Monday, June 12, 2006

مشروع هوشة


أول مرة أحس إني طالعة من طوري بالشارع ، عادتا أحب أسوق و عشقي للسياقة صج صج ما راح يفهمها أحد ، المهم عازميني على عرس و إذا أحد يبي يقثني يعزمني علي عرس ، الصراحة عيزت أعتذر و إعيزت أمي إترقعلي بس بالنهاية هذا العرس صادف إن يوم الخميس و قلت إذا ما لقيت البدلة إللي علي مزاجي ماني رايحة – شطيت عن الموضوع الأصلي .

المهم من السبت قاعدة أعابل بالشوارع أدور بدلة و لوازم البدلة و الحالة حالة مع هالحر و الزحمة و المشوار بو 30 دقيقة صار يبيلا ساعتين إبسبة الزحمة .

من الساعة 6 أنا بالشارع وألحين الساعة تسع و يدق التليفون و أنا بالسالمية .

ألو ؟ ها وينج أبي عشا خللي الطباخ يسويلي

أنا : إنت وين قاعد ألحين؟

زوجي العزيز : أنا بالبيت قاعد أطالع مبارات.

أتصل تليفون علي الطباخ و كالعادة ، ماكو و ماكو – السايق برة فما يقدر إييب لغراض

أنا : ترا الطباخ ما عندة لحم مفروم ، يصير أييبلج شي من برة أنا بالسالمية

زوجي: إيييه أبي فلافل من كناري

أنا : هااااااااااا حوليييي ألحين!!!!

زوجي: إيييه مشتهي من كناري

أنا : إنشاء الله

و بدأت رحلة العذاب من السالمية ليه حولي، و مشكلة كناري إن مكانه عسر و لفة الفوق تحت ما توصلة ، وللييييييييييييين يعني لازم أدخل الجابرية عشان أوصله!

المهم وصلت ، قمت و دقيت علي ريلي

زوجي : أووووووله توج توصلين يالله أنا يوعان

أنا: إنشاء الله والله المكان زحمة و ناطرة الريال يطلعلي!

الساعة عشر و لما ألحين قاعدة أهذر بالتليفون ويا بولعيال – وصل العشا – جان أقولة يالله بعابل بالدرب زحمة مو مال أسولف و أسوق ما أركز عدل.

و الله وكيلكم توني طالعه من الفاتق مال كناري وإلا هذيك الحرمة إللي سيارتها شفر موديل قبل الغزو – سودة و طاق عليها مطر و مو غاسلتها !

جان تطلعلي مادري من وييين و أدق هرن و أترك!!

مالي مكان عشان أوخر

يا تدعمني يا أنا أدعم إللي يمي !

لزمت بريك و مدقر سيارتها بوسط سيارتي!

جان أعصب و أقولها وخري!!!

رجعي ورا خل أمشي!!!

و الله تعطيني هذيك النظرة إللي قلت الحين إبتنزل من السيارة و إلا يتكمل دوسة و تخفسلي السيارة!

جان أعيد الحركة مرة ثانية إبييدي رجعي رجعي!!!

( تذكرت وحدة بهاللحظة - إختي و حبيبتي لووير - هاهاهاها - آآآآآآآآآخ وينج - يعني يكون بقلدها بتناجر )

جان إتقرب من سيارتي!!!

أنا إهنيي ذلييت و قام قلبي يرقع!

و يا ويهج إذا مو قد الهوشة لييش رازة ويهج و داقة هرن و إمأشرة بييدج!!!

فجأه قمت أرجف و هذي إتخزني جنها عتوي لي طالعك بليلة مافيها قمرة - وااااااي خزتها نقصتني !!

ما وعيت إلا يوم إرجعت بسيارتها ورا

أنا إهنييي جان أدووووووووووووس خفت ترجع و إترد تكفخ السيارة عليييي

المهم الحين أنا حدي خايفة جان أرفع التليفون علي ريلي و أنا غشيانة ضحك!!!

إلحق !

السالفه كيييت و كيييت

زوجى العزيز علي برادة : دامج مو قد الهوشات لييش رفعتي حسج عالمرا!!

دامج مو قد إنج تفتحين الباب و تنزلين ، لييش داقة هرن و إمتركة حق المرا!!

إنتي مو مال هوشات ، إنتي حدج تضحكيين

إحتفظت بالإجابة لنفسي و قعدت أضحك علي عمري

هاهاهاهاهاهاهاهاهاهاه

صج صج أول مرة أخاف من وحدة إتخز عسا ما أحلم فيها اليوم

أبي أحد ينفخ إب- بطني من الخرعة


32 comments:

Mohammad Al-Yousifi said...

ur not alone

انا بعد طول عمري أخق وقت الهوشة:(

للأسف لست شجاعا

PearL said...

لوووول ضحكتيني ريم

صج الشوارع تنرفز
والاوادم اللي ما يعطونج طريج ينرفزون اكثر

انا بالسيارة اصير وحدة ثانية
اصير متوحشة :):):)

بس لما تصير السالفة صجية
و تكون على وشك
انها بتنقلب هوشة اصير قطوة
:):)

enter-q8 said...

اول شي خطاك السو

ثاني شي

خذيها نظرية

اي سيارة قديمة او عوده بلعي العافية و وخري عنها حتى لو معاك الحق


رحت مره المخفر

يعني بصير انسان حضاري ومحترم و ابن ناس ومؤدب و مو راعي مشاكل

قلت له فيه واحد قاعد يطالعني كان يغلط علي و يهدد و و مع اني كنت قادر ادوس ببطنة وبطن اهله اللي ما ربوه

كان يضحك الضابط ويقولي زين سويت

بس يا خوي شنو تبينا نسويله والله هالمشكل واجد و ووووو

ضيق خلق اهلي واهو قاعد يحكي لي قصة حياة كل عسكري بالداخلية لدرجة ان اخرتها يقول خلني اسدد القرض مال البيت واطلع من الدخلية

بغيت أسأله شنو أسم امه

طلعت وخذيتها نظرية الدوام البيت الديوانية اذا لزم الامر
او ابلع العافية

او اني اشتري سيارة سكراب لما اطلع وقت الزحمة

3ateeja said...

اول شي شفتي السياره اللي حاطتها اببوستج اللي طاف
لو تييبينها وتصفطينها بقرجنا راح اردها عليج
اعوذ بالله من غضب الله
بطر
ناس مو لاقيه تاكل
وناست تركب سيايير مادري شلون قايله
والله اخاف اركبها يصير فيني شي من غضب الله علي
ادري بتقولون بنت فقر
بس شسوي كا انتوا قلتوها بنت فقر وماكو فايدملاحظه: ترى علقت هنيه لأني ما قدرت اعلق هناك

تبين ابط جبدج
اكثر
اكثر
اكثر
ترى في كناري بالسالميه هههههههههههههه والله والله في
وكل مره اشتري حق امي منه
ويالخوافه انا ما اتهاوش بالشارع الا مع الشرطه
اما حريم ورياييل ما احاجيهم ...احس هلاقه والله :)
تبين ادليج كناري السالميه ؟؟؟

3ateeja said...

ايييييييي
ونسيت لا اقولج بعد في كناري بشويخ هم كلا اشتري حق امي منه
ورى ماكدونالدز الصناعيه :)
صدق المثل
صج اللي ما يدل عمي ...واييب المشاكل حق روحه
:P

lawyer said...

هههههههههههههههههههههههه

واي واي واي بمووت من الضحك

مت مت غشيييييييييييت

ريما ضحكتيني

يبا اشفيج انتي مو لايق عليج الهووشه

ههههههههههههههههههه
اشفيج عزيزتي انا ووحده لي مع الهووشه ماضي طليع


عادي صاكه وحده ببطل بيبسي

اشفيييييييييييج

لا تقليديني في الشي الي مو زين

قلديني في الشغلات الزينه
مثلا مثلا شنو شغلات زينه مدري
قعدت افكر ساعه
بس ما لقيييييييييت


كلش لا تتطبعين في كل اطباعي الي اتييب الماحي

Unknown said...

لووووووووووووووووووووول
مدام منتو قد فرع العضلات تتهاشون شحقة ؟؟؟؟؟؟؟؟؟؟
تعالى اليوم مرينى عقب صلاة العصر اقرى عليج واخلى بنتى تنفخ ابطنج ننفع احنا فينا عرج سادة :P

MSB said...

al7mdla gat saleema!! :) hehe i get into confrontations like that kil yom bil share3! tha7akteeny!! :)

نون النساء said...

امبيييه ريمه


اتذكرت يوم كفخني سيتي باس
بطرف سيارتي عند الدوار وكان اكو شرطي شاف الحادثه

المهم ولا ايقوللي اختي السيارة الليت انكسر اشوي اذا تبين انخليه يدفع حق التصليح



استحيت اقوله خله يدفع
جان اقوله لا خلاس خله يمشي



>>>>>> حدي مسكينة




بس سالفة المخازز هاذي والهوشات مالي فيها لا ناقة ولا جمل

امبيه لو مكانج أقعد اتراجف من الخرعه
وأوقف وما اتحرك من مكاني مو ليّه

تعالي عاد شوفي الزحمة اللي اتصير وراي


*^___^*

نون النساء said...

تعبت وأنا اخذ حرف ص واسويله كوبي بيست

انا اليوم بشتريلي كيبورد جديد

Unknown said...

بعد زوجج حده مزاجه اوكىىىىىىىىى
كنارى انا بالنسبة لى ملاك وديع يرفرف على قلبى مع دهن الحمص اموووت عليه :P

Diver said...

اولا نفخة البطن نخليها حق ابو لعيال
ثانيا صراحة لو انا مرة متزوجة ما روح حولي بعز الزحمة عشان ريلي لو يبيض بس الظاهر انج تحبينا وايد
على العموم يستاهل بس المرمطة لنا احنا الرياييل انا ما احب ام عيالي اتمرمط بحولي بالازدحام
ثالثا مالج شغل اذا بلشت الهوشة لا ترجفين و تينين حق الي جدامج انج خايفة بيعيها اذا طقوق الا سوستي الي عليج
رابعا اخذي دورة عند لوير قبل لهواش

Яeema said...

kila ma6goog :
من نكك يبين
هههههه

Яeema said...

pearl :
أنا ما أعيل بس المشكلة بلوير
قبلها بيوم فهمتني إن هالشي عادي فقلت خل أجرب

ههههههه
لهواش له أهله

Яeema said...

enter- q8 :
خطاك اللاش
أهم شي بالبوست تدري منو؟

إنني أشوفك إتعاود نشاطك لأني صج صج فقدك كتاباتك

والله كلامك صح عن هالنوعية من السيارات
جنها باخرة راكبة فما يهمها شي!؛

خلاص بحاول أرد علي طبعي القديم
لما أسوق
أعتبر اللي يسوقون كلهم ميايين و ما يعرفون يسيقون
فما أحتر

ماني شارية سيارة سكراب
بشتري هامر
يخافون و يوخرون

Яeema said...

3ateeja :
علي قولت الشاعر خالد الفيصل
لكل شراي بضاعة و سوق

أنا لو ياتلي من أمه أفججها إوصال و أبيعها ، أخاف بس بخليها علي عدالها
والله مو بطر
إللا أخاف من عيون الناس
ههههههههههه


وااااااي حلفي!؛
أقولج شي يحرج؟
يقوللي ريلي يبيلي مال حولي طعمه غير و يوصل بيتنا إبسرعة

:ppp

كناري إللي بالسالمية بشارع المطاعم
تبين أسمعلج إسم مطعم مطعم؟؟
ههههههه
إللي بشويخ ما أدلله بروح أكتشفه

Яeema said...

lawyer:
آسفة والله ما هقيت العملية هذي صعبة
بس إنصدمت من الواقع
هههههههههههه


يا حلوج و حلو أطباعج
بس لازم أعترف بشي
أنا أصلح متفرجة أكثر من إنني أشارك
هاهاهاهاها

Яeema said...

mishari :
لا تجمع الله يخليك
لووير قدها وقدود

أنا إللي خواره حدي

قول حق بنتك بوس الواوا

ولدي هااب فيها هاليومين

Яeema said...

msb:
one day i will go with you in the car and take a lesson

hahahahahah

Яeema said...

noona:
ههههههههههههههههههه
أليفه هاااااااااااا

إنزين إنزين

يوم بوديج وياي و بتهاوش بشوف منو إللي يخاف أنا و إلا إنتي

الله يسلمج حياتي

Яeema said...

نون النساء:
ههههههه
مرة دعمني وايد و ماكان لابس حزام الأمان ، فنزل من السيارة و دم يشخل من راسة
نسيييت الدعمة و لهيت فيي أقولة
عسا ما تعورت!!!؛
أييبلك شي أدق علي أحد !؛
شطة و لوية
قام يضحك
هاهاهاها

Яeema said...

nadia anza7a:
loooooooooooooooooooooooooool

فضيحا إنتيييييي

هاهاهاهاهاهاها

إيييي يبا أخاف

Яeema said...

mishari :
ريلي إييي ماكان جذيييه
أنا علمته علي المزاج بالأكل
بس مشكلته إن يحب الأكلات الشعبية
حمص، شاورما
وااااااااااي يعني يعنيني خيطان وياه لأنه سمع عن مكان يسوي شاورما زيينه
جنه إسم المطعم بنابيع لبنان
أو نبع الصف
شي فييه نبع

و بعدين لأني راعية مزاج فا أحس بشعور إللي مشتها أكلة معينة

يعني إمجابل مبارات إشبييبلة غير حمص و فلافل و شاورما و بيبسي بارد

بعدين يدورني تالي الليل يبيلي مرقدوش و إلا إيينو بهضم إللي كليته
هههههه
ما قتلك لا تخربط عالعشا!؛

neelaah said...

شوفي اهي اول هوشه
عقبها يقوى قلبج
و يصير الهواش مثل شرب البيبسي
عاااااااااااااااادي

Яeema said...

diver :
أقول؛
مو سالفة محبة
السالفة أكبر من جذيي
أشوف الزحمة بالشارع ولا أشوف عسارة ريال مشتهي شاورمة و بيبسي و بجابل مبارات ، يطلعها من جبدي الطلعة
هاهاهاها
والله لو يقوللي أبي الشورما من المريخ مستعدة أييبها

أنا ما تمرمطت
أنا قاعدة معززة مكرمة بالسيارة تكييف و اليال إييبلي الطلب ليه عندي

و بعدين تعال!؛
بو يوسف لو يطالعني بس أعرف إشيبي و أيبله إياه
أبو عيالي و صديقي و كل شي لي بهالدنيا
و متحمل عسارتي و تحلطمي
الكلمات ما إتوافيه حقة والله

و إذكر ربك لا أروح البيت و أتهاوش وياه
هاهاهاها
و بعدين هم أنا طيبة و ما أعاسر و أحب أدلع

Яeema said...

neelah :
ما أظن والله
هذي مو أول مرة أجرب أتهاوش
مشكلتي ما أحب أحد يطالعني بعين

يقولون حتي هواشج غييير
هاهاهاهاها

esTeKaNa said...

we we we !!

اسم الله عليج وخطاج السو

طلعتي جبانه مثلي؟
heheheheh:)
من خاف سلم وانا اخيتج
تدرين انا مرة دعمني واحد بالجامعه
زحمه
لويه
وما بقى احد ما شافني
ومن الخرعه توه مجبل الريال الا انا كاتبه له ارقام ابوي واخوي وسايقنا
وطبعا مليونتعش مرة قايله له اسفه
كسرت خاطر روحي
:)))

iliveinq8 said...

الصراحه اول مرة اقرأ موضوع لج كامل!! قلت الحين بتصير هوشه وطق وشد شعر ودم .. ضاع وقتي وانا مشدود انطر هوشه :/

3ateeja said...

بالشارع اللي ورى ماكدونالدز
انا امي اتنسى وااايد على كبر
اهي وابوي
فمتعوده عادي
روحي يربيه مال شويخ ترى فللللله
وانا لو مكانج اييبله مال السالميه واقوله هذا مال حولي وافتك
ههههههه

neelaah said...

ريما
واااى...أنا ماستغربت
أولآ..سلامات..ثانيآ انتى صح هالاشكال ماتداحرينها أنا مثلج اخاف,الا اذا نيلة معاى لأنها تقوم بالواجب

layal said...

ضحكتيني
فجأه قمت أرجف و هذي إتخزني جنها عتوي لي طالعك بليلة مافيها قمرة

لين احد يخز اقول وخروا وخروا عنه قبل ما يقلبنا ضفادع

mishal said...

ههههههههههههههه

تذكرت
لما كنت بالمدرسه وكان المدرس يقول قصة المتنبي

لما هرب وناداه العبد
هرب ورجع ومات
وقتها قال رفيجي مقولة شهيره في الصف
الفلخه نص الرجوله
****
هج ...هج..اجررري

***
لما كنت صغير كانت الرجوله ماسكه معاي غلط
تهاوشت مع 8 وانا لحالي وماقصرت فيهم والله انحاشوا ورجعوا لي 12 كان بينهم 2 كبار
تخيلي فيّلق كامل على واحد
المهم حطيتهم فوق بعض وطقيتهم طق لكن بس والله تعبت احط واحد فوق الثاني واضرب فيهم وهم 12 واحد واكبر مني ومعاهم بايبات وعصيان وكل شي
المهم بعد نص ساعه من الصمود طحت
وراسي كله واذني كلها دم
قمت وغسلت راسي
وحقي اخذته في حلقات قادمه

والمشكلة صارت في شهر رمضان وانا صايم وما افطرت
وشافتني بنت جيرانا وقالت لأمها مشعل تهاوش مع شباب واجد اول شي طقهم طقهم وبالاخير طقوه
وامها طبعاً بدورها علمت الوالده

لكن لما كبرت صرت اقول يالله سترك والسلام

=======
اذكر لما فكيت سيارتي من الوكاله كنت صاحب ثاني سياره من هالنوع تدخل المحافظه
وكنت صافط السياره بالسوق ولما رجعت لقيتها مدعومه
مو قهر