Thursday, February 22, 2007

summer collection









يا بنات و يا حريم الكويت لزقرت و إللي يحبون اللبس و التكشخ إللي علي سنع.

أحب إني أوعيكم علي شغله

ترا هالأيام قاعد ينزل الصيفي و التفتيحات ، فهالله الله برياييلكم ، مو إتقولون إن هالجنطه إب 500! و إلا هالبلوزه إبـ 150 !

كل قسموا المبلغ علي 3 و عطوه الثلث إللي إب 200 قولوا 50

والليبيلات و التاق مجعوهم بالمحل .

ترا تفتحون عليكم بيبان مصككه

مهما وصلنا لمرحله من الثقافة و التعليم و الخبرة و المادري شني

كل هالشي يوقف و إنغيب عقلنا ليه سمعنا بتفتيحه

فيا رياييل الكويت

هالجم يوم تعيموا و تغاظوا عن هالموضوع إشوي عشان الحياة تمشي

و يا نساء الكويت

لو سمحتوا خفوا بالأكل شوي لأن الصيفي فضيحه مو نفس الشتوي بوالطوا !

الموده هالسنه :

الألوان

أبيض

أسود

وردي - فوشيا

رمادي فاتح

أصفر

ميتالك – فضي و مزج بين الفضي و الذهبي ( حق لجناط)

الشعر :

صبغه وحده بني و درجات البني

أو لو لايت

الموديلات:

نفانيف وسيعه زمن ال50 و 60 ( يبيلها ليققن لأنها بتكون قصيرة )

البلوزات الطويله واللاف علي الخصر ( لازم رجيم قاسي )

موديلات رجاليه إشوي – بالطو ، بنطلونات وسيعه ، قمصات

بلوزات فيها حياكة سواء ورود و إلا فراشات

الحبل هالسنه داخل بالبلوزات و الجناط والأحذيه

المخابي بالنفانيف

السحاب بدال الأزرة

المنفووووووووووش و ما أدراك ما المنفوش

منفوش بالأكمام أو نهايه البلوزة

يعني كل شي وسيع هالسنه و براد ونااااااااسه

وكل عام و إنتوا بألف خير

و معوضين إنشاء الله عقب الخساير



راح يضل هالبوست لمدة أسبوع و إحتمال ما أقدر أرد عليكم

لأني مسافرة و إللي يحب يوصيني علي شي حاضر بس يحول فلوسه باليورو أول و بعدين إنتفاهم




مصادر هالبوست : للأمانه العلميه

Instyle magazine

Marie Claire

Elle.com

www.net-a-porter.com


23 comments:

اجار الدين كشمش said...

ريما...واذا طلع دعله وقام يسال خواته والا امه ...اصلا اهم بطيييير عيونهم منيم هذا كله ؟..

Athoob Alshuaibi said...

ان شاااء الله و الغنيمة :P
هالسنة بتصير انقلابات باذن الله
نشكركم على هذه النصائح الغالية
و رحلة سعيدة اوخيتي

lawyer said...

ههههههههههههههههههههههه

ههههههههههههههههههه

هذي البوستااااااااااات

الي تشرررررررح القلب


انا انشاء الله امي قريبا بترووووح ميلانو


يعني انا ما راح اشتري شي كل شي عليهااااااا


انا مطلووووووووووبه 2500 دينار للفيزااااااا


ههههههههههههههههههه
مفلسسسسسسسسسسه

مفلسسسسسسسسه

بس شفت بلووووووقج

انشررررررررح قلبي

و حسييييييت نفسي
تسوووووووقت


بسسسسسسسسسسس شبعت
هههههههههههههههههههه

انا ما اتسوق
انا قبل لا تسافر امي في المطار اشتريلها

مجله فووووووووج

و ماري كلير

و تنطللللللللق

كل ما ولهت علي
زادت الجيييييله

:)))

Purplecious said...

لوووووووووووووووول

مشاءالله أول الغيث قطره

و كاهي تباشير الصيف هلت على بلوقج

شالبوست الفوشـــــي الحلوووووو اللي على الموضه

عفيه ريما دايما كتبي بألوان مو كله رمادي رمادي

:)

مشكوره يا ريما ما قصرتي على هالملخص المفيد

كل عام و انتي بخير و صحه و سلامه
و تروحين و تردين بالسلامه انشاءالله و انتي منتصره بالمعركه و محمله بما تيسر من الغنم و الغنائم
هههههههه

www.blogs4arab.com said...

يسعدنا تشريفك
www.blogs4arab.com

charisma said...

لوووووووووووووووول
لووووووووووووووووول
لووووووووووووووووووول

البوست عجييييييييييييب
عجييييييييييييييييب
حبيتاااااا

وزين سويتاى نورتينى لان ما عندى وقت اتصفح المجلات واجابل نت ابورت الى رافع ضغطى من كثر ما عسرنى بالطلب

مالنا الا ديرتنا الحبيبه

اى ابى وايد اشياء اتيبينلى
كل اليورو جاهز
ههههههههههههههه

Reflections said...

REEEMAA REMAAA REEMAAAA

حبــيــــــــــتج على هالبوست..

دغدغ مشاعري الفاشنية
و هيج فيني الرغبة للذهاب الي السوق
ابي Selfridges.. أبي Nights Bridge..
أبي Kings road.. أبي Sloan Streeeeeet

ابي و ابي..

عندي سؤال مهم للبنات، .. احنا ليش ما نشبع من الهدوم و كلا نبي شي يديد؟؟
ليش كلا جنه اول مرة انشوف هدووووم؟؟
و ليش و ليش.. ؟؟

يبيلي بوست كامل عن هالموضيع:/

2 u ALL said...

أشوه ..!! ريما الطبيعيه ردت لنا ..!!يا حبكم حق المخاسير ..!! بس عليكم بالعافيه بس بدون أسراف وتبذير ...!! وتروحين وتردين بالسلامه .. أشوه هديتي شوي ...!!؟

AseeL said...

رحلة موفقة تروحين وتردين بالسلامة انشاله

خوش يوست حق حريمنا وبناتنا الداثرين اللي ما يفهمون بالموضة و بالفاشن
يعطيج العافية

eshda3wa said...

Reeemaaaa
take me shopping with u
TAKE ME TAKE MEEEEE

PearL said...

:) الله يستر من صيف الكويت

3ateeja said...

لا اعوذ الله من الغلا ...حتى بنص دينار البس ولله الحمد قانعه المهم شي نظيف ومرتب
ريما بليز لا تقولين نساء لكويت وكأن كل نساء لكويت يشترون بهالجيمه ...قولي اي عبارة ثانيه عشان يصير في عداله :)
ترى بنات الفقارى وايد وانا اختج
بس ترى الموديلات يازتلي وايد ...

nEo said...

www.net-a-porter.com

من أكثر المواقع التي أكرهها و اتمنى ان تحوشه تفليسه !

زوجتي الحبيبة تعتبره موقع اهم من موقع الهوتميل !

اتوقع عموم الرجال يشاركونني الرأي !

Mohammad Al-Yousifi said...

انقذتي حياتي

tweety said...

ريماااااااااااا
حبيبتي كثري من هالبوستات التوعوية ترى والله لها مشجعين وأنا أولهم

أنا عاد عندي الملابس الصيفية تضعف أكثر من الشتوية لأن الاخيرة تتفخ بس صاجة الصيفية تفضح وتطلع أدق التفاصيل

أهم شي أن الموضة واسع ..بس يختج أنا ما أحب المنفوش شسوي مو ناقصين نفشه

فركاش said...

عقب كل هلي اتسوونه اتحلطمون على الرياييل!!!
و تقولون ليش الكويتيين قاموا ياخذون من بره!!
لا ريما انتي قاعده تخليني اصر على موقفي و اظل عزوبي ;p

عجبني ان بترد مودة نفانيف الستينات أحب هل ستايل :p

اجار الدين كشمش said...

فركاش.....نصيحتي لك اقضب ارضك اذا انت اتحاتي المصرف ..اذا اخذت عربيه يابت فريجهم كله مو بس اهلها. واذا اخذت اجنيه بتقعد اتحجي انقليزي طول عمرك اليما يطيح حنجك هذا غير توشن مدارس عيالك وغير كل صيفيه قيمة التذاكر اذا ديرتها بقلعت وادرين و لا تصير مثل ولدنا قالت له ديرتكم مافيها قطار ؟ واذا اخذت هنديه علابالك ارخص اخاف تروح الكنيسه و ما ترد ولا تقدر تسير معاها عند الاهل وخاصة بالعيديين ..يمكن فقيره ما تحط """ بالقاع كل يطرشونها...وبس ترجعون البيت والا ميمعه عيادي والفشله انها اقل من عيالها ....ها اشرايك..حط الكلكوليتر وحسبها صصصصصصصح يمكن انا اتعاطف مع الهنديه علشان اسمي...والحين قرر اذا تبي مجبعه متحجبه روح الحمرا مول في الفروانيه مول الحجابات اذا تبي ام الجينز عندك من فيلا موده الي المرينا الي الكوت...

فركاش said...

اجار الدين كشمش:
لا لا تخافين السالفة معاي مو سالفة مصرف انا قاعد اتكلم عموما من ناحية المصرف
وعلى طاري اذا تزوجت اجنبيه راح ادفع توشن حق المدارس اصلا انا (لا سمح الله اذا تزوجت) ما راح ادخل عيالي غير مدارس خاصه لأن تجربتي مريرة مع المدارس الحكومية..

physio-80 said...

ماشاءالله
ما خليتي شي
بس احنا الرياييل مشكلتنا هالسوالف
يعني المرة اتدش السوق علشان تشتري جم شغله
تطلع معاها 6/7 جياس متروسه
عليكم بالعافيه
و الله يعييييييينا

Ra-1 said...

hahha :p

White Wings said...

ما في أحلى من السيل
:)

Dr. Saleh said...

ريما يا حبك للخراب
أبي أعرف إشلون تقسمين على ثلاث و وتعطينه سعر الثلث
وقسمتك لل 200 على ثلاث أطلعت 50 مو 66.66
وعلى فكرة ترى دائما أنطنش بإرادتنا لإن جميع ما تشتريه المرأة هو صفقة رابحة
لكن ودي أعرف سر التوفير والمقارنات اللي ما لها داعي عندما تذهب المرأة لشراء مستلزمات البيت من الجمعية والتي إتزهق أم حياتنا واللي كرهتنا في روحة الجمعية

Hitman1 said...

Hitman1 <==== 7adda mo mal fashion :)