Tuesday, June 06, 2006

هوشة رقم واحد

أنا : هلا والله بوفلان إشلونك شخبارك؟
بولعيال: والله بخير الحمد الله ، ها شالمسج اللي دازتلي إياها ، إفتتاح مقر الفارس؟
أنا : إييه والله بس حريم و الريال جنتل حدة ، ما عبركم و قال ليديز فيرست.
بولعيال : ترا ماكو روحة إنسي
أنا : ليييييييييييش!!! كل حريم و ماكو ولا ريال والريال رفيجك و مرته من عمر جيرانا بالشاليهات !!
بولعيال : لما أشوف الوضع عنده، ما أبي إتروحون أماكم مسخرة مثل إللي صارت عند ديوان واحد من الربع، خلط حريم و رياييل ، مو من سلكنا و لا أرضاها علي، إنتي ما إتمثلين روحج ألحين ، إنتي إتمثليني أنا ، شيقولون لييه قالوا مرت إفلان قامت إتروح من مقر ليه مقر!!؛؛
أنا : و من قال بروح من مقر ليه مقر ، أولا هذا نازل بمنطقتنا و ثانيا قالوا بس حريم و ثالثا بشوف توجه ، ما يصير أعطيه و أنا مادري إشبسوي! مشاري العنجري ماشي حالة بس الصوت الثاني وين بيروح! ويين المصلحة الوطنية ، بس عشان هذا يصيرلنا و هذاك ولد خالت عم أم أبوي أصوتله! لا ما أعرف جيذيه !!
بولعيال : الحين بتفهميني كل إللي نازلين إتهمهم مصلحة البلد، وإلا اللي قاعدين يصوتون يبون واحد يتكلم عن الإصلاح و الفساد، يا حبيبتي المشكلة إن صاير المجلس برستيج حق البعض والبعض الثاني عشان يخلصون مصالحهم ، أنا أقولج منو الزين و صوتيلة ، و بعدين لازم إتعرفين شغلة، لازم واحد من عندنا يطلع و واحد من الفيحا يطلع و هذا إتفاق .
أنا : شنوووو !! أعطي مقطوع! ليييش و شنو يعني إتقوللي أصوت حق فلان ، لييش أنا مالي رااي !!
بولعيال: يوبا رايج علي العين والراس بس قاعد أعطيج الزبدة ، أنا أدرى منج بهالمواضيع و شفتي من جم أسبوع منو يايلنا الدوانية و شنو قاعد يتكلم عنه ، و جان تبن أييبلج أشرطة شوفي و حكمي علي الريال.

وبعدين تعالي !! خذيتيني بشراع و ميداف ، إنتي مو بتسافرين! و ماراح ترجعين إلا لما إتخلص لنتخابات! يعني علي لويتج هذي و بوفلان إتصل و شوف الوضع و بالتالي ماراح إتصوتين !!
صج حريم ، تبون إتروحون حق بلاغة الشف و إنتي بما إن مافيج بلاغة شف، فإنتي بتروحين عشان تكتبين بالبلوق إنج رحتي !!

أنا : وااااي إشفييك بتثقف ! مايصير الكل راح و أنا مادري شالطبخة!
إنزين إشمعنه الفارس يتروحين ! إشفيهم الباجي ما تبين إتروحين ! حتي المقار الإنتخابية صار فيها ناس راقية ! عشان سكان منطقة و منطقة !
أنا : إيييه شوديني حق الخنة ! و بعدين ما أحب ناس عفا عليهم الدهر ، أبي دماء جديدة .
بولعيال : يتفهميني ألحين إن فجئة بتدورين دماء جديدة .
أنا : واااااااااااي بس بس ماني رايحة هونت !
أنا : ( أدق تليفون علي الصالون ، أبي موعد حق شعري بسويه )
بولعيال : إيييه أحسنلج خلج من الإنتخابات و خرابيطها و ردي علي تزهلقج .
أنا : ( بس بيني و بين نفسي – المشكلة مو فينا ، المشكلة في الرياييل و طريقتهم في إختيار المرشح ، و يبي يفرض إللي قاعد يصير علينا – إنزين أنا مستقلة و أهوا مع مصلحتة و منو راح يوقف وياي – أقوله ثقافة – يقوللي يا عمي يا مصلحة يا بطيخ ، راعي هالدوانية شقول و إحنا وراه كبيرنا ولازم نسمع كلامة ، الشياب ما يبون يعطون فرصه للشباب و الرياييل ما يبون المرا تدخل في هالمعترك من باب الحشجارة و العادات والتقاليد )

و يستمر مسلسل المرأة والإنتخابات

39 comments:

Anonymous said...

Wow...akeed hal mawtho3 ga3d yeseer fe KEL bait al7een.
يا حبيبتي المشكلة إن صاير المجلس برستيج حق البعض والبعض الثاني عشان يخلصون مصالحهم

tara kalama 9a7 bas mo 3ala ilkel.

oo basech salonat ya reema..tara bayeey oo bagar3ech 3ashan etwafreen 3ala nafsech ildarb ebhal 7ar :P

Diver said...

على فكرة الي يعتقد ان النتايج راح تختلف بشكل كبير عن السابق بسبب دخول المراة غلطان على فكرة لاني شفتها عندنا و سمعتها من الربع تقريبا كلهم البنات في البيت يقولون لنا احنا السباب ها قولولنة منو تبون بعطون عشان نعطيهم
وبس

3ateeja said...

تدرين منو المساكين
اللي ازواجهم عسكرييين
يبيع ويشتري ويراهن على صوت مرته
لا عزاء للنساء :)

Mohammad Al-Yousifi said...

أمتنع عن التعليق لأني منسجم مع زوجك بقوانينه

nice said...

غريبة الرجل يفرض رايه
قد يكون اقدر على معرفة الرجل من بين المرشحين يمكن مختلط معاه
لكن مو سبب يفرض رايه
في نهاية شهر 6 الجو خانق وحار من من النساء بتروح خاصة في مناطقنا الداخلية وتنتخب
ترى فيه دور وزحمة وتنطر خارج الصف بهالحر والله بتسيح
لكن الله يعينها
بو العيال قوليله انشالله وبالصندوق حطي الي تبينه وحكمي عقلج
العبد الجادر زين :)

Unknown said...

انا ما اخلى مرتى تروح حق مرشح الا اذا كنت معاها بروحها لا
وزوجج الصراحة كلامه صح شنو يعنى المرة تروحين تتدعس بين الرياييل يعنى وين الرقى وين الاحترام حق خصوصية مجتمعنا
ترى هم نظل احنا نبى الاحترام بالتعامل والكلام الزايد بين المرة والريال وروحة المرة بروحها مقر انتخابى شكلها مو حلو احس
تحياتى
وصابر لحسين الجسمى

lawyer said...

انا ما اقدددددددددددددر اقول اكثر من الي قلتخ لج في التلفون
لا تعليييييييييييق

مهما كان هذا بوعيالج اطب فيه بيني و بينج عادي
بسسسسسس ما ابي اتكلم عن راييل الكويت اهني
اخاف احتاج صوووووووووتهم باجر

Unknown said...

يبه انا مع شئ معين
لما مرة تروح مع مجموعة حريم كبار وشكلهم محترم هذا اوكى بس اللى صاير فى بعض المقار شئ مخزى لدرجة ان بدأت تطلع اشاعات على وجود بعض المرشحين ان يتعمد يخلى نوعية معينة من الحريم تكون موجودة فى مقره
وبعدين البنت الزينة زينة
والتوجه الانتخابى ممكن الوحدة تاخذه واهيا قاعدة بالبيت والمقر الانتخابى مو المدينة الترفيهية والا كوفى شوب
مشكلتى ما اعرف ازعلكم :)
يبه تبون تروحون اشغل الوانيت واحطم بالقمارة ورة اوفتر فيكم بالمقرات الانتخابية
ويا اخت عافور خفى على شوى :) ترى الدنيا ما تسوى الانتخابات 29 الشهر تخلص بس ترى احنا قاعدين وهالله هالله فينى لنزلت انتخابات :)))

Unknown said...

بعدين مشارى العنجرى واقطع واذا فيج ثانى دعيج الشمري وصدقينى هذا اللى يستاهل

bo9ali7 said...

يب اذا فيه قسم خاص للنساء ترى مافيها شي يالربع..بس بالنهايه الزم ما على المرأة ريلها
شكراً

nadeyah said...

هذا حديث كل بيت الحين
وبصراحه انا لو فى مكان مخصص اروح لكن مو مع بعض احس مو حلوه

المهم طلعنا نفس الدائره الحين .. وتبين الصج الوالده راحت للفارس عشان الروابط الاسريه وما عجبها الطرح زتقزل لى اول مره اكتشف سخافه الحريم جذى .. المهم احنا الحين بالبيت نقول طبعا العنجرى اول صوت ولكن من نعطى الصوت الثانى صج مافى احد يعنى الدماء الجديديه عندج الفارس والطبطبائى بالنسبه لى ما افكر اعطيهم رغم القرابه ولكن صوتى امانه ابى صوتى له دور ويوصل فعلا من يستحق

نقطه اخرى من قال ان لازم واحد من النزهه وواحد من الفيحا ؟ مره صارت مشمش وكلهم من سكان النزهه وبينى وبينكم والكل بيحجى الخنه مرفوضو وعليه علامات استفهام من السلف نفسهم ومن اهل الفيحا ... ام الشمرى دعيج ما ادرى يمكن يكون الافرب للوصول وان شاء الله لا ...

الصوت الثانى هو المشكله عندنا


وايد قرقت بس سورى شدنى الموضوع واشوف هذا تصرف رياييل الكويت يعنى احنا وضعنا غير ولاحظوا اول تجربه بتكون غير

والوعد ان شاء الله يوم السبت عند عمو مشارى لانه يوجد اماكن للسيدات الناخبات وستكون رحله للعايله كلها


تحياتى

layal said...

ضحكني صراحه ريلج علي هذي الكلمه

فإنتي بتروحين عشان تكتبين بالبلوق إنج رحتي

ذكرتيني بشويب وعيوز (مره وريلها) راحوا يرشحون ريلها رشح المتدين وهي رشحة الشخص الثاني (أبو بدله ) علي كلامها -عاد ليش مرشحته --لانه شكله حليو
لا وكل واحد منهم يعاير الثاني اللي يقول فاهمين شي

Anonymous said...

sej nisait as'al..etgoleen 7ag raylech 'bo flan'?

laish mo 7abeebi? 3umri? galbi?

wain ayam ilromanseeya belzawaj? :/

ma 3endi salfa :P

Яeema said...

mini-r:
walleeeeeeeeeeeeen
gar3a 3aaaaad!
bas tadry new look !

if i have demi moor face i will do it

Яeema said...

the S , S :
الله يخليك عاد إنت آخر واحد تتكلم، الفرعيات شغالة عندكم

هههههههه

إنتوا إذا إحظري ما تعطونة

PearL said...

ريييم : اغلب الازواج الحين جذي
و مو بس الازواج
الاخوان و العمام و الخوال

اما عن المقرات الانتخابية
صايرة مكان للقززززز
بصراحة

شي مو طبيعي

Яeema said...

diver:
we will wait and see

Яeema said...

3ateeja:
hahahahaha
ما فكرت فيها والله

Яeema said...

kila ma6goog:
ماشي
وصلت وجهة نظرك

ترا قاعدة أقراله الموضوع و التعليقات
راح أقولكم بعدين ويا منو صار رايه

Яeema said...

nice:
لا بروحون و إللي بروحون أزيد من الرياييل و راح أذكرك

إنت عبالك منو إللي يهيهي بهالشموس حق أغراض البيت و اللويا

ترا متعودين

لا ماقاللي روحي غصب
أصلا ماراح أكون بالكويت حزة الإنتخابات

و هذا كان سبب الخلاف
إذا ماراح تنتخبين ليش بتروحين عيل هالأماكن

Яeema said...

mishari:
لا تعليق علي كلامك لأنك من مؤيدين لوجه نظر زوجي العزيز

Яeema said...

lawyer :
أهوا بقى زوجي بس ، طبيتي و خلصتي
هاهاهاهاها
الله يحفظج يارب

الناشطة السياسية

Unknown said...

ليش التحرش ما ادرى والله ياللى فى بالى مستانس على كبوسكم :)))

Unknown said...

بعدين فى ناس نصحناهم واربحوا المفروض من وراى
الربح 50% و 50% وبلا نحاسة :)

Яeema said...

3afoor :
الكلام بدا يطلع هالأيام و بديت إشوي شوي أقتنع بوجهة نظر بولعيال

الهارون صار خلط

و المشكلة صج بدت إتبين

بس كان التعليق علي إذا توفرت جميع الشروط ، ليش ما إنروح؟؟

يعني لازم محرح؟
أنا غير و أهلي غير دائرتهم

Яeema said...

mishari!
khalny akamil el ta3legat dodahtny!


إيييدك إتحكك علي ال
F5

hahahahaha

Яeema said...

3afoor :
لاحقني الرفرش لما ألحين


------------------

ترا الساعة 12 رووح صل خل أكتب !!:\؛
إبروحي غايبة اليوم من الدوام

عيالي إستمرضوا

:(

Яeema said...

bo9ali7 :
مو راضي ، فقلت ألزم ما علي ريلي
هاهاهاهاههه

Яeema said...

naydeyah:
سمعت من صديقتي إشصار إهناك ، إستقبال الله وكيلج و آخر الأزياء و الموضة

قصدي إن المرشح متفقين إن واحد يطلع من النزهة ، مثل مشاري العنجري و الثاني يبونة الديننين و النيادة ملوت الفيحا

عاد ما تدرين منو الدواوين تبي هناك

و بعدين لا إتقولين قرقت بالعكس وايد إستمتعت بكلامج

أنا حدي مالي خلق أطرح الموضوع مرة ثانية ، بقوللي إعيالج مرييضة قعدي جابليهم أبرك

هاهاهاهاهاها

Яeema said...

layal :
هاهاهاهاهاها
يحليلهم إبركة والله الشياب

Яeema said...

mini-r :

حدك ما عندك سالفة
و بعدين إحنا عييب إنقول حبيبي و عمري و قلبي جدام الناس

زين إنقولها بيننا و بين بعض

( حدي أخاف من العين )؛

يبا إحنا كويتيين!!!؛
هاهاهااهاه

Яeema said...

pearl :

يقولووون بس والله ما شفت بعيني

أنا هذا إللي ماني قادرة أقتنع منه
ليييش صاير جذيييه!!؛

اليوم النيباري خنشوف شبصير

المنبر الديمقراطي
لا فرق بين إمرأه و رجل

يا حصرتنه والله

Яeema said...

mishari :
أنا لا شفت الخمسين ولا قالها الله

هاهاهاهاها

أشونهم مو وايد

يبا مالك إلا العقار و إقطع

العقار يمرض ما يموت



3afoor :
إذا وداكم بالوانيت عفية مروا علي عيالي إخذوهم يشمون هوا وياكم

ههههههههه

أنا غير بنتلي ما أركب

Unknown said...

reema
راح تتلثمين والبسج نظارة سودة وايبلج ردبول وتكربين غصب بالوانيت

Яeema said...

mishari :
مالك أمل !!؛

mishal said...

قلة الاحترام بين الازواج علاماتها الاوليه طلعت مع اول انتخابات

والله يستر من اللي جاي

ما اقصدج (ياريما)ا
=========
اللي مستغرب منّه الفساد في هذي الانتخابات زاد والرشاوي زادت

مو هم قالوا المرأه بتقضي على الفساد!!اشوفها زادت الفساد مفاسد

الله يستر الحين بيوتنا المفاتيح الانتخابيه النسائيه طالعات داخلات من بعد ما كان البيت مكان للراحه والسكينه صارت الحين لعوار الراس وعروض الرشاوي وشراء الذمم

الله ياخذهم قاعدين يعلمون حريمنا على الرشاوي وشراء الذمم
******
قالوا ديمقراطيه
والله لأطلّع الديمقراطيه من عيون جمعيات حقوق المرأه

Яeema said...

المشعل:

مو قلت الإحترام يا أخ المشعل
قلة الإحترام مو محتاجة إنتخابات عشان تطلع

إهيا الحوارات الجديدة إللي بدت بالظهور والريال مو متعود إن يسمعها ، فصعبة عليه إن يسيطر عليها

بس علا محاسنها و مساوئها

لقينا موضوه إنثير الريال فيه و نفتح قنوات إتصال جديدة

و هذا المهم عندي

خليته يكلمني فوق الساعتين يشرح و أنا في قمة سعادتي

منها الإستفادة و منها إعتبرني واحد من أصدقاءه

و هذا إنتصار للمرأه بحد ذاته

iliveinq8 said...

صراحة ما عندج سالفه اتزعلين بو العيال!!

لا تروحين ونطري ثاني يوم بالجرايد يحطون شنو توجهه وشنو قال ومنو حضر المقر ومنو علق وصور وتعليقات!!

بس حريم لازم اعناد

Яeema said...

i live in q8 :
والله ما عاندت ولا شي
هاهاهاها

والله إني خوش مرا

و بعدين لعناد مو جذيه
لعناد ليه قال روحي ماراح أروح
هاهاهاهاها
بس طاب خاطري