Monday, March 23, 2009

يما بشوف الله

لصغار عليهم أسئلة اتدوده لما يسإلونها!
هابلي ولدي الحين لصغير يسألني
يوميا متى أروح حق الله؟؟؟
أقوله إنشاء الله لما تكبر
يرد: يما ما يصير ألحين أشوفه؟؟
لا ما يصير محد فينا شاف الله
يما متي أشوفه؟؟
قتله لما كلنا نموت نشوف الله
قاللي يما لما أموت بعدين ما يصير العب!
قتله ايي لما نشوف الله نكون كبار و ماراح تشوفه و إنت ياهل

طبعا ما إقتنع
و كل ما يروح حق أمي يقولها
أنا أحب الله وايد و أبي أشوفه
أمي دقت عليي هذاك اليوم تقوللي ولدج شطاري عليه
قتلها يما ما أدري كل ما بقينا نغير الموضوع يرد و يفتح الموضوع أبي أشوف الله و أبي الله

توه مساعه ناديته عندي بالدار أبي ألمه بروحه بعيد عن اخوانه
توني مسكرة الدار
و أنا قاعده أحضنه و أسمع هالكلام
يما يالله أنا بشوف الله
بيني و بينكم بدت تخوفني هالكلمات
أستغفر ربي
و أتعوذ من بليس
بس ما أقدر أحس بخنقه كل ما إييبلي طاري انه بيشوف الله
أخاف باجر يسوي في نفسه شي عشان فضول اليهال اللي في

أستغفرك و أتوب إليك
والله اللي عنده خبرة بهالموضوع يفيدني
شقول و شلون أوصله المعلومه ببساطه

13 comments:

Cat said...

فضول يهال .. لا تحاتين

شيين وايد يسإلون عنهم .. منو الله و من وين إحنا طلعنا ؟؟

أذكر لما كنت صغيره كنت أسأل أبوي عن الله .. و يقولي فوق بالسما ما نقدر نشوفه ألحين

مره كنا ناطرين أخوي عند المسيد .. قالي شفتي شوق هذا بيت الله

وانا وياه بالسياره أذكر شفت الإمام طلع و سكر باب المسيد .. إستانست و قلت حق أبوي شفت الله !!

عبالي إمام المسيد الله

حاولي تسإلينه ليش تبي تشوف الله ؟؟ إذا تبي منه شي صل و كلمه لأنه راح يكون يسمعك و يشوفك

فراوله said...

مساالورد والجوري
شلونج ريما
سمله علي
والله يحميه
ويطولج بعمره
وتفرحين فيه معرس
قولي آمين
حاولي توصلين لين مستوي تفكيره
لين تقدرين
تعرفين من وين سامع هالكلام
وربج كريم
ويحميه لج
آمين

weeknds said...

ابّي قلبي حدده عورني لما قريت اللي كتبتيه
الله يحفظه لج ولا تحاتين ترا وااااايد يهال يسئلون جذي
بس لازم يكون اجابتج ذكيه بحيث تقنعه مو تسكته
شلون ما أدري
بس شوفي انتي لازم تستشيرين أحد
أنصحج بـ د. محمد الثويني أو د. مصطفى أبو السعد
هذيله الأثنين متخصصين بتربية الأبناء وواااايد ممتازين
وأذكر مره شفت كتاب حق الثويني عن أسئلة الطفل المحرجه

شوفي أنصحج انج ما تتهاونين في الموضوع لان -الله يحفظه- كل ما راح يكبر كل ما راح تكبر أسئلته معاه
فاذا ما عرفتي شلون تتعاملين معاه من البدايه راح تتعبين
الله يحفظه ويخليه لج
التربيه كلللللش مو سهله
الله يعينا

abuhilal said...

هذا من الخطورة بمكان.
يجب تعليمه أنه لا يجب الكلام عن الله بغير ما تعلمينه إياه. وأننا لا نسأل أسئلة مثل هذا النوع عن الله. فنحن مأمورون بالتفكر بمخلوقات الله ومنهيين عن التفكر في ذاته. ومسألة القول بأن الله في السماء مسألة خطرة أيضا. "كان الله ولا مكان وهو الآن على ما عليه كان". فالله منزه عن الجهة والمكان! كيف وهو الذي خلقهما، وإلا دخلنا بموضوع الحلول الكفري. "وليس كمثله شيء"
"كل ما خطر على بالك فالله خلاف ذلك".

للأسف، كثير من المواد التي يتعرض لها أطفالنا في التلفاز من رسوم متحركة وغيره (وبعض الجهلة في العقيدة من المدرسين) تسبب خللاً وتضارباً في العقيدة في ظل غياب الوعي الكافي بذلك. فلا زلت أذكر تصوير توم وجيري للجنة والملائكة، وأذكر مسلسلاً آخر أيضا يجسد الخالق سواءً بضوء أو بصوت مسموع والعياذ بالله.
والله المستعان.
وجدت هذه الصفحة التي تلخص في هذا الموضوع: http://www.sunna.info/Lessons/islam_268.html

والسلام.

Hashemy said...

انا اشوفه شي طبيعي هذا فضول اليهال يصير بكل شي واذا تحاتين وايد ميمي صج شوفيلج احد متخصص اكيد يفيدج

الله يخليلج اياهم انشالله

cozy said...

صباحج الله بالخير :) من فتره ما علقت بس ذكاء ولدج ماشالله عليه الله إحفظه شدني
اول شي ترا ما راح إهدج ولا راح إطخ إلى لمن إتجاوبينه إبذكاء ومو غلط لمن يسأل طفل عن الخالق وعظمته وجاوبيه بسلوبج وعلى حسب فهمج بس مثل ما قالو الي قبلي إقنعيه وإنه يقدر إكلمه وأسف بس بلا توسوس وخزعبالات وبلعس فرحي إنه الله إحفظه مخه شغال و خياله زين ماراح إبعيد على امه و شوقتيني أبي أشوفه

Take Off life‘ said...

شوفي ريما انتي غلطتي يوم قلتيله مانشوف الا الا لمن نموت

بس حاولي تصححين وتبينين له
ان مو لما نموت بس نشوف الله

قوليله مانشوف الا لما لمن نصلي
ونسمع كلام الله ونقرا القران

" ومانصير شياطين " :p

ترى اليهال تثبت بعقولهم هالأشياء, قوليله لو جذبت وصرت شيطان وتهاوشت وطقيت اخوانك ماراح تشوف الله حتى لو مت

لازم تجتهد الحين وتسوي الي الله يقولك عليه علشان بعدين لما تكبر و تموت راح تشوف الله

بس لما تكبر مو الحين
ولازم تسوي الي الله قال عليه

واذا ما اقتنع
قوليله

غمض عينك وتخيل انك قاعد تشوف الله
اهو بيرسم خيال من نفسه وبيصدقه

بس بليز لا تحاتين, عادي كلنا كنا يهال ومرينا بهالفظول. وحاولي تنسينه هالموضوع قد ماتقدرين

Ducati said...

ممم اليهال تطري عليهم اسأله ما ادري اشلون ما اعتقد اني كنت اسأل مثلها

ولكن انشالله ماكو شي مجرد فضول وتقدرين تستعينين بوايد طرق بس اهم شي تكونين متأكده انها ايجابيه على الولد:)

SheLLoO said...

حبيبتي ريما ;**

في هالمرحلة السؤال طبيعي وكل شي نسمع عنه وما نشوفه لازم نسأل عنه والإنسان فضولي بطبعه..

قوليله إن الله سبحانه وتعالى شي ما نقدر نشوفه إلا بعدين واهوا موجود بالسما وما يصير تسأل وايد لأن حرام الله بعدين ما راح يرضى عليك..

حاولي تقرين له قرآن وقوليله إن الله سبحانه وتعالى ما يصير نشوفه لأن ما نقدر بعدين إذا شفناه نموت-عزوجل-

بسطي الموضوع وخلي يسأل على راحته لا تكبتينه لأن راح يدوّر بمكان ثاني وراح ياخذ معلومات غلط سولفي وياه بهدوء وشوفي ليش يسأل جذي وعلميه إن يدعي عشان الله يسمعه..

عسى الله يخلي لج يارب ويثبته ويمسح على قلبج ;*

لا تحاتين الموضوع جدًا طبيعي :)

Dr. Saleh said...

ask Dr. Mohammed Altabtabae

Dr. Saleh said...

Ask Dr. Mohammed Altabtabae

abuhilal said...

محاولات البعض لتقديم النصائح مقدرة، ولكن
"غمض عينك وتخيل انك قاعد تشوف الله
اهو بيرسم خيال من نفسه وبيصدقه"

WT...!!! ما هذا؟

هذه الأمور (العقيدة) هي أساس رسالة الإسلام. وقد ورد كما ذكرت النهي عن التفكر في ذات الله لأن ذلك ليس من شأن عقل الإنسان أن يدركه
(فالله كامل لا حد له، بينما عقول المخلوقات محدودة)، فيجب الانتباه.
والنصحية التي نصحني إياها أحد العالمين أن ننبه الأطفال إلى التفكر في خلق الله فقط والتنبيه على عدم وصف الله بشيء لم يخبر به الطفل مباشرة لتنجب نطقهم بمقولات كفرية دون إدراك.
أحد أبناء صديقي، بعدما كان قد شرح له هذه المسألة، عاد أحد الأيام من المدرسة وقال لأبيه "إن صديقي فلان كافر!" فقال له لماذا؟ قال:"لأنه يقول أن الله في السماء مع الديناصورات". قطعاً، كان هذا نتاج معلومات مغلوطة صورت له من قبل آخرين أو من التلفاز وغيره.
وكما قيل "كل ما طرا على بالك، فالله غير ذلك"!!! فلا أرى بالنصيحة التي قدمت من حيث إغلاق العين وتخيل الله، فهذا يجر إلى بلاوي والعياذ بالله.
أما نظر المؤمنين إلى الله في الآخرة كما ورد، فقد يأول إلى النظر إلى نعم الله والتمتع برضاه. وإلا، فيقال ننظر بلا جهة ولا حد ولا مسافة، فالله منزه عن صفات المخلوقين هذه. ولكن هذا قد يكون فوق طاقة الطفل في هذه المرحلة، فيأجل كما تأجل كثير من الأمور عنهم (مثل الحمل والولادة الخ...)
والسلام.

Take Off life‘ said...

abuhilal

wt شنو
ماكملتها !!

تتحجى عن الدين وقايلي
wt(*)

وبعدين ياهل شلون تبي تفهمه. تبي اروح اقوله روح اذبح نفسك وبتشوف الله حبيبي؟

وخليت بلاوي تجري ورا تغميضه العين ومادري شنو ترى ياهل والله ياهل

ههههههههههههههههههههههههه الله يهداك بس. ماذبحنا احنا يالغرب غير التشدد

عموما كل واحد يتحجى على هواه
:)

والحمدالله عارف ربي واعرف الصح من الغلط

واعتذر لصاحبه المدونه لو تعديت حدودي