فيني طبع يمكن ينرفز ناس وايد
إنني ما أسأل
حتي لو الموقف يحتاج ولازم إنك تسأل
يعني لما وحدة تقوللي ترا فلانه نخطبت
يكون جوابي:
الله يوفقها إنشاء الله مع ولد الحلال
رفيجتي بقلبها السالفه وتقوللي يعني إنتي ما تبين تعرفين منو خذت؟
أنا: لأ ما يهمني أنا إللي بعيش وياه وإلا إهي؟
رفيجتي: واااااي مو السالفه إن هالشخص إللي خذاها وخطبها
أنا : و شنو يعني؟ صايع؟ الله هداه و الله يهدي سرهم إنشاء الله ويسخره لها ويركده .
رفيجتي: ودها ودها ترقع السماعه بويهي ما أبرد الجبد
هاهاهاهاها
أمي :
يما ترا فلانه ولدت و إستقبالها السبت تروحين؟
أمي: خلاص يالله نروح لها ، شيابت البنت؟
أنا: ما أدري ، بس المهم إنها زينه والياهل زين هذا إللي تطمنت علي
أمي : نزين جم عندها من قبل من عيال
أنا: وااي يما شدراني بثبت كل وحدة وشيايبه؟
أمي : إللي عشان إذا عندها أولاد بشوف شيايبه الحين
أنا: يما بعد البنت ولدت وخلصت يعني إذا عرفتي شيايبه بترده داخل بطنها ؟؟؟
موقف ويا صديقتي:
أنا : ودي أقولج شي ، بس ترا توني أمون عليج عشان أقولج إياه بس عفيه لا تزعلين؟
صديقتي: قووولي إشدعوة ماراح أزعل منج
أنا: ترا أول ما عرفتج كنت أتنرفز من أسإلتج ، ما أحب أحد يسأل وااايد ، كنت ما أبدي السالفه عشان ما أكون الشخص الوحيد الموجه له الأسئله
صديقي : أيااا شااقووووووووووول ، أنا مو قصدي بلاغة شف
أنا أقصد إني أكون قاعدة معلوماتيه عشان السالفه تكون كامله ، و مو بكل شي أسأل
أنا: إييييي أدري مو مع الوقت عرفتج و قمت أنتبه علي نوعيه أسإلتج و بشنو تسإلين فقمت أسأل نفسج
صديقتي: إيييي أشوفج تغيرتي واااايد للأحسن طبعا
أنا: إيييي صراحه الأسئله بمواضيع السفر والمطاعم والسوق جدا مفيدة ، بس تقوليلي فلانه تزوجت و من خذت لما الحين ترا ما يهمني
فعرفت عشان ما أغلط قمت أسأل
سؤالي
هل إنتوا من الناس إللي يسإلون؟ ويخزنووون حق تالي يمكن يستفيدون من أسإلتهم؟؟
نحو كويت جديدة
وجيل واعي
و صيف بارد بدون لبحه
قاعدة شوي شوي أحسن من طريقه تعاملي ويا الناس
عشان أكون محبوبه
و ما أداحر أحد
، بعضهم يقولون لي صايرة سلبيه
و ما تبين تناقشين عشان ما تعورين راسج.
صحيح هالشي
سلبيه في أشياء ماراح تغير من حياتي وايد
ويمكن شي حلو ساعات
يا جماعة علي قولة المصريين
لاقيني ولا تغديني
القصه الحين :
المداحر بين البنات
وعلى أشياء تافهه وسخيفه
ثياب
مطاعم
بلد بيسافرون لها
بمسك كل بند وبشرح إشوي عنه:
محل زارا :
حرمة رقم 1: شفتي تفيحه هالمحل ، زوووووغه عجييب
( ترا يكون صج زوغه وعجيب ويقلد الماركات الكبيرة )
حرمة رقم 2: لا لا لا كلش ما عجبني صاير جنه يونيفووورم
، آخذه حق خدامتي
( تلاقون هالبنت مثلا متينه و يبيلها قياسات معينه و مثلا متحجبه
، فما راح تلاقي بهالمحل بالذات و لما تقوم من القعدة بينها و بين ربعها تمدحه وتوصله السما
بس تقول حسافه ما ألاقي قياسي )
مطعم ياباني :
حرمة رقم 1: واااي ماكي مسوي خلطات يديده و حده لذيذ
حرمة رقم 2 : ويييييع ويييييع إستغفر الله ، الله يزيد النعمة ما أدري شلون تاكلون ني إنتوا
( تلاقي هالمرا ريلها ما يرضي تطلع مع ربعها فتعذرب بالشي )
سفرة:
حرمة رقم1 : هالسنه بنودي اليهاال أمريكا إنشاء الله ميتين زايغين علي شخصيات والت ديزني
حرمة رقم 2 : و إنتي شونو ماشيه علي هوا اليهال بتطقينها درب 14 ساعة عشان يشوفون ميكي ، ينيتي؟
( تلاقون ميتيين عيالها بيروحون وحانيييين علي راسها بس أبوهم ما عندة إجازة )
دوام:
حرمة رقم 1: واااي حسافه ما قبلوا مرضيتي راح يخصمون من راتبي
حرمة رقم2 : ويييه أنا مو عايشه علي الراتب ألزم ما علي راحتي
( القصه مو قصه راتب، القصه الحين قصه ليش هالتسيب إذا مو هامج الراتب
ليش ما تقعدين بالبيت واتخلين وحدة تبي هالراتب إللي مو عاجبج؟
وترا تلاقونها أكثر وحدة تبيه ليه نزل
إللي بوصله رساله
ليش الواحد يعذرب الشي للي وده يسوي بس ما يقدر يسويي؟؟
ليش ما يتقبل إن كل واحد له ظروف خاصه؟
ليش ما يؤمنون بالطبقيه بالكويت؟إللي عند غيري مو شرط يكون عندي؟؟
ليش الحدة والنجرة بالحوااار؟
الحريم من صجي زايدة عندهم
إذا شفت شي و عجبني ليش ما أقول حلو و عليج بألف عافيه وتهنين في؟
تصدقون من النماين إللي أشوفها
أحس إن الفلوس عندهم راحت بركتها
صار ما يعجبهم شي
ما يونسهم شي
ما يترس عينهم شي
إللي عندها بيت علي شارع واحد تطالع إللي عندها بيت بشويخ
إللي ريلها فاتح لها سيارة حلوة تطالع إللي عندها شاليه
يعني حتى المقارنات بعيدة كل البعد عن مجال المقارنه
صارت القعدات ممله
و مسكينه إللي الله رازقها قاموا يقولون مغرورة وإتشيحط علينا مع إن سلكها من زمان جذيي
بس أهما مو مثبتين أول.ومسكينه حتي إللي بتشيحط خلوها شوي تشيحط مافيها شي ،
يمكن محد يمدح شغلها بالبيت يمكن شاريه شي ووايد حابته وبتشاركم فيه من وناستها في...
و إللي تزوجت و ربي رزقها بواحد عازها وكارمها قاموا يقولون عنها حديثه نعمة
و الله يعافي الريل لومه الريل جان ما عرفت الديرة
واااي مسكينه شلختوها
لا هذا عاجب ولا هذا عاجب الواحد ينطم و يسكت يعني؟
و إذا سكتوا
قالوا أم قليييب إتغبي، كل شغلها بسكات
----------------
يا ربي إرحمنا برحمتك وإبعد عنا كلام الناس
وعجبي عليك يا زمان
ما أقدر أتحكم بكل الناس
و بنفس الوقت ما أحب أخلي الناس تفرض علي سلكها
في كل عايله لازم تطلعلك وحدة تستخف دمها و هي مرا كبيرة
أول لما كنا يهال كانت المقاعد غير
بحكم إنهم ما يقدرون يتكلمون بمواضيع معينه
فدايما يقولون لنا طلعوا لعبوا بالسكه
بعد ما كبرنا إشوي همن ما يسمعونا مواضيع معينه لأن عيب
إنزين
لما تزوجت ، صاروا ينظرولي بنظرة غير
إنزين أنا معاكم إن إللي تتزوج تكون نوعا ما خلاص تقدر تتكلم عن مواضيع معينه
بس مو جدام الناس
و مو مع كل الناس
بيني و بين ربعي
وهمن لقراب حييييييل حيييييل
مو بمقعد وفي عماتي و بنات عمتي و أمه لا إله إلا الله !
في وحدة الله يهداها
، ما إتكلم إلا بهالمواضيع إللي جدا خاصه علي أبو تبي تضحك الناس.
و أنا قاعدة مالي خلق أسمع لأن بس عاااد زادوا التشيله
وصارت لوعة جبد
إللي أبي أفهمه؟
ليش عبالهم الناس إن هالشي يضحك؟
ترا حتي بالمسرحيات زايدين بالسخافه و التنغز
ترا إللي يضحك هو الموقف مو هالكلام
يا حلو ناااس ليه سمعت كلامهم يدش بالعقل والقلب
يا زين الرقي بالحوار
يا زين الرقي بالكلمة والنكته
تدخل الكلمة الأذون وهي مرتاحه
يا حلو لي قمت من مقعد خفيف و ملائكتك مرتاحه
ترا الراقي راقي بلسانه
لا بلبسه
ولا باسم عايلته
ما أقول إلا
الله يهدي الجميع بس
صويحبتي من أيام الجامعه ، و شاءت الأقدار إنها تكون وياي بنفس مكان العمل، ما أشوفها كل يوم، بس وايد أمر عليها مكتبها.
ولا مرة شفت أختها، كانت أصغر منها ، و همن شاءت الأقدار إنها تكون وياي بنفس المكان و يارتي بالمكتب.
الخوات ما يتشابهون ، بس مثل فيهم نفس الروح و الدم.
جابلت إخت صديقتي مجابل بحكم إنها يديده علي المكان، سوالف و حبيتها وايد وايد ، طبعا مثل إختها طيبه .
اليوم مريتها المكتب و قلت لها يالله خلينا إنروح حق أخيتج نزورها ما عندنا شغل وايد.
و الله و مريت وحدة من زميلاتي و رحنا المشوار ثلاثتنا.
أول مرة بحياتي أصادفهم أثنينهم .
إشصار فيني؟؟؟؟
كونفليكت قوييي
حسيييت صديقتي القديمة ويها غير؟؟ مو نفس الويه إللي أعرفه!
جنها فيها من إختها وايد؟؟
جن ويه إختها وويها ممزوجين ببعض!
شعور غريب خلاني أهستر و أضحك
هاهاهاها
قمت و قلت حق ثالثتنا ، إتحسين بنفس شعوري؟؟
و قامت تقوللل إن نفس الشعور حاشها!
ماني قادرة أوصفه ، بس مثل ما إستوعب مخي إن الإختين أشوفهم ويا بعض و بنفس المكان
هاهاهاهاها
ما أدري يالكم هالشعور من قبل؟
إن إللي إتعرفه من زمان تتغير ملامحه فجأه!
أنظر لمرآتي
علني أرى شيئا يعجبني
لا أستطيع تقبل علامات الزمن بوجهي
أمعنت النظر جدا
فرأيت عيوني
شيءٌ ما بداخلي
أظهرت إبتسامة بوجهي
هل صحيح ما أرى؟
وجهك و هو يكلمني
جميلة أنتي
لا تقلقي
لن تتغيري بنظري
روحك
حبك
ابتسامتك
لمعان عينيك
أغمز إليه و أبتسم
و أرحل
من أمام المرآه
by Reema
---------------------
إهداء حق حبيبت قلبي
charisma
الدنيا صايرة لهطه لهطه ما قمنا إتحمل أحد يلبح فوق روسنا!
اللباح عليه الله علي قوله كاريزما
حياتنا متروسه مشاغل و لويه و الكل عنده شي يسويه . طرت عليييي أسوي مقارنه بين
أمهات اليوم و أمهات امس.
أمهات اليوم :
لبحه رئيس
لبحه عيال
لبحه زوج
لبحه خاله
لبحه مرت حما
لبحه خدام
لبحه سايق
لبحه طباخ وشنو الغدا باجر
لبحة زوارات
لبحه أم و مواجيبها ( ماكو غيري بنتها الوحيدة )
لبحه تليفونات
لبحة مسجات
لبحه حبايب
لبحه ربع برة الدوام
لبحة ربع داخل الدوام
لبحة سوق و تفتيحات
لبحه مواعيد ( طبيب – صالون )
حق إللي عنده خوات ( لبحة خوات و إخوان )
لبحة خالات وعمات و تشره
لبحة بلوق
لبحة مسنجر
لبحة مدرسين
لبحة مدارس
لبحة عزايم
و إللي يبي يزيد يزيد
أمهات أول :
لبحة زوج
لبحة عيال
لبحة شغل بيت
لبحة تجناين
و يقولون ليش نمشي مسبهين و ما إنثبت و ليش كل ناسين و ليش إنام مبجر
من اللبحه إداااااد علي قلوبنا والله
يا جماعة الخير ترا الصيف بس يانا
وتوه بالراديو يقولون بتوصل درجة الحرارة 52 بالظل
فليكن شعارنا
نعيش بدون لبحه
و برد علي قلبك يا ولد بآيس كريم بترا بو عود أحمر
صديق عزيز جدا علي قلبي و عيز يتحمل لبحتي علي السوق و شني الموده
و شني المودة من العام و أقدر أستخدمه هالسنه
والمشكله إن ريال!!!؛
فياللي إيميل منه
بقيت أحب الشاشه من الوناسه
و محتوي الإيميل هالسايت
وبس الله يسلمكم كانت الضربه القاضيه
لا قال كلمة و لا نص كلمة
عرفتوا شعور إللي قلها و راح؟؟؟
أحبك وايد وايد وايد
و أحب إيميلك هذا
مشكووووووووووووووور
جدا جدا جدا
بصير خوش وحدة و ببطل لبحه
هاهاهاهاهاها
موقف إستغربت منه يوم الخميس إللي فات
دخلت محل معروف عالميا إن ماركه، فكل إللي يدخلونله أكيد عارفين شنو إللي في بحكم موقعه بأحد أفخم المجمعات التجاريه بالكويت.
القصه الحين
وحدة بالخمسين من عمرها ، ما يبين عليها لأنها جدا محافظه علي شكلها
تاااان و نفنوف ( فستان ) فوق الركبه إللي هابين في هالأيام البنات، مكياج خفيف ويه حلو صج في بوتكس بس الطبيعي.
المحل ماكان في أحد إلا أنا و بنتين و هالماركه إشوي شبابيه فما إنلاقي هالعمر هناك.
المرا: هااااي إشلونج شخبارج؟
البياعه: أهلين مدام كيفك ، شو أخبارك؟
بيني و بينكم فهمت إنها زبونه دائمه ، و هاللي خلاني أستغرب من الموقف إللي بقولكم إياه أدري طولتها وهي قصيرة
الزبونه: أبي الجنطة الفضيه مو الذهبيه عندج إياها؟؟
البياعة: إييي مدام حجزناها توها واصلتنا أمس
البياعة جذبت لأني من أسبوعين لقيتها و بلونين ذهبي و فضي ومحد ملتفت لهم لأنها شوي مافيها شي يشد.
الزبونه:واااي ما تخيلت عندكم منها بالكويت ما بقى أحد ما وصيته عليها ، أصحابي إللي بلبنان و أصحابي إللي بلندن و أصحابي إللي بدبي و حتي ولدي إللي يدرس بأمريكا قاللي يما خالصه و مو موجودة
ريما – بس أتحلطم بقلبي - : وولدج إللي بأمريكا مسكين هااد دراسته وقاعد يفتر بدورلج جنطة؟
بيني و بينكم في شغله فينا يا الكويتيين ولاحظتها في كذا محل ماركه تنقال
لييييش تبون إتفهمون إللي تبيع إنج تشترين؟
و من وين موصيه؟
وإنج تافهه ما بقي أحد ما سمع سالفتج
و البياعة شكو فيج؟
وليش إتعلين حسج و إتسمعين الناس السالفه؟
و فعلا هالموقف مو أول مرة يصير، لو المحل عادي شرت الشغله و إطلعت
أو كي إتحللييين بينج و بين ربعج مقبوله في إهتمامات مشتركه
بس ويا إللي تبيع إللي همها تبيعج و تفتك لأنها كارفه من صباح الله خير
راااعوا الناس و إللي يخليكم
ترا هموم الناس زادت من إن إتحمل سخافات جذي
ما خلاني أكتب هالبوست إلا ويه إللي تبيع و إهيا متحمله سخافتها ربع ساعه لأنها زبونه
مع الإحتفاظ بإسم و شكل الجنطة
هههههههه
ترا سعرها مو وايد 200 وشوي
كيف لكِ أن تفكري بطريقتك تلك
أي نفس بشرية أنتِ
--
عرفتني هكذا
لا أجبر علي تصرف أفعله ما لم أحسه
لا أجبر علي كلمة أنطقها تريد أنت سماعها
--
سوف تتعب معي
لأني بكل بساطه
أقوم بما تمليه علي طبيعتي
--
فأنا امرأة وأغضب
لا أنسى نبرة صوتك الرجولي وهو يعلوا
لا أنسى كلمة جرحتني بها دون علمك
لا أنسى موقف أنزل الدمع من عيني
--
و لأنني امرأتك
سوف تراني كلي
بجميع عيوبي
كما رأيتني بجميع أشكالي
--
فوضوية كانت أفكاري
صاخب أكان حبي
طفولية كانت تصرفاتي
متمردة كانت آرائي
--
لم يتغير شي بي
إلا وجودك بداخلي
By Reema
نخوض صعاب الحياة
بأجنحة متكسرة
نعلو بها حينا
ونخفض بها آخر
----
عَلمتني كيف أحبها
فأتقنت حبها
حرضتني لكسر قيودي
فكسرتها
راق لها حبنا
وعافته آخر
----
أقول- حبك تملكني
تقول- حبك يقيدني
أقول- الم أكن صنيعك
تقول- هذه سجيتي
----
أحبها وأهيم بها
وتحبني بطريقتها
أيدوم ذلك؟
أم يٌقضى عليه؟
----
قلبي ينبض لها
وسيظل لها
لا تزحزحه صعاب
سأظل دوما وفيا
وفاء جميل وقيس
----
إليك يا جميلتي
إليك يا مالكة فؤادي
إليك يا شقيتي
لك حبي وقلبي وعقلي
By
ملهمي
مشكله كبيرة إذا الواحد عبالة إن يقدر يمنع شي بالنت ،
في حمله شنوها علينا بمقاطعة المدونات
وبرامج الشات
داخل دوامنا و طبعا علي ناس و ناس
و ما أدري إذا غاب عن بالهم إن في شي إسمه بروكسي
بتكلم عن تجربتي
بما إن ضليعة بأمور النت و خصوصا البروكسيات فلقيت سايت يخليك تدخل علي كل شي
Choose one of 5,125 working proxies
Web messenger (about 83,600,000 for web messenger)
Web irc efnet ( about 1,010,000 for web efnet)
شنو إستفادوا الحين؟
كل يوم و كل ثانيه في ناس جاهزه و تبرمج حق هالسوالف
أنا وياكم إن النت قاعد يشغل ناس عن أداء عملها
بس صدقوني إللي ما يبي يشتغل ترا ما راح يشتغل و بدور له ألف شي و يمكن يروح و يعطل الناس عن أداء عملها
مو النت إللي بيخليه أو راح يمنعه
يمكن ساعات النت مفيد يخلي الواحد ينرزع علي مكتبه بدل الديوانيات والتجمعات إللي يسوونها
البروكسي يخليك تقرا و تعلق بس ما يخليك تكتب و تنشر إللي كتبته
بما إني ما أحب أحد يمنع عني شي، إكتشفت طريقه تخليني أنشر بوستاتني
مثل ما قاعدة أسوي ألحين و راح أعلم كل ربعي علي هالسالفه بعد
ساعات الموظف يحس نفسه ياهل لي منعوا عنه شي و كأن مالهم سالفه إلا أهو
إذا مسؤولنا عطانا كل شي ووثق فينا صدقوني راح يكون الولاء أكبر له
بس والله بتعاندني بعاند
بتمنعني لا و الله بضيع وقتي أدورلي مخرج عشان هالمشكله
لا و يمكن هالشي يرضي غروري بس
ترا إنت تدري إنك منعت
بس ترا أنا كاااني أدش و أكتب و أنشر و أسولف بالمسنجر و أي- أر – سي
مو عشان مستانسه أسوي كل هذا
و مو كل هذا تمرد مني علي الوضع ( هههههههه )
عشان نشوة الإنتصار علي قرارات المنع
أستانس إن الويندوز كلها مفتوحه و فيها برامج ممنوعه و ما أسوي شي
أتطمش عليها و إبتسامة المكر و الدهاء فيها
قصه عالطاير
مرة سكروا النت علي بكبرة
شسويت؟
يبت بلو توووث و شبكت منه من جهازي الموبايل
مااكو مشاكل بالمرة
ههههههه
كل إللي يمر يقوللي إشلون فاتح عندج؟؟
أقولهم واسطه
ههههههه
إنتوا معاي إن كل ممنوع مرغوب؟؟
