Tuesday, August 29, 2006

على البال كل التفاصيل على البال


الوقت : محاضرة 12:30 قاعة فاروق الشيخ

التاريخ : سبتمبر1995

نظرات متبادلة لمدة كورسين متتاليين ، الزمن يمر و نظرات الخجل ممزوجه بالرجولة و نظرات الأمل والترقب ممزوجة بالغرور الأنثوي .

الوضع يبقي كما هو عليه ، عيب و ممنوع و فشلة و إشلون و ليييش

عرفت إن مخلي أحد وموصيه إني أكون وياه بنفس المحاضرة ، ما دريت إلا تالي ، تعب و حاول بس نوعي الدراسه همي الأول و الأخير .

أصغر وحده بالكلاس ، يقوللي الدكتور تو الناس ماخذة مواد التخرج من الحين ، قلت والله عشان بنت عمي وولد عمي وياي و إنصير غروب بالمشروع .

دخل ويانا بالمشروع ، أقو ل حق بنت عمي ما إتفقنا واحد غريب ويانا؟!

الدكتور يقول إنتوا حتي في المشروع عنصريين ما تبون إتدخلون أحد ، ترا ما يصير لازم أربع أشخاص .

طلع متوبكها من أول ، واضحة السالفة و أنا علي نيتي ، كان رفيج ولد عمي ، مافيها شي و إسمه ولد عمي ويانا .

كورس كامل نشتغل بدون أي وسيلة إتصال ، حدنا الجامعة .

محمد: ريما؟ خالد ويينه؟

ريما: هاااااو إشدراني؟

محمد: ليييش ما عندج رقمه؟

ريما: لأ ما عندي !

محمد: بس أنا كل أشوفكم ويا بعض؟

ريما: إيي عدل كلامك ماخذين مادة ويا بعد ،و قاعدين نشتغل علي مشروع واحد و ويانا ولد و بنت عمي ، لييش ما تسأل ولد عمي عنا ، عندو رقمه ؟

بديت أفكر غير ، بدا يطلع الكلام ، ما أحب أحد يقول عني كلمة ، وراي أهل وراي إخوان !

ريما :خالد ؟ إنت قايل إن بيني و بينك شي؟

خالد : شالكلام ! إشقاعدة إتقوليييين !

ريما: عيل إييلي واحد يسألني عنك ووينه ووين راح !

خالد: منو هذا خل أشق حلجة جليل الحيا إللي ما يستحي !و ليييش إترديين علييه و ليش كلمتيه !

ريما: شنو لييش إشرايك إنت ، أحقره و أمشي؟ ولاني قايلتلك ولا شي ، مو ناقصة مشاكل ، كلمته وفهمته كل شي ، بس الله يعافيك مرة ثانيه لازم ولد عمي ويانا عشان الناس .

عصب و تضايق و ياللي اليوم الثاني

خالد : ريما ، أنا آسف إذا وجودي سببلج أي إزعاج أو كلام

ريما : إنت تدري شنو مشكلتك؟ إنت إنسان البنات كلها تبيييك و أنا مالي خلق هالسوالف البطاليه

خالد : والله إنج ظالمتني والله أنا مو جذيه، والله إن الإشاعات إطلعت بسبة الإنتخابات !

ريما : ترا شوف ، حدي مالي شغل فيك و إذا شفتني برة لا إتسلم !

المهم ، هبيييت بالنت وبهالعالم اليديد

قمت أقعد باللاب و أسوي بحثي من النت و تجميع بيانات طباعة و تعلمت الشاات .

و إنعزلت نوعا ما عن الحياة الجامعية إللي برة .

"آخر يوم بالمحاضرة"

خالد : ممكن أقولج شي؟ ترا آنا ما عجبني إنج إتسويين شاتينق بالنت ، و تضايقت وايد لما سمعت إن إنتي البنت الوحيدة إللي في كليتنا عنها أكاونت لا و إبإسمها .

ريما : نعم ؟لييش يعني؟

خالد : مو سلكنا و مو من عاداتنا و تقاليدنا إتسولفين ويا شباب ما إتعرفينهم

ريما : عيل سلكنا واقفه وياك أكلمك جدام الأولي والتالي؟

خالد: و من قال إللي قاعدة أسويه صح ، أنا ييت أنبهج لأني أبيج

ريما: نعم؟ إشقصدك؟

خالد : مو قصدي شي ، يالله أشوفج علي خير ، هذا آخر يوم لي بالجامعة و إذا تبين شي عندج رقمي

ريما : أنا ما أدق علي شباب !!!

خالد: ما إتدقين و طايحتله شااات و الكل يعرف إسمج؟!!

والله أمرج غريب !!

ضحكت و عصب و مشى ....

رحت سيارتي و إلا خالد يمي صافط

خالد : ممكن كلمة أخيرة و تقبلين مني شي

ريما : إيييه ممكن

وإلا شريط محمد عبدو

أغنيه على البال بس فقط لا غير

إنتهت القصة و كلمن مشي في دربه لا أدري عنه ولا يدري عني

أمس قاعدة أتمشي بالسيارة ويا صديقتي و نزلنا إبنشتري شريط محمد عبدو ما أدري إشطرا علينا !!!

شرينا السي دي و إلا !!!

أول أغنيه كانت علي البااااااااااااااااااااااااال

على البال
كل التفاصيل .. على البال
واحلى التفاصيل .. على البال
والحل والترحال .. والنار والهيل
والقمره اللى نورت ليل ورا ليل
والنظره المكسوره
والبسمه المقهوره
والخطوه المغروره
وأحلى المواويل
دايم على البال

مدري الى اليوم
ولا الزمان أنساك يا قلبها قلبي
مدري الى اليوم
توله على مضناك والا انتهى حبي
ياقايد الريم ذكراك ما غيبت عن خاطري ساعه
الروح لك يا ساكن الروح ... نزاعه
متى الوصل .. قول .. أبجيك وأسابق الساعه
ياللى على البال

كم شمس غابت وأنا أشوفك
شمس الضحى اللى تباريني
وإذا منع جيتك خوفك
نورك فلا غاب عن عيني
الحب تدري .. ما هو بيدي
سيدك تراه الهوى .. وسيدي
أبيك تبدا مواعيدك
ولا أببدا مواعيدي
ياللي على البال

و إلا فلااااااااااااااااااااااااش بااااااااااااااااااااااااااااااك قوي و ما يرحم !

والله إني قلبي إنعصر عصرة !!!!!

شعور حلو و براءه و قيم قويه تحكمنا و الشااات بالنت صار إنني أخونه و أفضل ناس ثانيه عليه

ضحكت علي دمعت عيني علي ما أدري شصار فيني ، فجأه أنا البنت أم 20 سنه وعشت مع كلمات الأغنية حرف حرف و كلمة كلمة و كأني أسمعها في هذاك الموقف !!!

شعور ما أقدر أنساااه

31 comments:

Charisma said...

مدرى الى اليوم ولا الزمان انساك يا قلبها قلبى مادرى الى اليوم توله على مغناى والا انتهى حبى

على البال كل التفاصيل واحلى التفاصيل دايم على البال

ايام ما تنسى صج صج ما تنسى وعلى البال اهى على البال اليوم بقلب القعده على البال بخر الاولى والتالى هههههههههههه زهبى الكلنكسات ناويه افضفض تدرين فينى محاتجه هاليوم وشوفتكم انتى ولوير
يالله بقوم البس لا ائخركم يسوف لبس وقاعد يحن على قلبى

Chai-7aleeb said...

الله يلعن إبليسج على هالرومانسيه اللى شقتنى شق

شهالقصه العجيبه

والأغنيه بعد من روائع عبده و من اللى أحبهم بعد

إنتى هالأيام أحسج فيج شىء و مو مستانسه

قاعد ألاحظ من بوستاتج الأخيره

هونيها وأنا أخوك و الدنيا ترا بخير

وبعد الصراحه إنج قاطعه هالأيام و مو قاعده تزورينى علشان توسعين صدرج

q8y_saint said...

بما انه مالي شغل بالرومانسيه و سوالفها ما اعرفها قبل الاكل ايه ي ولا عقب
بس البوست ذكرني بالجامعه وسوالفها و بفاروق الشيخ و الايام الحلوه الي انقضت في هل مدرج و الله انها تسوى الدنيا و ما فيها ياريت ارد طالب مره ثانيه
ضحك بريء صداقه حلوه ما تنباع و لكن تنشرى بالغالي
الله يرحم ايام مضت ماراح تعود

kila ma6goog said...

excellent post

Яeema said...

kitty:
looooooooooooooooooooooool

يا حلو قعدتنا و يا حلو الفصلة و يا حلو البساطه و يا حلو البجي و يا حلو الضحك

و يا حلو خرطوم ماي التنكر إللي كسر جامت السيارة

هههههههههههههههههههههههههههه
هههههههههههههههههههههههههههه
هههههههههههههههههههههههههههههه
هههههههههههههههههههههههههههه

آآآآآآآآآآآآآخخخخخخخخخخخخ
looooooooooooooooooooooooooooool

Яeema said...

chai-7aleeeb :
إيييه والله عمت عينه إنشاء الله ذبحني و ينني مو راضي يطخ عني !؛


أي رومانسيه لعوزت الريال وياي

الله يا أنا أول مالي شغل بأحد
أبط الجبد ، ألحيين متحسفه
هاهاهاهاهاهاهاها

مسوي قصه و لويه و عفسه و أنا في قمت برودي ، إنزين جاملي إيهني هناك

أبدا رافعة الجام
ويا ويهييي

حدييي ياهل كنت و خوافه و أبي الدراسه بس

يالله ما عليييه الحمد الله علي كل شي

هالأيام لاهيه ويا اليهال خبرك المدارس السبت و دوامي السبت فقاعدة أعدل نومتي بس مو راضيه تتعدل
هاهاهاها
قلت أسكر النت و أجابل التلفزيون

فنون شي مو طبيعي
قمت أتابع خالتي قماشه الساعة 4 الفير


لا طبنا ولا غدى الشر

بقولك شغله
ترا دلق سهيل
و بدينا إنقز إشوي
هاهاهاها

و برمضان شكلنا بناخذ إجازة
هاهاهاهاها

وااااااي هذرت وايد
شاربه رد بووووول
:/

Яeema said...

q8_saint :
أي رومانسيه إشتغلت عليه تجعم المسكين
هاهاهاهاها

ما عرفت قيمة هالشي إلا ألحين
ماأدري لييييش

ههههههههههه

إييييييييييه والله يا حلو ذيييك الأيام

كل ما طل بويهنا أحد حبيناه

لييييييييييش!!!!؛
هاهاهاهاهاها

Яeema said...

kila ma6goog :

a pleasure to hear that ;)

Fuzzy said...

والله انا ما جربت جامعة الكويت لاني درست في أمريكا وموضوع الزمالة بين الجنسين في الكويت يحتاج نضوج من الطرفين
------------------------------------
خوش اغنية صراحه .. اي شي بصوت محمد عبده عجيب حتى لو يغني ماما زمانها جايه

tweety said...

عاد صار لي جم يوم معلقة على هالاغنية
ذكرتيني بأيام الجامعة يا ريما

Charisma said...

looooooooooooooooooooooool looooooooooooooooool ههههههههه ابييه الله فكنه بغينه ننطحن بغينه نصير صمونه انحكرنه بين التنكر والصبه الى بالشارع الله فكنه الحمدالله انها يت على خرطوم التنكر كسر جامت السياره اليمين لول يمى يعنى لوووووووول

لا اليوم بدايته فصله ونهايته فصله
اخاف بس الحادث دقرنه ولا ردنه البيت لول ماكو الا العافيه وسابى ولا حلينه فى كوستا لول رد بول وبره على الكراسى ودرجه الحراره 40 واحنه حددددددد الكوووووووووووول سوالف وضحك
ليش ريمه ؟؟؟؟؟؟؟؟؟ ههههههههههه

wahooooo said...

eeeeeeeeh ya3ni tara dero balkom ana khereegah game3yah, o kent a3arf wa7ed wayed 7elooo. eeeh khashkha men gaddich.

Яeema said...

fuzzy:
أما من ناحية النضوج فمالك أمل إنسى
هاهاهاهاها

أنا شهادتي فيه مجروحة

Яeema said...

tweety :
أولا مبروك علي النيو لووك
شكلي فتحت شهيتكم للتغيير


أيام الجامعة من جد ما تنسي

Яeema said...

kitty
خلينه إنوزع خبز الله سلمنا

أهم شي إني كملت

ههههههه
مالج أمل أوقف

كل شي يتصلح إلا الروح و أهم شي الله سلمنا

Яeema said...

wahooo:
الحين إللي يسمعك جامعة هارفيرد
و إللي متحرش جورج كلوني

:/

كلها روضه و متوسطه و قالبينها جامعة غصب طيييييييب

EsTeKaNa said...

احم احم
مساج الله بالخير يا الغاليه
شخبارها ام يوسف؟
اشلون العيال وابو العيال؟
عسى كل امورج تمااام انشالله؟
حدي من قلب فاااقدتكم وشكله اليوم السهرة عله البوستات اللي طافتني
:)

طبعا البوست اينن
ذكرني بالاحداث اللي ترتبط باغاني معينه،تخليج لما تسمعين الاغنيه الناس بوادي وانتي بوادي ثاني
وبالاشيا الحلوة الي تمر بحياتنا اللي حلاتها جذي تخلص ويبقى لها ذكرى حلوة بكل بساطتها وبكل برائتها
بس والله ما كنتي هينه ها
:pP~
تهقين راح ايي يوم اتذكر ايامي الحين واتحلى عليها
ما يندرا
:))
Miss u:*

Princess said...

WaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaY Reema 3awaaartaaaay galbiiiiiiiiii ... Sij 3ala il baal ighneeyaaa abaadyaaa

Яeema said...

estekana !!!!!!!!
ياه ياه ياه ياه
تو ما نور لبلوق والله !؛

فقدناج يالغاليه

والله كل أموري بخير

أي ماني هينه
قولي لاهيه بالأي آر سيييييييي
هاهاهاهاهاهاه

ما أحب شطانه وجها لوجه
أستحي
هاهاهاها

بتيي هالأيام و بتحليين و بتقولين ليش ما سويت جذييي و ليييش ما سويييت هالشي

الذكريات حلوة و إهيا إللي تخلي الواحد يتعلق بماضيه

i miss you too sweety :***

Яeema said...

princess !!!!
eeeeeeeeeeeeeeeeeeeeeee
eeeeeeeeeeeeeeeeeeeeeeeeeeeeeeeee
7ad'haaaaaaaaaaaaaaaaaaaaaaaaaaaaaaaaa

cafe_namlet said...

salam 3alekom .. raja3teny a7ag ayam faroog esheeeeeeeeekh aaaaaaaaaah oo aaaaaaaaaaaaaaah .. chena ams wala ..ashwa 7asbaly bs ana bro7y kobart athary ako weyay wayed lol.. il 30`s momelaaaa

{ 13 } said...

ما احب محمد عبده ..احس انه يغني وهو متملل ..من جد ..الحين مو الاختلاط ممنوع في جامعاتكم ؟؟وياترى بعد ممنوع في الجامعه الامريكيه .؟؟ احنا الاختلاط عندنا جزئي ..يعني بجامعة قطر نووو ..بالجامعات الخاصة بمؤسسه التعليم يسسس..في وظايف اختلاط وفي وظايف نووو..انا ممكن اختلط (لووول) بس مع ناي معينه واغلبهم غير خليجيين ..مادري ليش الخليجي لسه فيه ثواره ..لمؤاخذه عالكلمة ..يعني مسكين يخترع كل ماشاف نوع انثى ..لووول..ذكرتيني على ايام الجامعه كانت البنت تجيلها هدايا عبارة عن شريط فيه اشعار وممكن صاحبها هو الي يقولها مع موسيقى خلفيه او حد من ربعه يدق عود ويغنيها ولا يعطيها صورة مرسومة له ولا راسمها مع كتابه الشعر ....هذا غير البومات صورته وصورتها ومرات يتقابلون يروحون برا الدوحه على البحر في مكان معروف ويتصورون ..كانهم هنووود ..هاهاهاها..انا كنت ياحسرتي مطيحه مع الدكاتره في مكاتبهم ومناقشات على اساس استفيد وبصراحه فتحوا لي مخي ..

انا بس للصراحه اخو رفيجتي كان يدرس بلندن وكان دايم يبعث لي كتب وسي ديهات اغاني ..يعني كان ينورني ..هذا نعم الصديق ..

wahooooo said...

ee wallah 3ala goltich ya reem, o kel wa7ed emed eryoola 3ala gad el7afa.

Яeema said...

cafe namlet :
hehehehehehheheheh
walla la momella wala shaaaaay
gemmah bel 7oriyyaaaaah
la 3aleech min a77ad wala shaaaay

Яeema said...

13 :
أوها مو المغني و لا اللحين و لا الكلمات
إهيا الذكري
و لا شيء غير الذكرى


علي أيامنا عادي
الحين ما أدري والله سإلي الجيل الجديد

إعجبتني إن يخاف كل ما يشوف نوع أنثي
هاهاهاهاهاها
يا عوينتي علييييه
الصديق مفقود في مجتمعاتنا الخليجيه

Яeema said...

wahoooo :
abee el7aafe el RED CARBET malat el oscar
hehehehehehehehe

albandry said...

oooooooooooohhhhhhhh
that is so sweeet walla zaman ayam eljam3a
eeeeee
ra7at o ra7at baraatha
ey33eeen allllaaaah

عبــدالله الظفــيري said...

يعني اقدر اقول ايام حلوه كانت ايام حبك ;)
بس ماعليه اخت ريم الزووووج له حق
والايام راحت لازم تروح معاها هالاشياء

عبــدالله الظفــيري said...

اسف اخت ريما على الي راح اقوله يمكن يجرح بس انا بقول الحقيقه وياليت تقرينها اذا اعجبتج اعجبتج واذا لا كيفج... انتي على كلامج الحين متزوجه وعندج يهال ..يعني هالقصه مالها داعي تذكرينها لانها يسمونها خيانه للزوج من نوع ثاني انتي تذكرتي الحب ونسيتي انج متزوجه ويايبه يهال منه واهوا له حق عليج يعني شنو يكون موقفج لين اهو يشوف هالكلام شيكون شعوره.. اعيالج لين يكبرون ولا سمح الله شافوا هالموضوع انا ما اقولج الحب عيب بس لين تستقرين لازم تنسينه خلاص تسوين عليه دليت وفورمات فوقه لازم تحسين بشعور زوجج وعيالج.. واسف على هالكلام بس هذي الحقيقه واتمنى تتقبلينها بصدر رحب

ShaRBiL said...

شيء جميل ان نشعر ولو للحظه و نتذكر تلك الذكريات و النظرات :)

Anonymous said...

مدونه رائعة

تستحق الزيارة

بالتوفيق


عدنان
مشرف موقع معلومة.كوم
www.m3loma.com