Friday, August 28, 2009

حر الكويت يقلل من وطنيتي

أمس كنت رايحة أزور وحدة مريضه بالمستشفى
الوضع كان ما يسمح بتفتيل عضلات الوطنيه بالمرة
السؤال المطروح كالعادة
ها وين صيفتوا هالسنة
والله كالعادة بأسبانيا
و إلا ما أشوف إلا هالويه اللي انعفس
ويييع وييع حر حر
رديت بكل هدوء
والله الحر بديرتنا اللي الجو جنه حالف ما ينزل عن 45
ترد علي
يا حلو ديرتنا بحرها و غبارها
( طبعا هالجملة لايعة جبدي منها من كثر ما تكررت علي هالسنه و ربعي اللي قاعدين يقرون هالبوست راح يدرون عن المواقف اللي مريت فيها بسبة الجملة السخيفه! )
خالتي؟
هالسنة وين كنتوا؟ عادتج لندن من أول 6
( هالخالة عندها شقة تينن بنايس برج الله يهنيها من قبل السبعينات هههههه معناها عمرها ماشافت حر الكويت)
أنا أدري اسم الله عليج عيالج 2 واحد يشتغل بأمريكا ما يبي يرد الكويت
و بنتج الصغيرة قاعدة وياه هناك و ما تبي ترد بعد ، لما الحين على خبري و إلا تغير الوضع وياهم؟
لا والله يا بنيتي لما الحين و عيزت أقولهم ردوا ردوا ماكو فايدة
( ويا ابتسامة شقاقيه بقلبي عرفت سر حبها لجو الكويت مو لأن شاقتها الوطنيه – لأ – لأن عمرها ما انلسعت )
خلونا من هالقصه
الكويتيين و خصوصا البنات أو الحريم ما ياخذون الحوار بأبعاده عامة ، دايما يحورونه
هذاك اليوم قعدت ويا وحدة أقولها ، والله لو عندي جم بيزة زايدة جان خذيتلي أحلا بيت برة و مدخولي أصرفه على وناستي ويا هالبراد و راحة البال.
( حلم مو صج أوكي؟ لأن مرتبطه بعايلة و عيال و بطيخ )
أشوف صج بهالمرحلة ينقلب الوضع سياسي!
إنتي ما اتحبين ديرتج
و حمدي ربج
و ما أدري من هالكلام البطالي
بس أعتقد هالإنسانة لو تقعد بينها و بين نفسها
و خلنا نقول اتجرد من هويتها الأرضيه
و تلبس الهويه العالميه و إن الكرة الأرضيه كلهم من جنسيه وحدة
والله و ربي ما تتحمل مناخ كل دول الخليج
ليش الواحد لي عذرب الجو بالكويت صار مو وطني و لازم يحذف جنسيته شهالمنطق!
و لي تكلمنا عن الوضع الزفت اللي بدواماتنا هم ما نسمع الا حمدوا ربكم وضعكم أحس من غيرك
طبعا يقصدون غيرنا المتخلفين
ماني فاهمة الوضع
هل انتقاد الوضع يقلل من وطنيتي؟
اللي بديت أشك إني أبيها بعد ما أشوف الأشكال المهدوده بكل مكان و ما أدري من وين طالعين؟؟
و خصوصا بعد كل الأزمات اللي قاعدة تصير بالديرة و ما عليها كونترول قوي
لا و هذا أنا ما أبطل الجرايد و أقرا!
و آخرتها تلوث مياة مشرف بعد و لا تسبحون بالمسيلة
!
و أمس بمستشفى الرازي تعالوا بس شوفوا الوضع
والله الوضع يضحك الصراحة
لزهيويه يتمشون وياي لي الغرفه
و يوم تكلمت تقوللي عادي زهيويه مستشفي صغار
لا والله !؛

والله ما تدري عايش بدولة لها كيانها و خططها المستقبليه
و إلا قاعد في بيت حمولة كبير
اللي يأمر و ينهي عميد العايلة!
ما يشوف الا اللي حواليه
بديت أشك الصراحه

10 comments:

هالحـــــزة said...

تحلطم زايد ماله معني ..؟؟

ma6goog said...

مرة ثانية دزيهم صوبي

nanonano said...

أقول لج شي

جو الكويت السنه ألعن جو شفته

خش كل بشاعته..لين رجعوا الكويتيين من صيفيتهم

و طلعت الرطوبه...و الشمس الحنانيه

و ما يبون أحد يحجي

أي حر بعد شنو نسوي

من تبطلين حلجك تقولين حر اليوم...ما تدرين منو يبلش محاضرة

حمدوا ربكم..أشتبون أحسن من جذي

وااااااااااي

يحرون

Purgatory said...

هاهاهاهاهاها

سوريسار

وانتي من صج تسمعين كلام الحريم، أنا أقول عدلي مكانج في أوربا أو أي مكان ثاني مثل الباجي،


 

SHOOSH said...

ما تبيع شقتها ؟؟؟

Anonymous said...

لووول مو هذا الهدف الله يهداج

الهدف ان حتى السفرة ياخذوها للمعايات وهذا قدر يسافر وهذا ماقدر وهذا قدر يروح مصر بس مايقدر على اوروبا. بالكويت كل شي يتحول لمعايات ويربطونه للمستوى الوظيفي والاجتماعي والمالي

Яeema said...

هالجزة

صار اللي ما يتحلطم مو كويتي




ma6goog :
والله ودي ودي

ودي أصير ملجعه و أعرف أرد





nanonano:

تراوالله جو الكويت دهر مو حلو
4 أشهر بالسنه زين
يعني ماردنا حقه
وييين بنهف

وترا والله وياج شي يحر لي صار دهر دهر ايبوللي هالسالفه

يا أقول الجو حلو

عبالج بتسلمين

يقولون اتبالغين
ههههههه






purgatory!!!!!!!!!!!!

مبارك عليك الشهر
اييييي هذا اللي ما يتسماش


والله قاعدة أفكر بالتقاعد المبكر


الواحد لي كبر يا لبنان يا مصر حق وساعة القلب
هههههه





shooosh !
loooooooooooooooooool

لييييس 99 سنة تنطرين؟
sharing ana weyach




anonymouse

المصيبه هالكلام يصير و يا ناس عندهم خير

و ترا أكبرها و أسمنها قامو ياخذون فلل بلبنان

الهدف والله صدقني معايات و بس


الله يخليك
دبي صارت أغلا من أوروبا

عثماني said...

ريما

انتحاطط و نشتري لنا ياخور بجبد

يمدحون الجو هالايام بجبد

:)

سمعي و طنشي و انا اخوج

اهم شي .. انتي شلونج؟؟

:)

Яeema said...

عثماني
هههههههههههههههههههه
والله جبدعجيبة بس الأشكال و أنا أختك
عندنا يمعا بجبد كل خميس حياك؟؟
هههه
أنا ما أكون موجوده بس الرياييل

كنت طالبه كنافه ههههه

ندور على البنفت

{~المباركية~} said...

ياحلات القعده بالمباركيه ويتكتكت ذاك الهوا البارد وستكانة الجاي الساخنه