Saturday, October 28, 2006

لبنه بماربيا

يا حلو هالديرة و يا حلو ربيعنا فيها، خل أقولكم عن الناس إللي إتعرف إتعيش ، عندنا صاحبنا إسم الله عليه و تبارك الرحمن سعودي و مرته كويتيه قنوع وايد و ولد خير و نعمة و فيه ميزة حلوة إنه كبير و صارل له 20 سنة متزوج و ماشاء الله الدنيا حلوة بعينه، كل فرض بأسبانيا بالمسجد، و شغله أبد ما يسولف عنه، بس همه الأكله لفلانيه و المطعم لفلاني، إشلون تعرفنا عليه؟ السبب أنا ، كنت رايحه حق دكتور أسباني حق رقبتي و ما قصر مسكين كان يترجملي لأن الدكتور ما يفهم إلا أسباني.

حبيب أهوا و مرته و من عمر الدنيا بأسبانيا ، و السنه شبه علي زوجي و سلم عليه و قاله ها إشيايبك هالحزة مو كنت طول الصيف إهني و يا عيالك ، و طبعا عباله أخوه و يقصد حماي ، يوم شافني جان يركز إشوي ، هاااااااااااااا إشلون إرقبتج؟

أنا : الحمد الله والله عقب ديييقو العجيب و علاجه إللي جنه سحر ! الحمد الله ماكو شي من ذيك السنه.

المهم كان أول يوم عيد و ما قصر عزمنا علي عشا العيد ، و إحنا وياه جان يقولنا علي شي غريب عجيب!!!!

الروب و لازم الماركه إللي بتشوفنها بالصورة ، و دلاق أديداس جديد!

لييييش؟ لأن صاحبنا مدمن شي إسمه لبنه! و اللبنه مو موجودة بماربيا

فيا حلوه شسوي؟ يشتري دلاق جديد و يصب فيه الروب و طول اليل يعلقة ليما الماي ينز كله من الروب ، و الصبح يحطه بتابير ويييير و يواديه وياه لينوتر ، و ياخذ أيبس خبز إهناك و يقمس فيه .

كل يوم يسألنا هااااا سويتوا اللبنه!!!!

يا حلوه ، اليوم مشا من أسبانيا و رايح ويا زوجته لندن ، علي قولته ما أواطن لندن بس بما إني متزوج كويتيه فلازم يكون عندي شقه بلندن ، تدرون الكويتييين يموتون علي لندن حق السوق و المزامط هههههههههه

الله يحفظهم يا رب و يسمح دربهم









هذا الروب شريناه بس راح آكله حااااف بدون دلاق أديداس
ههههههههههه















ممكن إتسامحوني ما راح أقدر أعلق عليكم بس صدقوني قاعدة أقرا تعليق تعليق

22 comments:

سالفة قلب said...

يحليله.....

خوش فكره....دلاااااق

عادي انا اقولج عن وحده اتحط فناييل

القهوة اذا بغت تروح البر

في قوطي جوتي وانتي بكرامه وامغطيتهم

بفوطه

عشان الفناييل تبقى نظيفه

هههههههه الناس فناتق

نون النساء said...

لووووووووووووووول

والله فلته هالريال

مو طبيعي الدلاق واللبنه

ههههههههههه


انا أول مرة ذقت الببنة وتعرفت عليها قبل سنتين لما رحت الحج اكلتها عبالي روب لأن قبل لما اشوفها ما أحب اكلها مادري منو اللي قاص علي وقايللي انها مو حلوة
واطيح فيها اكل

يوم ردينا لكويت اقول حق امي يمه ابي نفس روب السعوديين
يوم اقعد اشرحلها ولا تقوللي
يالخبلة هاذي لبنة مو روب

ومن ذاك اليوم الثلاجة ماتخلى منه
عجيب مع النعناع وزيت الزيتون

:P

Kwaitiyya said...

عليج بألف عافية ريما
وانشالله تكونين مستانسة والله يونسكم بالصحة والعافية
سالفة اللبنة عادية ! ما شفتي أمي شنو سوت على اللبن !

دشت الجمعية وقصب أبي لبن ! وقامت تشرح حق البياع أبي لبن و أبي لبن ! والريال مو فاهم
عاد أمي قامت تشرحله
يو بوت ميلك ان ذا صن 3 ديز
الريال انصدم زعفس ويها اخترع يقولها ايييووو نو نو اتس سكس ! تقوله امي لا بالعكس دليشز !
لوول
ما انسى هالموقف
وخصوصا بالسفرات الكبار يشتهون سوالف ويقعدون يتفنتقون فيها

المره اليايه جربي سالفة اللبنة مع الدلاق.. يمكن تطلع حلوه

cozy said...

LOL rob edlagat hahahahahahahah wallah 7abaita hatha hahhahaha 3ani ma akalt la roob wala labna hahhaha

have fun sis

nice said...

عليكم بالعافية
متى الرجعة علشان نستقبلكم بالمطار :-)

Яeema said...

cafe_namlet :
عيدك مبارك أول

أبيض عشان ما إتلوع جبدك لما إتشونه ينز

و يقولد أديداس أهوا الوحيد إللي يصلح



سالفة قلب:
عيدج إمبارك حبيبة قلبي



قوطي الجواتي كنت أحط فيهم هدوم باربيتي أول
هاهاهاهاها

وبنتي ألأحين إتزينهم من فوق و إتخلي ألوانها و خرابيط الآرت فيهم


والله وناسه





نون النساء
إتصدقين اللبنه الوحيدة إللي أتشهوا عليها بالسفر

و الزعتر بعد
الوحيدة مو موجودة

و إلا الروب و اللبن صار كل موجود


الروب كلش كلش روحي مطعم هندي

Яeema said...

kuwaityya

عيدج مبارك و يعافيج إنشاء الله


أنا أمي مدمنة لبن و كل إتسوي تروابه بالبيت

إذا بغت لبن ، يابت إيفيان ماي و ملح و صبت من هالروب الطيب
هاهاهاهاهاها

كويتيين ما يتعطلون




cozy

meshtehy el rayyaaaaal !
enta shift el extra vergin olive oil in spain!
or the olives?
or the baby tomato !

mo etsawelik labna , walla el milk is diffrent
egg is diffrent
toast diffrent

even el Aerial smell diffrent!





nice
المفروض الأثنين ، بس شكلي بمدد ، ما شبعت
فيها مرضيه السالفة
هاهاهاهاهاها

neelaah said...

وايد اعجبتني
و ودي اجرب
بس ما ادري مو جنه دلاغ شفاف اضبط؟؟

المهم استانسي
و ديري بالج على روحج

لوحات said...

ههههههه كتير مهضومة الفكره
وللناس فيما يعشقون مذاهب
وطرق لليحصلوا عليها


هني وعافيه يارب
اللبنة من اطباقنا اليومية
فطور وعشا

Unknown said...

يقولج فنايل علاق وبيض عيون بعد زين واذا جنه مو لج ولج مرة على مصرة جلابية مصرية مخصرة يطلع المجبوس مو طبعى

لييييييييييش دلاق ولبنة
بس تدرين شلون
نجرب رووب ودلاق ؟؟
شورانا :)

استمتعىىىىىىىىىى

Unknown said...

يقولج فنايل علاق وبيض عيون بعد زين واذا جنه مو لج ولج مرة على مصرة جلابية مصرية مخصرة يطلع المجبوس مو طبعى

لييييييييييش دلاق ولبنة
بس تدرين شلون
نجرب رووب ودلاق ؟؟
شورانا :)

استمتعىىىىىىىىىى

اوروفااااااار

Mamloo7a Q8ia said...

والله خوش اختراع
ما شاء الله عليه ما خلى في خاطره وسوى اللبنه وانا اتوقع انها وايد لذيذه لان هالنوع من الروب وايد لذيذ
صدق من قال الحاجه ام الاختراع
الله يرجعكم بالسلامه واستانسي كثر ما تقدرين لاحقه على الشقا

albandry said...

يبا شفيكم الحاجة ام الاختراع
انا امي بامريكا تسويلنا مرقوق من خبز البيتا المكسيكي

عادي
بس خوش طريقة نسويها اذا اضطررنا لمن تشتغل الشهوة عاد وتعن علينا اللبنة في بلاد لا توجد بها لبنة


عساكم اتونسون بالسفرة وماتشوفين شر ريما

والواحد يستانس اذا لقى بسفرة ناس سنعين وخلوقين

Anonymous said...
This comment has been removed by a blog administrator.
nice said...
This comment has been removed by a blog administrator.
nice said...

الله يعينج على المرضية يقولون الحين توقع من طبيبين ومدير المستشفى :)

Anonymous said...

لووووووول يقوقون الحاجة أم الإختراع و هالشايب عاشق اللبنه فقير فاخترع طريقة الدلاق.. لووول أهم شي إن أديداس بعد مو أي شي.. يمكن الطعم راح يفرق من لبنه مصنوعة في دلاق أديداس و لبنة مصنوعة في شراب العايلة لوووول
اللة يهنيكم إنشاللة بهالمكان الحلو و انا نااااااوية أروح ماربيا فإذا عزمت أبيج تعطيني لستة بالأماكن الزينة بعد ليش أتعب عمري و أكتشف عندنا الخبيرة ريمااا :)

على فكرة أحب أعرفج بنفسي أنا الصديقة الثالثة لأم سلوم و أم خماس(أم غايب سابقا) و من مدمنينكم نوعي ما يطوف يوم إلا و لااااازم أجيك عليج و على لوير و كيتي و مجموعة كبيرة بعد من الجماعة اللي عرفناهم من تعليقاتهم في مدونتج لاااااا و أزيدج من الشعر بيت شوقتيني و سويتلي مدونتي الخاصة و طبعا مانستغناااااش عن تعليقاتكم الحلوة

بصراحة إنتو ناااااس مدوناتكم ماااا تنمل و ترى شطبنا على كللللللل البوستات القديمة و من صجنا نوعنا إذا شفنا موضوع يحتاج النقاش نتيمع كلنا أنا و أم سلوم و أم خماس و
3eshtaw
و غيرهم بعدهم خلف الكواليس..
و ما عليه اسمحولي طولت عليكم شوي

و تردين بالسلامة إنشالله

Nora said...

hehehe .. he's smart ..

عاد غريبة اللبنانين ما يخلى منهم اي مكان بالعالم
!

انا خلصت اللبنة اللي اهيا غرامي بألمانيا .. على النية طلعت وحدة عربية علمتنا اسمها بالألماني و طحنااا له لبنة
;D

امي تسوي عيش و مشروووم .. تقول حق اخواني هذا فقع سويسري

hehehehehe ..

hv fun .. w come back soon yalaa tara gemt a7taar eshayaa ana ;pP

بنت الشاميه said...

الحمدلله علي سلامتك وسلامة العائلة الكريمة بس شنه العطلة قصيرة علي سفرتكم
اتا احب كله اعيد في الكويت خصوصا عيد الفطر مااحب السفر ايام العطل الرسمية...................انااحب اللبنة وكل ما سفرت اخذ وياي لبنةالمراعي ..............ها صج كويتية المهم استفقدانك في هذه العطلة

Nescafé said...

ههههه .. يحليله والله ومايخلي شي بخاطره
عليكم بالعافيه .. وبالسلامه ان شالله

Dr. Saleh said...

I hope that you are having a lovely time with your husband.

لعمل اللبنه من الروب طريقة قديمه وهذه إحدى الخبرات التي يتعلمها الناس في الخارج (الحاجة أم الإختراع) والحكمة من إستخدام الدلاق أو فوطة صغيره (فوط المطبخ للمسح) هو التخلص من الماء الموجود في الروب. نفسيا أحب أن أستخدم الفوطه

Kuwaiti said...

يههه والله فكره خل اسويها
انزيين اذا الدلاق قديم ومحمظ شنو يصير بالرووب هل يصير معتق ههههه
انا اعرف طريقه شوي احسن من الدلاق يبي غتره نظيفه وحطي الرووب فيها هذي نستخدمها بالبر