Tuesday, September 23, 2008

Mr.Baker - quality is a way of life !!!!????

كنت رايحة بيكر أييب منه كيكه حق عيد ميلاد ولدي .
و أنا قاعدة أنطر يكتبون إسمه على الكيكة و إلا سلال كبيرة قاعدة تنزل من سيارة نقل الشركة نفسها.
_
_

الفرع اللي كنت شاريه منه أهوا بيكر اللي يم جسر الجابريه والسرة
اللي شاف المكان بعرف إن صغير و مو مهيأ انه يشيل هالكميه من الحلو اللي نزلت من السيارة.
_
_

الصدمة الحين اللي خلتني أكتب هالبوست.
حوالي 6 سلال مكتوب عليهم ( شركة المطاحن الكويتية )
تعرفونهم؟؟
الصفر و الزرق اللي ينزلون فيهم الخبز عشان يوزعونه على الجمعيات؟؟
إيييي هذا أهوا
مصفوفين فوق بعض
وياريت نظاف!!؛
وسخييين فيهم سنون و شي أسود من التخزين
_
_

شنو فيهم؟؟
كيك مكشوووف ماشاء الله تبارك الرحمن
بلاكفورست و كيكة الكاكاو
لا و حلو المانجا اللي في لماعين البيض اليدد اللي مسوينهم و مو عاملين حساب إن مالهم غطي
_
_

وااااي ما عبرت ما أتكلم يوم شفت المنظر
مدير المحل و المسئول ( لبناني بعد
:
لو سمحت ، هذه طريقتكم كل مرة اللي تنقلون فيها الحلو من مكان لي مكان؟
المدير : ايييي شو في؟ ما الكيك من السيارة لي باب المحل
ريما: و من السيارة مكشوفة طول الوقت؟ ليش إنتوا تغسلون السيارة بالماي كل مرة؟
و بعدين هالسلات ملوت شركة المطاحن ، معقولة ما عندكم طريقة أحسن من هذه تنقلون فيها الكيك؟؟؟؟؟
الكيكه كلها كريمة و سهل إن تتلوث مو من زين جونا البارد والنظيف اللي تقول عادي من السيارة للمحل ، والمحل أصلا إنت حاط الكيك بالمرر! مو حتي بالبراد!
المدير: لا ما بيأسر ما تعتلي هم
ريما: تدري ؟ أهم شي اني عرفت شلون تنقلون و مشكور و ما قصرت ، يالله مع السلامة

المصيبة ما يقول أنا غلطان و رمضان و الدنيا كلها تبلع حلو
المصيبة إن مستهين بالشغله اللي سواها
هذا جدامي مسوي جذي
عيل من ورانا بالمطبخ شلون؟؟؟

إنتوا تخيلو إن واحد كان يم الكيك و قاعد يعطس؟
أو الحمالي اللي شال الكيك نسمة بالكيك كله


المصيبة إن اللي بالمحل محد تكلم و كان زحمة و الوضع عادي عندهم!!!
هل أنا فيني وسواس زايد و الا الناس صار ماكو إحساس بالنظافه ؟؟

19 comments:

الطارق said...

ما أدري أشوف ان فكرة وضع رقم مسؤول في المخبز والاتصال عليه ، والتعبير عن الاستياء من المنظر الي شفتيه فكرة مناسبة .

على الاقل يمكن يحسون ويعدلون طريقتهم ، ونكون سوينا شي ايجابي .


مجرد فكرة

Яeema said...

الطارق

i send e-mail for them about my post

أعتقد إن فكرة التلفون غير مناسبة مع الموقف


بالكويت آخر شي انتسويه إنك تتصل على مسئول

بيطيب خاطرك بكلمة

و إلا بطرشلك كيكة للبيت و بس خلاص


مو هذا هدفي

بس لما تسوي بلبله شويه و يحسون إن الموضوع راح يمس سمعتهم


راح ياخذون رايك بعين العتبار


ويحسنون من آدائهم للنقل و التخزين
و خصوصا إن شغلهم وارد فيه التسمم

الطارق said...

تمام مدام عندهم إيميل وطرشتي الايميل وهم راح يشوفون البوست والتعليقات فأظن راح يعرفون مقدار الاستياء .

اتمنى انهم يستجيبون مو لأن احنا تضايقنا من طريقة النقل والتخزين بس ، بل لأن في النهاية من مصلحتهم يهتمون بسمعتهم ورضى زبائنهم .


وين جمعية حماية المستهلك عنج :)

:::ShoSho::: said...

وييع و لا ما فيج وسواس اكيد

ma6goog said...

ma a7ebbah

nice said...

ماكو الا العافية
اكيد الوسواس الزايد

Bo Jaij said...

صارلى موقف مشابه معاهم فى أول أسبوع من رمضان

طلبت حلو التمر ..إللى معاه كور محشوة بكريمة و إمغززينه بعواده

الحلو كان واصل من عندهم حااار....و واضح جدا إنه كان موضوع بره الثلاجه طول النهار و في مكان مكشوف...الكريما إللى داخل كور العجين إطلعت إمحزره....حااامضه و ما تنوكل...و كان موقف محرج بوجود ضيوف

حذفت الطبق بالزباله - تكرمون - و حرمنا نشترى من عندهم شى

على ما يبدو ضغط رمضان مو مستعدين له بوسائل نقل نظيفة أو حتى ثلاجات

athoob said...

والله لا وسواسية ولا شي
هذا احساس كل واحد يخاف على صحته و صحة عياله

و زين سويتي نورتينا عشان احرم اطب عندهم بالمستقبل !

Cat said...

thanks for sharing ..

7a6ayna X 3leeeh !

ana ma a7ebah wayed a9lan anyways ..

3bady said...

هاذول التجار ما يمهم الا الفلوس ما يمهم شي بالزباين

سالفتج اتذكرني بسيارات تيوتا فيه مكان بالبر فيها سيايير تيوتا بالاميات

تخيليي واقفين بالشمس و متنقعين و يبيعونهم على الاوادم و يقولون لهم هذا تبديل مجاني للتواير علشان ذايبة من سبة المصنع و جذي

الي ما يخاف الله يسوي الي يبي

خليني ساكت انا اقول..

abu eldestor said...

عاد انا معقد بهالسوالف

bo_sale7 said...

بالعكس مو موسوسة لكن قلة امانة ونظافة عند هالتجار

انا اللي اعرفه ان سمير سعيد نظيف ويتابع بس الظاهر اللبناني اللي عنده لاعب لعب

انا اقول المفروض ابلاغ البلدية وحماية المستهلك وساعتها يعرفون ان الله حق

خلاص بحطه تحت المجهر والله لا يقطه بلساني

Bin3agul said...

laish matdgeen 3alla 7imayat il mustahlik teshtkeen ?

Funny Q8i said...

المشلكة اصلا بالادارة

مدام الناس قاعدة تشتري، ماكو فايدة

وتحياتي

. . . ساخر كويتي said...

تلاقين الناس محد بيشتري حق نفسه خخخخخخخخخخخ

وكلهم ياين لتقديم الكيك كهدية

بالنسبة لي ماهو وسواس ولاهم يحزنون
الا هذا اهمال منهم
ورد مدير المحل بهذه الطريقة يعطي انطباع ان لايمكن اني ادخل هالمحل بالمستقبل

هذا مديرهم موفارقة معاه
عيل اصغر موظف عندهم شنو اللي بيفرق معاه

مع ان سمعتهم حلوة
بس بمواقف نفس هذي مااعتقد بيحافظون عليها

تحياتي
نصيحة اخوية سوي شغلك في بيتكم :)

ShLaLaT said...

لاااااا حبيبتي ما فيج وسوااس

النااااااس صارت ما تهمها النظافه

المهم بطونهم
@@


مشكوووووووووره لانج قلتي
عاد كنت احبه

بس احب الشي النظيييف اللي تثقين فيه

!!

Kuw_Son said...

شوفي ..

إذا أنا شايف الشغلة جدامي .. أمشي و أخلي اللي بيدي و ما آخذ منهم ..

لكن إن ما شفت شي ..

ماكو إلا العافية
:P

w happy birthday to your kid

دُمْيَة said...

وااي حتى بيكر جذي؟

يعني من وين نشتري بالله؟
:(

Organic Kuwait said...

hatha sij shay ma yenseket 3anna