Thursday, May 24, 2007





ما أقدر أتحكم بكل الناس

و بنفس الوقت ما أحب أخلي الناس تفرض علي سلكها

في كل عايله لازم تطلعلك وحدة تستخف دمها و هي مرا كبيرة


أول لما كنا يهال كانت المقاعد غير

بحكم إنهم ما يقدرون يتكلمون بمواضيع معينه

فدايما يقولون لنا طلعوا لعبوا بالسكه


بعد ما كبرنا إشوي همن ما يسمعونا مواضيع معينه لأن عيب


إنزين

لما تزوجت ، صاروا ينظرولي بنظرة غير

إنزين أنا معاكم إن إللي تتزوج تكون نوعا ما خلاص تقدر تتكلم عن مواضيع معينه

بس مو جدام الناس

و مو مع كل الناس

بيني و بين ربعي

وهمن لقراب حييييييل حيييييل

مو بمقعد وفي عماتي و بنات عمتي و أمه لا إله إلا الله !



في وحدة الله يهداها

، ما إتكلم إلا بهالمواضيع إللي جدا خاصه علي أبو تبي تضحك الناس.

و أنا قاعدة مالي خلق أسمع لأن بس عاااد زادوا التشيله

وصارت لوعة جبد



إللي أبي أفهمه؟

ليش عبالهم الناس إن هالشي يضحك؟

ترا حتي بالمسرحيات زايدين بالسخافه و التنغز


ترا إللي يضحك هو الموقف مو هالكلام

يا حلو ناااس ليه سمعت كلامهم يدش بالعقل والقلب

يا زين الرقي بالحوار

يا زين الرقي بالكلمة والنكته

تدخل الكلمة الأذون وهي مرتاحه

يا حلو لي قمت من مقعد خفيف و ملائكتك مرتاحه

ترا الراقي راقي بلسانه

لا بلبسه

ولا باسم عايلته



ما أقول إلا

الله يهدي الجميع بس




28 comments:

Unknown said...

والله يا ريما خوش موضوع

بس الحيا نقطة بالجبين لا زالت زال الحيا

يعنى سواء جدام حريم او لا شلون تتكلم جذى وبامور خاصة جدا على سبيل الضحك
لو قاعدة تعرض مشكلة
او تقول هم نفسى نقول ميخالف لكن علي سبيل الضحك
ما عليج منها هذى شكلها شيطانة وتبى تحر الحريم اللى وياها مو عارفة شلون وتحسب الذكية بانها بالهطريقة صح

بعدين اللى تتكلم جذى تكون ابتعدت عن امور الرقى نهائيا

مع العلم واكررها ان ما فيها شى البنت تتكلم بنظرى مع وحدة قريبة عليها باستشارة او شي مضايقها بس غشمرة وجذى
الرياييل ما يسونها

Purplecious said...

my answer to your question:

الناس عبالهم ان هالشي يضحك لأن في ناس تضحك فعلا على هالسوالف
و هالنوعية تلاقي احد يعطيها ويه و يجاملها و يضحك لها

هذول فيهم نقص

و اذا ما شاركتيهم قالوا عنج مغرورة و شايفه عمرج

أنا أقترح عليج ريما تحاولين اول شي تغيرين الموضوع اذا بدت هذي تتحجى او تدشين بحوار جانبي مع اللي يمج و اذا كلش كلش ما قدرتي قومي
مو ملزومة تسمين بدنج

Breeze said...

عيل أنا ما أواطن أسمع أي نوع من أنواع هالسوالف !! و الكل عارف حده معاي !! سواء متزوجة او مازلت آنسة !!!؟

و في أمـه خير واحد يسولف جدامي بجذي مواضيع !! ما يدور غير عمره حزتها !!

حتى من القرااب حيل .. ما تدور عندي نمونة هالسوالف لأني أعتبرها أشياء شخصية بحته خاصة بذاتي و بس !!!!؟

يعطيج العافية على هاللفتة اللي المفروض الكل يقرى عنها و يلتزم حدوده مع الغير ..

:))

Hungry-Healthy-Happy said...

مساج الله بالخير :)

هذيل موجودين بكل عايله مثل ما قلتي
والمصيبة لما ما يحترمون وجود اليهال
في سوالف كنت أسمعها وانا ياهم لما الحين أذكرها.. بس توني أفهم معناها

هالمواضيع لازم ما يتكلمون فيها أبد
في بالدنيا مليون و مليون سالفة
يعني حبكت بتتكلمون بهالسوالف باليمعاااات!!!

بس صاجه بربلشوس
الناس يمكن تجامل و تضحك
بس مو معناتا إن الموضوع يضحك
قد تكون ابتسامة إحراج

أنا فكرة الناس اللي تستهبل و تحاول تقول أشياء تضحك أصلا مو بالعتها فما بالج باللي تسولف عن هالمواضيع؟

عثماني said...

مسا الخير ريما...يمكن انا مالي علاقة بقعدات الحريم... بس فعلا اذا كان هذا يصير ..مشكلة
حلاة المراة بحياها..و اذا راح الحيا ..خلاص
هالنوع من الحريم مال تجعم ..و مو مال تنعطى ويه...علشان تفهم ان هالسوالف ما تضحك

كادي said...

هلاريما
مثل ماقلتي الراقي راقي بتصرفاته بس في ناس وايد يحبود يخربطون ويلاقون من يضحك
انا شخصيا عندي خطوط حمرا ما أجاوزها ولا أسمح لأحد يتجاوزه معاي لأن في ناس ماينعطون وجه وممكن يتمادون لأقصى حد من الجنسين

Kuw_Son said...

إذا انعدم الحياء انعدمت معاه وايد أشياء..

الرسول صلى الله عليه وسلم يقول

الحياء لا يأتي إلا بخير

و المشكلة الحين لازم تقعد مكان و تسمع واحد ينكت بنكتة من تحت السر و نازل !!

والله عيب !!

و في مواضيع ما تنقال.. ليش الناس استمرأت تناقلها و الخوض فيها !!

صحيح ما قلته أن الواحد زين بحلاة لسانه و خلقه مو بعايلته !!

الله يكون بالعون

2 u ALL said...

سالتي سألت عنك العافيه ..!!! فمريت أقرء "جديدك" ...!!! لقيت "جديدك" هو نفس "قديم" اهل ديرتي وناسي ...!!؟

فأهل ديرتي وناسي كم قلتي ...!!! لايعرفون ما يجب أن يقال ... وما لا يجب أن يقال ...!!! ولا مع من يقال ...!!!ولا متى يقال ...!!! ولا علم لهم بفن "المقال" ...!!؟

والرسول عليه أفضل الصلاة والسلام يقول : أتركو القيل والقال وكثرة السؤال ...!!! فهل من متعض ...!!؟

فأتركي هذا كله ...!!! وتعالي عندي أقرئي خير "المقال" أحسن لك من القيل والقال ...!!؟

Shaima'a Alkandari said...

صح هالحجي بس في سوالف لازم ماتنقال جدامنا لانها سوالف خاصه ولازم مانسمعها
عالاقل الاهل مثلا يقومونا علشان مانسمع هالحجي والشي اللى مااحبه ان اللى وياي بالدوام عادي يسولفون سوالف يعني عيب تنقال وتعتبر من الخصوصيه ومايهتمون حق اى احد سواء كبير ولا صغير متزوج ولامومتزوج وصج احس باحراج وكله اقوم واطلع من المكتب واصير جني مشرده بره واقعد ازفهم واقول لهم عيب يعني هذي اسرار حياة شخصيه وخصوصيه لازم ماتنقال فيقولون عادي شنو يعني

مادري ليش يتفيخرون بهالمواضيع وتصير قعده مطوله قطيعه


مهما يكون لازم محد يتحجى بهالمواضيع بالمره لانه موفخر

الزين said...

عافاج على هالحجي
المشكلة ان هانمونه زادوا
وصار الحجي ماله معني
والحوار ماسخ وساعات تشمئز نفج منه
حتى الملائكة تهد المجلس وتطلع
الناس صاروا سطحيين
للأسف

http://al-zain.blogspot.com/

KQ8 said...

بسيطه ..اذا مايزالج المكان قومي من المقعد..جود يحسون

فراوله said...

مساالخير والكرامه للأخت
العزيزه "ريما"اذا سمحتيلى أكون ضمن
الناس اللى تستهويهم مدونتك الجميله جدا
والله انه كلامج صج وما يختلفون عليه أثنين ،وصدقينى اللى قاعدين نشوفه هاليومين يشيب الراس صار كلشى عادى الناس ماقاموا يحاسبون على كلامهم ولا تصرفاتهم وصار كلشى عادى وبدون حساب
والله لو كل واحد حاسب على كل تصرف قبل مايبدر منه جان صارت الدنيا غير دنيا

سامحينى على الأطاله بس موضوعج وايد حلو
:)فراوله

Яeema said...

mishari
كلامك صح
كنت أقصد مو الأمور الخاصه
الغشمرة الراتيد
و هذا يصير حتي بين الرياييل و شياب بعد

ما أدري جيلي مو قادرين نتحملها





purplecious

والله يبتييها يييييييييييييب

صاااجه مغرورة و دمج ثقيل بعد

و فعلا أدخل بحوار مع إللي يمي و أشونه يصادف إن كل الاقي احد

Яeema said...

breeze
الدنيا بتخليج تشوفين و من ناس ما تقدرين إلا إنج تقومين من المقعد

ومثل ما قلت ما إنشوفهم إلا من حريم كبار

-----
الله يعافيج حبيبتي
;)





joli
ما أدري من لغلقه إللي بالناس عبالهم صج هالشي يضحك

أما ابتسامة الإحراج!!!!؛

إشكثر إتحووووشني

وصدقتي علي الإستهبال

Яeema said...

عثماني
صباح الخير .. هالشي مو بس بالحريم صدقني
هم الشييااب

و تخيل الوضع
شايب إشلون بتجعمه؟؟






كادي
والله عدل كلامج
لحدود أحلا شي
و على قولتج
لاقين من يضحك لهم

Яeema said...

kuw_son
والله أما هالسالفه!!!؛
إللي بين الناس و صوت عالي و سمعوا سخافتي

أمبيييي و الله جم مرة قمنا من مكان بسبتهم

و إلا إللي يسب رفيجه علي أبو يتقشمر وياه !؛


واااااااااااي لأ لأ يعني ؛






2 u all
الحمد الله علي سلامتك و علي رجعتك

إييي و الله أهل ديرتي أول
يا زين مقاعدهم و كلامهم

و إنشاء الله نمرك

Яeema said...

shaima'a alkandari
ولا لما يكون يوم الأحد
الله و يناقشون مواضيع فوزيه دريع

تعالي سمعي عااااد

والله لو برنامج مفيد جان ما جابلوه و تكلموا عنه هالكثر





zozota

غييي والله يا شين السطحيه بهالمواضيع
تحسين مغيبين العقل معطينه تقاعد

Яeema said...

kraktoa
ما قمت أروح الله وكيلك



فراوله

اولا يزيدني شرف انضمامج لنا بالقائمة

أثرتي نقطه مهمه وايد
يحاسب نفسه قبل لا تطلع منه الكلمة


الناس مو نفس الشي

وما طولتي كلامج عسل علي قلبي

شوقتيني علي الفراوله

charisma said...

فى كل عايلة تقريبا اكو هالنمونه
واكثرهم حريم كبار ترى
وحريم اول ما يهمهم احد لووول
طاقين الكل بالطوفه اذا تكلموا

انا اذا شفت هالناس دشوا بالعميق اسحب نفسى
لان مو بس اهى تتكلم
لالالالالالالالالالالالالالالا
تبينا كلنا نتكلم ونشارك
وتعالى عاد شوفاى المصخره
حتى خصوصياتهم مع رياييلهم تطلع
لا حى ولا مستحى

ReLaaaX said...

يا زين الرقي بالحوار

يا زين الرقي بالكلمة والنكته



بالضبببببط





مسكينة تكون فيها علة مقروده .. وإلا أكو انسان طبيعي بس يسولف بهالسوالف وماعنده غيرها ؟





والمقاريد اللي معاها يجاملونها على بو كبيره ومايقدرون يقولون لها شي






ريما .. ودي اطبع هالبوست واوزعه عليهم

SHAHAD said...

عندنا نفس هالنوعية
بس احنا بزيادة
عادي جدام الكبير والصغير / الريال والمرة
الله يعين بس
مادري هالنوعية عبالهم اذا شي في سبيل الضحك عادي !!
بس شنقول غير ان لم تستحي فافعل ما شئت !

الوجد said...

الموضوع كثير حلو

ما ادري ليه هالمواضيع
لازم تتناقش في الجلسات ؟
ولازم الكل يشارك فيها؟


انا معك انه ما يضحك وانه يخلي القعدة كثير سخيفة

الحيا زال من وجوه الستات وكل وحدة تبي تتفشخر اكثر في هذي المواضيع

يضنون انه هذا التفتح والرقي
الله يخلف عليهم بعقولهم

3ateeja said...

في كل عايله لازم تطلعلك وحدة تستخف دمها و هي مرا كبيرة

<<<<< عندنا وعندكم خير

انا بعرف وييييييين الخصوصيه
اذا هالشي عالملأ او حتى بين الوحده ورفيجتها
الخصوصيه بالحياة الخاصه
اسمها حياة خاصه
والله بمقعد يوم الاربعا عند وحده من الاهل والده قعدنا ننتقد هالموضوع وطبعا كوني بنت وانتقد هالموضوع و الوالده مسكينه اصلا ملت وهيه تعضض هالبرطم قامت ما تعضضه هونت ...لأن فعلا شي سخيف
يعكس شعور بعدم الراحه بالحياة الزوجيه
وشعور بالنقص يتم التنفيس عنه بصوره اخرى ببأسف وقلة ايمان فمثلهم الرسول عليه الصلاة والسلام شيطان وشيطانه بالطريج
اكثر من هالتمثيل شنو بعد
في واحد وده يكون شيطان ووحده تكون شيطانه اعوذ بالله مادري شالحلو بهالموضوع

Яeema said...

charisma
ايي والله مصخرة
لا وإذا كل من قام يشارك
ياااا سلااااااام

بس سحبة النفس أحسن علاج
لأن بس ماراح يتعدلون راحت عليهم التعلوم

Яeema said...

relaaax
طبعي طبعي محلله
بيقولولج لما كنا بسنكم ما كنا نسولف جذييي
يقولج مع الكبر هالشي يزيد
يا حصرت قلبي

Яeema said...

shahad
allaaaaaaaaaaaaaaaaaaaaaaaaah
تخيلي وضحج وهي تتكلم و جدامها ريال
أمبييييييييه
علي أبو إن كبر عيالها

فشله فشله واخزياااااه

Яeema said...

الوجد
قلتيها يا أختي
الله يخلف عليهم عقولهم

Яeema said...

3ateeja
زارتنا لبركه
ما أقصد الحياة الخاصه
أقصد التنكت إللي عليه رييتيد
يعني طريقه المسرحيات و كل مل قلتي كلمة فسروها بطريقه غلط

إتحرني هالطريقه


إستانست يوم شفتج عندي اليوم