Thursday, September 06, 2007



إطلاق سراح روحي



كل منا فيه إنسان بسيط بداخله

يربيه و يدلـله على إيده ما يخلى أحد من بره يلمسه بكلمه

دار حوار بيني و بين صديقه

قعدت آخذ رايها بشي

قلت :

أحس إنني ولهانه على إني أدلل نفسي

أسوي الأشياء إللي أحبها فى الوقت إللى أبيه

جاوبتني:

ودج إتمارسين هواياتج؟

قلت : إيي ، أحب أكتب بس ماني لاقيه الفرصه

الكل يتلني من صوب

أبي الحياة توقف شوى

مخي أحسه مزحوم ، الكل يطالبني و لا أحد قاعد يعطيني

ملامه من الكل

أمي

أبوي

زوجي

عيالي

محد فكر فيني أنا شنو أبي

من أصبح لين ما أمسي طلبات

أبوق الوقت لنفسي

بعد ما الكل ينام

عشان أقدر أركز و أكتب

أو أقرا قصه

بس ألاقي نفسي تعبت من السهر

أقوم الصبح هلكانه

شسوي؟

هل ممارستي لهوايه أحبها تعتبر نوع من أنواع الأنانيه؟

مو معقوله بعيش طول عمري بس مسخره لبيتي وعيالي

إختفت الإنسانه الثانيه إللي فيني

صارلي مده ما كتبت و لا أعرف أكتب شي

كأن الكلام إللي كتبته كله مو أنا إللي كاتبته

ولهت على إني أكتب شى حلو

كلمات كلها إحساس

أفتر على القديم إللي كتبته

أقووول

الله

إشلون طلع

و في أي مناسبه؟

وليش؟





إحساس موحش

فقدت نفسي

فقدت روحي

عشان أظل فى صورة الأم والزوجه

ما أحس هذى السعاده بالنسبه لي

إنطلاقتي ويا نفسي

ويا روحي بأفكاري لها طعم غير

أفكر أفكار مينونه محد يحاسبني عليها

لأني واعيه أنا لأي حد راح أوصل

الفكرة حدها داخل مخي

تعصف تعصف و تهدى بروحها

عيزت أشرح هالنظريه حق إللي حواليي

محد قادر يقدر

إني لما أختلي مع نفسي

راح أسعد إللي حوالي



بالنهايه

إعتبروني إنطوائيه

أنانيه

و أحسس إللي حوالي إني ماني بحاجه أحد

فالحل إللي سويته

ما أعلم أحد بإللي أقراه

أو إللي أكتبه

و أضل أسرق اللحظات و أتمتع فيها

و ما أضر إللي عايشين وياي



11 comments:

charisma said...

شفتى شلون احس فيج
تونى راده من حفله
راسى مفتر
والله ريمه ما ادرى ليش فتحت الاب توب طايره على بلوقج
لول هاو عسى ماشر
حتى بلوقى ما فتحته
لانى ما ابى اشوف صوره المارون قلاسيه منسحنه وشبعانه
ههههههههههههه


حبيبتى انتى والله حاسه بكل كلمه قلتيها
خصصى لج ساعات بالويك اند اذا اليهال طلعوا انتى سوى شى اتحبينه
ساعه اخر الليل ما اتعب وايد من كل يوم الحين مدارس ينامون مبجر

لا تنسين نفسج
سوى الى تحبينا والى ترتاحين له
انت مثلى انا وايد احب الهدوء وايد احب اكون بروحى مرات
سويهاا !!

ريما الايام الى تروح ما ترجع
استمتعى وهذى سنه الحياة
زوج وعيال واهل ومسئوليه
الله لا يخليج منهم امين
ويخليج لهم ذخر ويعطيج الصحه والعافيه يا رب
:**

تصبحين على الف خير

Яeema said...

حالتي واصله إلى سفرة
أبي أسافر
هاهاهاهاها


بروحي


يا أنا أسافر يا زوجي يسافر خل يختار

هههههههههههه
ههههههههههه

Joli said...

ريمــــــا

هذي الدنيا يا ريما
تلهي اللي ما يلهى

بس تدرين أنا عندي قناعة إن كون هالوقت صعب تحصلين عليه
و تبوقينه بوق فهذا اللي يعطيه تميز و طعم

تخيلي نفسج
فاضية
ماعندج شي و لا أي مسؤولية
راح تستانسين و تدللين عمرج يوم و يومين بعدها بتملين


صدقيني حلاوة الوقت كونج صعب تلاقينه
تحسين فيه بمتعة أكثر
:****

kila ma6goog said...

نفس الحالة بالضبط

:)

Dana__23 said...

نفس حالتي بالضبط :)
بس أنا قسمت وقتي بين الدوام والبيت ولازم أمارس كل هواياتي إلي أحبها عشان أحس إني موجوده بالدنيا ..

عندي هوايات وايده بس ماأمارسها بوقت واحد ! كل هوايه أمارسها بأيام أنسقها بنفسي :)

نصيحه ..

مارسي هواياتج لكن لا تنسين زوجج وبيتج ..

لا تقولين ماكو وقت !!

في وقت وإنتي بيدج تقدرين تقسمينه على حسب راحتج ..

هواياتج تعبر عن شخصيتج الموجوده فيج ..

قسمي وقتج صح وراح تربحين بإذن الله :)

تحياتي لج وأمنياتي لج بالتوفيق :)

5roofa said...

واااي تدرين معني مو متزوجه و مالي مسؤليات بس هم احس ماعندي وقت لنفسي

و امبي انه ما تقولين حق احد
:/

انا بعد اخاف اقول و يطنزون علي و يلا يقولن اني سخيفه و ماعندي سالفه لانه مو الكل يقدر انه الكتابه شي يطلع كل الي بقلبي و روحي

الناس تفكر و تاخذ على كيفها
المهم انتي شنو تفكرين بنفسج ولا الباجي بتحجون طول عمرهم و ما بفهمه بالاخير الا نفسهم

T.C swetee...

salamz...

Shaima'a Alkandari said...

مرات يحس الواحد فينا ان ماعنده وقت لنفسه لانشغاله وارتباطاته اللى كل مالها تزيد

بس لازم تاخذين لنفسج وقت ترتاحين فيه

بعيده عن كل شي ويكوون هالوقت مخصوص لج انتى بروحج

يبه عيشي حياتج واستانسي واستمتعي

PearL said...

اتوقع وايد يحسون نفس شعورج

برايي ان انتي اهم من كل شخص ثاني
لازم تحبين نفسج وتدللين نفسج وتدلعين نفسج عشان تقدرين تعطين غيرج هالاحساس بصورة صح

اخذي بريك من كل شي

كلمي زوجج يتحمل عنج شوي عبء اليهال

شعور اللوية وان تبين الوقت يوقف عشان تلحقين شعور ينرفز
مجربته من قبل


اخذي بريك .. اجازة من الدوام
سافري بروحج

او حتى لا تسافرين
اعتري نفسج مسافرة
عيشي حق نفسج وسوي كل اللي تبين
حتى لو يوم واحد

Яeema said...

thank you all

i will do my best

Flirty said...

صراحه هذي مشكله ناس وايد

يمكن انا واحد من منهم

بس عزائي ان الشي اذا صار متوفر وايد يفقد طعمه

حتى اوقاتنا مع انفسنا من ندرتها اذا يت نستمتع فيها الى ابعد الحدود

نستمتع متعه مبالغ فيها

و اذا حبينا انحجي نلقا من تسمعنا واذا فرحنا نلقى من يشاركنا

و اذا كتبنا بوست نلقا من يقراه
:)

اخيرا
life is a B.......

ZoZOta said...

ما تزعلين منى

اول مره اشوفج بهالصدق مع نفسج

اول مره احس انج تكلميني

اول مره اعرف ريما عدل

لو كتبتى بالمستقبل

لا تطلعين بره هالإطار

انتى اليوم ساحره جميله مشرقه

حتى الشمس غلبتيها بهالإشراقه

حبيتج ريما

عن جد حبيتج اليوم