Wednesday, September 26, 2007



من بين حوار من الحوارات بين أثنين من أهلي الشباب

لقيت تذمرهم من البنات كالعادة

البنات مدلعين

ما يتكل عليهم بشي

بس يبون و ما يعطون

***

إستوقفني هالنوع من الحديث

هل من الممكن إن البنت تكون رومانسيه و يايه مدلعه من بيت أهلها يتم كرفها ببيت زوجها؟

مو لازم يبيلها وقت اتعلم على الشقا؟

على سبيل المثال

لما البنت تييب أول بيبي لها و ما إتعرف إتسبحه تخاف يزلق و لازم أمها وياها إتساعدها هل هذا في عيب؟

السؤال

ليش حلال على الريال إن يتدلع و يتديعل و إحنا لأ؟

ليش الريل يحتر إذا أهل مرته قاموا فيها قوووم و ما خلوها تحتاج شي و يقول قاعدين تخربونها و إتصير إتكاليه؟



فى الأسر المعتدله الدخل:

بكل بيت يكون في

ريال يشتغل

مرا تشتغل

خادمتين أو ثلال على حسب أعمار اليهال

سايق

طباخ





من وجهة نظري كل خادم بالبيت قاعد ياخذ دور من أدوار الأم أو الأب

ليش إحنا يالحريم عمرنا ما عايرنا الرياييل على شي؟



نشتغل

نرجع البيت ننطر اليهال عشان ناكل وياهم

دراسه

حوسه متطلبات اليهال والبيت




بالدوام عندي ما سمعت ولا ريال يسألنا هذا من وين و إلا شنو سوا حق عياله

كل سوالفه ربع و دواوين وبر و إلا حداق

معناها طول اليوم المرا إهيا إللي تسوي كل شي في بيته

مع كل هذا

يبي البيت يكون هادي عشان ينام الظهر ، عشان ما يتعسر حق ربعه

يبي ماكينه مو مرا

و مواصفات الماكينه أو أقصد المرا كالتالي:

  • تستقبله بإبتسامه صباحيه و مسائيه
  • لقمته من إيدها - مسويتله شي غير كل مره
  • لعيال نظاف 24 ساعه
  • لعيال شطار بالمدرسه
  • الطبيب ما يودي مهنتا تودي -لأن ما يعرف شقول حق الدكتور
  • حس المرا ما يطلع بالبيت تكون هاديه – ممنوع لصراخ سواء حق ياهل و إلا خادم
  • تعامل أهل الزوج بكل حب و تضحيات ( شغل يا دهينه لا تنكتين ).
  • دشاديشه و غتره على سنقة عشرة
  • دكتورة طب عام
  • دكتورة نفسيه
  • مدرسه لجميع المواد وتعرف إنجليزي بطلاقه و يفضل جم لغه يمها عشان لي سافروا إتعرف تقرا منيو المطعم بباريس
  • ما تكون تافها همها اللبس و الطلعه مع ربعها ( مع إن يكون لاهي ما يطلعها لأن ما يحب المجمعات ولا المطاعم الكشخه والترزز )
  • ما تطلبه فلوس
  • جسمها حلو و شكلها وااااااااااايد حلو بالبيت أهم عنده من برة البيت
  • لازم يكون لها هدف بالدنيا – تشتغل عشان تثبت ذاتها ( في داخل قلبه عشان تشيل مصاريفها )
  • شقرديه إتييب أقل الأسعار حق كل شي
  • جاهزة للرد عن أي إستفسار من قبل الزوج متعلق بالبيت أو اليهال أو حتى الأمور السياسيه
  • ذويقه ببيتها – مرتب – أنيق- في شموع – مبخر عند دخلته
  • ما إتدخله بمشاكل البيت – لازم إهيا تداريه و تحل مشاكلها بنفسها
  • في المساء – يتم تغيير مسماها من إمرأه عامله وربه منزل إلي زوجه حنون و فيها كتله من المشاعر الفياضه و نديمه وصديقه و شي ثاني فهموها إنتوا بطريقتكم
  • و إذا ما سوت كل هذا طول اليوم – يختمها يقول : الله يعافي الخدام إللي مسوين كل شي بالبيت





بفهم شي الحين؟

إذا المرا قاعده إتسوي كل شي بالبيت ، ليش تحتاج الريال؟

ما يفكر إن بدال لا يريحها عشان تقدر تعطيه و تعطيه إنها إكتفت ذاتيا؟ ؟



بقولكم سر

بنات الكويت شوكتهم مو مكسورة

الحديث إللي قاعد يدور بين بنات عطوا من قلبهم و رياييلهم هل من مزيد صدقوني يخرع

قاموا يتمردون

يكابرون

يعاندون

إللي ما يبيني ما أبيه بالطقاق عندي أهل يصرفون على و على عيالي بعد



ماعاد فيهم صبر أمهاتنا قبل

**



إللي يعطي لازم يشوف

وإلا ينتهي كل شي

البنات

يتحملون أهلهم إللي معاهم سنين وبنين

بس مو رياييلهم إللي عارفيهم من سنتين ثلاث

مغريات الدنيا وايده



ما أقول إلا الله يتمم على الكل و يهدي سرهم و يفهمون بنت الديرة عدل



في مسج وصلي ودي تشاركوني في:



نصيحة للرياييل

إن خذيت سوريةشغلت أهلها بكفالتك

آسيويةهدت حيلك

مصرية أنصمخت من طولة لسانها

إيرانيةغيرت مذهبك

عراقيةبهذلت عيشتك

أجنبية ضيعت دينك

يبا مالك إلآ الكويتية عز ودلال

ومعاشها عليك حلال

تودي وتييب وتدرس العيال

تسهر وتسافروهي ولابالبال

تطنشها ماتعطيها ويه ماتشكي الحال

تلبس تكشخ وتشتري لك كل شهر نقال

تاخذلك قرض وتسفرك إنت والعيال





26 comments:

Reflections said...

يا عوينتي

بوستج طالع من قلب

أتفق معاج، خصوصا بالقسم الأول

LOOL كلامج يبرد الجبد


ما يازلي المسج :/


بس الصوووورة .. عجبه! Lool

Mustafa Şenalp said...

very nice a blog.:)

Bin3agul said...

reeema abda3tay bil post .. men zeman ma kitabtay post chethy.. w kalamich 3anna kila 9a7 1000%.. w etha 3indich wa7da bil muwa9afat ili gelteeha bereena Feha :P

Ta7yaaati

charisma said...

ويه ويه لو مو صايمه شربت قلاص ماى
البوست نشف ريجى وتعبنىى

اااخ

والله انج صاجه
وهم يتذمرون ومو عاجبهم
لا حمدا ولا شكورااا

:/

يا صااجه وياا صاجه ما جذبتىى

:**

يسلموو

Яeema said...

reflection:
صباحج حلو

عن المسج
عشان تشوفين شنو يدور في بالهم

بذمتج في أحد ما يطلب وحده تشتغل حق الزواج

أصلا صار شرط من الشروط



يقول
عشان تشيل عمرها و تنشغل عني ما إتجابلني




تدرين ليش؟؟
عشان هالأسلوب الزفت إللي يعطي الريال الحق إن يختار عمياني من بين البنات المرشحات له

Яeema said...

mustafa senalp

thank you ;)

Яeema said...

bin3agul

المرا إتشكل على إيدك بسهوله
لوهي عويه

الصبر و المجابل
تخليها تغمض عينها عن كل شي بهالدنيا
و تسخر نفسها لأبو عيالها

الله يعينك على إنك تلاقي نصك الثاني



إخذ مدلله ولا تاخذ معلله

thank you for the compliment ;)

Яeema said...

charisma

لا تتعبين ولا شي
أنا وياج من زمان طاب خاطري
هاهاهاها

و أنا متبعه أسلوب يديد

إللي يبي شي يستخدم إيده و يحمد ربه إن الله معطيه هالنعم

Hungry-Healthy-Happy said...

ريما

أولا : ولهت عليج لأنج غـــــــاطه هاليومين


ثانيا: أي والله صدقتي
خنت حليلي الحريم والله

واي تعبت تعبت

عطاء بلا حدود

ابتلشوا ب"بعض" الرياييل اللي
ما يعجبهم العجب

ما ينلامون الحريم من ضغط لي سكر
لي صداع نصفي
من هالظـــــــيم!!

و بالنهاية جان زين يبين بعينهم
أغلب اللي أشوفهم مطبقين كل هاللي تقولينا من شروط الماكينة
تلاقينه حاط على راسها وحدة ثانية؟!؟

و الأجنبية لي سوت البلاوي و المصايب
عسل عسل على قلوبهم

ايييييييه
وعلييه


بس والله يا ريما في رياييل سنعين
بس المشكلة إنهم فئه نـــــــــادرة
و على وشك الإنقراض
:/

يالله بعد هذي الدنيا

Яeema said...

joli



توله عليج العافيه حبيبة قلبي

حوسه والله يا جولي من هالمؤتمر الدايخ
إللي ما أدري شنو الهدف من تنظيمه



تدرين شنو المشكله
الرياييل ما تغيروا ترا
إحنا إللي تغيرنا و قمنا نشوف ونقارن

مثل ما الريال يقارن بين الحريم

فإللي أول تشوف ريلها لا يصعد ولا ينزل
لا الحين غييير


تشوف و تسمع
بالكويت أو بره الكويت


ما أقول إلا الله يعين رياييلنا علينا
هاهاهاهاها

جنون إحساس said...

أبدعتي بهالبوست صراحة صااااجة
الغلط الأول من الأهل
اهما اللي معلمين الصبيان على الإتكالية
والعين الزايغة واهما اللي مقوين شوكة الريل على مرته

لما الولد من الصغر يتعلم مايكون اتكالي ويكونون أهله سنعين وأوادم
ويعلمون ع المسؤولية ويدربونة شلون يكون اب وزوج ناجح
جذيه ماراح يتعثر في حياته

لو كل أم وأبو علمو عيالهم بهالطريقة
بتخف المشاكل


>>آنا صار الزواج كابوس بالنسبة لي
كارهته من هالمشاكل اللي أشوفها
ومن هالحريم اللي انهد حيلهم

شفيها البنت اللي عند أهلها؟

:) الله يوفق الجميع

nice said...

ريموووو شهالبوست شطوله معلقة مو بوست
ميخالف تحملي رايننا
الريال اتكالي في البيت صح
لكن برا البيت المرا تعتمد على الريال ،الطبيب والامور الخاصة بالاولاد اهى ادرى بس هذا ما يمنع انه يرافقها فيه
افكارج جهبذية هاليومين شسالفة
دمتي ودمنا والله المستعان

Mohammad Al-Yousifi said...

إيرانيةغيرت مذهبك

مو شرط

:)

خوش بوسط

بو حامد said...

قد يكون الموضوع من زاويتج في مبالغه على البنات الي حولج ، لكن في رياييل يعينون ويجابلون ، بالمقابل في حريم حيييل حيييييل مو دلع لا طلع لأن مبالغه بالدلع فيصيل طلع .

بس انتي نصيره للمرأة
وزعلانه على الرجل :>

PearL said...

ريماا

كفيتي و وفيتي

بوستج يبرد الجبد

قال كل اللي المفروض ينقال

ابدعتي بهالبوست الصراحة

بس وين اللي يقرون ويفهمون ويطبقون

newly_wed said...

marra tanaqasht ma3 rayli bhalmawtho3, lama nyeeb yahil, hal ra7 ynathfa? ybadel 7fathta? thal y36eeni alf sha'3la besaweeha..

1. ana ra7 ala3ba
2. ra7 ashterela eli yabe
3. ra7 a6al3a yestanis
bas... abadella ,, mosta7eel !!

i still think men should do this.. bs laish reyayeel awal kano akthar mas2oleya? l2na el7areem makano bhal estiqlelaya.. and man now doesnt fear for his life going to a battle mathalan aw a dangerous work environement.. most of the time i wish i can afford not going to work, so i can relax and let the husband do that part fully.


vyyvaa,

Kuw_Son said...

تحلطم حريم مرة ثانية :)
ما ردهم يطخون بعد هالكراف و جنه ما صار شي :)

الله يعينكم يا الأمهات :)

لما أتزوج يصير خير
:P

Яeema said...

جنون إحساس

الشي الوحيد إللي لاوي إيدنا اليهال
الأمومه غريزه

إذا ما تبين يهال
فا أبدا مافي شي بيت الأهل


والله على كلامج كل عدل عن تربيه الولد في بيت أهله

Яeema said...

nice

شتطلع جهبذيه هذي بعد؟؟؟

والله هاليومين الحريم حتى بيوت قاموا يبنون

لا تشوف نفسك و تقيسها على الكل

الرياييل الخاملين بإزدياد



على الطبيب

عدل كلامك
نبي
support !


مو إلا يعرف

Яeema said...

kila ma6goog
يالعنصري
ما لفت نظرك إلا النكته؟؟
هاهاهاها

Яeema said...

بوحامد

خلني أقولك شي

الرياييل إللي عندهم جم بيزه ما يعانون


يقول حاط لها كل شي إشتبي بعد


ما يدري إن وجوده أهم من هذا كله

و أقصد مشاركته بأمور التربيه

مو ماش إيده بالطوفه



رياييل الدروازه راحت يا بوحامد

Яeema said...

pearl

ما إتشوفين إن لعيال كل لازقين في أمهاتهم؟؟

ولا راح يتعلمون

عشان جذي بالكويت كل تشوفين الحريم لهم حياتهم الخاصه

Яeema said...

newly_wed

about the 3 points
like we dont do all this with an extra extra jobs with them :/


3ala elmas2oliya :

قعدت بالبيت فترة

بس بيني و بينج ما لقيت نفسي

ما عجبني كل آخر الشهر يعطيني معاش

أحتاج أكثر من جذي
أحتاج أثبت نفسي
أحتاج أختلط بالناس
أحتاج أشوف إنجازاتي

like any human!

Яeema said...

kuw_son

بعد 10 سنين خبرة بأمور الزواج
أقولك بدينه الخطه

أنا ما تفرق وياي
لأن أمي كانت تسوي كل شي

و ييت بيت زوجي و هم أنا أسوي كل شي

فا ما تأزمت وايد
بالعكس

زوجي ماله شغل ولا يتدخل
بشي

ترا هذا وايد يريح بإتخاذ قرارات

موزعين الأدوار

له يأمن مستقبلنا
و أنا لي أبني الحاضر

2 u ALL said...

شفيك شايشه علينا نحن (معشر الرجال) ..!! ترى مو كل الرجال يطلبون كل هذا ..!! بس أتفق معاك فيه أكثريه هذه مطالبهم وربما شويه أكثر بعد ..!!؟

بس هم أنتو (نساء اليوم)أحسن حال من حريم قبل ..!! كانت الوحده منهم تقوم بكل هذا لوحدها وبدون مساعده..!! ألا من رحم ربي وعنده خدم وحشم ..!!؟

النهايه هناك متطلبات واقعيه من الرجل وهناك متطلبات واقعيه من المرأه لكي يعيشوا حياتهم الزوجيه بهناء وسعاده ..!! ومتى ما تم الأتفاق بيهم على تلك المتطلبات وقام كلاً من الطرفين بتوفيرها للأخر ..!! نجحت العلاقه الزوجيه ..!! أما أذا مالت كفة المتطلبات لطرف على حساب الطرف الأخر ..!! فهنا تبدء المشاكل الزوجيه والخلافات ..!! فالوسطيه والتوازن مطلوب بين الجنسين ..!!؟

NGONGE said...

أنا لاني كويتي ولاني سيده وبصراحه مالي علاقه ابد باي شي في هذا الموضوع. كنت قاعد ادور مواقع ومنتديات عربيه في النت لما حصلت بلوج وحده صديقتك بالصدفه, ومن هناك رحت مكان ثاني وبعد لفه طويله اخيرا وصلت هني. المهم, كلكم مواقعكم جميله وخفيفه علي البال.

كنت باحاول اعلق علي الموضوع بس لاني قريت كام من صفحه هني وكام من صفحه هناك بصراحه نسيت الحين اي موضوع كان اخر واحد قريته..علي العموم انا كنت متفق معاكي اصلا!

اووه..اووه..الا في موضوع الازواج اللي يقول....والله ما اذكر بالضبط..بس الرجال تري طيبين ويحبون نسائهم, وكل يوم يقررون انهم يساعدوا اكثر في البيت, يطلعوا زوجاتهم سهرات مفاجئه و حتي انهم يضحوا وما يناموا الظهر..بس جل من لا يسهو..

تحياتي لجميع اهل الكويت وخاصة اي واحد فيكم يقراء كلامي..انا لما اكبر واستوي غني راح اشتري بيت ورا مقبرة الصليبيخيات..اني اراكم تسالون حالكم, هل اتي هذ الشخص للكويت؟ لا لم اتي لم اتي يا اخواني واخواتي..سمعت عنها, المقبره طبعا, في التلفزيون..

سلام