أحتاج إلي صقل عقلي بكلماتك
دائرة الحياة والمشاكل لا تنتهي
أحتاج أن تتلاعب بألفاظك معي
تحب اللف و الدوران بحديثك
تسألني إن كنت تخيفني بطريقتك تلك
فضولك لإكتشاف عالمي الداخلي
أحببت طريقتك
و لن أرضي بغير ذلك
في صغري كنت أحب الأحاجي و الألغاز
أضع لكل سبب عذر منطقي
تكون داخل عقلي صندوق صغير
أفتحه عندما أكون وحيدة
عالمي الخيالي
طفلة بريئه
مراهقه متهورة
شابة ناضجة
أم حنون
عاشقه حالمه
لك كل ما تريد
فأنا بالنهايه
دميتك المفضله
By Reema
4-1-2007
علي بداية السنة الجديدة راح أقولك سالفه حدها إتضحك
عندي ناني حق ولدي إسم الله عليها الله يحفظها لبحه ما بعدها لبحه ، و ما أحب إنني أدقرها لأن داخل قلبها مثل الياهل ، و تصرفاتها علي وزنها إللي شثقله و كل من يقوللي ثقيلة طينه موزون و بنفس الوقت إتحب و هذا أهم شي عندي .
نوعها نكته زمانها ويا المسجات وياي ، ما إتحب إتواجهني ما أدري ليش ، بس إتموووت علي شي إسمه مسج بالتلفون ، و من كثر المسج إهيا الوحيدة إللي أعطيها فلوس حق موبايلها عشان ما تقطع هالعادة ، صراحة رسالتها واضحه حقي
راح أخليكم مع بعض من مسجاتها و راح أعلق علي سبب هالمسج
| Madam i go bakala now i buy noodles for us were hungry and i buy card also i want to call my family in d phils. |
هذي المسج الساعة بتاريخ 1-1-2007 \11 الصبح و لو إتشوفون إشكثر نصرف علي الأكل بالشهر راح إتطقون علي راسكم ! المطبخ المركزي تحت مفتوح لهم ، يعني لو حتي يوزعون علي الفريج ما راح إنحس فيهم.
لما أشوف هالمسج و إنها تبي إتروح البقاله لأنها يوعانه؟ إشبقول؟؟؟؟؟؟
تبين كرت قولي عادي! تبين شي معين قولي! بس مو إتقولين مدام أنا يوعانه!
علي قولت زوجي ، تدفعين 60 دينار معاش و ياكلون بـ 300 دينار !
| Madam can you pls. call sayed to go jamiah i dont talk to him. |
هذي المسج أنا بالدوام و كان عندي إجتماع ، ردت فعلي إني حقرتها
| Madam i know your sleep now. Were going abdula house now. |
مدام تدرين إني نايمة الظهر ، و إتيوون قبل لا أقوم من النوم ، شكو دازة مسج؟
عبدالله بيت جيرانا ، و المسجات تشتغل بين الخدام ، فإذا تبي إتروح حق خادمتهم حطت العلثه بولدي ، تبين إتروحين إتكلمينها لا إتودين ولدي عند بيت الناس الساعه ثلاث و نص الظهر! فشله!!! كانت أول و آخر مرة يروحون هالحزة
| Madam i hope you give our salary tom or wed because on thursday the biya biya coming. I have to pay the biya biya coz i take one blouse. And i send my money in the phils when i go holiday dis coming friday. Thanks.. |
طبعا هالمسج بدعه من البدايع، أنا المعاشات ما أعطيهم إياها إلا 1-1 الشهر
كنت يومها مريضه و طريحة الفراش فتأخر تسليم المعاش جم يوم لأني أصلا ما طلعت من البيت ، و عيزت أوصي زوجي، كلا ناسي لا يسحب ههههههههه
أهم شي المصطلح بيا بيا ( هذي وحدة هنديه إتييلهم البيت إتييب بياعة )
| Madam yousif he wants donut can i give him? Co'z donut is sweet. Reply pls |
لا تعليق
في وايد مسجات إتضحك بس أحس إنني ثقلت عليكم
آخر بدعه من بدايعها:
يايتلي أول يوم العيد و إتقوللي ، مادام ممكن إتطرشين السايق عشان يشتري كرسبي كريم دونت؟
أنا طقني عقر بقر ! كرسبي كريم ! لييييش ما عجبكم مال بين الدونت؟؟؟
لأ مادام ، كرسبي كريم مو ثقيل و لو سمحتي نبي درزن حقنا
أهم شي قلت لها إنشاء الله أشتري لج و حق عيالي وياج إذا سمحتي هههههههههه
أول يوم بالسنة الجديدة شلت شلايلي و رحت كرسبي كريم و شريت 3 درازن
خل تشبع قبل لا تاكل واحد من عيالي !!!!
و أشكر كل من عايد علي و باركلي بالسنة اليديدة و إنشاء الله إتصير سنة خير للجميع
مواصفات صاحب البلوق:
باله طويل
أعصابه بالفريزر
كل شاق الحلج من الضحك علي التعليقات
يسمع من إهني و يطلع من هناك
لي تعدو خصوصيته و طريشوا إيميل يكشت فيهم
دايما يدعي الغباء حق إللي ببلغون شفهم بحياته
ما يعاسر
يفهم إن كل التعليقات صحيحه بالنسبه حق إللي كاتبها بس
لا يتعب حاله بالشرح لأن الموضوع دايما ما يسوى بالنهايه
إذا أذوووه وايد يكشت بالبلوق بكبرة و يروح يحجز مساج في سبا تايم
لا يلبح وايد ، لأن ماراح يقدرون و لا راح يفهمون إللي بيكتبه البلوقير
يستانس إذا الناس إفهموه غلط ، معناها ضبط الكذبه و إنه روائي صادق
يتبع سياسه ( إشعلي أنا من الناس و إشعلى الناس مني )
يحط في باله إن الناس كل مبحلقه عيونها و في بالها كلمه ( من صجها هذي تكتب جذي؟ ).
يدري إن الناس إتظهول و إتسوي النون و ما يعلمون لأنا من بيئات مختلفه
لازم يعرف إن أكو فئه إذا ما قدرت إتسوي فإنها إتهد و إتدقر
لازم يعرف إن الناس إللي فاضيه و ما عندها شغل وايد
لازم إتعرف إن لك حياة ثانيه غير البلوق
لازم إتعرف إن البلوق بيتك و مكانك و إللي تبي إتسوي فيه سو و إللي مو عاجبه ما يشوف شر و لا إتضع وقت بتربيته
إللي بيحكم علي شخصيتي وتربيتي و ثقافتي من بلوقي الصراحه ما عنده سالفه
و أخيرا و ليس آخرا
إحنا كويتيين ، لي إيدنا تدخلت بشغله للأسف خربناها
و إللي علي راسه بطحه يحسس عليها
و البقاء للصبور و ليس الأصلح
بدأت أحبك فعلا
قالها لي
و في قلبي ألم وفرحه
كيف لي أن أواجه كلماتك تلك
صداقه قديمه
بموقف جديد
أثبتَ لعقلي أنك ((رَجُلي))
تسمعني إياها
تؤكدها علي سمعي
((بدأت أحبك فعلا))
بدأت أتذكر أيامنا
وكيف أني لم أنتبه لك
كنت إختيارك
وكان قرارك دايما
فرضت نفسك
وتربعت علي عرشي
أصقلت عقلي ببطئ
تقرأ لي كلمات أعجبتك
مقالاتٌ تشٌد عقلك
تشركني بأفراحك
لا تظهر لي أحزانك
أحببتك بلا وعي مني
بلا مسؤليه
وبلا عقل
لأنك ببساطه
لا تترك مجال للعقل بالتفكير
قريت مقاله عن العماله باليابان و كيفيه التدرج الوظيفي و قانون التقاعد
الشي إللي شدني أهوا:
العامل معاشه أكثر من الإداري
( ما شاء الله مثلنا بالضبط)
يعني واحد مهندس يشتغل في معمل و يكرف ياخذ مثلا 3 آلاف دينار
و مديره إللي فوق قاعد مرتاح على المكتب ياخذ 1500 دينار.
قانون التقاعد حق المهندس مثلا
سنوات الخدمة 30 سنه مثلا و الإداري 40 سنه
بند المكافآة :
كل ما إرتفع السلم الوظيفي كل ما قلت المكافئه
( لا إله إلا الله نفسنا بالضبط – المسؤول عندنا علي توقيعه الكريم ياخذ 20 ألف و الموظف إللي يكرف ياخذ 300 )
الزواج مشكله هالأيام من كثرة المشاكل الماديه و التعصب الفكري بين الرجل و المرأه ، كل من له شخصيته و كل من له رايه بالهدنيا .
قاعدين ويا جماعه أصحابنا ، زوج وزوجته و بنتين علي ويه زواج .
الزوج نص كويتي و نص أجنبي
الزوجه بنت خالته و أجنبيه بس صارت كويتيه
الزوج عمره بنهايه الأربعين ، بس ماشاء الله عليه قمه بالتفائل ، له أسلوب بالحياة غريب و عجيب ، من أقعد وياهم أكره عمري تالييي
ههههههههههه
الله يهني على هالتفاؤل
( بيني و بينكم قتله عن سالفه القاري بالكويت – تدرون شنو رد عليي؟؟ - قاللي تبين إتسوقين قاري بهلجلحه و بين إللي يسوي و إللي ما يسوي بين صبيان و عمال؟؟ لا أنا ما أرضي عليج ! لا يبا أوعدج إتتين عندنا و أنا إللي أشتريلج القاري و أخليج إتمشين بين الورد و الحدايق إنتي و زوجج و عيالج )فا إقتنعت مابي قاري خلاص يسوه النطرة .
أرجع لموضوعي
قاعدين إنتكلم عن السن المناسب للزواج و قعد يسألنا إشلون زوجي و أنا تزوجنا بسن صغير نوعا ما و سنا كان 22 سنه .
علي جنب خذتني زوجته و قعدت إتقوللي عن واحد متقدم حق بنتها و إن البنت إتحب هالولد .
لييش أقول ولد؟ لأن عمرة 25 سنه
و الأبو رافض إن بنت من بناته تاخذ ريال أقل من سن الثلاثين ، و المشكله الحين الأبو معند علي هالسالفه؟
قلت حق الأم ترا أبوها عنده وجهة نظر ، ما إتشوفين الكويت هالأيام الطلاق سهل
الشباب مو نفس أول يتحملون المسؤوليه .
سن الثلاثين في ميزة يمكن ما إتلاقينها عند إللي أصغر ( و هذا مو تعميم و لكن من وجهة نظري )
شاب الثلاثين يعي تماما علي أي قرار يقوله و يكون ملتزم في ، و بنفس الوقت متحمل نتيجه هالقرار ، و حتي بينه و بين نفسه ما يدور في باله أفكار يمكن الزوجه لو تدري عنها راح تنحاش من بيتها.
جيل الشباب قام يعاني من وقت فراغ بسبب إنشغال الزوجه عنه ، فأصبح منهم نوعين :
الدين و إللي يخاف ربه : إتلاقي متواجد بالصيف بالبحر و الدواوين و بالشتا إتلاقونهم بالبر
إللي نص و نص : إتلاقيهم يا ويا ربعه بشقق و ما يندري أي نوعيه إتييلهم ، و إلا النادي و إلا الدواوين إللي لا إتودي و لا إتييب
مو معقوله بجابل مرته 24 ساعه/ 7 أيام بالأسبوع.
( عشان إتصدقوني لما أقول ماكو نشاطات مشتركه بين الزوجين بالكويت )
طريقه حياتنا تختلف الريال ما يحب لا مطاعم و لا سوق ، فا وييين بيروح؟؟
نقطه ثانيه أحب أثيرها بهالموضوع.
ليش الرجل ليه صار فوق الثلاثين و لما ألحين ما تزوج يكون قرار زواجه هم صعب؟
الخبرة و المواقف إللي صادفته بالحياة خلته يتصور و يشوف حياته إشبتكون بعد الزواج.
زوجه بيداريها
عيال بأمن مستقبلهم و دراستهم
حياته بروحه و إشلون راح يتغير هالشي بيوم و ليله
الأم و الأبو كلهم بحيرة ، هل يزوج بنته و بعد سنتين يلاقيها عنده؟
الريال زين و من عايله محترمة و البنت إتحبه
بس عيبه إن صغير بالسن بالنسبه حق الأبو
بيني و بينكم ، أنا إشوي تعاطفت و يا الأبو يوم قال إن الريال في هالسن يدوب قاعد يبني حياته و بيكون لاهي بمستقبله و هذي فرصته لأن سن الشباب ما يتعوض، الشاب مهندس و بشركه خاصه و دق صبح و عصر ، يعني مشغول حده
زائد إن عنده مسؤوليات إتجاه والدته لأن وحيد أمه و أبوه .
ما أدري إشلون أختم هالبوست
بس أنا قمت أأيد زواج الرجل فوق الثلاثين
شعور غريب إييلي من يدخل ( فصل الشتا) ، ودي أسوي وايد ناشاطات خارجيه بس المصيبه في عاداتنا و تقاليدنا.
أحس روحي مقيدة ، لأني بنت ، لأني أم ، لأني كويتيه ! لأني بنت فلان ، لأني زوجه فلان !
لييييش الريال بالسفر يصير إنسان ثاني !
ليش ما إنسوي الأشياء إللي إنحبها بديرتنا بدون خزني و أخزك .
لما أروح الصالحيه بترينق سوووت و ماكو مكياج إشحقه أمه لا إله إلا الله يخزوني من فوق ليه تحت جنه مو عاجبهم؟
بروح أقييييس هدووووووووم !! ليييش أكشخ؟؟ ليييش ألطخ بدله المحل بالحمرة الحمرة؟؟؟
أبي قااااري ( دراجه هوائيه ) ، ميته أسوق قاريييي من عند الممشي إللي يم مارينا مووول
أقول حق زوجي أبي أشتري ، يقوللي وديه الشاليه!
ليييييييييش الشاليه!!!
ليييش أطق درب ساعه عشان أبي أتمشي 30 دقيقه!!
ودي أروح الجمعيه مثل برة أشتري خبز و أرجع!!!
يقوللي لااااااااا ينيتي رسمي عليييييي
L
بطلع ويا زوجي ريوق الصبح ، أفتح الموضوع .
الرد من قبل زوجي العزيز : إنتي من صجج بقوم 9 عشان بطني؟ إكلي أي شي!!
وااااااااااي و ليييش بالسفر إتقويمني الساعه 6 إنتريق؟؟؟
يبا بالسفر جبنتهم غييير و بيضتهم غييير و حليبهم و توستهم غير!
يايلي شعور هالأيام بعدم الإنتماء لهالديرة ، أحس بكبت مقيده بالعادات و التقاليد ، أحس إن مافيها شي نقدر إنسوي بسبه مدارات الناس!!!
وين في شي إنسوه أنا و زوجي ويا بعض و الناس ما تنقد؟؟؟
لا أحب سينما ، الأفلام مقطعه و لاعنين خير القصه و هم قمته مو مال جو حلو برة
المطاعم و القهاوي متنه متنه من البلعه !
و من نقعد ويا ربوعنا و إلا فلان و فلان
بااااااااااااااااااااااس إشعليكم من الناس إنتوا!!!
إللي متحجبه و تبي تلبس ليقننج مشتهيه كيفها!!
و إللي ماسك إيييد مرته كييييييييييييفه !!
و إللي جسمها لوعه و لابسه جينز و مطلعه البلاوي كيفها !!!
شوفوا و إستانسوا !! بالعكس أصلا إمسوين جو بالقعدة
بس لا تتكدرون و يكون شغلكم الشاغل
و تنتقل السالفه بطريقه بايخه
التعليق وقت الشي و بس خلاص إنسوا!!
صرنا بالكويت الحمد الله و الشكر إنفكر بالوناسه برة ، من الكبت إللي عايشينا
و لا إتقولولي إشعلي من الناس ، ما أقدر برستيجي ما يسمح.
ما إتلاحظيون في مقوله متداوله حق إللي يبي يسافر هالأيام؟
أبي ديرة مافيها كويتيين
مع إن برة مو قاعدين إنسوي شي غلط ! بس البساطه مو محصلينها بديرتنه
و المصيبه إللي دايم أتنح عندها ، إن كل الدنيا فاهمه هالموضوع غلط
إني أبي أسوي شوووو أو إني ببين حق الناس إني متحررة
والله إللي يدخل مخي ويشوف إشلون إن هالأشياء التافه الحمد الله أنا بعيده كل البعد عنها.
بس مثل ما دايما أقول
ماراح أربي خلق الله
يا يتقبلني ، يا ما يشوف شر ، خل يكون همه الناس
