Thursday, September 11, 2008

طبيب عيون و مسلسل

صارلي تقريبا 5 سنين ما أتابع أي نوع من المسلسلات

بسبب الأوقات و إن المسلسل يقيدك بوقت و 30 يوم صعبه التزم

المهم

عندي موعد طبيب عيون الكشف النهائي بعد عمليتي

و ماخذه آخر موعد و كنت بروحي بالعياده

مبطلين التلفزيون و السكرتيرة كانت تطالع مسلسل سوري

المهم

المشهد الحين :

وحده قاعدة تولد

و هي خرسه

وولادتها متعسرة

و ما يطري عليها إلا منظر أمها و هي طايحه من الدرج و ميته !

و بعد 10 دقايق صراع مع هالمنظر و بدون شعور بدت دموعي تنزل و إندمجت وياها!

بعد ما ولدت جان يرجع لها الصوت و تصرخ تقول أمييييييييييييييييييييييييي

الله لا يواريكم ويهي

قلب ألوان

دموعي مو راضيه توقف

في عز و أنا بهالحاله و إلا الدكتور يطلعلي برة يناديني

يالله ريما دورج

قمت و قبل لا أوصل

أهوا شاف ويهي

إخترع

شفيييييييييييييييج!

عسا ما شر ليشه الدموع ؟؟

تبوسمت و قتله السالفه

ضحك علي الدكتور

قاللي يالله أحسن بعد غسلتي عيونج قبل الفحص

بالجهاز و هو قاعد يكشف

طايحلة طنازة

والله ريما باجيه بضمير

هههههههههههههه

ولليييييييييييييييييييين شيبي هذا بعد!

قتله دكتور كل منك!

أحد يحط مسلسل و يبجي بعد؟؟؟

قاللي شنو المسلسل

ريما : ما أدري إسأل السكرتيرة اللي تتابعه

مسكين قالها تييبلي ماي يالله هديت

و راح عليه الفحص لأني ما شفت شي من لدموع

هاهاهاهاها

بعدين دقيت على الوالدة قتلها شنوه المسلسل اللي يضيق الخلق

جان تقوللي باب الحارة



على طاري المسلسلات

قاعدة أشوف أسد الجزيرة

وهذا السايت مالهم إللي بشوفه

لأنه ممنوع

و كل ممنوع مرغوب

بس والله من الحلقه الأولى مبين إن متعوب عليه

و إندمجت

لا و يايبين طاري جد أبوي إن كان يزودهم بالسلاح

حده يدي كان زقرتي

هاهاهاهاهاهاهاهاها


يالله أخليكم ويا السايت


click

7 comments:

QiYaDiYa said...

hheheheheehh ;p

والله انا لما شفتها بعد بجيت !!! ;p

و عندي مقطع امها لما تموت مقطع تعذييييب !!!

رفيجتي كانت شايفة الحلقة قبلي ..
تقول وقت ولادتها راح تذكر امها غمضي عيونج ;p

لاني استعسرت من منظر موتة امها ..

و على اسد الجزيرة لو عارضينه بالتلفزيون جان محد شافه ;p ;p


و حركااات ..
عاد اورثي المهنة من يدج ..

بس انتي اسلحتج غير ..
كاميرا و عدسات ;p ;p

Mohammad Al-Yousifi said...

طلعتي تاجرة سلاح

اقول هالميزاراتي من وين

:P

3aleech bel 3afya

Bin3agul said...

i7na 7a6eeen yadna yetkalam mkasaar !!!!!!! :P

Purplecious said...

لوووووووووووووووووووووووووول

اهم شي انج اندمجتي بالمشهد
ههههههههههه

بس تصدقين انا اللي بغيت ابجي لما قريت انها نطقت!!! ما اقدر اقول اني تابعت المسلسل بس شايفه جم حلقه من الجزء الاول و جم حلقه من الثاني و باجي القصه مسولفين لي عنها

الحين شوقتيني ابي اشوف الام شلون ماتت و هذه شلون ولدت

لووووووووووول

اسد الجزيره وصلت لي ما الحلقة 9 و الحين مادري شنو سالفة الـ
e-GO
صاير بطيييييييء لوع جبدي

خلاص عيل ضبطينا بصفقة أسلحة
ههههههههههه

الطارق said...

سلامة عيونج ما تشوفين شر .

أما المسلسلات فنادرا ما اتابع أو بالأحرى نادرا ما ألقى شي يشد ، وبيني وبينج في السنوات الأخيرة تشوفين نفس الممثلين وتقريبا نفس المشاهد في اكثر من مسلسل ، مسلسليين او ثلاثة تاريخيين واكثر من 7 مسلسلات خليجية وكثرهم سورية ومصرية ونفس الممثلين !! فالواحد ما يدري هالمشهد الي يشوفه مال اي مسلسل وهالممثل مره شرير ومره طيب ومره ابو ومره ولد بشهر واحد !!


قبل جم سنة تابعت سلسلة الاندلس فأول واحد كان صقر قريش ورمضان الي بعده كان ربيع قرطبة والي بعده كان ملوك الطوائف ، كانوا روعة التصوير والديكور والملابس واللغة المستخدمة تطرب الأذن والأحداث والتثقيف وكل شي كان رائع .

بصراحة سلسلة الأندلس رفعت السقف عندي وخلت كل باقي المسلسلات مو بالعين .


وعلى أية حال اشوف ان تمضية ساعة في اليوم او ساعتين بالكثير في رمضان على التلفزيون كافي واكثر من كافي .

يقول النبي صلى الله عليه وعلى آله وسلم : ( روحوا عن أنفسكم ساعة و ساعة فإن النفوس إذا كلت ملت )


وسلامات ، لا تنسينا بدعائج

mjkout said...

Asad el jazeera 3ajeeb thanx alot sarly 5 hours mtab3a idmaaan

Anonymous said...

hehe meendamja 3adeel :P