Thursday, August 24, 2006

secrets !


قاعدين أنا وكيتي ولوير بالصاله عندي ، قاعدة أسويلهم النيو لووك حق بلوقاتهم ، و مع الهذرة و السوالف ، إكتشفت إن الأخت العزيزة الغالية توأم عقلي كيتي عندها صندوق ذكريات .

و إهيا قاعدة ، جان أقوم أتسحب داخل الدار و فتحت اليرار و طلعت ملفي الخاص جدا جدا و إللي محد يدري فييييه و كنت ناسيته !!!

هذا الملف فيه ذكرياتي و كروت معايدة و كلمات جميلة و أشعاري البريئة إللي بدون لا وزن ولا قافية هاهاهاهاهاه

جان أييبه و أرزه ! و أطلع لها قصيدة قديمة مكتوبة بخط يد الشاعر الله يرحمه طلال الرشيد !

جااااااااااان إنموووت ضحك !!!!

كيتي : هااااااااااااااااااو ميتا شفتييييه و وييين عطاج هالورقة و فعلا إبتوقيعه و بخط إييده !

ريما : سر سر ماني قايله هاهاهاها كتبها و عطلني إياها و خلاص ، الله يرحمه

كيتي : شوووفي كيتبي بوست عن هالسالفة ، كل يوم أكتشف إن عنج أشياء نفسي !

ريما : إنشاء الله ، شوووفي هالكرت ! بالفالنتين وصللي

كيتي : وااااااااااي عندي نفسه ! ما أصدق ! لا هذا ملفج يبيله قعدة إبروحه !

ريما : الأيام يايه إنشاء الله ، إنسوي عليييه إجتماع قمة هاهاهاها

---------------------------------


ذكرتك

أذكره كل ما طرالي غناه

و أذكره كل ما بغيت إنني أنساه

ودي تطول الليالي و ما نفترق أنا وياه

نجمته تبرق بليلي وتضويلي سماه

حبه بقلبي ويا مكبر غلاه

أصيل بين الناس منهوا بمستواه

ما يلين لكل واحد، ولا لكل من بغاه

صلب في الشدايد وعلي من عاداه

أنا خوفي من باكر يوم عيني تلقاه

وخوفي على نفسي ليه قلبي هواه

يترك قلبي وحيد يبكي من شقاه

تلعب بي الدنيا ويحرمني حبه وعطاه

كل هذا ترا خوفي من هم فرقاه

أنحرم من حنانه وهي أشد المعاناه

ريـمــــا

14.4.1997


37 comments:

3AJEL said...

ما شاء الله والله منتي هينة صارت عندنا شاعرة جديدة
واصلي ما راح تخسرين شئ
التجربة على النت مفيدة وخوش اختبار

Яeema said...

عاجل :
مشكورة حياتي أنا جربت و شفت والله صدي لا بااس فييييه

أهم شي النيه بالشعر مو القافيه
هاهاهاهاها

Яeema said...

لحظة سووووووووورييي

إنت male !!!

Charisma said...

اى والله ههه قاعدين انا وياها اسولف لها عن دفتر مذكراتى وسوالف وسوالف وشنو فيه وشنواقدر اقوله وشنو ما اقدر اقوله وقاعده اشاورها فى بعض المواضيع هل هى قابله انى انشرها ولا لا ؟؟ المهم الحلوه هفت عنى خلتنى وراحت ،، شوى الا راده بملف طول ذراعها وتحظنته بعد ما ورتنى اياه !!

هاو شعندج جان تقولى عندى نفسج دفتر مذكراتى لووووووووووووول ولا شنو دفتر مذكراتها سفط دفتر مذكراتى ههههههههه وعليه على كسرت خاطر نفسى
ريمه مستواها شعرا طلال الرشيد وما خفيه كان اعظم لوووووووووول قلت وعليه على كله عوير وزوير هههههههههههههه


أنا خوفي من باكر يوم عيني تلقاه

وخوفي على نفسي ليه قلبي هواه


عجييب هالمقطع
الله يرحمه

Яeema said...

kitty
هههههههههههههههههههههههههه
هههههههههههههههههههههههههههههه

أهم شي وصفج هاهاهاهاها

بس ترا لازم إنفرغ إللي فيييييه

بدت الأوراق إتصير صفر

Charisma said...

توضييييييييييح

قصدى الله يرحمه عن طلال الرشيد لان وايد تذكرنا بالقعده انا وريمه

3AJEL said...

الله يسامحك
يا فضيحتي بين الجيران
شنبو انا شنبو

{ 13 } said...

ما افهم في الشعر الشعبي..وتلاقيني ثلاثة ارباع الاغاني الخليجيه مادري ايش يقولون..لووول..مو عشان ثقافتي البلجيكيه ..بس مااسمع الناس تتكلم جذيه في حياتنا اليوميه ..على الاقل الي عندي..الوحيد الي افهم شوي من اشعاره بدر بن عبدالمحسن هذا اذا طبعا كتب بلغة مقاربة للفصحى ..ماعلينا مو هذا موضوعي..انا الحين لي كم شهر اعمل سياحه بالمدونات الكويتيه واحاول اختار لان ماشاللله في الكويت لكل مواطن مدونة ..لووول..عموما انا حدي 45 مدونة من العالم كله ..اغلبهم بطبيعة الحال عربيه لان هذا اهتمامي ..ويظل الرقم كبيررررر..ماعلينا الزبدة قبل لاتسيح...لقيت هالمدونة ..من كم اسبوع كذا وبما اني اعلق عندك قلت اسألك ..العنوان واحد ..وهي كويتيه ومتزوجه وام ولد....بس تعيش في امريكا ..يعني صدفة غريبه ..هذي المدونة


مستنسخة؟؟؟

3ateeja said...

ويييييييييه ريما ما يصير جذي يعني امس من التعب نمت يم الجهاز شلون يعني كل ما اغط شوي ولا شاكلتي دستت مواضيع وتعالي يا عتيجه تعالي يا ام مضحي اقري ريما شكاتبه وييييييييه
<<<< تحلطم تالي الليول
اولا تمام خوش حجي انج جوابتي على التاق بس مادري احس جنج بحجرة تحقيق وانتي تجاوبين
عسى ما شر؟؟؟
لا ومبققه عيونج بعد

Mini Я. said...

mashallah...sowalef malefat...kabatat...ma 3endich safe deposit box bel bank? :P

it's nice to have such sweet memories :)

tara that paper can be VERY expensive in the future ;)

nice said...

حلوة الذكرايت والشطانة الي تتضمنها
لكن منو طلال الرشيد ؟
شيقول ؟

kila ma6goog said...

:)

Яeema said...

عاجل
عجبني إسمي إسمك إن عاجل بالكويتي يسمع الكلام

بس يو فتحت علي قناة لقيت إن شعار و المعنى مختلف

هاهاهاها

Яeema said...

13

بدر بن عبد المحسن من أصعب الشعر و تركيبة و يطلقون عليه مهندس الكلمة

إختيار حلو


هذي النسخة الإنجليزية
هاهاهاهاهاها

أنا ريما عربي
إهيا ريما إنجلش

والله خوش سياحة بالمدونات

Яeema said...

3attoooooooooooooj!

ترا التاااق ما أواطنه بعيشت الله و إنتي أول وحدة يمكن أجاوب علي تاقها ولاحظي ما رشحت أحد
لا و شلت الكومنت عليه بعد عشان ما يدودهني
هههههههههههه


و بعدين ترا برجع الدوام فما أقدر أجابل بلوقي و أكتب ورانا مدارس
هاهاهاهاها

راح أخف والله والله كنت بنزل بوست ثقيل و قوي بس قلت أخليه تالي عشان ويييك إند مو مال شي طويل

يا زينج و يا زين تحلطمج
هههههههه

Яeema said...

mini-r

laaaa a7eb a7e66a 3ala galby

expensive coz i hold it :p

looooooooooooooool

Яeema said...

nice

إكتب طلال الرشيد في غوغيل و إرعص بحث

:p



حبيبتي


حبيبتي لا من غديتي لي ســراج اتـــبعه
وكني غديت من الظما اركض ويطردني السراب
لا تبخلين اليا شربتك ماشربتك من سعه
دامي من جروح الهموم الموجعه كلي صواب
اليوم مرتني السواني والفصول الاربعه
اليوم مريت المواني والمباني والسحاب
اليوم ماكني لقيتك مر صوتك ماسمعه
اليوم ما كني فقدتك من سؤالين وجواب
يابنت في خدك وهج سيل الشموس الساطعه
احـرق بداخل داخلي انسان ماهو للتراب
واللي خلق ظلم الليالي بالعيون الهاجعه
اني من الحرمان اتسائل وحرماني جواب
يوم الوداع تخيلي مالي حبيب اوادعــه
محروم انا وتخيلي محروم حتى من العذاب
ليتك بعمري ثلاثة اشخــــاص مامــلّك
واحد معي دوم وواحـــد روحي يملاها
يابنت لي قصه تطول بكلمتين موجعـــه
هي باختصار اني انا اركض ويطردني السراب




للإستماع للقصيدة

Яeema said...

kila ma6goog

;)

Яeema said...

القصيدة مرة ثانية


للإستماع للقصيدة

Chai-7aleeb said...

هالنحاسه اللى فيكم،ما قلتولى أجى معاكم بهالأجتماع؟؟

على العموم،كلمة واحده على قولة اللبنانيين

يقطع الحب شو بي يذل

وسلامتكم

Яeema said...

chai-7aleeb

إنت موجود موجود ويانا والله
سيرتك و بوستاتك

بس واااااااي والله لو تكون ويانا

هاهاهاهاهاهاها

لا لا لا ما يصييييييييير

لوير - كيتي - ريما - شاي حليب!؛

بنسوييه مسلسل طاش ماطاش

فصله من فصلات الزمان !!!؛؛

مرة ثانية إبنعزمك علي مندي

Chai-7aleeb said...

لا تنسونى المره اليايه

راح أييب لكم نقصه معاى

مربين مع دقوس صبار

Chai-7aleeb said...

TRY MY HOTMAIL EMAIL ADDRESS.IT SHOULD BE WORKING.

lawyer said...

ههههههههههههههههه

امس كانت قعده ممتعه

ما قصرت ريما يمعتنا


على فكره قاعده اقرا الكومنت وايد منكم ما اعرف طلال الرشيد



المرحوم الامير طلال الرشيد
شاعر و امير سعودي

و صاحب مجله فواصل الشعريه

و من اشهر ما كتب
يا صغير ما يكبر باللقب

lawyer said...

لسماع قصايد طلال الرشيد

http://www.dwaihi.com/hm/25tlal.htm

Яeema said...

طلال الرشيد كتب

علمتني وشلون أحب
علمني كيف أنسي


---------------------

بعض أحوال

نا مقدر أكون .. اني حبيب في بعض أحوال ** أنا كلي أجي ..

------------------
ما جته

يحتريها موعد آمال كبار ناجته .. يحتريها حافظ بعض الكلام اللي يبلغ حاجته

----------------------
سنا الفضة
جتني وشافتها عيون حايرات ** ذا شعاع الشمس او هذا سناها
------------------------
أموت من فرقاك

أموت من فرقاك .. و أموت بلقاك ** وأموت من جورك .. و أموت بحنانك
------------------------
تسوى عيوني

ماقلت احبك ولا قد قلت ماحبك ** احب مالي عيوني وانت تسواها



كان إسمه الملتاع
إسم الشهرة

Яeema said...

ان حكت

ان حــكت غــار السكوت من الحكي

وان بــكـت يـحسـد مدامعها الغرور

كــنها والشمس خــصم ومشتــكي

وبــين ذيــك وذيــك عذبت السطور

الثــرى يـــا مــايـســــه مغــروركي

ومــن يــلومه ما يعرف سر الغرور

والجــمــال امــرايته فـــي وجـهكي

والبــها لــــه فـــي جـفن عينك فتور

الــحـــلا يــا حــلوتي شـــبّه بــــكي

مــنهكٍ حـــرفي ويشـكي به قصور

والحــروف اتـهني احروف اسمكي

والاريــــج اختال في عرس العطور

يا غــريره ياغــرورى مســــــلكي

تـهت والا تـاه عـن كـــــفي العثور

فـــي طريقي ضاعت الخطوه لكي

ماتـمـيز بيـن نــار وبــين نــــــور
طلال الرشيد

barrak said...

ما يلين لكل واحد، ولا لكل من بغاه

تخيلول كتبت هذه الابيات في 1997
اي قبل تسع سنوات
عيل اللحين شلون
اتمنى اعادة صياغةالقصيده بروح ناضجه

yoyo said...

:) حلوه الذكريات
والله يرحم طلال الرشيد

Яeema said...

barrak
كلماتي مموجة بحب و ألم
ما أقدر أكتب هالنوع بدون تجارب

تزوجت
و راحت ذيييك الأيام

لازم أحب و أنحرم و قلبي يعورني عشان أكتب

Яeema said...

yoyo
حلوه و بس
ومالك أمل تتكرر
إستمتع في سنك

mishari said...

كل مالى واكتشف العيايز :P

Яeema said...

mishari :
الشباب شباب القلب

Chai-7aleeb said...

صباح الخير

ما قدرت أوقف من الضحك البارحه على مسرحية كازينو أم عنبر

لازم تشوفينها

Яeema said...

chai-7aleeb
توني أقوم من النوم و ما أدري إشلون بعدل نومتي واااااااي لا تحفس نومتك بهالعطلة ههههههه

أروح اليوم أشتريها مالا يهمك إنآزرك في الضحك
يالرب الله لا يحرمك و يحرم الجميع من الضحك

ممكن أضحك؟
هاهاهاهاهاهاهاهاها
يوم قتلي مت من الضحك تخيلت كوبك إللي بالصورة إختض و طاح الحليب
مثل الميكيآت
هاهاهاهاها

nice said...

موشرط انا او غيري نعرف منو طلال الرشيد
لانه شعره شعبي على ما اظن
فعقب 100 سنة محد بيعرف منو اهو يعني الغالبية سمعت بأمرؤ القيس وجرير وعنترة وغيرهم رفم مضي اكثر من 1500 على اشعارهم
على العموم كل حرفة ولها سوق واليوم شعبي وباجر عجمي :) يعني عيمي

Alather said...

حلوة الذكريات ..
وحلو الواحد يكتبها ..

لا اعلم احقا بعد الزواج ينتهي كل الكلام ويبقى الكلام اللي انكتب على الورق ما ينعاد..

مادري هذا اللي حسيته من ردج

وبالنسبة للشعر رغم حبي له.. ورغم محاولتي لكتابة الشعر لكن ما يطلع معي غير النثر
والخواطر..
الا اني بعيدة عن الشعراء وما اعرفهم ..
احاول لكن يكون عابر


والحين اسوي بحث جديد يتلخص بشاعر جذبتني ابيات من اللي حطيتوهم..
الله يرحمه..