Saturday, June 06, 2009

home sick !



خل أقولكم حقيقه تفاجأت فيها توني الأسبوع اللي فات

صارلي جم يوم ما أدري شفيني من أطلع من البيت تحوشني دورة و أشوف الشارع يلف فيني

ما داوت آخر يوم من الأسبوع قلت بروح أسوي تحليل دم

راسي ماني قادرة أشيلة من المخدة

رحت حق دكتوري

و بعد تقريبا ساعتين اطلت نتيجه تحليلي

سليمة 100%

الحمد الله

أوكي دكتور شفيني عيل!

قاللي انتي من الأشخاص للي تتأثر بدرجة الحرارة و أييلج هبوط

فلا تتعرضين لدرجات الحرارة العاليه

أو من حر لي برد و العكس صحيح

طبعا أول ما سمعت الخبر من العياده لي سماعة التلفون

زوجي العزيز ، بقولك خبر يطمنك وااااااااااااااااايد

شفت لما كنت تعيب علي تقوللي اشدعوة ما اتحملين الحر عادي

أشدعوة مولوده في القطب الشمالي

و كنت تضغطني ضغاط عبالك انني ضب؟؟؟

أبشرك من الحر اييلي هبوط و حاااد بعد

معناها مواعيدك اتمشيها وياي مع درجات الحرارة

جان تبي سيراميكه الحين بعد المغرب

تبي أشوف طوفه بانيها أصلي الفجر و نطلع

خلصنا؟؟؟

يالينا هالويك أند

خميس و جمعه ما طلعت

قلت بروح السبت البحر

و طبعا العايله رايحه قبلي البحر يوم الجمعه و يقولون أم المرادم عجييييييييييييييييييييبه و باردة

أقوم الصبح و إلا غبار!

يا ربي لييييييييش!

اشبسوي بالويك أند

ما أحب أسوي أي نشاط داخل البيت

ما أحب التلفزيون

ولا أحب الأفلام

والبلوغيرز صاير دعلة

يا ربي أدعيك من كل قلبي ويا الصحه والعافيه نبي جو حلو

مليت من الأفنيو والمجمعات والبلعه

أصلا مع الحر الواحد ما يشتهي ياكل

بديت أحس بالهوم سك من ديرتي

والله مو زين وراي عيال قاعدين يشوفون حالتي

مو معقولة الحكومة تعطينا 32 يوم بالسنه اجازة

يا تطول المده شهرين و الشهر الثاني بدون راتب راضيه

يا تسويلنا شي غير المجمعات التايهه اللي مافيها إلا محلات الشايع!

مارينا نفس أفنيو نفس الفنار

ليش مايعطون فرصه للمستثمرين يسوون ريزورت مسكر

في حمام سباحه كبير

شاليهات و سما صناعيه الواحد ينعزل فيه اشوي

مو معقوله النفسيه بتصير زفت على طول جذى!

بالنهايه اختار نمط شخصيتك اللي تقدر تعيش فيها بالكويت

Workaholic

Shopaholic

Gaazaholic

Dayinholic

Computer addict

أما الوسطي اللي مثل حالتي تحوشه حاله عدم الإندماج بهذه الأنماط

يومين قاعدة بالبيت و هذا ثالث يوم بسبة الجو الحار والغبار .

في اقتراح بس مادي إذا ينفع و إلا لأ

الواحد يضبطله دكتور يعطيه حبوب هلوسه

لي شاف درجة الحرارة 50 يقول

اللللللللللللللللللللللللللللللللللللللللللللللللللللللللللللللله خل أطلع كوتي أخاف برد

لي شاف ناس تتهاوش بالمجلس على أشياء سخيفه و تايهه

يقول اييييييييييييي ياحليلهم قاعدين يتهاوشون عشان يسوولنا مكان حلو حقنا و حق الأجيال القادمة و مشاريع التنميه

عشان لما اتشوف سلوى المطيري على تلفزيون محترم يعكس الديرة و الأشكال اللي فيها و توجه هالقناة

تقول والله اتصدقون عندها هدف بالدنيا؟؟؟

شكلي أنا اللي هلوست بدون هالحبوب



11 comments:

نون النساء said...

انا من اطلع بالحر
ويهي وايديني احس يحرقوني ويقرصون
وما اقدر احط صن بلوك لأن يصير الجلد لووعة
حتى لو كان أويل فري


وما أحب امشي بالمجمعات
وما اقدر اخذ راحتي بالبحر

البحر يبيله تفصخ
واهني ما يمشي الحال والله لو قاعده تتسبجين بسرداب بيتج اتحسييين اكو احد يطالع
ههههههههههههههههههههههههههههههههه

وإذا خلص الصيف اتلاقين ويهج دويحة سمره وفرق بينه وبين أذونج




فأنا بالصيف حالتي بإختصار


pillowaholic

:/




يعين الله

esTeKaNa said...

يا بعد قلبي انتي سلامات
امبيه انا بعد لازم اسوي هالتحليل
ريما قبل يومين رايحة عندي مشوار وادوخ واسيح عند الحارس مال المبنى تخيلي
ما فتحت عيني الا اشوف مياهه وانا متشرقده عند الباب
:((
وعلى طاري حبوب الهلوسه
الوالد مسافر شاري لي ذاك الشال العجيب،الحين بخاطري البسه بس لو احد يشوفني بتحوشه سكته قلبيه
:))
فمالي الا اكل حبوب هالهلوسه واكشخ فيه
:Pp~

فريج سعود said...

انصح بازدواجية جنسية سويسرية

NewQ8 Bride said...

لا تقعدين بالكويت :) سافري و الله انا جذي احس ملل و ماكو شي نسويه يا مطاعم يا كفيهات و على قولتج الأفنيوز ملينا منه الحين بعد المحلات قامت تسكر و تفتح محلات المهلب اللي كل شغلهم خياط الكويت

و الله انا سفرة الصيف سافرتها و رديت فانا قاعده هالصيف و اله يعيني على الملل

ابي ادور اشياء يديدة اقدر اسويها


و سلامات و ما تشوفين شر

Anonymous said...

yaa haram>..........

Mr_CHoCoLaTe said...

ههههههههه
لما ألحين ما تأقلمتي ويا حر الكويت
وينج عن صاحبنا الاوكراني
ما تحمل الشمس
جان يروح جهة الظل و يطلع Sun Block
من جنطته
و يقولي تبي ؟
انا!!!
لا يبا احنه متعودين انت حط زين حقك هي هي

U-Turn said...

سلامتج سلامتج @@

ما تشوفيين شر

الله يعينج عيل ثلاث ترباع السنه بتقضينها بالبيت ;p

ايي والله إذا عندج من هالحبوب عطينا منها شوي
جود تتعدل النفسيه ;D


ونرد نقول ما تشوفيين شر
ما تستاهليين والله ;*

الزين said...

اذا عطاج دكتورج من هالحبوب

وزعي علينا يا ريما

الحاله كسيفه



وما تشوفين شر

Яeema said...

نون النساء

باركيلي
طبقت طريقتج
pilloholic!

شي خيااااااااااااالي عجيب
ههههه

طلعاتي بعد الثمان سلمج الله







estekana

وي وي اسم الله عليج
لا ديري بالج
كلش و لا السيحه


دايما إخذي وياج هذا مال ستاربكس اللي يحفظ الحرارة و البروده و جم ثلجه و ماي حق الطوارىء


الشال أمره سهل
مرينا مجمع الوزارات و يبيه وياج
الله يا المكيف ثلج
البنات كلهم يتمشون بالشالات
الوضع طبيعي جدا

Яeema said...

فريج سعود

لا مابي قمات سويسرا

انطر خل أدورلي ديرة بارده و فيها لويه و أعطيك خبر


:p



New Bride

مو لازم تعرفين إن الكويتيه دايرك حق ملقا أول تاريخ ب أخر أسبوع من سته
و كل حق ربعهم
فإحنا بالرحلة الثانيه انشاء الله

هانت هانت

ترا على فكرة ياما قعت بالصيف
الوضع حلو جدا لو عندج شاليه أو شغل

وفرصه حلوة حق اللي يبون يسوين
small business


الأشياء اليديده لو سمحتي لو لقيتي أبي تقوليلي عنهم

والله صج صج نحتاج يكون في نشاطات حلوة بالديرة نمارسها حتي بالبيت


عن نفسي الحين قاعدة أكمل دراستي الأسبانيه





anonymouse
:(

Яeema said...

mr_chocolate

لأ ما تأقلمت
ودي ودي أتأقلم والله العظيم

looooooooooooooooooooooooool
sunblocka how manny el protection??
100+ hhahahaha




U-turn

loooooooooooooooooooool
ما عندي
ليتها عندي والله

لا مو 3 أرباع

11
شهر

بالسنه بالكويت

إجازتنا بس
32
يوم بالسنه





الزين

يا بعد عمري عمرج
أصيرلج حبه و أكليني قزري فيني

هههههههه

اسم الله عليج الرحمن الرحيم

بس اشرايج بالمطر أمس؟؟

حده عجيب
ههههههه
استغفر الله