أعشقك

كشفت سر من أسراري

العاشقه بداخلي

تقولها بخجل

كأني عار على عشقه

أعشقك بلا حدود

أقولها بكل فخر

بلا خوف

وبلا خجل

الحريه

ليست الحريه غياب الإلتزامات

إنما هي القدرة على إختيار ما هو أفضل لي

و إلزام نفسي به

فلسفة رجل

عاقله بجنون

مجنونة بعقل

تصفني بإحساس الرجوله لديك

تقول لي :

جنونك لا يظهر إلا بعقلك

تمردك على الحياة

رسمك لقوانين يعجز البشر عن تطبيقها

عنفوان الحب في عينيكي

أحببت جنونك قبل عقلك

أحببت تمردك

أحببتك أنتي

كما أنتي

عاقله مجنونه

وصيه من أب لإبنه

يامرقب بالصبح

يا مرقب بالصبح نطيت عاليك
ما واحد قلبي خبرته تعلاك
وليت ياذا الدهر ماكثر بلاويك
الله يزودنا السلامة من اتلاك
ياللي على العربان عمت شكاويك
وليت يا دهر الشقا ول مقواك
واليوم هالكانون غاد شبابيك
تلعب به الارياح من كل شباك
يا مالك اسمع جابتي يوم اوصيك
وأعرف ترى يابوك بآمرك وانهاك
وصية من والد طامع فيك
تسبق على الساقه لسانه العلياك
أوصيك بالتقوى عسى الله يهديك
لها وتدركها بتوفيق مولاك
الله برب أجدادك الغر يعطيك
مرضاته مع ما تمنى من إمناك
إحفظ دبشك اللي عن الناس مغنيك
اللي ليا بأن الخلل فيك يرفاك
وإعرف ترى مكة ولاها بناخيك
لو تشحذه خمسة ملا ليم معطاك
إجعل دروب المرجله من معانيك
وإحذر تميل عن درجها بمرقاك
لا تنسدح عنها وتبغاني اعطيك
جميع ما يكفيك ما حاصل ذاك
أدب ولدك إن كان تبغاه يشفيك
لو ضاقت إمة لا تخليه يالاك
إما سمج واستسمجك عند شانيك
ويفر من فعله صديقك وشرواك
والا بعد جهله ترا هو بياذيك
لو زعلت أمة لا تخليه يا لاك
وإحذر تضيع كل من هو ذخر فيك
معروف لا تساه واوفه بعرفاك
ترى الصنايع بين الاجواد تشريك
إليا طمعت بغرسها لا تعداك
واحذر سرور بغبة البحر يرميك
ولا عنده افلس من تشكيك وبكاك
وأوف الرجال حقوقها قبل تاتيك
لا توفيه بالهرج فالحق يقفاك
وهرج النميمة والقفا لا يجي فيك
وأياك عرض الغافل أياي وأياك
تبدي حديث للملا فيه تشكيك
وتهيم عند الناس بالكذب واشراك
واليا نويت إحذر تعلم بطاريك
كم واحد تبغي منه عرف وأغواك
وأحذر شماتت صاحب لك مصافيك
وليا جرالك جاري قال لو لاك
ولا تحسب أن الله قطوع يخليك
ولا تفرح إن الله على الناس بداك
الضيف قدم له هلا حين يلفيك
ومما تطوله يافتى الجود يمناك
إحذر تلقي الضيق مقرن علابيك
خليه محب لك صديق ليا جاك
ووصيك زلات الرفيق أن عثا فيك
ما زال يغطاها الشعر فاحتمل ذاك
راعه ولو ما شفت إنه مراعيك
عساك تكسر نيته عن معاداك
وإحذر عدوك لو ظهر لك مصافيك
خلك نبيه وراقبه وين ما جاك
لا تامنه واطلب من الله ينجيك
ويكفيك ربك شر ذو لا وذولاك
شفني أنا يا بوك بآمرك وانهيك
عن التعرض بين الاثنين حذراك
إذا حضرت اطلابه به شرابيك
اسع لهم بالصلح واللاش يفداك
ابذل لهم بالطيب ربك ينجيك
ولا تجضع الميزان مع ذا ولا ذاك
أما الشهاده فادها إن دعوا فيك
بين عمود الدين لا عميت أرياك
بالك تماشي واحد لك يرديك
طالع بني جنسك وفكر بممشاك
رافق أصيل في زمانك يشاكيك
لا شاف خلاتك عن الناس غطاك
وحذراك عن طرد المقفي حذاريك
عليك بالمقبل واترك اللي تعداك
ثم إلعن الشيطان حذراك يغويك
ترى أن تبعته لشرابيك وداك
وأوصل لا تشكي علينا بلاويك
انت السبب اطرفت عينك بيمناك
وإعرف ترى اللي واطا الفعرو اطيك
ولا أنته أعز من الجماعة هذولاك
ألمسك يا راسي من الذل وأخطيك
وأحذر تكلم يالساني وحذراك
وألطف بجارك قوم من دون عانيك
وافطن لما يعنيك عن ربعة اخواك
ياذيب وإن جتك الغنم في مفاليك
فاكمن لها ياذيب لاما تعداك
فيما مضى يا ذيب تفرس بياديك
واليوم جاء ذيب عن الفرس عداك
ياذيب عاهدني وعاهدك مارميك
مرميك أنا ياذيب لو زان مرماك
والنفس خالف رايها قبل ترميك
ترى لها الشيطان يرمي بالاهلاك
ومن بعد ذا لا تصاحب النذل يعديك
عن صحبة الانذال يابوك حذراك
والهقوة انك ما تجي دون أهاليك
ولا ظن عود الورد يثمر بتمباك
الحر مثلك يستجي يصحب الديك
وإن صاحبه عاعا مععات الادياك
لا تستمع قول الطرف يوم يلقيك
بالكذب يقضي حاجته كل ماجاك
من نم لك نم بك ولا فيه تشكيك
وألياه قد زرى رفيقك وزراك
عندك حكا فينا وعندي حكا فيك
وأصبحت كارهنا وحنا كرهناك
ما خطاك ما صابك ولو كان راميك
واللي مصيبك لو تتقيت مخطاك
مير استمع مني عسى الله يهديك
أنصحك يا ما لك لك الله مولاك
عندي مظنه ما تمثلثها فيك
واطلب لك التوفيق من عند مولاك

الشريف بركات

عنوسة البنات بسبب الكشخه

يمعه و سوالف بالخيمة و ماكو إلا العافيه

يابوا طاري السوق و التنزيلات

وحدة تسألني

ريما ؟ ودي جنطه بهاللون و تكون خفيفه و حلوة

انا : و الله هالمكان هلو و مسوي تنزيلات اليوم 50 % و أتوقع راح إتلاقين ، توهم داقين علي من شوي ، يمديج إتروحين باجر الصبح ، لأن ما نزل إعلان التزيلات بالجريدة .

رن الجرس عند وحدة مخها صغير مع إن عمرها فوق ال 45

ريما! شهالخبال ! في أحد يشتري جنطة بهالسعر! لا و هذا بعد التنزيلات ، و ليييش داقين عليج إشمعنه

صراحه وصلتوا حق قمة التفاهه إللي قمتوا ما تشترون إلا ماركات و إلا ما يعجبكم !

( بحكم سنها و صلة القرابه بيني و بينها ، أخذت الموضوع ضحك ، لأني لو بقلبه جد جان قلت لها – لو عندج فلوس جان ما قلتي هالحجي ، لا إتطلعين روحج سنعه و إحنا إللي فينا الخمال لأنج ما تقدرين تشترين )

عمر الماركات ما زادت أو نقصت من قيمة الشخص ، و إللي عنده عليييييه بألف عافيه

و أما بنعمة ربك فحدث

المهم مو هالنقاش ؟؟؟

التكمله يايتلكم الحين

المرا أم 45 : إنتوا ما إتشوفون نسبه العنوسه زايدة بالكويت ، بسبه إن الريال من يشوف بنت شايله جنطة ماركه كش منها

( تعليقي بس إحتفظت في لنفسي – إشدعوة الرياييل يعرفون بماركة لجناط من شكل الجنطه – و الله لو إتيبيله ماركين و تصبحين الصبح مو مثبت )

المرا أم 45 : إيييي و إلا أكو وحدة إتحجز جنطة قيمتها 2500 دينار و إتقول حق الريال إذا إسألوك قولهم هذي محجوزة حق فلانه لفلانيه

( الإسم معروف إن تقدر إتحط 10 من هالجنطو مو وحدة و لا عليها عايز إتقول هالكلام – بس أتوقع إن إنتي إللي بتبلغين شفج و تبين إتعرفين منو إللي خذتها )

المرا أم 45 : تعالوا شسالفه هالسيايير الكشخه إللي لبني ( البنات ) هابين فيها ، محد عنده سيارة عاديه ! الله يعافي لقساط و الله إللي مكشخه هالأوادم ، والله الكويتيين الوحيدين إللي ما يبين غنيهم من فقيرهم.

( لا حول و لا قوة إلا بالله – لي هالدرجه حسد وصل بالناس ! البنات معروفين أبهاتهم منو!! أي أقساط إنتي الثانيه ! )

المرا أم 45 : أنا إشكثر إيولي شباب إشزينهم من عيالنا يقولون لا ما نقدر علي مصاريفها .

( إللي أعرفه إن الديرة مقسمه طبقات ، ما يصير إللي علي معاشه ياخذ بنت تاجر ! – و ما يصير والله الموظف يطالع وحدة سيارتها إب 40 ألف دينار !

أصلا مو منطق !

المرا أم 45 : ما إتشوفون فئه الطبقه المتوسطه أهما إللي يتزوجون !

( هدمتي مقاييس القسمة و النصيب إللي أنا أأمن فيها أصلا حدج من منطق )

أنا ما أقول إلا الله يهدي الجميع ، و لا يكون الواحد قاعد على الوحدة

ترا القناعه بإللي عنده أبرك من ملايين الدنيا .

ياما ناس عندها فلوس بس مو متهنين فيها ، مجرد أرقام بالبنك

لا يصير همنا المظاهر ، و إللي عنده علييييييييييييييييييه بألف عافيه

إذا حط قلتوله ليييش و يتشيحط و إشدعوة هالكثر !

و إللي عندة و حريص و يسوق سيارة عاديه قلتوا بخيل!

حرتني وايد

من زمان ودي أكلمها بهالموضوع أقولها ترا و الله مبين عليج مو زين جذي

بس أدري ماراح إتقبل و بتسويلي إن مو هامها و إن كل هذا سنع

و إهيا لو عندها زايد شوي جان سوت أزيد من جذي

يا ربي لا تجعل الناس أكبر همي

الحمدالله ملائكتي مرتاحه

و عساها دوم مرتاحه

i need you

أحتاج إلي صقل عقلي بكلماتك

دائرة الحياة والمشاكل لا تنتهي

أحتاج أن تتلاعب بألفاظك معي

تحب اللف و الدوران بحديثك

تسألني إن كنت تخيفني بطريقتك تلك

فضولك لإكتشاف عالمي الداخلي

أحببت طريقتك

و لن أرضي بغير ذلك

في صغري كنت أحب الأحاجي و الألغاز

أضع لكل سبب عذر منطقي

تكون داخل عقلي صندوق صغير

أفتحه عندما أكون وحيدة

عالمي الخيالي

طفلة بريئه

مراهقه متهورة

شابة ناضجة

أم حنون

عاشقه حالمه

لك كل ما تريد

فأنا بالنهايه

دميتك المفضله

By Reema

4-1-2007

sms's

علي بداية السنة الجديدة راح أقولك سالفه حدها إتضحك

عندي ناني حق ولدي إسم الله عليها الله يحفظها لبحه ما بعدها لبحه ، و ما أحب إنني أدقرها لأن داخل قلبها مثل الياهل ، و تصرفاتها علي وزنها إللي شثقله و كل من يقوللي ثقيلة طينه موزون و بنفس الوقت إتحب و هذا أهم شي عندي .

نوعها نكته زمانها ويا المسجات وياي ، ما إتحب إتواجهني ما أدري ليش ، بس إتموووت علي شي إسمه مسج بالتلفون ، و من كثر المسج إهيا الوحيدة إللي أعطيها فلوس حق موبايلها عشان ما تقطع هالعادة ، صراحة رسالتها واضحه حقي

راح أخليكم مع بعض من مسجاتها و راح أعلق علي سبب هالمسج

Madam i go bakala now i buy noodles for us were hungry and i buy card also i want to call my family in d phils.

هذي المسج الساعة بتاريخ 1-1-2007 \11 الصبح و لو إتشوفون إشكثر نصرف علي الأكل بالشهر راح إتطقون علي راسكم ! المطبخ المركزي تحت مفتوح لهم ، يعني لو حتي يوزعون علي الفريج ما راح إنحس فيهم.

لما أشوف هالمسج و إنها تبي إتروح البقاله لأنها يوعانه؟ إشبقول؟؟؟؟؟؟

تبين كرت قولي عادي! تبين شي معين قولي! بس مو إتقولين مدام أنا يوعانه!

علي قولت زوجي ، تدفعين 60 دينار معاش و ياكلون بـ 300 دينار !

Madam can you pls. call sayed to go jamiah i dont talk to him.

هذي المسج أنا بالدوام و كان عندي إجتماع ، ردت فعلي إني حقرتها

Madam i know your sleep now. Were going abdula house now.

مدام تدرين إني نايمة الظهر ، و إتيوون قبل لا أقوم من النوم ، شكو دازة مسج؟

عبدالله بيت جيرانا ، و المسجات تشتغل بين الخدام ، فإذا تبي إتروح حق خادمتهم حطت العلثه بولدي ، تبين إتروحين إتكلمينها لا إتودين ولدي عند بيت الناس الساعه ثلاث و نص الظهر! فشله!!! كانت أول و آخر مرة يروحون هالحزة

Madam i hope you give our salary tom or wed because on thursday the biya biya coming. I have to pay the biya biya coz i take one blouse. And i send my money in the phils when i go holiday dis coming friday. Thanks..

طبعا هالمسج بدعه من البدايع، أنا المعاشات ما أعطيهم إياها إلا 1-1 الشهر

كنت يومها مريضه و طريحة الفراش فتأخر تسليم المعاش جم يوم لأني أصلا ما طلعت من البيت ، و عيزت أوصي زوجي، كلا ناسي لا يسحب ههههههههه

أهم شي المصطلح بيا بيا ( هذي وحدة هنديه إتييلهم البيت إتييب بياعة )

Madam yousif he wants donut can i give him? Co'z donut is sweet. Reply pls

لا تعليق

في وايد مسجات إتضحك بس أحس إنني ثقلت عليكم

آخر بدعه من بدايعها:

يايتلي أول يوم العيد و إتقوللي ، مادام ممكن إتطرشين السايق عشان يشتري كرسبي كريم دونت؟

أنا طقني عقر بقر ! كرسبي كريم ! لييييش ما عجبكم مال بين الدونت؟؟؟

لأ مادام ، كرسبي كريم مو ثقيل و لو سمحتي نبي درزن حقنا

أهم شي قلت لها إنشاء الله أشتري لج و حق عيالي وياج إذا سمحتي هههههههههه

أول يوم بالسنة الجديدة شلت شلايلي و رحت كرسبي كريم و شريت 3 درازن

خل تشبع قبل لا تاكل واحد من عيالي !!!!

و أشكر كل من عايد علي و باركلي بالسنة اليديدة و إنشاء الله إتصير سنة خير للجميع