Saturday, September 05, 2009

كلام بيني و بين نفسي الجزء الأول - الوزارة

أقوم الساعة 7 و أستعد للدوام و أطلع

8 أطق الكرت و ليتني أطق شي ثاني وياه بالطريج

( لما الحين ما يثقون فينا أو ماكو سيطرة على الموظفين اللي ماعندهم لا ذمة و لا ضمير ) لازم مراسل يشوفك و إنت تطق الكرت و يسجل رقمك

سؤال؟

ليش حاطين لنا كروت و متعبين حالكم و مصاريف دام الموظف يراقب دوامانتا؟

نقعد بالمكتب

الوو بابو جيييب ماي حااار مو مغلي! حااار بس!

تبطل ايميلك و تشوف فيس بوكك و تصبح على الجميع اللي حالهم ردي مثل حالك و ماكو شغل و إذا في شغل فهو مو من ضمن اختصاص القسم و لا مر عليك بحياتك الدراسيه.

و إلا تثاثثيت بالشغل و سويته خذا منك 5 دقايق

الساعة الحين 9 لما الحين ما سويت شي مفيد بحياتك إلا البلعة

تبدي تتمشي شوي بس مليت من الكرسي مرزوع فيه ساعة ريولك تخدرت!

تتمشي؟؟

لا ممنوع التجمعات ولا الدواوين

لازم تقعد بالمكتب تبتكر أشياء و ابداعات ( اللي ماردها بدرج مديرك عشان ما يبي يكتشف إن أثول من سنين الروتين اللي حط نفسه فيه و إنك فطين أزيد منه و يمكن بالمستقبل مديرو الكبير يحبك و يحطك بداله )

الكمبيوتر اللي بالكتب

من 2004 و غير في ناس قبلي كمبيوتراتهم أقدم مني بعد أنا كان عندي واسطه ( انباق ال cbu مالي خلال فترة اجازة الوضع و لهالسبب وفرولي كمبيوتر يديد ( مال الوكيل ) بس الشاشه و الماوس و الكيبورد قديمة مال الكمبيوتر المبيوق – ليش ما تبدلونه؟ لأ لأن مسجل بعهدتج لما انلاقي الكمبيوتر المبيوق يالله نسجل الكل بإسمج)

هالكلام أقولكم إياه و أنا أشتغل بوحدة تابعة لمكتب وكيل ها؟؟؟

يعني المفروض واصلين و كل شي بالتلفون يمشي

خلصنا؟

تجميد الأفراد الكبار يطلع على راسنا إحنا يالموظفين

من بعد مؤتمر كبير شاركنا فيه بسنة 2007

وحياتكم لي يومكم ما مرت علينا ورقه انسويها عليها القيمة إلا ورقه احتياجات عفش أو مستلزمات مكتبيه ( قلم دباسة ...الخ )

استقالة عقليه ذكيه و يؤسفي أقولها بسبب قرار شخصي ( ما أقدر أقول الأسباب ) أدي إلي تعطيل جزء مهم بالوزارة.

( إنشاء الله أشوفك وزير و تنفضهم كلهم والله محد عارف لهم إلا إنت )

مشاكل إداريه أدت إلي :

انشغال الرؤساء بريوق الموظفين لما يروحون الكافتيريا

أنشغال الرؤساء بابتكار لجان عشان يستفيدون منها

قضايا تنرفع عشان والله فلان ما خذا حقه بالوزارة و ما عطوه رئاسة القسم

تحركات سريه و تنقلات و تلاعب على المسميات و فجأه من موظفه لين مراقب اشلون ما تدري لأنها كفء. ( وين التدرج الوظيفي و ليش ما صارت رئيسة قسم بالأول؟ )

المهم بنهاية اليوم ما تدري شنو فعلا سويت عشان تحلل معاشك.

المصيبة الأعظم :

سالفة الحش و تنقل الكلام والإشاعات

و التجسس على الكلام والتنبش من ورانا و إنت ما تدري شالطبخه

طبعا تلاقيها عند ( اشباه الرياييل اللي عندنا بالوزارة )

عبالكم خلصنا؟

تعال شوف نماين البنات اللي تضحك لها ضحكتين حق مسؤولها المباشر و يضبط لها الدوام والتقييم و المرضيات .

غير الرياييل اللي يسون سوالف تضحك حق مسؤلينهم أو يقرا عليه ما أدري والله أو يربيله لحيه نفسه و تلاقيه بكل اجتماع أو لجنه أو زياره أو مهمة رسميه خارج البلاد وياه.

إذا مو عاجبك الوضع وودك تنتقل ، ما تقدر ليش؟

خلاص اكتمل العدد ماكو مكان ولا أكو توسعه يديدة بالوزارة

مكان صارلي فيه من 96 فتحت عيني على البنات و تعودت عليهم مالك خلق تروح و تتعرف على ناس غرب ماتدري من أي بيئات يايه و شنو نفسياتهم عساك اتعابل باليدد اللي يايبينهم و مفروضين عليك فرض!

تتكلم ، يقولون ، صبروا الوضع راح يتحسن

قام يصير من ردي لي أردي

طلعت استقالة و رديت ، نفس الشي بس المسؤولين صايلين يدخنون أزيد و عاقدين النونه و ما يسلمون .

لا جديد

نفسيات الموظفين تعبانه من المسؤولين

التفرقه واضحه وضوح الشمس

والناس السنعة اللي ما يحبون لخشوم و لا لها لسان ضايعين بالطوشه

12 comments:

Mohammad Al-Yousifi said...

بالعكس حلو الدام يكون مافيه شغل

اييب لابتوبي معاي , و اقزرها بلوجات و كُتُب

SHOOSH said...

حياتكم صعبه

SHAHAD said...

الله يعينج
حده الوضع ما ينطاااق :/

Unknown said...

عشان جذي انا ما احب الشغل بالحكومة
واسطة وتفرقة وعمات عين
القطاع الخاص صج يخوف
بس مستحيل يطلعون حمار فوقك

نمووول said...

الله يعينكم
زين اذا كسرتي الكيبورد
والماوس ما يعطونج غيرهم ؟

hessa said...

7asaft elshahada etha hatha mard.ha ;/

Dr. Saleh said...

فكري بجد بالإستقالة
السنين تركض
والوقت ما يرجع ورا

bo_sale7 said...

عندنا وعندج خير
بدك تطولي بالك

charisma said...

هههههههههههه
واى مت من الضحك والله يبتيها يييب
شر البلية ما يضحك يا ريمه
الشكوه لله بس

حااااااااااااااااله

ARTFUL said...

هذي الحكومة ما تحس انك مبري ذمتك

!!!!!!!!

enter-q8 said...

انتي تتحلطمين على الكمبيوتر
انا بصور لك الكراسي و الفاكس
هذا و احنا اهم و اخطر مكان و ما ابالغ يعتبر اثمن مكان بمحتوياته اي صج و نسيت التلفونات بعد

nino said...

الخيارات الزينه موجودة في الماليه
الدقابه الماليه
الميزانيه
نظم الشرا
على الأقل كل واحد على مكتب مو كل ٣ :)