Wednesday, September 05, 2007



موقف في ستاربكس



عندي مشكله مع بعض الناس إللي عبالهم إذا تكلموا إنجليزي يعني راقين

رايحه ستاربكس أبي أطلب

و إللي ياخذ الطلب مصري

الطلب أطلبه بالإنجليزي لأنه ماله ترجمه

بس بعد إشحقه أعوي لساني بالباجي؟؟؟

سمعوا هالقصه

إللي وراي

لو سمحت 1 أمريكانوا

قال له شنو الحجم؟

يرد: كبير

كنت يمه أنطر طلبي

عرفتوا الناس إللي يطالون و بعدين يالله سمعيني ترا أعرف أتكلم إنجليزي و أكسينت أمريكي بعد

أنا أقول بقلبي يالله صباح خير

Pleas, how many shuts inside the Grande size?

يرد عليه بالمصري:

يا فندم 3

WOW , this is a wake up coffe for real!

يرد عليه:

عايز فيها أن نكهات؟

what do you have to add??

يرد عليه بالمصري لاحظوا:

في يا فندم كراميل

رازبيري

فانيلا

I guess I'll have caramel with my wake-up coffee


أنا بقلبي أقول:

وللييييييييييييييييييييييييييييييين

واااي ما أدري ليش إذا تكلم أمريكي عباله الناس بتبلعه

بتحس إن راقي مثلا و إلا شنو القصه؟

و خصوصا إن عينه إتكلم تقول سمعيني و أنا أتكلم!!؛


على إفتراض إنك درست بأمريكا خلونا نقول 6 سنين

لأن ويهه مو مال طبيب

و ماهو صغير بالسن

باجي لسنين ترا إنت كل بالكويت؟؟؟


يا زين الكويتي بس

ولا إذا كان عتيج بعد خف طيييييييينه حده

يا حلو المفردات الكويتيه إذا إنمزجت بنص الكلام

تعطي ملح حق الحوار


بس عاد منو إللي يفهم هالشي





14 comments:

vancouver said...

ههههههههههه

اهم شيء انه المصري يكلمة عربي
واهوه يجاوب انجليزي

ههههههه



ترى هالاشكال وايد مساكين

حيييييييييل مو شوية



يالله بعد لا نحط بذمتنا يمكن امة اجنبية
وزوجتة اجنبية
ويشتغل بشركة اجنبية
وجيرانة اجانب

فنسى الكويتي

:)

TReSTeN said...

تدرين عااد
انا قاعد اتعلم اتيليانو

علشاا اتشييحط ههههه

بس للاسف ماقدرت اتعلم ولا كلمة

هههههههههههه

هذا الشخص مريض حبتييين

وبس

charisma said...

عاد هذا المصرى اهو الى شكله ما يوحى انا مصرييييييييييي
جنا اجنبى

:))

والكويتيين الى من هالنوع يا ريمه يا حبيبتى يا بعد عمرى يا حياتى انتى
شنسوى فيهم
لوووووووووووووووووول
خلى كل واحد يشبع الى داخلا بالطريقه الى تعجبه
شنسوى لهم يعنى
ههههههههههه

ذكرتينى بواحد دربتا
امه امريكيه ووحييد خواته وعايش عند الخوااااااال يعنى مكسر كويتى

ويا عندى انا ادربه
انااا ريمه تعرفينى اناا
لووووووووووووووول

والله انى تحلييت عليه
تدرين ليش؟؟

ولالا كلمه قطعا كانت بالانجليزى
كويتى ويتعب عشان يتكلم كويتى
بس لما وصلنا لين الاختبار قالى بليز ابيه بالانجليزى ما اعرف عربى
:)))

بس كاان عجيييب

اذكر قتله تكلم بالى ترتاح له
قالى نوو انا كويتى

وسلامتج وتعيشييين
:*

Hungry-Healthy-Happy said...

والله هالأشكال يا ريما الحمدالله و الشكر
يبيلها من يدزهم جزيرة و يشوحهم قنبلة ننوية و يختفون من على وجه الأرض


جنه محد تحجى انجليزي إلا أهم
حلايه الويه

هذا نقص والله
و يبي يلفت النظر

واللي بينلفت نظرة واحد من نوعين:
يا أما واحد ما يعرف انجليزي و ما يدري هذا شيقول ف طايرة بوهته فمالا داعي يتفلسف لأن
both ways
فهي فلسفة على الفاضي

و النوع الثاني
من نوعج.. يدرون إنه يتفلسف
و لايعه جبدهم منه و معطينه بولباس
شتسوى عليه بالله

لوووووول

تدرين صديقتي الأمريكية كانت تاخذ كورس كويتي تبي تتعلم اللهجة الكويتية
و كانت تسولفلنا عن شاب كويتي
أمه أمريكية و عايش طول عمرة هناك ما يعرف عربي
داش معاها الكورس لأن ما يبي يتحجى انجليزي بالكويت
يحليله

مو هالعوي اللي شفتيه
ههههههههههه

ناس تافهه ِ

Purplecious said...

لووووووووووووووووووووووووول

وااااااي أعرف هالنمونه
هههههههههههههههههه

و وااااااااضح جدا التفلسففففففف



شنو يعني انت أول مره تطلب من ستاربكس؟؟
أول مره تطلب أمريكانو ما تدري جم شوت فيها؟؟
أكسنت امريكي و حالتك حاله ما تعرف
!!!!!!
اللي مثله المفروض حافظ المنيو صاااااامه صممممممم


يا ثقل طييييييييينته هالمصري
ما أبلعه ما أبلعه
اذا هو اللي في بالي
لوووول

انا طفارتي ريما مو جذي
طفارتي اذا فليبينيه تاخذ مني الطلب و انا طالبته و اكلمها انجليزي ترد علي بالعربي

واااااااااااي اتحررررررررني
الحين انا أعرف اتحجى ليش تحاجيني عربي؟؟؟؟
هههههههههههه

سويلفاتي said...

هذا اللي يسمونه الملاقة ولا اكو املق من هالنوعية الله يبعدهم عنا لا يغثوننا

Mohammad Al-Yousifi said...

what did u say??

come again please?

لوول

Shaima'a Alkandari said...

هذا الشي عاد اللى مااحبه

ياشين التفلسف الزايد عن اللزوووم

sologa-bologa said...

thanx god

me no english
me know english me this !!
:)

ودمتم ب
love
and great
ود
:)

Hungry-Healthy-Happy said...

Reema O Charisma


بالنسبة للمليـــــق
اللي مادري شنو أصله بس شكلة أجنبي
و يتحجى كويتي اللي بستاربكس

يا ثقل طيــــــــنته

اليوم رايحين أنا و بربل
بردلي باجي الفلوس
:يقول
حديد؟؟

أنا: نعم؟ شنو يعني؟

يرد و يقول:حديد؟؟؟

ألتفت على بربل
هم ما فهمت

بيني و بينج أقول بقلبي
"يربي باين علي أدق حديد يعني و إلا شنو؟"
و أفوكر "يربي ماني معضله؟ شيبي هذا؟


جان يقوللي: حديد حديد
أثاريه يقصد فلوس
Coins!!!!!!!!!!!


شفتو أملق من جذي؟؟؟


شككني بعمري حسبي الله على بليسه


ععععععععععععععع
هالأيام وايد ناس مطفريني و باطين مرارتي
شسوي ياربي شسوي
ابتلشنا بهالعالم

5roofa said...

لووووول
يمكن ما يعرف يتكلم عربي لوووول

بس امبي تدرين مره انا صار فيني جذي كلمت واحد في مكدونلدز بالانجليزي حسبالي هندي ولا يطلع كويتي
لووووول حسيت ويهي انقص عطاني نضره الي انتي شكو تفلسفين لووووول
و انا والله مو قصدييي
احم احم العتب على النضر والله لوووول

nice post
salamz sweetee....

PearL said...

التفلسف مشكلة

انا وحدة لما اتكلم اسوي مكس
دي جي
لوول

وانا اتكلم كويتي اقط لي جم كلمة انجليزية عادي

بس ما اتفلسف عاد مثل الاخ

بس غرامي الحجي الكويتي الكويتي
يشووووق

Expatriate said...

هالاشكال صج صج ينرفزوني

للأسف كثير من اللي درسوا بامريكا في بالهم مجرد كونهم درسوا بامريكا يعطيهم قيمة وأفضلية على الناس رغم وجود العقلية القديمة المغبرة

ومثل ما ذكرت فانكوفر .. هالاشكال واايد

كان معاي واحد بالدوام نفس الطريقة .. ذبحنا يتفلسف علينا بالانجليزي ويتكلم عن امريكا مع انا كلنا دارسين بامريكا وقاعدين هناك اكثر منه وكلنا لغتنا افضل منه .. لكن اهو الوحيد اللي كان يحس بالنقص

LAVENDER.Q8 said...

اي والله يازين الكويتي

فقرتج الاخيرة اايدج فيها مية بالمية