Wednesday, October 11, 2006

your baby grow up





اليوم: الأثنين :10 أكتوبر 2006

المكان: منزل والدي الكريم

كان والدي الله يطول لنا بعمره عازم بالبيت صديق قديم و هو الحين قنصل في إحدي الدول، الرجل من أرقي الناس إللي قعدت وياهم و زوجته ماشاء الله من أهدى و أمتع الناس ، وبنته الله يخليها لهم من أرقي البنات لصغار .

ليش بتكلم عن هذي العزيمة بالذات، لاحظت أن العزايم إللي تكون بين عايلتين من أمتع الأشياء عندي بالدنيا، لييش أقول هالكلام، لأن الحديث و أسلوب طرح المواضيع يكون جدا راقي و مفيد و بحكم وجود الرجال بينا إحنا يالحريم يكون صوت الحريم واطي، كل وحدة تستمع للثانية عدل، الكبير يسمع لصغير ، الصغير يتعلم من لكبار إللي قاعدين حواليه.

موقف محرج و مضحك بنفس الوقت:

صديق الوالد شكله مو كبير وايد و ما سألت جم عمرة بس أكبر ولد عندة كان عمرة 19 سنه، و أصغر بنت عمرها 5 سنين ، دخلت و سلمت علي زوجته وبنته و يوم وصلت حق بوخالد جان يقوللي أبوي ، سلمي علي عمج و القصد من السلام المصافحة باليد، و قمت و صافحته بس إللي تنحت عند كلمة عمج !؛

ما أدري حسيت زوجته إهيا إللي تنحت وياي هاهاهاهاها ، الله يهداه أبوي صج إنه رفيجك بس مو معناته إني أقوله عمي و أنا مرا إشكبري !

ملاحظات علي نفسي جديدة:

دار النقاش و لقيت نفسي لا شعوريا أندمج مع سوالف والدي العزيز و صديقة، ذكرياتهم أول و الحديث من العيار الثقيل، تداركت نفسي و درت ويهي للصوب الثاني و إلا والدتي و أم خالد قاعدين يتكلمون عن الديكور بحكم إن أم خالد كانت نازله بيت جديد ، طبعا يازلي الحديث بحكم إني دخلت دورة تصميم داخلي ، فعندي خلفيه إشويه عن وين أحسن مجلة و من وين الأثاث الزين و نظرية ثيم الألوان و بدي الحديث ينتقل من أمي ليه عندي فا أم خالد إندمجت وياي إشوي، بس الوالدة الله يهداها كل إشوي مقاطعة المرا و لا هذا سعرة مبالغ فيه و هذا يقصون علينا ، و أنا قاعدة أقول بيني و بين نفسي صراع الأجيال و أمي مو معترفة برايي إني كبرت و قمت أفهم.

البنت حبيبة أبوها:

بعد ما طلعوا الضيوف ، قعت ويا الوالد و أسولف وياه سوالف بعيدة كل البعد عن سوالف مجتمعنا المريض، فتكون قعدتي وياه من أمتع القعدات عندي بالدنيا، و دايما يسألني ها إشلون موقعج إللي تكتبين فيه و شنو آخر مواضيعج، وطبعا أبوي ما يعرف بلوقي و إستسمحته العذر إني أغبي عنه ، عشان آخذ راحتي بالكتابة و المواضيع المطروحه في.

أمي راحت بدلت و إنزلت تحت و أول ما إقعدت بطلت التلفزيون طولت علي الصوت !

أقولها يما بلييييز ممكن إتقصرينه إشوي قاعدة أكلم أبوي، تقوللي قومي قعدي يم أبوج أنا بتابع المسلسل ، و فعلا قعدت يم أبوي.

أبوي من النوع إللي إذا كنت موجودة و زايرتهم يعطيني كل إهتمامه و يحسسني إني فعلا كبرت و لي وضعي لأن يدري إشكثر أحب إللي أسولف وياه يكون مو مشغول إلا بسالفتي، المهم أندمج ويا الوالد بالسوالف و فجئة بدون مقدمات أمي كل ساعة بين فاصل الدعايات تقطع الحوار بسالفة ممثله و الله يهداهم ليييش يحطون برمضان جذيه و ليه هذا الدور مو لايق علي الممثلة، و إحنا طبعا فعلا إنكون مو وياها بس نسمع و نسكت لما إتخلص.

نرجع إنكمل الحوار و أقوم أقول حق أبوي يبا يوعان تبي تاكل شي؟

طبعا كل الأكل إللي أمي حطته حق الناس ما ذقت منه إلا قلاسين ماي و قهوة تركية عشان أقدر أتسحر عدل، لأني لو بخربط بتروح علي وجبة السحور و عندي إهيا من أمتع الوجبات إللي آكلها برمضان.

أمي : وااااي ريما بسج كل ساعة تتكلمين عن الأكل، والله بطنج بيحوشه شي من كثر ما تاكلين من برة، ما جني أمج ، أنا ما أواطن أكل برة و كل دهن و مو مفيد كلش.

ريما: يما لازم أتعرفين شغلة أساسية فيني ، أنا التغيير جزء أساسي بحياتي و الأكل مو مهم عندي يكون صحي و إلا نظيف وايد و أدري إن المطاعم كلها وسخة، بس شسوي متعتي بالمطعم.

قمت و دقيت تليفون علي زوجي كان معزوم علي سحور و إلا أشوه مو ماكل ، حبيبي بعد عمري فييييك الشراتون؟

يالله أنا مشتهي القوزي من زمان و مرقة البامية مالتهم، إنتي وينج؟

أنا في بيت أهلي ألحين أيي البيت و إنروح ويا بعض.

أمي : راسج يابس ماكو فايدة و طول عمرج ما تسمعين كلامي .

ريما : يما ليييش؟

أمي: في مرا سنعة إتطلع ريلها من البيت الساعة 12 عشان إتروح تاكل هالحزة!؛

ريما: واااي يما إرمضان عادي! و الشراتون يسكر الساعة 2:30 باليل

أمي: و إنتي ما وراج عيال و دوام طالعة هالحزة،

ريما : يما والله صدقيني لو زوجي ماله خلق جان قاللي مالي خلق عادي

أمي: والله ريلج حليييو ، لو مو حلييييو جان ما وداج حق بطنج الساعة 12

ريما: ( وللييييييييييييييييين – أبي أبوووووييييي )

أبوي: إشفيييج أم محمد الله يهديييج خليهم علي راحتهم

أمي: إشقلت أنا الحين بعلمها السنع

ريما: يما والله الريال مشتهي قوزي الشيراتون، والله زوجي لو مو مشتهي جان مالج أمل نطلع هالحزة.

أمي و بعد إقتناع: خلاص خلاص كيفج أنا شعلييي سوي إللي تبينه، خو إنتوا عيال هالوقت ما تبون أحد يقولكم إدنو علي ورا.

ريما: يما أنا صارلي 10 سنين متزوجة الله يهداج أي نصيحة بعد هالعمر و عقب ما فهمت ريلي . يالله عن إذنكم ، لازم أروح تأخر الوقت.

المهم طلعت ورحت الشيراتون و أثنينه كنا كاشخين بحكم إن كل واحد ياي من عزيمة، و يوم رحت الشيراتون حسيييت نفسي جني عروس ، ما أدري ليش ياللي هالشعور، ليييش إني أول مرة أطلع هالحزة برمضان من سنين، رجنا البيت بالثنتين بالليل، و أنا هالحزة كل أكون نايمة أو علي وشك أني أنام.

حلو التغييير و حلو إن أهالينا يقبلون التغيير فينا بعد


29 comments:

انسان said...

بالعافية صراحة القوزي مال الشيراتون ما يتطوف لو مو الساعه 12 لو الفير وايد لذيذ
وكل جيل له تفكيره والاختلاف شي وايد حلو ودليل حيوية ويساهم انه ما يخلي حياتنا اتصير جامدة
وتحياتي لج

نون النساء said...

ياحلو الأهل
اذا تعاملو معاك
كصديق لهم

مو كإبن وصغير وماتفتهم
صج اتحس بقيمتك


المشكله لما ما اتعرف انت شلون تتعامل مع اهلك

انا مثلا اهلي مرات يحسسوني اني مرة كبيرة وعوده وخلاص ماني ياهل واقعد اتصرف على هذا الأساس مع اللي حوالي

بس يكسرون فيني لما عاد أعيش الدور صج
ويردون يعاملوني يا نونووه يا اصغيره ياللي لازم تسمعين كلام ماما وبابا


شي يضيق الخلق

Kwaitiyya said...

عليكم بألف عافية ريمـــا
الأهل وخصوصا الأم لازم تعلم بنتها سوالف جيلها.. عبالها جيلنا نفس جيلها
ومرات قصب قصب انسوي اللي اهيه تبيه ومووعترفه ان احنا عندنا راي
بس مع كل هذا هم كلامهم صح .. بس انتي بحالتج عادي مافيها شي .. انتي بعد مو اللي كل يوم والثاني طالعة مع ريلج! كلها مره ومشتهات عن الخاطر
عليكم بألف عافية
وسالفة الأبو وسوالف الريايل أحلى وأونس فأنا معاج بهالراي
أنا لو يحصلي أروح مع أبوي الديوانية ! أحس سوالفهم مفيده و ونييييسه
عليكم بالعافية

Anonymous said...

ya 7elo el obbahaat dayman faahmeenna, sij sij elbint 7abeebat obooha

7osen said...

اسلوبج بالكتابه الصراحه وايد ممتع

استمتعت وانا قاعد اقرا

حطيتي سيناريو وحوار

حسيت اني قاع اشوف مو قاعد اقرا

برافو

الله يخليلج اهلج انشاالله
:)

Kuwaiti said...

اهليييييين ريما
الف الف الف عافيه على القوزي جان يبتي معاج شويه للبوست ههههه

والله امج تونس ماشاء الله وكل هل نجره وابوج ساكت الله يعطيه طولت العمر شكله بارد
بس ترا الماما عندها حق شوي

ترا الاحظ انه دائما ام البنت توقف مع زوج البنت ولا انتي شرايج

سالفة قلب said...

عليج بالعافيه

وعسى ربي يسخر لج ريلج ويسخرج له

ولايفرق بينكم

( البنت حبيبة ابوها)

استوقفتني هذي العباره

بالفعل ياريما حب الاب ماكو مثله حب ..حب كله حنان فريد من نوعه يكفي لما تقعدين وياه يعطيج شعور انح انتي بنته الكبيرة والام والمرأة العاقل وبنفس الوقت مايحرمج من شعور انج مازلتي طفلته الصغيرة الدلوعه

الله لايحرمج من والدينج ولايحرمنا وياج

albandry said...

وووووواااااايييي

ريما الله يخليلج ولا يخليج
طول عمره الابو غير حق بنته
عمره ما يسال حق ليش تبين فلوس
والا دايم يتحلى عليج
وعلى لبسج
وعلى اكلج اللي تسوينه حتى لو مو حلو
التشجيع كله منه

الله لا يحرمنا من ابهاتنا ولا امهاتنا
والا ما يطلعون امهات اذا ما سوو جذي وتحلطمو كله اللي نسوييه مو صحيح وما يصير جذي ولا تفعلين جذي

بس تظل الام ام
وعليكم بالعافية والله يسخرلج هالريل
وصاجة اذا رحتي الشيراتون مع ريلج وبتعشين جنج عروس مادري ليش


يبيله
بس كله يدقرني
الله كرييم


ويازين التغيير اهوا ملح الحياة واهو اللي يخلي الحياة تستمر بسعادة

Bed0uin said...

عـــــــــســـــــــــــــــاه محدووور العافيه لج ولريلج انشالله =))
وعسى الله يخليكم حق بعض ووفقكم وخليلكم اعيالكم وياكم انشالله

الامهاااااااااااااااااات وما ادراك ما الامهااااات عااااااااادي عاااااااادي عااااااااااااااااااااااااااااااااادي!!! طوفييييييييييييي ،،، ههههههههههه والله صدقيني لو اشماسويتي لازم ينقدوون والا ما يعجبها ولازم اهيا الصح وانتي الغلط وماراح تكبرين ابعينها حتي لو صرتي جده ههههههههههههههههههههههه
انا وامي شرايج مو ام وبنتها هههههههههههههههه ان سكتي ما يعجبها وان رديتي هم ما يعجبهااااااااااااا مادري شسوي بستخف والله واي واي وااااااااااااااااااااااااااااااي ههههههههههههههه ما يقدر ماااااا يقدر بنبط هههههههههههههههههههههههههههههه بس شسوي بعد امي حبيبتي مالي غنات عنها صراحه الله يحفظج حق اهلج ويخليلي امي انشالله

Bed0uin said...

ايييــــه نسيت التغيير مهم اصلا وضروري لكي ينعنش العلاقات بين الاوادم =PpPpp
ويا حلوه ويا زينه زيناااااااااااااااااه ..

وين اخذتي دورتج مالت التصميم الداخلي؟ =P

lawyer said...

اي والله انج صاجه البنت حبيبه ابوها

الابو غير معانا
و يحس ان احنا البنات الي نسمع


انا عن نفسي وايد علاقتي قويه ويا ابوي وحتى و اهومريض الحين

و بالنسبه لمواضيع الرجال
و اليمعات العائليه
فعلا فعلا شي ممتع
والله ان ملاحظتج في مكانها

حسيت في هالشي لما بيت خالي تفطرو عندنا

عاد ماشاءا الله ريما امج صج صج صج من الحريم الي ينقال عنهم برفكت
و كلمه برفكت شويه

واي مت من الضحك على الديكور و مواضيعه
تدرين ليش يمكن عشان امج اتحس ان هذا مجالها

الحمدلله على الطلعه الحلوه مع ابو العيال
و انشاء الله ربي يسخره لج

بعد عمريييييييييي والله

Mamloo7a Q8ia said...

صاجه ريما ... العزايم اللي تكون عائليه و محفوفه نستمتع فيها اكثر
وسالفة عمج الوالده موهقتني فيها على طول كله سلمي على خالتج وسلمي على عمج لحد اللحين مو قادره تستوعب اني ماني صغيره ودايما لما تسألينها عن عمري تصغرني ب 4 او 5 سنوات وهذا يطفر صديقتي وغلاتي (ل) وكله تقول امج تصغر عمرها

Яeema said...

إنسان
إيييه والله عجيييييييييييب
علينا بالعافية
أنا لو بسمع أمي جان أقوم بالست الصبح بالعطلة و أنا الساعة 10 بالييل


نون النساء

ترا علي فكرة أنا شوفيني مرا و أم عيال و لما الحين ما أفهم بالتربية

و شوفي لما أسافر و أخلي عيالي عند أهلي

كل دقيقة داقه تليفون ، إعيالج يكسرون الخاطر و هذا يقول وين ماما

و أنا أدري إن عيالي مستانسين وناسة العالمين عند الجدتييين

و طبعا زرقة 5 أيام مالج أمل آخذ أحد وياي

تقوللي أنا ورا مرة خليتكم
قلت لها والله يما إتصديق ما أذكر
هاهاهاهاها

ليييش كنا لاهين بالشاليهات و اللويه


ولا يضيق خلقج و كل بأجرة إنشاء الله

وماراح إنحس بإللي يسوونه إلا لما أصير بعمر أمي

الله يخليج لهم يا رب و لا تنحرمين من شوفتهم

Яeema said...

kwaitiyya

المشكلة إحتياجات رياييل أول غيييييييييييييييييييير
عن إحتياجات جيل الحين

أنا هالأيام ريلي حده مشغول و أصلا ما أذكر أمته طلعت وياه عشاه فلو أشرح هالكلان و الله ما يهمها لأن عندي إللي أهم من الطلعة الكلام و الحوار يصير غير و إعادة حسابات


و الله صاجة سوالف الرياييل حدها غير و إحنا عندنا دواية مرة بالأسبوع و من يدخل زوجي أستلمه أسئلة ، شنو آخر المواضيع و شصاير بالديرة و شنو تكلمتوا عنه
و الله شي حلو

و الله يعافيج



anonymouse
eeee walla a7is el wa7eeed elly ye7is enny kobart , o a7is enny embaytha wayha .

kella yegolly walla ya ebnayty ma ta3abteeny

Яeema said...

7osen
الله لا يحرمني من كلماتك الحلوة

أمييييييييين و يقدرنا إن نراضيهم و نسعدهم



kuwaiti

والله إسكت لوما الفشلة من زوجي لأن ما يواطن أيييب سيرة البلوق
جااان صورت الهرفي المنسدح علي صينية العيش



بقولك شي
أبووووي ما يحب يتدخل بين الحريم

ما إتشوفني أعزه وايد!؛
يا أخي أبوي مدرسة الله يحفظه

والله رايي من رايك، أمي كل تدافع عن ريلي جن أهوا إللي ولدها مو أنا إللي بنتها
هههههههه

Яeema said...

سالفة قلب

يا حلو دعوتج والله
أميييييييييييين


إتصديق بقولج شي
الوالد كلامه يكون له مصداقيه غريبة داخل نفسي

أحس لما يقول شي ما يجامل
صدق و حب فعلا حقيقي

و لما كنت صغير أصغر شويه كان يعلمني أشياء عشان أدير بالي علي نفسي فكنت أسإلة وايد و بعض الأوقات أسئلة محرجة

بس كان فعلا و نعم الصديق

Яeema said...

albandry
إيييييه والله صاجة
التحلي عليج بصوب و خصوصا و إنتي في عز تعبج ، بس يبي يدلري خاطرج


والله إني أذكر يوم ولدت في ولدي الأخير جان يمسكن زوجي و يقولله


يا وليدي كثر لعيال ترا مو زين
هالأيام التربية مو سهلة و لعيال يبيلهم مصاريف و مجابل مو مثل أول

هاهاهاهاهاهاهاها

الحين من خالتي تقول يالله ييبي إخت حق بنتج أقولها أبوي ما يرضي ، و زوجي يوقف معاي يقول إييي عمي ما يبي و ما نقدر إنخالف رايه موصيني

و أمي تحتر تقول لييييش عيل أنا يايبتهم وايد
ههههههههههه


ترا هم أنا عشان بنته الوحيدة بين شباب فمكانتي إشوي غير




bed0uin
يا بعد عمري عمرج ، مشكورة حبيبتي ما قصرتي


أنا ما ودي أعلق عليج
ما ودي أزيد همج هم

ههههههههههههههه
هههههههههههههههه

والله حاسة بكل كلمة إتقولينها


و إذا سكتتي و غيرتي الموضوع هم ماكو فايدة

هههههههه

إيييييه و الله أصلا أنا وصلت مرحلة إذا تحلطمت علي أتحلا عليها

أقولها وااااااااااي يا زينج والله لما تتحلطمين

إتعصب زيادة
و أنا و أبوي نستلمها ضغاط إفقيرة

و أميييييييييين يخليلج أمميمتج و الله لا يبين غلاتهم




دورتي مالت الديكور
دزيلي إيميل علي

allure187@gmail.com

i will send you the phone number , you can call and ask about anything you want

و يعطونج شهادة مختومة من الحكومة معترف فيها


و المنهج مالهم نفس منهج كلية التربية الأساسية

بس وايد تغير ذوقي حتي بطريقة لبسي

قمت أشوف تنسيق الألوان غير

Яeema said...

lawyer
هلااااااااااا هلااااااا
هلااااا بالزين كله والله


عدل كلامج
نسمع ، حسييييت إن أنا وياج فينا هالخصلة و يمكن إحنا نسمع لأن عندنا الأبو خبرته بالحياة أكثر من الأم

أصلا أنا شغوفة إني أسمع سوالفة
ووايد كنت أقول ظابوي غير
و فقدت سوالفة يوم تزوجت


إييي عشان أنا مو فيرفكت و مستمتعة إني مو بيرفكت فأمي تبيني أكون مثلها

بس إتعرفيني إنتي عدل
perfection doen't exist!

أنا مقتنعة إن الكمال لله وحده

Яeema said...

mamloo7a q8ia
والله أما سالفة خالتي و عمي صج صج وهقة

هههههههه

المشكلة عندي خالة صك عمرها جريب الستين و لما الحين عند نفسها نونو

ههههههههه

PearL said...

الله يخليكم لبعض يارب

الفراشة said...

!!! قوزي والساعه 12 بليل
يلله عليكم بالعافيه

والله يخلي لج الاهل ويطول بعمرهم يارب

kuwaitia said...

عليكم بالعافيه :) وناسه شوقتينى ودي اطلع هالحزه اروح اتسحر جو رومانسي

Unknown said...

كل الموضوع بصوووب
وحسيتى انج عروووس بصوب
عروووووس رايحة تاكل قووووزى ؟؟؟؟
ليييييييييييييش
متزوجين بالخفجى؟؟؟
:))))
على العموم صحتين وانا كل ما ادش بلوق القى اكل جدامى وانا مو متسحر عدل يعنى اليوووع اليوم بيقطعنى

:(
ما احب شعووور الجوووووع

Яeema said...

pearl

مشكورة حبيبة قلبي



الفراشة

12
باليل بتوقيت بيتي المتواضه الساعة 8 المسا

يمديه يتهضم لا إتحاتين

ههههههه



و الله يعافيج
عاد تدرين والله خفيف و يعت عقبة ، لأني كثرت من السلطة
مرة ثانية بروح بس حقه بروحة

Яeema said...

kuwaitia
والله صراحة جو حلو ، و في واحد يدق عود أغاني أم كلثوم


بس ما ينفع الحين بالعشر الأواخر

يالله السنة الياية إنشاء الله



كيتي
تدرين صج حسيت إني مو بس أنا إللي تسمع الإنتقادات الدايمة من الوالدة العزيزة

أنا قلت لي إني وحيدة أمي فمالها إلا أنا إتحن علي


أما السنة إغسلت إيدها مني ، ولا إتصال واحد حق ولا إستقبال

أقصد الإستقبالات إللي مالها لزمة لبعاد

الصراحة عيالي أولى بالقعدة




mishari
أولا أبشرك بشارة
آكل كل يوم باليل عيوش ووزني 53 كيلو

:p


أوعد المرة الياية إنشاء الله آكل سوشي و رد بووووول
عشان أحسسك إني عروس


;)


و بعدين القوزي مفيد و يقوي الصحة و خفيف علي المعدة

و إذا يالك يمه المعبوج الكويتي



شنسوي مشاري نيادة إحنا ما نستغني عن القوزي

شغل تبربس و ستيكات برمضان ترا ما يدور عندنا

يا إتدش علي قوة يا إكل روب و خيار
مثل أمي الله يحفظها

هههههههه


شباب شباب الله يحمينا يا رب

Яeema said...

mamloo7a q8ita


لييييش ما نقدر إنعلق في مدونتج

و باجي الكومنتات إنقفلت

شكله الثيم اليديد إمخصبق السالفة وياج


قريت موضوعج بس أنطر إنج إتصلحين الصفحة

و قوليلنا إذا صلحتيها بلييييز

Wafa said...

كأنك تبين تظهرين أمك بمظهر السطحية باهتماماتها وحواراتها

مهما علت مكانة الإنسان وعلمه مو المفروض يعتلي على أمه

أعتذر لكن هذا اللي فهمته

Wafa said...

يعتلي = يتعالى

Яeema said...

fofo:
والدتي العزيزة كانت موجهة عامة خدمة إجتماعية و متطوعة نشطة في لجنة شئون الأسري بالكويت

و كانت تراعي أبناء الأسري


فلا أعتقد أن إختلافنا بالحوار ينقص من مكانتها العلمية


لأهذا السبب و بسبب حياتها الجادة العملية فإنها تريدني نسخة من هذه الحياة