Sunday, October 29, 2006

البساطة





الأحد و كل شي متسكر برة ، مالنا إلا نلعب غولف و إللي ما أواطن هاللعبه، تم تأخير الساعة الحين فصار بينا و بينكم ساعتين فرق توقيت.

رحنا أكدنا علي موعد الطيارة و إللي تحتاج رحلتنا يومين و إستراحة بلندن إللي أكره جوها في هالوقت من السنه.

شنو تعلمت من هالسفرة ؟

ساعات علي كثر ما إتعرف صاحبك ، إتحس إنك تكتشفه لأول مرة، هالريال الحبوب السعودي و زوجته كانوا مثال إنتعلم منهم أشياء كثيرة .

أولها الفلوس مو كل شي بالدنيا ، القناعه بإللي عندك إتخليك إتعيش ملك ، زوجي أول مرة يقعد معاه وايد جذيه ، و أول ما قعدنا كان بس همه المطعم لفلاني و المكان لفلاني، و عقب ما قمنا قعد يقوللي زوجي، أنا ياي آكل ما بقي مطعم ما قالنا عنه، ضحكت أنا ، قتله الريال لايعه جبدة من الشغل و تبيه يكلمك عن الشغل و أهوا قاعد في أحلا مكان بالنسبه حقه؟

قعدنا وياه مرة ثانيه، حسينا زوجي و أنا إن ما نقدر إنجاريه بالمطاعم و الأسمامي لأن آخر إهتمامنا ، فدار الموضوع بشكل ثقافي حلو، و زوجته قامت إتسولف عن شي غير المطعم و الطبخ، و قلت لها عن كتابتي بالبلوق ، بس ما علمتها علي عنوان الصفحة عشان أحش فيهم بالخير براحتي.

قالتلي جم قصه تصلح تنحط بالبلوق و راح أكتبها علي سعى إنشاء الله لكم.

بوفيصل ( صاحبنا) قاللي شغله ، و حسيت إن بالكويت فعلا زايده هالحركات بالمقاعد ، و هي النديه و فرض السالفة و الإقناع .

يعني قاعد واحد يسولف سالفة مو عاجبتني، إشحقه أداحره ، أخليه يسولف و يقول إللي بخاطرة و أنا أمشي وياه ، أسمع و أطلع بالزينه ، قاللي لاحظت إنكم مريحين بالقعدة تسمعون و بالتالي إتمشون و هذا طبع مو كويتي!

ضحكت و قلت له ، الواحد ما يفرض إهتمامه علي الغير و مو معقوله إن كل سالفة تنقال بتكون لنا إهتمام فيها، بالسفر الواحد يصير حريص جدا علي كلامه و نوعيه الحديث ، لأن الواحد هااااج من ديرته فماله خلق يسمع بس من آداب الحوار إنك تكون مستمع جيد جدا .

قال إن بجدة له يوم بالأسبوع إستراحة ، و ممنوع أحد يتكلم بالفلوس أو بالشغل، عشان الواحد يستمتع بالأشياء البسيطة إللي عنده، جنجفه و كرة و برنامج بالتلفزيون.

و إطلع من المجلس معطي إنطباع عنك حلو.

تخيلوا لبنه بدلاق و إلا مطعم بمدينه ما أدري وين، خلتنا إنحب هالإنسان و إنحب بساطته و إشلون إن يدق و يسأل عنا لأن حس إن ماكو عقد بالحياة ، خل الأمور تمشي . ساعات إتسوي شي و ما إتكون قاصدها .

و أنا قاعدة أكتب هالبوست إتصال ياللي منهم إوصلوا بيروت، و داقه تقوللي ها؟ ما غيرتوا رايكم تجولنا إهناك الجو حلو و الناس مبسوطة ما ودها تجي ، و ترا هذي ملابسنا إللي بماربيا ما غيرنا و لا شرينا شي .

ما أقول إلا الله يحفظهم و يحميهم يا رب ، تعلمت منهم وايد ، و راح أحرص إني أسمع و أتعلم منهم وايد



ولهت عليهم والله ولهت عليهم



12 comments:

cozy said...

lol,والله حبيت هالاسره الي نادر نلتقي فيها
القناعه والبساطه اتخلينا انشوف الدنيا ابمنظور ثاني و صح كلامج لفلو مهمه بس مو كل شي عسالله اخليهم حق بعض والله يرزق الجميع بالقناعه ورضى بلي عنده
And you have fun with your family :)

العين الساهرة said...

الله يونسج بالعافية، وبصراحة بالغربة الواحد يصادف خوش ناس ، الله يديم المحبة

esTeKaNa said...

الانصات فن،يفيد المنصت أكثر من غيره
والسفر متعه،التلذذ فيه مهم
التعرف على ناس جدد يفتح لك آفاق كثيرة للتفكير وينبهج على أشايء كثيره

عليكم بالعافيه وانشالله دوم مستانسه
بس ترا يالله عاد..ولهنا عليج
:)

Unknown said...

ماشاء الله عليه هذا انسان يمشى بحياته صح معطى كل شى حقه واللى جذى منظم حياته عسى الله يتمم عليه

تعلمىىىىى سبجوووو

اى انتى انتى سبيجة تعلموا من هالناس :))

Яeema said...

kitty
لا ولهت عليكم و علي عيالي و علي أمة لا إله إلا الله بالكويت

ههههههههه

وين بروح كاني كاني
الوعد بكرسبي دونت إنشاء الله






cozy
إييي والله أدعيلهم

thanks alot ;)




العين الساهرة

إييي والله يا حلوهم والله السماحة و البساطة
الله يسلمج حبيبتي

Яeema said...

estekana

والله صاجة و خصوصا من إللي أكبر منج

و مارة عليه سوالف


يالله كاني قفلت لجناط يايه بإذن الله



mishari
قاعده أتعلم والله
يا أخي هذيله مدرسه

بس بيني و بينك
هم لأن ديرتهم قمته علي قولته و الجو رطوبه

ترا ديرتنا حلوة يالله من فضلك

إنسوق و ناخذ حريتنا باللبس

elq87obi said...

ما شاء الله تنظيم رائع و كل شيء معطيه حقه

الله يتمم عليه ان شاء الله

سلاامي لج :)

Dr. Saleh said...

the only thing that I can say about the new image is

waaaaaaaaaaaaaaaaaaaaaaaaaaaaaaw

good choice

وعيني عليك باردة

Mohammad Al-Yousifi said...

خوش بوست

Nescafé said...

يحليلهم والله حبيناهم من كلامج عنهم
شكلهم خوش ناس.. الحمدلله الله سخر لكم هالريال الطيب ويا زوجته

شوقتينا على سوالفج اليايه
:)

Kwaitiyya said...

الله يونسكم ويونسهم بالعافيه
صح المستمع هو المستفيد الأكبر من اللي يتكلم وايد

ريما صوريلنا أكثر

iliveinq8 said...

ما رحتوا ميخاس؟ :/

مشتهي حليب كاكاو مع اللي يبيعونه يتغمس فيه نسيت اسمه :/ للأمانه كل سنه اروح اسبانيا ونروح ميخاس ونشتري الهوت شوكوليت مع هذا اللي يتغمس فيه وعمري ما عرفت اسمه

ولهت عليج يا بلدي الثاني