اقبال ..خووووش طبخه ..هههههههه يعني اتحجى عنه
تالي اهوه قام يقول لها اكثر من جذي
وصار حليووو وحبيب
نصيحة اخت
اقري كتاب الرجال من المريخ والنساء من الزهره لجون غراي ..من اصدارات مكتبة جرير وانتي راح اتثقفين اكثر من هالناحيه
مو بس مع زوجج مع كل ذكر
والله قرقت راسج اكثر من قرقتي على ناديه

ii said...

ما اقدر افتي!!!

نجرب ونقولك
:P

Яeema said...

mishari:
أنا معاك بسالفة الحيا ،الحب شي راقي بس شقولون إربيعنا، خصوصا المتزوجين
الريال ليه نام مع مرته يعني يحبها

إنزين سنة، سنتين ثلاث و بعدين؟

بس يا أخو والله لازم الثناء
و من الطرفين عشان الواحد يكون له دافع إنه يعطي زيادة

يعني حوافز عاطفية
و الحب إييب الحب و السعادة بالبيت

و علي قولتهم
يضرب الحب شو بيزل

Яeema said...

3ateeja :
واااي و ليش ما عزمتيني عشان أصك راسها وياج كل مالها خلق
هاهاهاهاها

خلينا إبسالفتج الحين
الحب غللي أتكلم عنه أهو الحب الطاهر
مالي شغل بالأنواع القشرة اللي أشرتيلهم

كنت أتكلم عن أثنين يحبون بعض و بدون مصلحة بس يكابرون بالتعبير عن اللي داخلهم ، يعني شي زين إن الواحد يتكلم

أدري إن مو حلو الكلام 24 ساعة
بس يعني هه
إشوية مني مناك
مشكورة
الله يعطيج العافية
مسكة اييد
والله تعبتي وياي
الحياة بدونج ما تسوي شئ

يعني هالأشياء تعطي دافع و يعرف اللي له واللي عليه ، راضي ، مستانس

عن الكتاب الله يسلمج
قريتة بالنسختين
الإنجليزي و لما طلع العربي
أقولج شي
ما ينطبق علي رياييلنا
أقصد رياييل الكويت
في شي من الصح و تعلمت منه وايد

plus i read :
dont sweat the small stuff in love
dont sweat the small stuff in family
dont sweat the small stuff in woman

و هم ماكو فايدة
رياييلنا ما يبيلهم إلا فوزية دريع

Яeema said...

laialy:
allah ye3afeech 7abebty

mo ajmaal mennich walla my post ;)


أنا دقيت سلف الحين و شغلت التيربو بعد

Яeema said...

se3loah :
واااي إنتي الله يعينج علي الريال السعودي ، يتروالي ما ينتفاهم

مادري إنتي قوليلي تالي

أنا حدي أفتي باللوكال ( المحلي)ز

bo_sale7 said...

السلام عليكم ..

اكبر خطأ هو التعميم ...ما يابنا ورا وزادنا تخلف الا التعميم ....شلون بتحلين مشكلة وانتي معممة السلبيات ؟؟؟
الصح قولي 99.9% من الرياييل الللي عرفتيهم ما يحبون ...مو 99.9 % من الرياييل الكويتيين ما يحبون !!
بعدين منو قالج انه الرياييل ما يحبون ؟؟؟ مثل ما انتي عشتي بالكويت وتربيتي بالكويت واهلج كويتيين وعلى قولتج تبين الناس ترجع لزمن الحب مال عبدالحليم وعمر الشريف ...اكيد غيرج وايد عاش بنفس البيئة وتربى فيها عنده نفس الفكرة ..بس انتي او اي انسان يبي يكبر مشكلة فلازم يعمم .....الحب شي جميل وبدونه الحياة ما تستمر ....الحب مفهومه بسيط عندي ....الحب=التضحية ....متى ما وصل الانسان الى درجة استعداده انه يضحي علشان شخص اذن اهو يحبه ....الحب مو حب شكل ولا حب مشية ولا حب لبس او كلام ...الحب فعل وموقف ....ناس وايد ما يقولون حق بعض كلمة احبك او احبج ...بس افعالهم تدل على هيام وعشق مو بس حب ....لما الانسان يكون تعبان حده وهلكان وتطلب منه زوجته او حبيبته يسويلها شي او اييبلها شي ويقوم ويتحمل تعبه ويسوييه هذا حب ....لما الانسان يكون فقير ومعتاز ...بس يكرف او يتسلف علشان اييب شي تحبه حبيبته وهو يدري انه دافع سعره دم ...هذا حب ....لما الانسان يتغرب ويتبهدل علشان يكون حياة افضل حق حبيبته....هذا حب ....لما الانسان يقطع اللقمة من حلجه ويبدي حبيبته عليه وهو ميت يووع ...هذا حب ...لما الانسان يتحمل نوبة غضب وزلة لسان من حبيبته ويعديها ......مع انه جرحته ...هذا حب ......فلا تعممين وتقولين الرياييل ما يعرفون يحبون ...يمكن انتي ما تحسين بالحب ولا دارية عنه ...
اللي يحب يحس بالحب ...

وسلامتج

lawyer said...

ريماااااااااااا
انا اكثر وحده في هالدنيا اعاني من الحب الكويتي هذا
يعني حبيننييييييييي كثر ما تقدرين بس انا ريال عيب ما اقول كلام حلو

اعتقد هذرتي اليوم من الصبح عندج كانت كفيله بالرد على هالبوسسسست
الله يخلييييج لنا يا ريما محد حاس فينا غيرجججججججج

Lord Bin Sleet said...

هذا الحال الله يخلف علينا

تحياتي لك
لورد بن سليت

Unknown said...

بعد اذنكم كلكم الصراحة كلام عتيجة على راسى وبعدين انا ما اتفق معاج ريما ان الريال الكويتىو ما يحب صدقينى ريما وايد شباب كويتين اعرفهم حبوا وبعضهم ما تزوجوا لى الحين بسبة ان متأثر باللى صارله وواحد يقول يمكن تتطلق واخذه انا اعرف واحد الحين عمره باخر العشرينيات نطر وحدة تصيرله تتطلق من زوجها علشان يخطبها لا ويبينى اتوسطله عند ابوه لان ابوه مو راضى العيب مو بس بالريال من الصوبين وشنو معاييرنا عن الحب وشلون صارت بس المشكلة لما الولد قام يحب كل يوم والبنت نفس الشى يوم لها خالد ويوم فتحى ويوم عبدالستار وهلم جرة خل كل واحد على الاقل يحبله انسان لمدة سنتين متواصبلين بعدين خل يتكلم عن الحب وبعدين الجياكر عندنا وايد يا ريما وشباب الكويت مملوحين :P
والا شرايج ؟

ومشكورة على هالاغنية المهداة منج لى

iliveinq8 said...

أنا حاطيني إهنييه عشان أطالب بإعادة طريقة الحب علي زمن عبدالحليم و عمر الشريف .
-----

يا زين هذا الحب :)
ذكرتيني بالأفلام
اللي 99.9 من قصصها
البطل ينحاش مع البطله من ابوها :)
او يتسلل البطل داخل بيت البطله وابوها وامها نايمين لين يدش غرفتها ويسكرون الباب وراهم
واحنا يا غافلين لكم الله :)
انحط ايدنا على قلبنا نخاف لا يصحى الأبو ويطيح على العشاق :)

كملي رسالتج يا ريما :) انتي قدوة الإنفتاح لهذا المجتمع اللي ناقصه حيا وأدب :)

3ateeja said...

مشكور مشاري على هالكلام الطيب
نرجع لريما
اييييييي هيجي تحجين لا يبا ذكور الكويت ما يعرف لهم الا المره الغريبه
ما تشوفينهم شايلين الجنطه وراها بالسوق
وشايل اليهال
تقولين صبي
دايسته دووووس الله وكيلج
قاطته عليه دي
وراده آآآآر
وبدي وبدي
واهو ما يقول الا لبيك وسعديييك
والابتسمه شاقه الحلج تقولين دعاية معجون اسنان ..اما احنا يا حظي علي وعلى اللي خلفوني
لو الحكومه تخلي البيت للمره جان ماكو ذكر ياخذ من برا
والحريم ماكو وحده تاخذ من الديره
ههههههههههه
خلينا بعمق السالفه
الحين فهمتج
الحب عالطريقه الكويتيه
والله يا وخيتي انا اقول لازم الانسان يحب روحه كثر ما يقدر
اعرف وحده موجهه كبيره بوزارة التربيه
تدرين شتسوي اذا عندها محاظره او شي
تدز حق نفسها ورد
وكل يوم تصبح بالمنظره تقول صباح الخير يا احلى النساء
مع العلم ان زوجها حدى حبيب وحليووو لكن تقول حب النفس هو الباقي
اما حب الغير ..فحسب الظروف
والله نظريتها صح
يربيها وقوليلي
خلج على قولتهم عاشق روحه :)

Яeema said...

nadia :
والله حاسة فيج
بس أهو الخسران

علي الطاري
ترا صايرين ماكو صبر رياييلنا
كلشي يبون إتسويلهم بإسبوع

بس يالله دمهم خفيف و إنحبهم

Яeema said...

bo_sale7:

أنا أعمم عشان أثير الرأي العام الذكوري بالموضوع

أنا النسبة ماخذتها من معهد الأبحاث
هاهاهاهاهاهاها

ترا كلامك حلو
و لو خليت خربت

بس أنا أقصد التصريح بالحب مباشرة

ما كنت أقول إن ما يحب
إذا ما يحب هذا ماكو إحساس بالمرة

تركيبة المرا إتحب إتشوف الإعجاب
عشان إتحس إبأنوثتها!

بس عاد إذا مافيها أنوثة و لسان طويل لا تستاهل رفعة الجام

مشكور بوصلوح
كلامك منطقي 100% هالمرة

الله يسلمك

Яeema said...

lawyer
إنتي خليج وياي و راح نوصل لنتيجة مرضية للطرفين

إحيا طريقة وحد
الحنة و مالك غير الحنة

و بعدين اييي ما يكفيج بوست إسميلله
عليج الله يحفظج

Яeema said...

lord Bin sleet:
إكتب إشوية عن الحب السعودي الرويال

Яeema said...

mishari:
قاعدة أقول يحب
بس
ما يصرح و يكابر

إحنا جياكر ها؟
إنزين
يا المماليح
ماني رادة عليك
لأن مو أنا اللي خالقتهم
بس إنتو بس تبون برة


والله علي يوم إبنكسر فيكوم كسرة سودة

Яeema said...

i_live_in_q8:

رسالتي ترا الحب الخالص بدون خرابيط
هروب
ما هروب
أنا أقول بس خل نصمع كلمة حلوة

يعني لا تستحون

Яeema said...

3ateeja :
بعد عمري والله إنتي علي هالكلام

أنا من ضمن الأشياء اللي إتكرهني بالسفر ويا اليهال حطت ريل علي ريل هذي

بس بسمع كلامج بحب عمري
هاهاهاهاها

bo_sale7 said...

reeeema :

مشكور بوصلوح
كلامك منطقي 100% هالمرة

ليش وكلامي كل مرة شنو ؟؟؟
:)

Яeema said...

bo9loo7:
كان تعليقات فقط

بس هالمرة وجهة نظر صحيحة

شكرا