Thursday, September 28, 2006

رمضان حلو بصلة الرحم




من خلال زياراتي لأهلي و أصحابي خلال الشهر الفضيل لاحظت خصلة الله يهداهم بايخة ، وصرت مع الوقت صج ما أتحمل هالنوع من الكلام.

التشره الزايد عن اللزوم.

نسينه أشباهج، ما قمنا إنشوفج ، محد ياي عيال إلا إنتي ، و أدري أكيد من محبتهم الزايدة لي و إلا لو ما أهمهم ما تشرهوا ، بس عاد يقولك من تشره تكره.

يعني إحنا مو مثل أول أعترف ، ما إنشوف بعض إلا بعرس و إلا عزا أو وحدة والده.

إنزين أنا من الجيل لصغير فمعناها ما أقدر أعزمهم و أسوي يمعات و أنا في بيت حمولة، فيبقي الدور علي لكبار ، أهما إللي لازم إيمعونا علي الأقل مرة بالشهر و بالويييك إند عشان يراعون إن ورانا يهال و دراسة . أنا مو قاعدة أتكلم عن أهلنا لقراب ، أتكلم عن عيال عمي و عيالهم و خصوصا إني يايه من عايلة كبيييرة وااااااااااااايد و الله أمس شفت ولد عمي الكبير ما عرفته، لو أشوفه بالشارع راح أعرفه من زوجته ، لأني أصادفها بموجب.

صلة الرحم حلوة ولازم الواحد يحرص عليها، بس صج المشكلة فينا و الكلافة الزايدة و طريقة الإستقبالات و التزهلق الزايد عن اللزوم.

إشفيها ليه سيرنا بجينز وبلوزة ؟

وكل واحد إييب طبق و إنتيمع يوم خميس من أول كل شهر؟

بنتي لما تكبر ما راح إتعرف عيال عمي و عيالهم مع إنهم يمكن يتصادفونها بأي مكان.

تذكرت مرة يوم كنت بالجامعة ، دخل علي زميلي بالكلاس و كان وياه رفيجة ، جان يقوللي :

ريما ؟ تدرين منو إللي وياي؟

قتله لا والله منو؟

جان يقوللي معاج فلان لفلاني ولد عمج

أنا: هاااو إشلون ولد عمي بس مو نفس إسمي؟

جان يقوللي القصة إن يدتي كانت ماخذه ولد عمها قبل لا تاخذ يدي ، و يابت ولد واحد وتوفي زوجها و خذت يدي تالي! فا أبوه أخو أبوي من الأم !

فأهوا ولد عمي بس مو نفس إسمي !

تخيلوا كنت بالجامعة و أكتشف هالمعلومة ومن واحد غريب!

يعني صج مو شي يحر؟ مو لازم إنعرف بعضنا بعض؟ حريم و رياييل وليش صار برمضان إنتيمع و لي صار العيد كل واحد خذا إعياله و قب من الديرة و عذرة الزحمة.

37 comments:

Unknown said...

اهم شى انج من الجيل الصغيييييير :))))

المهم سمعينى انا لو منج اعزم اللى بطقتى على جاى او كوفى شوب لو مرة بالشهر
تحسبلج :)

على العموم هذى الدنيا كلها صارت جذى محد يدرى عن الثانى :)

ووويييه من زمان انا مو اول واحد

bo9ali7 said...

يا معودة انتي سالفتج هينة..عيل شتقولين على اللي صارله اربع سنين يرمض ويعيد الفطر والاضحى برة الديرة..مو قهر؟

ReLaaaX said...

ايــــــــــــه الحمدلله ياربي آنه عبالي بس احنا ;p


والله صاجه ...!!!!؟

Fuzzy said...

هه حتى برمضان تبون تسيرون بجينز وبلوزه !! لازم دراعة مخصوصة لا وبعد لازم ثوب وبخنق هاهاها والشعر فرق من النص وعجفتين وتحنين جفوف ايدينج وهالله هالله بالديرم والكحل

هاهاها

ودج ؟

Bed0uin said...

I totally agree with you Reema... انا عيزت واقووول واتحجي حق اهلي لانه نفس حالتج العايله شوي كبيره لكن ما بذنهم ماااااااااي .... بس خلاص غسلت ايدي منهم فبسوي اليمعه عندنا واللي بيي حياه الله واللي ما يبي ما يشوف شر صراحه فقدت الامل فيهم و انا اقووول لا تنطرووون احد يسوي الفيرست موووووف ... خوش موضوع والله =)

{ 13 } said...

وانا كنت اعتقد ان مدونة شاي حليب ما تطلع عندي بس ..الصفحه تطلع فاضيه ..مثل مدونة سعلوه ....هذا سببه ايش؟؟لان لو لاغي مدونته يطلع رساله ان المدونه غير موجوده ....واذا فيها ايرور مؤقت مثلا ..بس مدونته ممسوحه ..

Яeema said...

mishari
جيل الأمهات لصغار ، و إللي لازم لنا دور إنا ناصل أرحامنا


أي كوفي شوف الله يهديك
تخيل أنا جدي ماخذ 7 حريم
و عندي 17 عم و عمة
و أخر العنقود عمي إللي أحبه وأموت عليه يدي يايبه و عمره 61


فأي كوفي شووف إللي بيزي العايلة الكريمة و أحفادهم


إنت صاج محد يدري بس إحنا لازم يكون لنا دور إنشاء الله بهالموضوع



بالبركة على المركز الأول
هاهاهاها
تشرفت والله



princess

ما أدري شقولج بس حلو الواحد يعرف أهله ، صرنا إنعرف الغرب أكثر من عيال عمامنا

Яeema said...

kitty
هلا والله بالغالية

إنتوا الحمدالله صايدينها من النص ويا لزوارات

صج متعبة لأنها أسبوعيا
بس والله بتشوفين عيالج إشلون راح يربون
يحبون الناس و رد و بدل لأنهم مخالطين لكبار



bo9ali7
إنت حياتي ظروفك غير و مؤقته
كلها فترة و إبترجع حق أهلك و رافع راسهم بالشهادة


و إذا رجعت إعزمنا كلنا علي قوووزي روووب

هاهاهاهاها

Яeema said...

relaaax
لا حبيبتي وااااااااااايد في

الحين حتي جيل الشياب إتلاقينهم إمزاحمينا بالقهاوي

ماكو دواوين و قعدات و يمعات نفس قبل




fuzzy

أنا وحدة ما أعرف أمشي بدراعة و أتكرفس و ما أعرف أغرف فطور حق أحد و جمي طاااب بالمرق

ترينج و إنقز


مو قاعدة أتكلم عن رمضان بس




و بعديييين لألألألألألألألأ

حدي ما ودي

i hate it !

Яeema said...

love nature
hehehehehehehehehhe

I AGREE



bed0uin

إنتي الصح ، المبادرة منا إحنا خلاص و مباركة لكبار للموضوع

و خلصنا



13

بالضبط ممسوحة

لأني فتحت السورس مال الصفحة
page source
emty mako HTML code !

you think they hack his page?

why he didnt open new one !

والله شي يحر والله فاقدينه

سالفة قلب said...

اي والله ياريما
صدقتي....الدنيا صارت تلاهي

وعلى طاري الباستا

اشرايج اتسيرون علي بالحديقة وتاكلونها عندي؟؟؟؟

ترى الجو صاير عجيب

Яeema said...

سالفة قلب

أبدا ما عندي مانع

برمضان أحب اليمعات و لزوارات
لأن اليهال يكونون نايمين من التسع و بالي مرتاح


kitty !

السلطة عليج
و الحلو عليي

{ 13 } said...

we will never knOw what happened tO him unless someone knOw him persOnally ..!I keep lOse a lOt of blOg'S..!..hOpe im nOt gonna be neXt :P..

The Simper said...

والله اليمعات حلوة، بس عاد لاتصير التزام

انا ما أحب الالتزام

ابي كل شي على راحتي هيهيهي.. يوم اروح يوم ك.ش.ت.هيهيهي

وعاد أهم شي سوالف دواوين ولويه وغبغات بس عاد ما نبي احد ايلزم علينا الا تقعدون و لازم ومادري شنو

ليش ماكو جينزات حق الدواوين؟ ;)

ترا على مادري شنو هذرتي هيهيهيه مادري شنو قاعد أقول

freeq8 said...

يسلام يا صغير انت...!!!بس حطي بالك على صلة الرحم وخاصه في رمضان ... والوصل ترى ما يحتاج تشجيع من أحد أهو طبع يولد معاك وتتربين عليه ... نعم المشاغل كثيره ... لكن الي في قلبه الصلاة ما تطوفه ... والسن ما له علاقه بالوصل ... بعد هذا الدرس والنصيحه ... قومي الحين .. وروحي حق ارحامك ... والله يعينك أنشاء الله

enter-q8 said...

الصراحه لهم العذر يا ريما

هذا واحنا بجيل ثورة الاتصالات

يعني التلفون وكل شي

انزين ترى مره بالاسبوع ما يضر ان الواحد يتصل

اعطيك سالفة

انا عندي واحد من عيال عمي

ازوره في المناسبات بس
راح تقولين كاهو انت نفسي بقولك لأ

لأن الاخ فاتح ديوانية و يبي الناس يمرونه بس
فا طنشت

قام كل ما يقعد اهو وعيال عمه يتشره وانت وانت
اشلون صارت لك السالفه الفلانية واحنا ماندري
لا انت مقصر يا خالد ما معاك حق


عاد انا بخبث

ارد عليه
اقوله اي قصدك السالفه هذي

صارت بعد ما مشيت من عندكم بيومين

و رقمي نفسه ما تغيير تصدق

يطخ

فا حس من يومها بس عذره اني مو فاتح ديوانية اسبوعيه

ارد واقوله انا دوامي شفتات

وعاوزين ندور على لقمة العيش اللي صعبه قوي اليوميين دول يا ابن عمي
ورانا عيل جاي بالطريق عاوزين نربيه

فالتشره يصير على سنع

يعني انا ما سالت انت اسال ياخي

هذا اللي ما احبه بالتشره اللي مو سنع
لما يكون معاك انسان كتواصل واصله

ما واصلك اسال عنه مره مرتين الثالثه

اقرب حفره وطريق السلامة

و يا محفوظة السلامة ما ادري اي بنر اللي تسألين عنه بموقعي

اذا بنر شاي حليب محلله يا اختي وياريت كل الاخوان يحطونه عادي

اما اذا قصدك بنر علم الكويت

مش مشكله هم تستاهلون

انا الصراحه سويته علشان يكون للمدونات الكويتية

و بالاخص حق كويت بلوجز اللي ما قصروا و هذا مثل ما يقولون ردة جميل لهم

و ودي ان كل المدونيين الكويتيين يحطونه على بلوجاتهم

للحين في اثنين

LiL Eline
%
i live in Q8

Unknown said...

القطاعة مو زينة
وهذي تربية من الصغر اذا ما في عشرة وتاريخ مشترك وصور قديمة
ما في فايدة المعرفة على كبر مالها طعم

Яeema said...

13
we are doing what we can do , asking about the person who was caring to share with us everything bel blog


الله يسلمه وين ماكان و يرجه لنا سليم معافى




kitty
مو يوم السبت إرتبطت ويا الأهل
يمعة عمي العووود

وناسة جنه حاااس فيني ربي و إستجاب دعوتي باليمعة المختلطة

Яeema said...

أكمل الرد بعدين بنروح نشتري قيقيعان

الاء سعود المجيبل said...

جينز وبلوزة حق تسيورة رمضان @@

ما تصير مو حلوه الصراحه حلاته دراريع حلوه او بدلات سنعه جذي تحسين ابحلاوة عاداتنا في رمضان...^___^


ويعطيج العافيه...:)

Nescafé said...

والله صاجه يا ريما.. انا الشي هذا يأزمني.. تخيلي لما نشوف اهلنا بالمناسبات بس اسلم واتبوسم مااعرفهم ولا اعرف بناتهم مع ان منهم اللي يكون قريب
بس اشوه الوضع الحين تطوّر .. الوالده سوّت لي شجرة العايله فيها حريم ورياييل وعيالهم علشان اثبت :")

Mamloo7a Q8ia said...

والله صاجه يا ريما كلش ماله سالفه التشره .. والواحد زين يلقى له وقت يوصل اهله واول ما يشوفونج يشتغلون عليج من هالكلام
والله الدنيا مشاغل وكل واحد الله يعينه على اللويه اللي هو فيها.. وبنفس الوقت يحاول انه يزور ويتواصل مع اهله
احنا تربينا من احنا صغار انه مهما تكون مشاغلنا او ظروفنا اننا في المناسبات السعيده والغير سعيده لازم نشارك اهلنا واقربائنا واصدقائنا حتى لو ما كانوا واصلين فينا.. وامي كانت ولا زالت تقول " اوصل من قطعك " وما شاء الله عليها الله يحفظها لنا واصله حتى في ربع امها وتزورهم وتسال عنهم حتى عقب وفاة جدتي " امها" وبما انها كبيرة العايله فدائما بيتنا مفتوح للاهل والاصدقاء والحمدالله بهالطريقه قدرنا نتعرف على اهلنا رجالا ونساءا
الزبده انج صاجه لازم الكبار اهما اللي ييمعون الاهل ولازم الاهل يعودون عيالهم على الوصل والزيارات للعايله

Mamloo7a Q8ia said...

ريمااا... اخجلتي تواضعي بوجود بلوقي مع البلوقات اللي تحبين تزورينهم يوميا وهذا شرف لي ومشكوووره يالغاليه

الفراشة said...

ريما الأهل موكل وقت نزورهم
لكن رمضان مناسبه حلوه
ان الواحد يقدر يوصل الرحم
في عمه او عمته يعني الأهل
فهي فرصه لنا لأن الدنيا ماخلت لنا وقت
سواء العيال سواء الدوام يدوب الواحد يرتاح
حاولي قد ماتقدرين توصلين فيهم
لأن تدرين ان فيه ناس يدخلون الجنة عشان
سبب واحد وهو صلة الرحم

layal said...

مثل ما قلتي من تشره تكره

والكل علي قولتنا مشغول

يعني لو حد تشره وقلتي له ليش انت ما تتصل؟؟ يقول انا مشغول معناته لا تتشره من اساس

وتره احنا معذورين حيتنا مو نفس حياة الاهل قبل اللي ما عندهم سالفه الا التسير علي بعض والقهاوي

وجان علي الاهل- ناس وااايد ما نعرفهم الا اذا احد مات هذي فلان وهذي فلانه
الله- يعني ما نعرف بعض الا اذا احد مات
سبحان الله

Dr. Saleh said...

من الأشياء التي لا أطيقها هي التشره من بعض الأهل والأصدقاء
في هذا الزمن إذا الرجل شاف أخوه مرة في الإسبوع فهذا إنجاز
ولست الوحيدة في عدم التعرف على أقاربك
ففي أحد الأيام يسألني أحد أقاربي( من الجد الخامس عشر) عن شخص يتحدث إلي الوالد قائلا إن شكله يقربلنا فمن هو، لأرد عليه لا أعلم
فألتفت لأسأل العم من الشخص الذي يتحدث إلي الوالد، فأكتشف إنه ولد عمتي
وللأسف هذا الشئ كثر في أيامنا هذه
والسبب إنشغال الناس في أمور حياتهم اليومية، والعائلة الصغيرة صارت عوائل كثيرة وكبيره والإتصال صار على نطاق الأسرة القريبة الضيق

Mohammad Al-Yousifi said...

كلامك عدل بس بعد شنسوي

الحياة صارة ركضة ركضة و ماكو بريك احد يوقف يتنسم

الله كريم

قوليلهم يفتحون بلوجات عشان نتعرف عليهم

لوول

Honey™ said...

way akrah hal sh3oor ,, salfat il tsherh ,, they should do something about it

PearL said...

موضوعج حلو وواقعي جدا جدا جدا
واعاني منه وايد

وانا بعد اقول لازم الكبار اهمه اللي ينظمون السالفة

Яeema said...

q8ya :
هاهاهاهاهاها
ما أعرف أمشي فيها

دراريعي لا ثلالثت أرباع و إلا شي ماله علاقة بالدراعة
إسم دراعة
الله يعافي المصممين هالأيام

مشكلتي ما أعرف أطلع برة البيت بدراعة

معنها إتينن و ناس وايد يقولون حلوة الدراعة عليج

أحب إللي تكون أقرب إلي بدلة سهرة

قاعدة أشرب ريد بوول و قمت ألبح عليج
ههههههههه



شروحات
أولا أسعدني وجودك بمدونتي
و كلامك صحيح و بالنسبة حق للكبار راح نستحملهم

و لنا الأجر إنشاء الله


ودك ليه كبرت أحن نفسهم
أتشره علي عيالي و عيال عيالي
هاهاهاهاها


تحياتي لك

يوم دخلت المدونة تقهويت؟

Яeema said...

nescafe
والله فكرة حلوة سالفة شجرة العايلة

بس لويووه إشلون؟

تخيلي أحط صور عيال عمتي و عيال عمي ريلي يشك فيني
هاهاهاهاهاهاها

ترا عيال عمي يصيرون عيال خال زوجي

أشوة يعني أثنينا تصلح هالشجرة





mamloo7a q8ia
والله قبل لا أييب اليهال و يدشون المدارس كنت أروح وياها حتي حق ربع يدتي الله يرحمها

و هذا إللي فقدته هالأيام محبوسة طول الأسبوع

إنشاء الله الله يقدرنا و ناصل أ{حامنا و من يحبونا



مملوحة أحب مواضيعج وايد و هذا أقل ما أقدر أسويه

إنتي فرضتي نفسج بطريقتج في التعليقات ووجهات نظرتج

أعجبت فيج
و قمت أتكلم عنج ويا ربعي

بما إنج يدية إهني ، فشو إشوي راح إتشوفين نفسج أبدعتي إنشاء الله


عزيزة وغالية حبيبت قلبي


و إنشاء الله أكو وقت بس حق كل حبايبي إللي بعالم البلوغير

عشان أزورهم و أقرالهم

Яeema said...

الفراشة

هذا إللي قاعدة أقوله ، و إنشاء الله الله يقدرنا و ناصل الأرحام

والله إتحسين بوناسة لما إتزورين أهلج

ولازم أعلم بنتي بعد علي هالعادة




bonvitta
hehehehehehehhehehe
la esmella 3alina min enkhali9 min first week yalena 3azayim el gerge3an

hehehehehehhe

at least last week elly nertaaa7


nice seeing you here ;)

i love the sea too
i am like a fish, if i travel it has to be with a country with a sea view!

Яeema said...

layal
إيييه والله سبحان الله

أنا صرت قريبة من ناس وايد بسبت العزا
ليييش؟
لأن نقعد 3 أيام ويا بعد بدون تكليف ولا تسمت

سبحان الله




dr.saleh
والله كلامك عدل ، أنا يمر الأسبوع هوا و فجئة أمي تتصل ، إشدعوة ما إنشوفج
محد ياب إعيال إلا إنتي

أقولها يما مدارس خاصة نوصل الساعة3
إندرس و أمور البيت إللي كلها علي المرا
يعني إداد!؛



kila ma6goog

هاهاهاهاهاهاهاهاها
حالتك صعبة حبيب قلبي

لييييش بلوقات حق الفضايح

أحش بمنو بعدين؟


الصبر يا مطقوق

إشلون سلمي؟

Яeema said...

honey
any creative idea!

what do you think of a very big smile when they ask you !


or you do a rude thing


if they say anything , tell them can you take my mobile # if you miss me call me or sms me


hehehehehhehehe

welcome sweets to my blog :)



pearl
إنتي ويييينج فاقدتج

( بديت التشره )

هاهاهاهاهاهاهاها


راح أثير الموضوع علي عمامي و عماتي اليوم
عندنا يمعة كبيرة في بيت عمي العود

إتييلكم الأخبار

العين الساهرة said...

الله أمرنا بصلة الرحم والرسول صلى الله عليه وسلم أمرنا كذلك بصلة الرحم. لكن للأسف مثل ما قلتى صارت اليمعات هالأيام فيها وايد تكليف، استعداد وخسير مالها داعى، أنا كنت دايماً أقول لما أنزل بيتى راح أخصص يوم بالأسبوع حق أمى وخواتى وخالاتى وجدتى وبناتهم، يس بعدين إحترت أختار أي يوم الويك إند غير مناسب أيام الأسبوع، ما في يوم مناسب للجميع، إحترت شسوى، بالآخر ما سويت يمعه، لكن الفكرة لاتزام موجودة وإنشاء تتنفذ

Яeema said...

العين الساهرة
الله يقدرنا و يعطينا علي قد نيتنا
دام النيه موجودة فراح إتتي إنشاء الله بالقريب العاجل

الله يحميج يا رب

Kuwaiti said...

امممم والله يا حجيه
احنا الحمد لله محد يتشره على الثاني للأن دايما نشوف بعض والحمدلله اني اعرف كل صغير وكبير بعايلتنا صج انه في ناس مايعرفوني بس انا اعرفهم من كثر ما اقعد بالديوانيه ويا الشياب واسأل وايد وانا عدوي اللدوود القطاعه
على الاقل اذا ماتقدرين تيمعينهم في بيت حمولتج يمعيهم في بيت ابوج ولا شرايج