Saturday, May 26, 2007




نحو كويت جديدة

وجيل واعي

و صيف بارد بدون لبحه


قاعدة شوي شوي أحسن من طريقه تعاملي ويا الناس

عشان أكون محبوبه

و ما أداحر أحد

، بعضهم يقولون لي صايرة سلبيه

و ما تبين تناقشين عشان ما تعورين راسج.


صحيح هالشي

سلبيه في أشياء ماراح تغير من حياتي وايد

ويمكن شي حلو ساعات

يا جماعة علي قولة المصريين

لاقيني ولا تغديني


القصه الحين :

المداحر بين البنات


وعلى أشياء تافهه وسخيفه

ثياب

مطاعم

بلد بيسافرون لها



بمسك كل بند وبشرح إشوي عنه:

محل زارا :

حرمة رقم 1: شفتي تفيحه هالمحل ، زوووووغه عجييب

( ترا يكون صج زوغه وعجيب ويقلد الماركات الكبيرة )

حرمة رقم 2: لا لا لا كلش ما عجبني صاير جنه يونيفووورم

، آخذه حق خدامتي

( تلاقون هالبنت مثلا متينه و يبيلها قياسات معينه و مثلا متحجبه

، فما راح تلاقي بهالمحل بالذات و لما تقوم من القعدة بينها و بين ربعها تمدحه وتوصله السما

بس تقول حسافه ما ألاقي قياسي )




مطعم ياباني :

حرمة رقم 1: واااي ماكي مسوي خلطات يديده و حده لذيذ

حرمة رقم 2 : ويييييع ويييييع إستغفر الله ، الله يزيد النعمة ما أدري شلون تاكلون ني إنتوا

( تلاقي هالمرا ريلها ما يرضي تطلع مع ربعها فتعذرب بالشي )


سفرة:

حرمة رقم1 : هالسنه بنودي اليهاال أمريكا إنشاء الله ميتين زايغين علي شخصيات والت ديزني

حرمة رقم 2 : و إنتي شونو ماشيه علي هوا اليهال بتطقينها درب 14 ساعة عشان يشوفون ميكي ، ينيتي؟

( تلاقون ميتيين عيالها بيروحون وحانيييين علي راسها بس أبوهم ما عندة إجازة )


دوام:

حرمة رقم 1: واااي حسافه ما قبلوا مرضيتي راح يخصمون من راتبي

حرمة رقم2 : ويييه أنا مو عايشه علي الراتب ألزم ما علي راحتي

( القصه مو قصه راتب، القصه الحين قصه ليش هالتسيب إذا مو هامج الراتب

ليش ما تقعدين بالبيت واتخلين وحدة تبي هالراتب إللي مو عاجبج؟

وترا تلاقونها أكثر وحدة تبيه ليه نزل



إللي بوصله رساله

ليش الواحد يعذرب الشي للي وده يسوي بس ما يقدر يسويي؟؟

ليش ما يتقبل إن كل واحد له ظروف خاصه؟

ليش ما يؤمنون بالطبقيه بالكويت؟إللي عند غيري مو شرط يكون عندي؟؟

ليش الحدة والنجرة بالحوااار؟

الحريم من صجي زايدة عندهم

إذا شفت شي و عجبني ليش ما أقول حلو و عليج بألف عافيه وتهنين في؟


تصدقون من النماين إللي أشوفها

أحس إن الفلوس عندهم راحت بركتها

صار ما يعجبهم شي

ما يونسهم شي

ما يترس عينهم شي

إللي عندها بيت علي شارع واحد تطالع إللي عندها بيت بشويخ

إللي ريلها فاتح لها سيارة حلوة تطالع إللي عندها شاليه

يعني حتى المقارنات بعيدة كل البعد عن مجال المقارنه



صارت القعدات ممله

و مسكينه إللي الله رازقها قاموا يقولون مغرورة وإتشيحط علينا مع إن سلكها من زمان جذيي

بس أهما مو مثبتين أول.ومسكينه حتي إللي بتشيحط خلوها شوي تشيحط مافيها شي ،

يمكن محد يمدح شغلها بالبيت يمكن شاريه شي ووايد حابته وبتشاركم فيه من وناستها في...


و إللي تزوجت و ربي رزقها بواحد عازها وكارمها قاموا يقولون عنها حديثه نعمة

و الله يعافي الريل لومه الريل جان ما عرفت الديرة

واااي مسكينه شلختوها

لا هذا عاجب ولا هذا عاجب الواحد ينطم و يسكت يعني؟

و إذا سكتوا

قالوا أم قليييب إتغبي، كل شغلها بسكات

----------------

يا ربي إرحمنا برحمتك وإبعد عنا كلام الناس

وعجبي عليك يا زمان







35 comments:

Cr8ivia said...

LOL shar ilbaliya ma yuth7ik

u r in Q8 3adi ..
ma7ib ili yitshai7e6on sij .. bas ham in the same time ma7ib ili yamshoon wi3athrebon .. mo 3ashan shay bas la'ana mo 7asilhum

the weird thing inhum yadrooon ili jidamhum iy3arefkum wiy3aref laish o ma laish .. ya3ni laish it6al3on ashkalkum ghabiya !

aThooB said...

صدقتي يا ريما

يكب الناس على وجوهمم بالنار بسبب هاللسان هذا اللي يبيله قص مع بعض الناس

كلامج هذا متأكدة ان كل وحدة او واحد يقرا هالبلوق صاير له
هذا اذا مو قاعد يصير له يوميا

شي متعب ... اييب القهر و يحز بالنفس لما تشوفين ناس يسيئون الظن فيج
او يعذربون الشي اللي بتسوينه او الشي اللي عندج

بسبب نقص داخلي فيهم

سواء جدامج او من وراج

و سبحان الله ... قلب الواحد يحس ... باللي يحجي فيك و بالناس
فتعرفينهم واحد واحد .. حتى لو تصدين و تسوين روحج ماتدرين !



لو بنحجي على هالموضوع مانخلص
لكن بالفعل كلامج هذا واقع مؤلم جدا

و اقول ان مو بس النقص او الفروق الطبقية
كذلك الفراغ ... له دور كبير في ذلك

ياناس اذا ماعندكم شغل
روحو اقرولكم كتاب
طوروا بعقولكم او ذواتكم
او حتى بعلاقتكم الروحانية بينكم و بين ربنا العزيز الحكيم
و بالاخير احب اختم كلامي بحديث رسول الله صلى الله عليه و سلم

" المسلم من سلم المسلمون من لسانه و يده "

Mishari said...

الله كل هذا فيج ؟؟؟

:)))

انا دايما اللى يعذربلى اعانده وا اخذ اللى براسى وخلصنا

عناد واحره ;)

:D

Purgatory said...

You have many valid points in your post, very good, however, women will be women, that you cannot change.

barrak said...

موضوع في الصميم
ترى مو بس الحريم
العموم صاير جذيه

Purplecious said...

ريمااااا
بوست عجيييييييب
و مقيولة يا ريما


اللي ما يطول العنب حااااااامض عنه يقوووول


أنا معاج ان الواحده ما يكون قصدها تتشيحط و قصدها تشارك الناس باللي عاجبها و توريهم
بس اللي مو حاصلهم و ما يقدرون على الشي يفسرون اسلوبها انها تبي تتشيحط علينا فيعذربون

ذاك اليوم واحده بنت خير اعرفها عجبتني جنطتها و مدحتها لها و الجنطة مو رخيصه فوق 500
و هذه المرأه كبيره مو من سني
قالتلي تصدقين بيربل ماكو احد بالكويت مو شايلها و وين ما اروح أشوفها صارت ال 500 سعر عادي
انزين انا أبي أكون مميزة لازم أقط لي1000
و فووووق؟
أنا اقدر ادفع هالمبلغ بس حسافه على جنطه
ليش ما يعترفون ان أكو ناس تدفع هالمبلغ و ما يأثر على ميزانيتها؟؟

وحده رفيجتي تشتغل بالبنك تقول أم يايه تاخذ قرض عشان بنتها تبي جنطه حق الجامعة!!!!! البنات مو احسن مني

يننووووووووا الحمدالله و الشكر

بس تبين الصج
انا مرات تعجبني جناط غالية بس اتحسف اقط عليها مبلغ و قدره
اخرتها تروح موضتها و تطيح بجبدي
فأقول انها مو حلوة مو عشان شي
بس عشان أقنع نفسي و يطيييييييييب خاااااااطري منها
لووووووووول

بنت الشامية said...

من راقب لناس مات هما

صغري دائرة معارفج

اهتمى باسرتج الصغيرة

اهتمى باسرتج

اهتمى باسرة زوجج

ا سمعى وقلبى بيعونج ولا تردين على احد

تفتكين من كل هالبحه

طبقيها وبتدعين لى

عثماني said...

اختي ريما مساؤك سكر..على قولة قباني

اولا يازين مدونتج...تونس و تبرد الجبد

ثانيا احنا في الكويت مجتمعنا مريض... يبيلة علاج... المظاهر ذابحة العالم...و الكل ما يبي يبين ان مو قادر يشتري هالشغلة..سواء سيارة ..شالية... فيتسلف و يقص اظهره علشان يتزنقح بين الناس..يعني وحدة اهيا حافية و ريلها حافي منتف... وهذا مو عيب... رايحة شاريه نفنوف حق عرس رفيجتها بالفين دينار!!!؟ اشحقة!!؟ و قيسي على هالموضوع... ناس مينن

Kuw_Son said...

سوااااالف حريم

الله يعييينكم

كادي said...

هلا ريما
عملية التعليق والنقد هي عملية أخلاقية تبين نفسية الواحد فمو شرط الواحد يتحلطم عشان ما عندة او ما يقدر
هي عملية ذوق وايد ناس ماتملك بس تتمنى كل خير لغيرها والعكس يحصل في ناس إمكانياتها المادية عالية وما تبي أحد يوصل لها
وهذا مو بس بالمادة لا بكل شي هناك الحاسد والمحسود
والأنانية زايدة بين الناس كل واحد يالله نفسي
والله يستر ليه جدام
والكلمة الحلوة صدقة حتى لو شي مو عاجبني و عاجب غيري وما فيه أذية لي فعليهم بالعافية

kila ma6goog said...

خوش تجربة

الحين جربي العكس و عطينا النتيجة

ReLaaaX said...

ريما



كلامج وصل ومضبوط مليون بالامية :)




وقلتيها
ومايتحجون الا من النقص اللي فيهم




ماقول غير الله يشافيهم ويشافي كل مريض ياربي




وحلاته الواحد يريح قلبه ولسانه وملائكته .. وماله شغل بخلق الله !؟




والله يتني الضحكة تصدقين
الحمدلله والشكر موصاحين وربي

فراوله said...

مساالسعاده لأحلى " ريما" قلت ومازلت اقول انه مدونتج تستهوينى كثير وما أقدر ماامرها ،وياحلات هالموضوع اللى طرحتيه صج يحتاج وقفه ونقاش بعد

والله ياأختى صرنا نعانى من هالتصرفات والعادات الكريهه اللى صارت مستمره سواء بيمعة حريم ، والا بعرس والا باستقبال الى اخره من المناسبات ،بس شنقول حق ضعاف النفوس من هالبشر

ومثل ما قالوا أنه الأنسان مايملى عينه الا التراب
والله يكافينا شرهم آمييين
:)تحياتى

SHAHAD said...

واي يهالحريم لو ربي يفكهم من شر لسانهم جان هم بخير
المشكلة ان الناس هالأيام ما تعرف تشكر ربها وتقتنع بالي عندها
لا دايما معترضين وحقودين اعوذ بالله
وإذا ما حصلوا الشي اللي يبونه حطوا في ميه عيب وعيب
أما الي يتشيحطون يا كثرهم
الله يعينهم على نفسهم والله
ريما البوست يعكس واقع أليم بصراحة

What Will Be , Will Be .. said...

ريما صراحه من كثر ماانا مااتحمل اللبحه والحنه قريت اول سطور من البوست وعورني قلبي من سوالف الحريم اللي اتييب عوار القلب (عوار القلب من الحنه)

وبعدين ماقدرت اتحمل لبحة سوالفهم

مهما تنبهين على الحريم وتفطنينهم على ان وااايد اشياء مالها داعي يسولوفن عنها تصدقين يسولفون عن اشياء اسخق واسخف

ياجماعه الله عطانا لسان واحد واذنين
يعني لازم نسمع اكثر من مانسولف وخصوصا سوالف التفاهه

What Will Be , Will Be .. said...

ريما ليش لوير نزلت من الاسم الاول في قائمه البلوقات ؟؟

تعودت ادش عليها من سايتج :)))

Яeema said...

cr8ivia
i guess we are in kuwait, but b4 that they dont have anything to show off or showing the envy act
this is the point
why this goofy act!

Яeema said...

athoob

والله كلامك عين الصواب
الفراغ
ثم الفراغ ثم الفراغ

و هو ليس فراغ الوقت كثر فراغ العقل

عجبني كلامج وايد
أشكرك جدا

Яeema said...

mishari
لا والله أنا حدي أترفع عن المهاترات إللي لا تودي ولا إتييب
i always have other things to do in life

Яeema said...

purgatory
walla even men starting to act the same , specially when you become WOW in your work .

Яeema said...

barrak
يوم أثرت الموضوع بين الشباب عندما بالدوام وجدت نفس إجابتك

صارت العله علة مجتمع الحين

Яeema said...

purplecios
واااي هذرت و راح التعليق كله!؛
بحاول أعيد إللي كتبته

:/


------
سالفه القرض الشرهه علي الأم
بتموت بالله البنت لي ما لبست ماركه؟؟


بيني و بينج كلام المرا صح
والله ربي قاعد يحاسبنا علي الفلس و وين نصرفه
أنا ويا المرا
أكثر من 500 وااايد الصراحه
100
زيديهم 300
و إشتري ساعه
هاهاهاهاها

Яeema said...

بنت الشاميه
لا الحمد الله أنا آخر همي الناس
أنا كل أتطمش و أضحك بيني و بين نفسي
أقول مساكين لاهين بالتفاهات

ما يدرون إللي يلبس يلبس حق نفسه مو حق الناس

Яeema said...

عثماني
صباحك شكر
علي قوله أهل جبله
خوالي
:p

والله العظيم صااااج
مع إن إهيا بالنهايه إللي بتاكلها

تدري أعرف ريال باع عمارته إللي تدخله مدخول بسبه مرته تبي سيارة غاليه مو قادر علي إن إييبها

تخيل صرف رزقه ورزق عياله علي حديد

Яeema said...

kuw son
مثل ما قلت
سوالف حريم
عسي ما إتعادون إنتوا بعد
هاهاها

Яeema said...

كادي

وجهة نظر أحترمها حدا
و يمكن القناعه لها دور هني بالموضوع

كلامك حلو مثل قهمتج

Joli said...

كل كلاااااااامج عدل مدل

مأيدتج في كل كلمة

واااااي أحس طلعتي إللي بقلبي
ماعندي مجال للتعليق

صح السانج :)

Яeema said...

killa ma6goog
لا مجربه العكس ولا شي
هالأيام شاليهات و بحر
هاهاهاها

قتلك أنا ممنوع اللبحه والتجارب بالصيف

Яeema said...

relaaax
والله صاجه نفوس مريضه الله يشافيهم و يبعدهم عنا
و يثبت عقولنا

Яeema said...

فراوله
حبيبت قلبي إنتي والله
يسعدني ويشرفني كلامك هذا

إنشاء الله أكون علي قد المسئوليه بكلامي بالمدونه

أما عن هالكلام
والله الواحد ماله إلا الصبر علي بلاوي الناس

و كلمتي المعهودة
أنا ما أربي إلا عيالي

Яeema said...

shadad
لازم ما نشجع هالشي و نراعي نفوسنا

عندي مشكله كل أمدح
و مرة وحدة تقوللي شدعوة تمدحين علي الفاضي و المليان

جااان أقول لها
عيل البنت شاريته أضيق خلقها!؛


طالمه عاجبها أنا شاكو
علييها بالعافيه و مدحي خل تستانس
ويفرح قلبها


الكلام ببلاش

Яeema said...

what will be , will be
أولا ترتيب اللسته صار أبجدي

هذا برنامج أستخدمة من أحط اللنك رتبهم لي يالله من فضلك

راح أضيفج إنشاء الله

--------

علي طاري الإذنين

هم لها إستخدام ثاني

سمعي من أذون و طاعي من الإذن الثانيه


اللسان ما تقدرين تمسكينه
وخصوصا إذا كان مو لج

Яeema said...

joli
هلا والله بحبيبت قلبي إنتي


لا تعلقييين واصل واصل

G.Q.™ said...

A7la shay enna hal 7achi 6ale3 min a WOMAN! ...God bless you :P

Shaima'a Alkandari said...

اى والله وهذا اللى حاصل بديرتنا


مادري ليش يحسدون الفقير بموتت اليمعه

وليش هالفخفخه الزايده


وبعدين مد ريولك على قد لحافك ليش يعني احتر من غيري بالعكس اسوي واييب واحط واشتري بس على قدي


يعني ماارف ليش هالغيره والحسد

بيني وبينج

لو شنو مايدش بعيون بعض الناس