Tuesday, April 10, 2007

وقت الفراغ





إستغلال وقت الفراغ

وحدة نفسي موديه حدها

أمل بسرعه من كل شي أسويه

يعني أم هبَه

ما أواطن الروتين

و كل يوم أسوي نفس الشي أو إني أجابل نفس الأشخاص و بنفس الساعه ( أتكلم عن شغلي إهني ) أخاف ربعي و حبايبي يفهموني غلط مو وقته هههههههه .

بالكويت شنو نقدر إنسوي؟

دوام :

من 7 ليه 3 جنا إب ماراثون !

7 ليش؟ لأنا نحتاج 45 دقيقه درب من الزحمة بمشوار ما ياخذ 9 دقايق

بتكلم عن نفسي كمثال وليس قاعدة ( ما أدري بيوت الناس شصاير فيها )

غدا :

خلصنا بالأربع تقريبا

نومة الظهر : ساعه

قهوة العصر: مع مراجعه الواجبات المدرسيه و اللبحه

يوم و ترك الدرس الأسباني

( فترة مؤقته ما أدري شبسوي لي خلصت )

لو مافي شي ؟

جمعيه ، أغراض اليهال ، قهوة ، مطعم ،سوق

بالنهايه كل هذا ما يصير كل يوم

يضل في وقت فراغ إشكبرة

لو إني بالبيت؟

تلفزيون ما شوف

نيت ملليت منه

ما أقدر أقرا شي اليهال طقني و أطقك

9

الكل نايم

أحلا وقت عندي ، بس للأسف ما أقدر أطلع هالحزة وين أروح؟

لا زوارة تنفع فشله الوقت متأخر

الزوج ياي تعبان ماله خلق كل مرة طلعه

لا مطعم ينفع

أروح 9 أرجع 11 مثلا؟

كتاب؟

مو كل مرة أييلك المود للكتاب و خصوصا بعد عناء يوم كامل لبحه ويا الكتب .

نادي؟

نوادي الحريم إتسكر بسرعه

و مو حلوة شكلي شايله الجنطه و رايحه النادي الساعة تسع

ليه جابلنا النت قالوا كبرتوا! لما الحين نت؟

ويييييه ، يا أوجب يا أنا مو زينه؟

ممكن سؤال؟

شتسوون بوقت فراغكم

أقصد وقت لنفسكم تستانسون

لا مواجيب ولا دواوين

وصج الطلعه حق البنت في هالوقت أقصد بالتسع فيها شي بنظر الريال؟

10 comments:

Dr. Saleh said...

أحلى طلعة ورا العشر
ما في زحمة وهدوء إلي حدا ما

وإذا عندك نصيحة حق قتل وقت الفراغ أفيدينا جزاك الله خير

بنت الشاميه said...

صج انج راعية بيت الله يهنى ريلج
واهلج فيج.....هذا السنع

انا اذا صارت الساعه ثمان ونص ...بس ماكو طلعه مو تسع...هذا شئ عودت عليه نفسى من زمان الطلعه الوايده حق الحرمه مو حلوه

اما الفراغ اذا انا بالبيت ما احس فيه ابد....احب البيت وايد خصوصا بعد ماكبروا عيالى وصرت ما ادرس احد

وطحت بالنت عاد ...متى امل منه الله اعلم وبعد جريت ريلى حق النت

بحضنه لاب توب وبحظنى لاب توب

وشوفى النجره نموت من الضحك

الله يسلمج البيت صار مدرسه محو الاميه للنت

لوووووووول

لمياء الحالمة said...

فكري بهواية كنتي تحبينها بالسابق وتركتيها بسبب مشاغل الحياة, وحاولي إنج تشغلين نفسج فيها

Almas said...

حدي الساعة تسع أرجع البيت

ما أقدر أتأخر أكثر من جذي

أوامر الماما

بأوقات الفراغ أحب أرسم

أطالع التلفزيون

أشتغل عالنت

ساعات أدش المطبخ أخترع أكلات وطبخات يديدة

وطبعا الهذرة والسوالف مع أهلي

لكن الشئ الوحيد إلي ياخذ كل وقت الفراغ أهو الرسم والموسيقى الهادية
بعيد عن الضغوطات وفترة ريلاكس

موضوعج وايد حلو ومهم

charisma said...

شتسويين بعد
سوات الله ابرك

المصيبه انا عن نفسى موديه وقت فراغى مرتبط بالمود
انا العب رياضه
يا سباحه يا مشى وارجع اخذ شور واحط راسى وانام

والحين بلش الغبار يعنى مالك الا السباحه
ولا النت او اقرى

او اكون بيمعه مع ربعى ارجع 10

وجذى يعتمد على الظروف والمود ومزاج كل وحده فينا

والى يناسبج ما يناسبنى والعكس

بس لا اتعدين وقت جذى
شغلى نفسج

الوقت الى يروح ما يرجع

لا تنسين هالشى

عيشى حياتج ولا عليج من الناس

بسنا ملينه اندارى

حبيبتى

اذا ضرب مزاجج على طلعه هالوقت طلعاى
لو تمرين تاخذين اكل من مكان تو قو

ولا تتمشين بروحج تسمعين فضل شاكر وترجعين تحسين سويتاى شى

:)

SHAHAD said...

انا هالأيام ما عندي وقت فراغ كلش
من التسع لي الثلاث في الكلية
ارد البيت اتغدى والبس واروح الممشى
امشي ساعة ارجع البيت ع الخمس ونص
على الست أبدي أسوي بحوثي وتقاريري
وأدرس للامتحانات
على الاحدعش اشبك لما ادوخ
احط راسي وانام
طبعا بالويك اند
الأربعا اطلع مجمعات
الخميس زوارة
اليمعة أقعد مع امي وابوي واخواني

حاولي تمارسين هواية قديمة والمشي حلو ترى

engineera said...

والله صج كلامج ضيقت خلج الروتين! الواحد 3/ 4يومه بالدوام على ما انرد ونتغداوانريح الا صار المغرب! والله ساعات مالي خلق اطلع مجمع ولا مطعم وين اروح؟؟! انا اقضي وقت فراغي في المشي بس اذا صار الجو مو زين ضيقة خلق أكل ومرعى قلة صنعه! والويك اندز شاليه! بس انادايمن احاول اشغل وقت فراغي احوس ادش الطبخ اي شئ بس ما اقعد فاضيه..

QiYaDiYa said...

الصراحة انا اذا رديت البيت الساعة 9 بروحي احس اني مسوية جريمة ..

بس مع اهلي ما عندي مشاكل ..

و اهي الطلعة بالليل حق المره بروحها مو تشكيك باخلاقها ..
بس الحين الوضع يخرع ..
لو يصير شي بالليل شتسوه عليها

----

قال رسول الله صلى الله عليه وسلم : نعمتان مغبون عليهما كثير من الناس .. الصحة و الفراغ


والله الفراغ نعمة !!


ما احس انه عندي وقت فراغ بالعكس ابي وقت زيادة ..

الصبح لي الظهر بالكلية ..
ارد ارتاح .. اروح مرتقى او يكون عندي اجتماع حق البرنامج او اشوف امي شنو تبي اذا تحتاج مني شي ..

ارجع .. يالله يمديني احل واجباتي و اقعد مع اهلي او اسوي بحث و اقعد على النت ..
و الويك اند مع الاهل و الصديقات ..
المواجيب ما احبها .. استعسر فيها حييل !! ;s

انا اقترح عليج دوريلج شي بالبيت تسوينه على رواااء ..
خاصة اذا ناموا عيالج الله يحفظهم ..

حلو ان الانسان يستثمر وقته ..

دوري الشي الي تحبينه و سويه =)

موفقه ..

Kuw_Son said...

أتمنى اني يكون لي وقت فراغ ساعة على بعضها !!

الصبح دوام إلى الساعة 3
على ما أرد البيت إلا 3:45
و على ما أتغدى إلا صارت الساعة 4:30 و ساعات أنام الظهر إلى صلاة المغرب وساعات لأ.. يكون عندي مواعيد على طول بعد الغدا ..

و بالليل ساعات ديوانية و ساعات .. محاضرات أو دورات .. و ما أرد البيت إلا الساعة 12 و أهلي ما أشوفهم !!

أخوي ساعات يصير لي يومين و ما اصادفه !!

خواتي يمر يوم عادي و ما أشوفهم .. أرد البيت من الدوام و هم يدرسون و أطلع و ما أرد إلا بالليل ولا هم نامين !!

تدرين شنو أتمنى مرات !؟

أتمنى أقعد أشوف التلفزيون لو 30 دقيقة بس !!

في فيلم

The davinci code

والله شاريه من قبل 4 أشهر .. أبي وقت أشوفه ماني قادر !!

أُكتب بالرصاص said...

على فكرة
الصورة حلوة قوي
ومعبرة