Tuesday, October 31, 2006

i am home :)





الحمد الله و برعاية الرحمن وصلت بالسلامة

أدري ولهتوا علي هذرتي مع إنني ما بطلت هذرة و أنا هناك، بس والله في جم سالفة إتقرقع بقلبي ودي أقولها، راح أمخمخ البوست و أكتبه علي ما إتحمدون بالسلامة .

إللي يحر إني بالمطار من الساعة 10 الصبح يوم الأثنين ، ووصلت الثلاثاء الساعة 6:30 الصبح؟

لي متي ماكو رحلات دايرك؟ ليش الكويتيه الدايرك حق لهنود و الفلبنيين و لندن و روما! و الوقت تعيس و مو مدروس بعد ما يمشي مع الرحلات الثانيه الثابته حق أوروبا و كل الترانزيت من 6 ساعات و طالع .

ييت الكويت مفتره خرايط راسي !

بقولكم سر و إنجاز في هالسفرة

ما زادت القطع و لا زدنا عن 30 كيلو

رحنا بثنتين و رجعنا بثنتين

وناسه!


Sunday, October 29, 2006

البساطة





الأحد و كل شي متسكر برة ، مالنا إلا نلعب غولف و إللي ما أواطن هاللعبه، تم تأخير الساعة الحين فصار بينا و بينكم ساعتين فرق توقيت.

رحنا أكدنا علي موعد الطيارة و إللي تحتاج رحلتنا يومين و إستراحة بلندن إللي أكره جوها في هالوقت من السنه.

شنو تعلمت من هالسفرة ؟

ساعات علي كثر ما إتعرف صاحبك ، إتحس إنك تكتشفه لأول مرة، هالريال الحبوب السعودي و زوجته كانوا مثال إنتعلم منهم أشياء كثيرة .

أولها الفلوس مو كل شي بالدنيا ، القناعه بإللي عندك إتخليك إتعيش ملك ، زوجي أول مرة يقعد معاه وايد جذيه ، و أول ما قعدنا كان بس همه المطعم لفلاني و المكان لفلاني، و عقب ما قمنا قعد يقوللي زوجي، أنا ياي آكل ما بقي مطعم ما قالنا عنه، ضحكت أنا ، قتله الريال لايعه جبدة من الشغل و تبيه يكلمك عن الشغل و أهوا قاعد في أحلا مكان بالنسبه حقه؟

قعدنا وياه مرة ثانيه، حسينا زوجي و أنا إن ما نقدر إنجاريه بالمطاعم و الأسمامي لأن آخر إهتمامنا ، فدار الموضوع بشكل ثقافي حلو، و زوجته قامت إتسولف عن شي غير المطعم و الطبخ، و قلت لها عن كتابتي بالبلوق ، بس ما علمتها علي عنوان الصفحة عشان أحش فيهم بالخير براحتي.

قالتلي جم قصه تصلح تنحط بالبلوق و راح أكتبها علي سعى إنشاء الله لكم.

بوفيصل ( صاحبنا) قاللي شغله ، و حسيت إن بالكويت فعلا زايده هالحركات بالمقاعد ، و هي النديه و فرض السالفة و الإقناع .

يعني قاعد واحد يسولف سالفة مو عاجبتني، إشحقه أداحره ، أخليه يسولف و يقول إللي بخاطرة و أنا أمشي وياه ، أسمع و أطلع بالزينه ، قاللي لاحظت إنكم مريحين بالقعدة تسمعون و بالتالي إتمشون و هذا طبع مو كويتي!

ضحكت و قلت له ، الواحد ما يفرض إهتمامه علي الغير و مو معقوله إن كل سالفة تنقال بتكون لنا إهتمام فيها، بالسفر الواحد يصير حريص جدا علي كلامه و نوعيه الحديث ، لأن الواحد هااااج من ديرته فماله خلق يسمع بس من آداب الحوار إنك تكون مستمع جيد جدا .

قال إن بجدة له يوم بالأسبوع إستراحة ، و ممنوع أحد يتكلم بالفلوس أو بالشغل، عشان الواحد يستمتع بالأشياء البسيطة إللي عنده، جنجفه و كرة و برنامج بالتلفزيون.

و إطلع من المجلس معطي إنطباع عنك حلو.

تخيلوا لبنه بدلاق و إلا مطعم بمدينه ما أدري وين، خلتنا إنحب هالإنسان و إنحب بساطته و إشلون إن يدق و يسأل عنا لأن حس إن ماكو عقد بالحياة ، خل الأمور تمشي . ساعات إتسوي شي و ما إتكون قاصدها .

و أنا قاعدة أكتب هالبوست إتصال ياللي منهم إوصلوا بيروت، و داقه تقوللي ها؟ ما غيرتوا رايكم تجولنا إهناك الجو حلو و الناس مبسوطة ما ودها تجي ، و ترا هذي ملابسنا إللي بماربيا ما غيرنا و لا شرينا شي .

ما أقول إلا الله يحفظهم و يحميهم يا رب ، تعلمت منهم وايد ، و راح أحرص إني أسمع و أتعلم منهم وايد



ولهت عليهم والله ولهت عليهم



Saturday, October 28, 2006

لبنه بماربيا

يا حلو هالديرة و يا حلو ربيعنا فيها، خل أقولكم عن الناس إللي إتعرف إتعيش ، عندنا صاحبنا إسم الله عليه و تبارك الرحمن سعودي و مرته كويتيه قنوع وايد و ولد خير و نعمة و فيه ميزة حلوة إنه كبير و صارل له 20 سنة متزوج و ماشاء الله الدنيا حلوة بعينه، كل فرض بأسبانيا بالمسجد، و شغله أبد ما يسولف عنه، بس همه الأكله لفلانيه و المطعم لفلاني، إشلون تعرفنا عليه؟ السبب أنا ، كنت رايحه حق دكتور أسباني حق رقبتي و ما قصر مسكين كان يترجملي لأن الدكتور ما يفهم إلا أسباني.

حبيب أهوا و مرته و من عمر الدنيا بأسبانيا ، و السنه شبه علي زوجي و سلم عليه و قاله ها إشيايبك هالحزة مو كنت طول الصيف إهني و يا عيالك ، و طبعا عباله أخوه و يقصد حماي ، يوم شافني جان يركز إشوي ، هاااااااااااااا إشلون إرقبتج؟

أنا : الحمد الله والله عقب ديييقو العجيب و علاجه إللي جنه سحر ! الحمد الله ماكو شي من ذيك السنه.

المهم كان أول يوم عيد و ما قصر عزمنا علي عشا العيد ، و إحنا وياه جان يقولنا علي شي غريب عجيب!!!!

الروب و لازم الماركه إللي بتشوفنها بالصورة ، و دلاق أديداس جديد!

لييييش؟ لأن صاحبنا مدمن شي إسمه لبنه! و اللبنه مو موجودة بماربيا

فيا حلوه شسوي؟ يشتري دلاق جديد و يصب فيه الروب و طول اليل يعلقة ليما الماي ينز كله من الروب ، و الصبح يحطه بتابير ويييير و يواديه وياه لينوتر ، و ياخذ أيبس خبز إهناك و يقمس فيه .

كل يوم يسألنا هااااا سويتوا اللبنه!!!!

يا حلوه ، اليوم مشا من أسبانيا و رايح ويا زوجته لندن ، علي قولته ما أواطن لندن بس بما إني متزوج كويتيه فلازم يكون عندي شقه بلندن ، تدرون الكويتييين يموتون علي لندن حق السوق و المزامط هههههههههه

الله يحفظهم يا رب و يسمح دربهم









هذا الروب شريناه بس راح آكله حااااف بدون دلاق أديداس
ههههههههههه















ممكن إتسامحوني ما راح أقدر أعلق عليكم بس صدقوني قاعدة أقرا تعليق تعليق

Wednesday, October 25, 2006

spain


عيدكم مبارك جميعا ! و سامحوني ما رديت عليكم بس الرحلة كانت متعبه إشوي و ماكان لي خلق أفتح النت
إييييه سافرت و رحت ماربيا و كل سنه أقول مابي أروح أوله عليها و علي الجو و الذكريات الحلوة إللي فيها


أخليكم مع بعض الصور








الطريق لجبل طارق





المنظر إللي كل يوم أجابله لما أتريق








علي الدرب صورت الجبل








يالله من فضلك المنظر
و جباله البحر
و رذراذ خفيف و تلبسون نص جم









حق إللي يقول مو وقته أسبانيا


و إكتشفت إن نص ربعنا إهناك
فإحنا من عشا عيد
لييييه غذا العيد

واليوم ربعنا السعوديين متنقصيللي تمر من المدينة المنورة و دلة القهوة العربيه


و أشوفكم علي خير إنشاء الله




Saturday, October 21, 2006

عيدكم مبارك



Right click ==> save as ====> YOU GOT YOUR 3EDIYA!!!!!



عيدكم مبارك

و كل عام و أنتم بألف خير

ويعودها علينا السنه القادمة بالصحة و العافية

و تقبل الله طاعتكم





-----------------------------------


أوقات ياخذنا الحكي ..
وننسى بالحكي أوقات ..
واوقات .. يا ليت الكلام سكات ..
يجرحنا الحكي ..
اسهر .. مع حبيبي .. يا قمر الكلام ..
لين يغفى حبيبي .. وجروحي تنام ..
ابعد عن حروفي .. وعن المي وخوفي ..
وابحر في سفينه .. عن بحر الظلام ..
وصلنامدينه .. من عطر وغمام
انا وين القى كلام .. ما مر فــ كلام
اوقات .. يا ليت الكلام سكات ..
يجرحنا الحكي ..
بغني لعيونك .. في حزني وفرحي
وبكتب عيونك .. قصيده لجرحي
واخلي ابتسامك .. دموعك كلامك
قمر هالسوالف في ليل السكوت ..
ولو الف نجمه في عيني تموت ..
في حزني أحبك .. ويأسي أحبك ..
أحبك .. مااقول أوقات


بدر بن عبدالمحسن


Thursday, October 19, 2006

Happy BirthDay




HaPpY BirTHday

My sweet princess

Yes today 8 years ago

I got my first baby !

and i become a mother!!!

lovely feeeling!


I wish her the best in her life .

this is her cake lovely ha!

it looks her her face!

smiling always

enshallah dooooooom




Wednesday, October 18, 2006

story from the cashier!



آخر أيام رمضان و الله يعودها علينا بالصحة والعافية ، هالأيام قاعدة أتفرفر بالسوق، أغراض البيت و تفتيحة الشتا و العيد و إللي ناقصة دلاق و إللي تبي ليققنج( حارني ماني لاقيه قياس بنتي ويا عصاقيلها) ، المهم لاحظت ظاهرة غريبة عجيبة؟

ماكو إحترام حق إللي قاعد يشتري، إشلون؟

دخلت محل المفروض إللي يشترون منه يعرفون السنع، إشلون؟ البدلات ملوت اليهال من الستين و فووق !

قاعدة أشتري معناها راعي الكاشير قاعد يحسب فلوس مو لعب، و حق 3 يهال، يعني ضربوهم ب2 و 3 ، غير إن البنت خرابيطها وايد و لويه و جنطة!

مسكين ألف مرة يجيك علي القطع إذا ناقصة و إلا لأ، و الإخت تلبح علي راسه، في من هالقياس؟ و يحقر ، أقووووووووول إنتتت، ليييش ما إترد !! أبي أشتري أنا!!!

( طبعا أنا مالكم أمل أدخل بهالحوار إللي ما أقبض وراه إلا قلت الحشيمة، لأن إللي ما يستحي و يتعدي علي دور الغير ، فالله بالخير بالعقلية)

المهم أهوا تدارك الموقف، و قاللي ممكن أستأذن منك إشوي علي ما الكرت يخلص؟

البياع لبناني، فكان قمة بالذرابة ، وراح شافها إشتبي.

خلاها و ردلي عشان يغلف لهدوم ، فدخل إشوي داخل عشان إييب جييييس يحط فيه لهدوم .

و إلا الأخت أعصاب! ويييينك إنت ! أنا بشتري!

جان يقول البياع: إهدي إشوي مدام ، خليني أخلص إللي بيدي؟

و جان تردحله، إنت ما إتعرف أنا منو؟

البياع: ما خصني إنتي ميييين ، إنتي هووون زبونة حالك حال الزباين البائيه!

الأخت: لا أنا يايه أشتري بمبالغ، لازم إتعاملني غييير

البياع: شوووفي إختي، يا إما تعدي بحترامك و إلا يالله علي الباب!

أنا إهنييييييي ، بلمت! أووووخ طردها! إشسوت عليها الحين لسانها الطويل هذا !

المرا إنطردت و أنا واقفة ، طبعا بيني و بين نفسي مستانسه لأن الله خذا بحقي!

من أول ما إدخلت و إهيا تلبح ! جنه محد شاري إلا إهيا !

الموقف الثاني: at mother care

المحل معروف إن ما يغلف هدايا غير تغليفة المحل، و أنا شاريه حق عيالي بجامات و إهدوم بيت و يعني فيها 20 قطعة؟

و قاعدة أحاسب على الكاشير، و الفليبينيات إبروحهم مدودهين و قاعدة إتفك القطعة مالت جهاز الإنذار ، و إتييلكم ذيييم المرا و يا بناتها صغار و صراخ عليهم يممممي ، لا تلمسين هذا و بسج تعبث !

( أنا : لا حلو ولا قوة الله بالله موعودة فيهم و إلا إشلون – الساعة 3:30 الظهر إشيايبهم من المدرسة ليه السوق ! )

الحرمة: أقووووووول ، عندج علبه هدايا حق إللي شريته؟

( طبعا و لا جنه في وحدة واقفه قاعدة إتحاسب و قش لهدوم علي الطاولة و يبيله تركيز لا إتغلط بالقطعة و ما إتحطها و إلا إتحاسب عليها مرتين ! )

خلصت البياعة نص إللي بيدها و عطتها العلبة و إطلعت العلبة أصغر من الحجم إللي تبيه .

الأخت مرة ثانيه: شنووووو هذااااا إللي إهناك أكبر من هذييي و بلا وبلا و بلا إتحلطم علي عليها

الفليبينيات أمهات إطران! جان إتقوم إتحقرها !

و هذيييك إتحلطم !

جان إتقولها البياعة : قوووووووووووو ذيييييييييييييير!

علي شكل زفة

تخيلوا الموقف إللي أنا في ، طبعا هم إستانست إنها زفتها و طخت عن هاللويه الله يهداها !

إللي بفهمه؟ وييين الإحترام ؟ ليييش ماكو محسوبيات مثل أول ، و ليييش عبالهم إن إحنا ميخالف ننطر و أهما لأ و أهما إللي مستعيلين ووراهم شغل و إحنا بالطقاق !

بالمرتين أنا ساكته ، بس ليييه متي هالجهل في مجتمعنا !

والله شي يحر

Monday, October 16, 2006

just write






في بلوق إستكانة و تحديدا موضوع ( أدري بقلبك كلام .....) ، وقفت عند نقطة أساسية و كان هذا ردي علي البوست بس كان موجز وودي أتكلم عنه إهني .

بسبب إن الموضوع وايد وايد عجبني ، فحبيت إنكم إتشاركوني تفكيري بصوت عالي على بوست إستكانة.

الموضوع باختصار، ليش فضفضة البلوق غير وليش البلوغرز البنات أكثر من الشباب :

كان ردي علي الموضوع:

ليش أحس المدونة فضفضتها غير


لأننا نفتقد كلامنا ويا نفسنا

الصديقات ما يعطونا مساحة صمت لمدة طويلة، لتداخل الكلام بين أطراف الحوار

الكلمات متي ما عبرت بالضبط عن ما في روحتج إتحسين فعلا إن هذا إللي تبينه


دايما في نقطة يغفل عنها الكثير



نحن نريد التعبير المجرد لكلمة (تفريغ) ؛


و معناها ( لو سمحتوا بدون نصايح بدون مناقشة ماله داعي)؛


لو كل شخص فهم هالمعني ما كنا إحتجنا المدونات

بس ولكن قلة الإدراك فينا أن الإنسان يحتاج الكتابة لمجرد الكتابة


و بما إن البنات لديهم هذه الملكة بسبب إن إحنا كنا ناكل الكتب أول و عندنا إسلوب حلو ووقت أكثر بسبب قعدتنا بالبيت.


و لأن الرجل يحس إن سره يجب أن يكون بداخلة ليمنحة القوة



و لأن المرأة تحب أن تظهر ضعفها لإستدراك العطف من الجميع



و لأن الرجل لا يحب أن يظهر نقاط ضعفه



و البنات إحنا أكثر من الشباب
و لأن الشباب لاهين بأمور حياتهم



هذا سبب أن البلوغرز البنات أكثر


سوووري طولت عليج

إنتهي الحوار بالبلوق و لم ينتهي بتفكيري، بتكلم عن نفسي ، ساعات لما أكون في قمة لويتي و مشاكلي و أبي أرتاح و كان هذا الكلام قبل لا يطلع لنا عالم البلوق، أحس إني أبي أقرا و أقرا و أقرا ، لأن القراءة تعطينا الرتم البطيء لحياتنا السريعة، بس بالبيت في تداخلات خارجة عن الإرادة بسبب وضعي كزوجة و لازم أنا إللي أجابل كل شي.

منو له خلق يجابلني؟

و الجواب أهوا :

نفسي

نفسي الوحيدة إللي تقدر إتحملني، لأني أسوي أشياء ما يتحملنا مخلوق بالدنيا.

هالأيام فقدت إني أقعد مع إنسان ينورني و يساعدني علي التفكير بنفس مستواي و بنفس الوقت إللي أحتاجه.

بتقولون زوجي، الله يعطيه الصحة و العافية مشغول و هالأيام فرصة إن يجابل ربعه إشوي بهالقعدات الحلوة إللي برة بالدواوين. مقدرة جدا هالشيء و الله يهنيه بعد.

قعدت و ويا منو؟

قعدت والإمام الشافعي ، جابلت السايت ماله و من زمان كنت أشوف أبوي الله يعطيه طولت العمر بالدوانية إمبروز بعض أشعار الإمام الشافعي رحمة الله عليه.

لاحظتوا علي إني زايدة بالجيلة و الحين أقولقم لييييش، كل ما الواحد يكبر ، كل الناس ما إتقبل أخطاءه:

وَإَنَّ سَفَاهَ الشَّـيْخِ لا حِلْمَ بَعْـدَهُ

وَإِنَّ الفَتَـى بَعْدَ السَّفَاهَةِ يَحْلُـمِ

هذا البيت للزهير بن أبي سلمي ، مادري طرا علي الحين فجئة علي طاري الأخطاء.

المهم ، شنو لقيت بالإمام الشافعي ، الخبرة و الحكمة إللي نفتقدها مع من نصادقهم، و كنت دايما أقول ليش ما يكون لي صديق خفي ، مثقف و عارف و إذا إحتجته دقيت عليه بدون خجل و خوف ، أستشيره و يعلمني بأمور الدنيا ، ساعات الواحد لما يكون غرقان بموقف لازم إييب أحد من برة يشوف البحر كامل يفكر صح و ينقذني.

دخلت بستيت ألف موضوع أدري، بس هدفي إني بكتب بشي أحبه و خذا من وقتي الكثير بالتفكير.

الزبدة

الواحد ليش يحتاج إن يقعد و يا نفسه، يحب و يعشق و يخشع و يلوم و يحاسب و يجازي و يعاقب

و بالنهاية ، المفروض ما يقول حق أحد شنو إلي بداخل تفكيرة. و أخليكم و يا هالأبيات للإمام الشافعي.

كتمان الأسرار


إذا المـرء أفشـى سـره بلسانـه
ولام عليـه غيـره فهـو أحمـق


إذا ضاق صدر المرء عن سر نفسه
فصدر الذي يستودع السر أضيـق

البلوق و الفضفضه حلوة ، بس هم لازم يكون في جزء أحتفظ فيه لنفسي .

و متأسفه جدا إذا في يوم شاركت أحد بفكري و ما إعجبه كلامي ، بالنهاية البلوق و الفضفة تكون جزء مني ، فأرجو تقبلها كما هي .


Saturday, October 14, 2006

short story



يسمعني صوته بهدوء

أشتقت إليك

كانت كلماته الأولي

لا أستطيع أن آخذ أنفاسي معها

كأن البحر الهائج قد أتاني من جديد، بكل ما تحمله هذه العبارة من حنين وعشق و أمان، بكل ما تحمله من ذكريات حلوة وأليمه ، أعود لأغرق محاولة النجاة من أحلى شي لي في هذه الدنيا ، أتنفس الصعداء مرة أخري، يسألني ما بك؟ لماذا كل هذه التنهيدات؟ هل يضايقك أن أشتاق إليك؟

قلبي يفكر بالجواب

لم يجد الرد

لا أستطيع التمييز بين الخوف والحب، يخفق قلبي مرة أخري، يريد النجاة من الموت، لا يستطيع تحمل الحياة ، أريد إستخدام عقلي هذه المره.

يسألني

لما هذا الصمت؟

هل سؤالي أصعب من أن تجاوبيه ؟

هل تلاشي كل ما تتمتعين به من عقل يوقف أكبر الرجال عنده ليتأملوه من غرائب ما يحتويه من علم و حكمة سنين الكبار.

الصمت قد يكون أبلغ بالتعبير أحيانا من أن يشوه بكلمات قد لا أجد من بينها ما تستطع التعبير عما يجول بقلبي.

لا تتكلمين

لا أريد سماع العاقل فيك

أحب غموضك

أحب جنونك

أفهمك تماما ، فعلا الكلمات لن توفي بحق هذا الحب .

أريدك بجنبي ، لا نفترق ، تتعانق أرواحنا قبل أجسادنا ، أريد أن أحسسك بالأمان و ليس الخوف ، لا أريد الكلمات ، أنا رجل ، والرجال يقاسون بالمواقف. إبقي بجانبي نظراتك تجعل مني شاعر مجنون و حكيم عاقل. تعالي بقربي، عانقيني ، كعناق الأم لولدها ، أنا من يطلب الحنان هذه المرة ، لأني أشتقت إليك .

أستيقظ فزعة من حلميييييي!!! أكلم نفسي ، أطمإنها ، لا تفزعي ، إنه حلم .

أبيات ألهمتني لكتابة هذا الموقف :

إذا المرء لا يرعاك إلا تكلفا ... فدعه ولا تكثر عليه التأسفا
ففي الناس أبدال وفي الترك راحة ... وفي القلب صبر للحبيب وإن جفا
فما كل من تهواه يهواك قلبه ... ولا كل من صافيته لك قد صفا
إذا لم يكن صفو الوداد طبيعة ... فلا خير في ود يجيء تكلفا
ولا خير في خل يخون خليله ... ويلقاه من بعد المودة بالجفا
وينكر عيشا قد تقادم عهده ... ويظهر سرا كان بالأمس قد خفا
سلام على الدنيا إذا لم يكن بها ... صديق صدوق صادق الوعد منصفا

الإمام الشافعي

home work





قاعدة أدرس بنتي اللغة العربية، إيهيا بثالثة إبتدائي و قاعدين يعطونهم المثني و الجمع، المهم إستوقفتني كلمة و إحترت فيها وايد وايد.

كلمة خفيف – شنو المثني مالها و الجمع؟

أوكي المثني سهل

بس الجمع عقدني ، خفيفون؟ خف ؟ خفاف ! أمبييييه والله إبتلشت أنا مو مال هالجما إللي إتعقد!

سويت إجتماع قمة عليها، دقيت علي أمي، يما شنو جمع خفيف؟

أمي: الحين معقولة ما عندج معجم بالبيت؟

ريما: يما عندي إنجليزي – عربي ، و بعدين إبتدائي ما أحتاج معجم

أمي : لحظة خل أسأل أبوج، بو- محمد شنو جمع خفيف؟

أبوي: جنها نفس الشي ، إنقول أوزان خفيفة و حمولة خفيفة

ريما: مشكورة يما و شكريلي أبوي بعد.

طبعا كلش ما إقتنعت بالإجابة، إنشغلت و تركت الموضوع ، لأن كان يوم أربعا هالحجي

ييييه اليل، بحط راسي علي المخدة ، و إلا كلمة خفيف أشوفها جدام عيوني تقوللي شنو الجمع مالي!

لا حول ولا قوة إلا بالله، إشهالحالة! شنومني الحين و في كلمة غبية مثل هذي إتنطط جدام عيوني !

الساعة 3 الفير ، و أقوم أفتح الاب توب ، مالي إلا قوووقل المنقذ

عرفت الجمع مالها و إلا شي ما مر علي بالي !

و فجأه ياتلي النومة عقب ما عرفت الجمع.

اليوم الثاني ناديت بنتي و أنا مستانسة! عرفت الجمع مال كلمة خفيف !

بنتي: يما؟ حتي بالعطلة تبين إتسوين الواجب

الأم ريما : حبيبتي يا بعد طوايفي ، عطلة مو عطلة ، بتبطلين الدفتر الحين و إبتكتبين الكلمة ، إنتي ما تدرين إشصار فيني باليل عشان أطلع الجمع و إنتي إتييلي تقوليلي عطلة

بنتي: يما عادي عادي حتي إذا ما عرفتيها أقدر أنطر أسأل المدرسة السبت.

الأم ريما : لا حبيبتي ، لازم إحنا إندور و نسأل عشان ما ننساها ، لما تسإلين ماراح تثبت براسج، يالله يا حبيبتي صيري خوووش بنت و كتبيها

بنتي: إنشاء الله يما ، والله عشانج بكتب الواجب بالعطلة

السؤال الحين لكم؟ شنو جمع كلمة خفيف؟

Wednesday, October 11, 2006

your baby grow up





اليوم: الأثنين :10 أكتوبر 2006

المكان: منزل والدي الكريم

كان والدي الله يطول لنا بعمره عازم بالبيت صديق قديم و هو الحين قنصل في إحدي الدول، الرجل من أرقي الناس إللي قعدت وياهم و زوجته ماشاء الله من أهدى و أمتع الناس ، وبنته الله يخليها لهم من أرقي البنات لصغار .

ليش بتكلم عن هذي العزيمة بالذات، لاحظت أن العزايم إللي تكون بين عايلتين من أمتع الأشياء عندي بالدنيا، لييش أقول هالكلام، لأن الحديث و أسلوب طرح المواضيع يكون جدا راقي و مفيد و بحكم وجود الرجال بينا إحنا يالحريم يكون صوت الحريم واطي، كل وحدة تستمع للثانية عدل، الكبير يسمع لصغير ، الصغير يتعلم من لكبار إللي قاعدين حواليه.

موقف محرج و مضحك بنفس الوقت:

صديق الوالد شكله مو كبير وايد و ما سألت جم عمرة بس أكبر ولد عندة كان عمرة 19 سنه، و أصغر بنت عمرها 5 سنين ، دخلت و سلمت علي زوجته وبنته و يوم وصلت حق بوخالد جان يقوللي أبوي ، سلمي علي عمج و القصد من السلام المصافحة باليد، و قمت و صافحته بس إللي تنحت عند كلمة عمج !؛

ما أدري حسيت زوجته إهيا إللي تنحت وياي هاهاهاهاها ، الله يهداه أبوي صج إنه رفيجك بس مو معناته إني أقوله عمي و أنا مرا إشكبري !

ملاحظات علي نفسي جديدة:

دار النقاش و لقيت نفسي لا شعوريا أندمج مع سوالف والدي العزيز و صديقة، ذكرياتهم أول و الحديث من العيار الثقيل، تداركت نفسي و درت ويهي للصوب الثاني و إلا والدتي و أم خالد قاعدين يتكلمون عن الديكور بحكم إن أم خالد كانت نازله بيت جديد ، طبعا يازلي الحديث بحكم إني دخلت دورة تصميم داخلي ، فعندي خلفيه إشويه عن وين أحسن مجلة و من وين الأثاث الزين و نظرية ثيم الألوان و بدي الحديث ينتقل من أمي ليه عندي فا أم خالد إندمجت وياي إشوي، بس الوالدة الله يهداها كل إشوي مقاطعة المرا و لا هذا سعرة مبالغ فيه و هذا يقصون علينا ، و أنا قاعدة أقول بيني و بين نفسي صراع الأجيال و أمي مو معترفة برايي إني كبرت و قمت أفهم.

البنت حبيبة أبوها:

بعد ما طلعوا الضيوف ، قعت ويا الوالد و أسولف وياه سوالف بعيدة كل البعد عن سوالف مجتمعنا المريض، فتكون قعدتي وياه من أمتع القعدات عندي بالدنيا، و دايما يسألني ها إشلون موقعج إللي تكتبين فيه و شنو آخر مواضيعج، وطبعا أبوي ما يعرف بلوقي و إستسمحته العذر إني أغبي عنه ، عشان آخذ راحتي بالكتابة و المواضيع المطروحه في.

أمي راحت بدلت و إنزلت تحت و أول ما إقعدت بطلت التلفزيون طولت علي الصوت !

أقولها يما بلييييز ممكن إتقصرينه إشوي قاعدة أكلم أبوي، تقوللي قومي قعدي يم أبوج أنا بتابع المسلسل ، و فعلا قعدت يم أبوي.

أبوي من النوع إللي إذا كنت موجودة و زايرتهم يعطيني كل إهتمامه و يحسسني إني فعلا كبرت و لي وضعي لأن يدري إشكثر أحب إللي أسولف وياه يكون مو مشغول إلا بسالفتي، المهم أندمج ويا الوالد بالسوالف و فجئة بدون مقدمات أمي كل ساعة بين فاصل الدعايات تقطع الحوار بسالفة ممثله و الله يهداهم ليييش يحطون برمضان جذيه و ليه هذا الدور مو لايق علي الممثلة، و إحنا طبعا فعلا إنكون مو وياها بس نسمع و نسكت لما إتخلص.

نرجع إنكمل الحوار و أقوم أقول حق أبوي يبا يوعان تبي تاكل شي؟

طبعا كل الأكل إللي أمي حطته حق الناس ما ذقت منه إلا قلاسين ماي و قهوة تركية عشان أقدر أتسحر عدل، لأني لو بخربط بتروح علي وجبة السحور و عندي إهيا من أمتع الوجبات إللي آكلها برمضان.

أمي : وااااي ريما بسج كل ساعة تتكلمين عن الأكل، والله بطنج بيحوشه شي من كثر ما تاكلين من برة، ما جني أمج ، أنا ما أواطن أكل برة و كل دهن و مو مفيد كلش.

ريما: يما لازم أتعرفين شغلة أساسية فيني ، أنا التغيير جزء أساسي بحياتي و الأكل مو مهم عندي يكون صحي و إلا نظيف وايد و أدري إن المطاعم كلها وسخة، بس شسوي متعتي بالمطعم.

قمت و دقيت تليفون علي زوجي كان معزوم علي سحور و إلا أشوه مو ماكل ، حبيبي بعد عمري فييييك الشراتون؟

يالله أنا مشتهي القوزي من زمان و مرقة البامية مالتهم، إنتي وينج؟

أنا في بيت أهلي ألحين أيي البيت و إنروح ويا بعض.

أمي : راسج يابس ماكو فايدة و طول عمرج ما تسمعين كلامي .

ريما : يما ليييش؟

أمي: في مرا سنعة إتطلع ريلها من البيت الساعة 12 عشان إتروح تاكل هالحزة!؛

ريما: واااي يما إرمضان عادي! و الشراتون يسكر الساعة 2:30 باليل

أمي: و إنتي ما وراج عيال و دوام طالعة هالحزة،

ريما : يما والله صدقيني لو زوجي ماله خلق جان قاللي مالي خلق عادي

أمي: والله ريلج حليييو ، لو مو حلييييو جان ما وداج حق بطنج الساعة 12

ريما: ( وللييييييييييييييييين – أبي أبوووووييييي )

أبوي: إشفيييج أم محمد الله يهديييج خليهم علي راحتهم

أمي: إشقلت أنا الحين بعلمها السنع

ريما: يما والله الريال مشتهي قوزي الشيراتون، والله زوجي لو مو مشتهي جان مالج أمل نطلع هالحزة.

أمي و بعد إقتناع: خلاص خلاص كيفج أنا شعلييي سوي إللي تبينه، خو إنتوا عيال هالوقت ما تبون أحد يقولكم إدنو علي ورا.

ريما: يما أنا صارلي 10 سنين متزوجة الله يهداج أي نصيحة بعد هالعمر و عقب ما فهمت ريلي . يالله عن إذنكم ، لازم أروح تأخر الوقت.

المهم طلعت ورحت الشيراتون و أثنينه كنا كاشخين بحكم إن كل واحد ياي من عزيمة، و يوم رحت الشيراتون حسيييت نفسي جني عروس ، ما أدري ليش ياللي هالشعور، ليييش إني أول مرة أطلع هالحزة برمضان من سنين، رجنا البيت بالثنتين بالليل، و أنا هالحزة كل أكون نايمة أو علي وشك أني أنام.

حلو التغييير و حلو إن أهالينا يقبلون التغيير فينا بعد


Tuesday, October 10, 2006

إنتقام إمرأة


بقولكم سالفتي ويا الطبخ برمضان، أول ما تزوجت و يايبه اليهدة و كل يوم طبق أسوي و يوم طبقين مالح و شغل عدل ، كانت خالتي ما يعجبها شغلي، مو عشان أكلي مو حلو؟ لأ ، لأنها ما إتحب غير الأكل القديم، هريس ، تشريب ويا رقاق شغل بيت مو ما ل جمعيات،المهم لمدة 30 يوم تبيني أتعلم صب القفشة لأن عايلتنا الكريمة مشهورين من عمر الدنيا بهالخلطة السرية، وأقولها خالتي، ما أحب أسوي شي لازم أسوي واحد واحد منه، تقوللي كااا أمج أحسن وحدة تطبخ و مهتمه في بيتها و تشتغل و ما بقا كتاب طبخ إنجليزي قبل العربي عندها بالمكتبة.

أقولها خالتي أمي غير و أنا غير، أنا زوجي ما يحب إلا الحلو إللي داخل فيه سارالي كيك ، والأكلة لازم يكون فيها سوس و الباستا أكلته المفضلة، فكل مرا علي إللي يحبه ريلها.

تقولي، إيييه و أمه ماله خاطر عندج إتسويلي قرص عقيلي وإلا بلاليط وبيض وإلا محمر و إلا كريم كراميل،و إلا الكيكة إللي فيها هيل إللي أمج إطرشلي إياه حق القموس ويا الشاي حليب.

أقولها خالتي والله ما أستطعم هالأكلات من جذيه ما راح أعرف أطبخهم.

تقول ، أشووووف إتسويين ستيكات و باستات و لا يبقي كريمة حمرة ما إتحطين ، إسمالله عليييه ولييدي زاد وزنه من أول ما خذاج.

بقلبي ( لا حول ولا قوة إلا بالله ، شسوي ألحين ).

فقررت أطبخ ، و أصريييت أطبخ إللي يحبه ريلي حبيبي.

كل يوم في الثلاثين يوم بالشهر الفضيل تعليقات من نوعين، زوجي و حماي يصعدون أكلي فووووووووووووووووق السما و يا حلوة و يا زينة.

وخالتي الله يهاداها إتبط فيني بالقاع ، هذا ما ينإكل و ثقيييل و أحد ياكل هالأكل برمضان.

الحلو و ما أدراك ما الحلو، شنو هالأكل، و لييييش مو حلو كويتي، غريبة و إلا بلح الشام و إلا لقيمات.

هالكلام من 5 سنين، و قررت إني أطبخ بسكات حق ريلي بس ، عشان ما ينكسر خاطري ، وصية أبوي دايما حق ريلي ( حتي إذا الأكل مو حلو قووول حلو عشان إتشجع و تدخل المطبخ مرة ثانية، و إنت من وراها إمسحلك خبزة و يا جبن و إكل- هههههههههههه )

الزبدة:

بعد إنقطاع دام 5 سنين أعود بإنتقام بأكلة الله يعافيها كيتي حاطة لنا الوصفة، لييييش بنتقم؟ لأن لمدة 5 سنين قمت أسمع إني مو سنعة عشان ما أطبخ برمضان.

إشسويييييت؟

شريت 12 مارس و 2 سارالي و 2 قيمر و بدت خطة الإنتقام لأن هالحلو راح ينزل تحت، طلعت خروجية من الدوام عشان يمديني أسويييه و أنام بعدها.

الساعة 5:30 و الحلو نزل تحت ، تفطرنا و صلينا و وصل دور الحلو، جان أقوووم أقرف حق نفسي و أجابل القهوة التركية و أهيييييييم كما يهيم العاشق لمحبوبته.

في حلقة مفقودة، منو إللي مسوي الحلو، و أنا عمك أصمخ جنه مو لي، هااااو من ماعونة، ( كنت بسمع التعليق ) و فجئة تم الهجوم علي طبقي، يا حلوة بس ثقيل و ياكلوون ، ناطع بس يبيلة قلاااااس جاي بدون شكر يمحر، يييه دوووري وااااي يا حلوة جنة مال شوكولات بار ، يبيلة كاباتشينو.

يا أخي هالخدام ما يعرفون يسألون من ماعونة هذا !

خالتي؟ هذا ماعوني و هذا شغلي إشرايج فيييه؟

و أنا قشيانة من داخلي لأني سمعت كل التعليقات و بدون مجاملات المدح قبل الذم و هذا حدة أثلج صدري، عقب ما خلصنا جان أنادي اليهال ياكلونه لأن متعتهم الكاكاو.

أخليكم ويا الطبق ، صورته لكم، و الله يعيني علي تعليق إختي لوييير لأنها لاحظت شي فيني، ويوم صورت الصورة إتضحت الرؤيه ألا وهي، إن معاعيييني كلهم بيييييض و لازم الأزرق داخل فيهم .

مو عشان يمشي و يا ثييييم بلوقي