Wednesday, November 24, 2010

القرار خل يبلونه و يشربون مايه




هالأيام الكل قاعد يتكلم عن القرار ( اللي ما شفت نصه ) بمنع التصوير بلأماكن العامة و الأسواق بالكاميرات المحترفه ( SLR ) .

ما أدري بالضبط ليش صارت هالزوبعه و ليش خايفين المصورين من الجريده اللي أشارت الا هالقرار!

جريده وحده فقط اكتبت بالموضوع و هي جريده الكويت تايمز!

و أشارت إليه بدون أي دليل !

شنو نص القرار

و شنو الأشياء المترتبه عليه؟

منو اللي بيطبق هالقرار أصلا!

بما إن القرار يقول إن التصريح بالتصوير يجب أن يؤخذ من 3 جهات رسميه :

وزارة الإعلام : ما تدري وين و أي إدارة

وزارة الماليه : أنا أشتغل هناك و أدري إن مالها علاقه ! و احنا بنفسنا لي بقينا انروح مكان عام ناخذ تصريح من إدارة المبني نفسه!

وزارة الشئون الاجتماعيه و العمل ( يمكن عشان العمال اللي يشتغلون هناك يشوفون التصريح؟ )

الأهم من هذا كل إن القرار ماله نص عقوبات

يعني ممنوع عرفنا, رحت و شلت كامرتي و صورت؟

و بعدين؟؟

شنو الجريمه اللي سويتها؟

في قوانين للتصوير عامة و متعارف عليها بينا المصورين لما انسافر أي ديرة

ممنوع تصوير المنشآت العسكريه ( نواحي أمنيه )

ممنوع تصوير المنشآت النفطيه

ممنوع التصوير بالأماكن اللي مكتوب عليها ( ممنوع التصوير )

ممنوع التصوير بالممتلكات الخاصه! ( بيوت و أماكن مغلقه خاصه)

ما كثر الله القرارات بديرتنا

و أوله ممنوع التدخين بالأماكن العامة

في أحد التفتله؟

التلفون و أنت تسوق سيارة؟؟

في أحد خالفنا عليه؟؟؟

من يشوفك الشرطي يقولك نزل الموبايل و بس

و بعد هالقرار

رحت

و طلعت

و صورت

لا و يمي شرطي بعد و استأذنت من حارس المشروع و كان حلييو و خلاني أصور و عادي ماكو مشاكل و لا يدرون عن هوا هالقرار أصلا!

أنا أقول بديرتك خل لسانك حلو مع العالم و كل شغلك بيمشي

هذي صورتي الحلوة بعد القرار الحلو

هي تعتبر هالصورة جريمة يعاقب عليها القانون؟؟؟


و إلا يحمدون ربهم قاعدين انطلع الديرة بأحلا نظرة!


أقولك شي؟

كل ممنوع مرغوب

و الحين كميه المصورين بتزيد أبشركم




3 comments:

t7l6m.com said...

سمعنا عن القرار وما شفناه
إللي ما يدش المخ الماليه والشؤون شكو بالسالفه
وعلى فكره الصوره حلوه

إنسان بسيط said...

ماعندهم سالفه
اليوم انا و واحد من الشباب رحنا مرينا نتريق
الكل يتمشى و بيده كامره بس الي لفت انتباهي الشايب
دشداشه و قحفيه ومعلق نيكون برقبته
ههههه

Яeema said...

t7l6m

شكله اشاعة!؛

أشكرك على التعليق






انسان بسيط

الناس مو راضيه اتصدق ان ماكو شي
ماكو دليل واحد أو وثيقه نستند عليها


والله يحليله
عجبني الشايب!