Saturday, September 25, 2010

شكر خاص جدا لشبابنا

شبابنا الأعزاء

ودي أشكركم من كل قلبي على أخلاقياتكم العاليه بتوصيل بنات ديرتهم لبيوتهم كل يوم

أدري والله انكم شقرديه



و هم أدري انكم اتحبون اتسكرون الشوارع لأنكم تدرون إن ما انعرف انسوق إلا و طابور حماية الشخصيات ورانا بسبتكم

أعزائي الشباب الشقرديه

اللي يعرضون خدماتهم بحمل الأكياس عنا بالسوق ، أشكركم من كل قلبي لا خلا و لا عدم يا رب.

أعزائي الشباب أصحاب الإبتسامات الشقاقيه.

والله أنا أشهد إن صار عنكم وعي بنظافة اسنانكم اشحلوكم صايرين عيني عليكم بارده.

أعزائي الشباب أصحاب النظرات اللي من تحت لي تحت

أشكركم على التفاصيل الدقيقه اللي ألقي صداها بايميل حلو يوصلني بالفيس بوك ( منورة اليوم ويا الأبيض و لون التان الخطير و اللوك الراقي اللي ما شفت أحلا منه )

أعزائي الشباب التكانه

يعجبني ال poke

اللي أشوفه الف مرة في بروفايلي و طاق الخفه فيه

أعزائي موديل المحقق

أشكر جهودك الجبارة في رحلة البحث و التقصي الباديه من لوحه سيارتي و المنتهيه بمسج ( عن الإحراج ) على مبايلي تشرحلي اشكثر تعبت على ما طلعت رقمي و تقوللي بعدين اشدعوة عندج 4 أرقام بزين 2 بالوطنيه؟

والله حلل الأرقام و لقي أحلا واحد يمكن يكون رقمي

ما يدري ان الباحي هذيل أرقام اليهال و الخدم اللي عندي بالبيت

أأشكر جميع الشباب اللي صار منظره حلو و مجملين المجمعات بكل حزة من الساعة 9 بادينها بمشي رياضه الي الساعة 11 باليل .

تدرون نبيكم حوالينا 24 ساعة بالمجمعات عزوة الصراحه و اتحسسونا بالأمان لين ما صرتوا أكثر منا يالبنات. وفجأه أستاحش بالقهوة !

حبيت أشكر الشخصيات اللي تفقدي لي ما طبيت المجمع اسبوع و يتعني و يقوللي عسي ما شر ما شفناج من فترة عسى المانع خير؟

رسالى شكر أحب أقدمها لكل شخص

يحس نفسه خفيف طينه

و يحس ان جميل

و تكانه

و يعرف بالأصول و الواجب

و ماشاء الله متربي

و عباله اللي قاعد يسويه في بنات الناس ماراح الله يرزقه بمعتوه يسوي هالحركات حق خواته و ان كما تدين تدان.

الصراحه؟

ما قمنا انشوف رياييل تكانه بالديرة

خفاف أقوي شي

بطاليه

تهتمون بالتيشيرتات أكثر من أهتمامكم بعقولكم

ما أستانسنا بالقهاوي الا مع هبتكم بالكرة بكاس العالم

ما قمتوا اتحشمون البنات

حتي و انا أمشي مع بنتي ما سلمت!

بس عاد والله العظيم الوضع صار خااااااااااااااااااااااايس

كل اللي عندنا مجمعين بالديرة!

تحرمونا منهم!

وين انروح!

صيروا تكانه!!!! والله مالينا !

أقول أروح الصبح ما نسلم

نفس السيناريوا

نفس الحوار

نفس الأسلوب

و بعدين يعني؟؟؟؟؟؟؟؟؟

شعب شبابه 99% خفيف!!!

6 comments:

Seema* said...

الموضوع مضحك مبكي!
الله يصلح حالهم ويصلحنا وياهم.
:)

Bin3agul said...

Reema lash za3lana 3alina ..? Ba3dain bthmtich mo msawlich jaw w raf3een ur self esteem ?? :p look at the bright side

moayad said...

مشكورة أختي على رسم هالصورة الفجر سعيدية عن شبابننا... قصدي عن ٩٩٪ من شبابنا

:)

athoob said...

سبحان الله
على كثر الانفتاح في بلدة مثل بريطانيا
إلا أن المعاكسات تعتبر حالات شاذة جدا
و نادرة و أغلبها من المراهقين اللي يبين من أشكالهم إنهم ضايعين أساسا !
محد له شغل بالثاني !

بعض الشباب للأسف تتعلم بأن النظر إلى المرأة لا يكون إلا بشهوة والعكس

و الأمر من ذلك، تفسير تصرفات الفتيات أو الشبان المـؤدبين من جمعتهم هواية، دراسة، أو عمل على أنها خارقة للعادات و التقاليد و أنها عيب !

و لو خليت خربت ،،، الديرة فيها شباب ينحط على الجرح يبرا

الله يهديهم و يهدي عيالنا و يحفظهم أجمعين

Яeema said...

seema :
pathetic وحياتج



بن عاقول:

وييييييييييييييييييع
أي
self esteem!!!!!!!!!!!!!!!!!

مو من صجك صح

واللي يرحم والديك شفت الأشكال انت

ظيييييييييييم و ظلايم

لا لا لا ما أصدق انت بالذات يطلع منك هالتعليق

أنا أقولك سلملي على الملكه
ههههههه



moayad :

والله مو قاعده أبالغ

بش عشانك راح أنزل النسبه لي
98 %




athoob:
هلا بالغاليه

الخير يخص و الشر يعم

أكيد لو خليت خربت
بس وينهم؟؟

والله سإليني عن الأشكال اللي هني

و أقصد بالمجمعات
والله يضيق خلقكم


و اتقولين هوايه
هم سإليني عن اللي تجمعنا وياهم هوايه

والله فاهمين غلط

مو تقوليللي والله مروا علي أشكال و أرناق

تفكيرهم بالنهايه وحده

Yara said...

شباب فاهمين الأمور غلط ماعنده أي اعتبار للخصوصية

يستخدم التكنولوجيا بطريقة تفشل