Saturday, September 26, 2009

a place to go pleas !

لما ايلك شعور إنت مو قادر تتأقلم مع الجو العام بالديرة شتسوي؟

بس تبي تهج من أول عطله تصادفك و تحس إن قلبك متعلق برة مو هني

من توصل مطار الكويت يحوشك قامت تتذكر الروتين من البيت لي الأفنيو أو لي أي مطعم بس هذا جدولك !

ثاني يوم ياتلي حساسيه غريبة عجيبة بوهي بسبة الجو !

رحت الأفينيو أمس و إلا مكرفونات طلعوا هوشه حالة طوارئ!

بالمجمعات الناس أشكالها غير

لا احترام إنت وياك ريال و إلا عيال يقل الكلمة و أهوا اللي ماشي لا حيا ولا مستحي!

و ليش شافك معلق البلاكبيري قام يأشرلك يعني أبي ترقيمة البلاكبيري!

اتقول لاتروحون بالويك إند إنزين بالله الديرة اشفيها غير مجمعين ينراح لهم؟

اتروح اتمشي عالبحر تعال شوف الأشكال و القز و طيران و صقال

تقعد بالبيت اتحوشك قمته لأن ما عندك إلا النت اتجابله !

العضلات ما اتحرك

محسوبه عليك الطلعه لأن عندك التزامات وواجبات لازم اتسويها داخل البيت

كوني 35 و شفت كل شي فما عاد تهزني الأشياء المتعارف عليها الحين

نبي شوارع رايئه

أماكن مافيها زحمة

أماكن تكون ريلاكس شوي و مافيها خزني و أخزك

أول ما كنت أأيد منع الإختلاط

والله بس الحين ما نبي هالشباب مال جيل اليوم اللي إييلك المجمع بمايوه مشير!

قاعد يمك و يوزع ضحكات عبط يخلي الطاولات كلها تلتفت عليه من سخافته

والله معطيك ظهره و أشياءه كل طالعة بالسكه! على أبو شاري كالفن كلاين!

و البنات بعد ما خلت بالرياييل عقل داش مجمع كأنك رايح الشاليه من التفسخ!

والمتحجبات اللي قاعدة أتكلم عنهم اللي محسوبين على المتحجبات شي مو صج والله اللي مو متحجبه ما تلبس هاللبس!

والمصيبة ان صاروا أغلبيه!

ليش؟

قمنا ما انروح ننفر من هالأماكن! إذا نبي شي نفضل انروح الساعة 10 الصبح عشان ما أنشوف هالفئه!

تقولولي أتحلطم وايد؟

لا والله الوضع صار فوق ما الواحد يقدر انه يتحمله!

أول أماكن القز والمغازل معروفه و بأيام محدده تبون؟ ترا الوعد يوم الثلاثه بالمطعم لفلاني

الواحد قام ما يدري وين يروح!

عفيه إللي عنده أماكم زينه يطرشلي إياها بالإيميل!

والله من صجي مو قشمرة أماكن نظيفه و فيها ناس بحالها سنعه و ما عندي مانع ما أطلع بالويك إند بس بالنهايه أكو مكان نروح له!

يايلنا الجو الحلو و نبي نستانس بالديرة!

Sunday, September 13, 2009

العيد الأحد إنشاء الله

أعلن مدير ادارة علوم الفلك والفضاء في النادي العلمي الكويتي زيد احمد القطان أن أول أيام عيد الفطر المبارك سيكون يوم الأحد الموافق 20 سبتمبر 2009 القادم "أول شوال" حيث يولد الهلال يوم الجمعة 18 سبتمبر القادم الساعة 21:44 بالتوقيت المحلي وتغرب الشمس في هذا اليوم الساعة 17:23 و بالتالي تستحيل رؤيته لأن مولد القمر بعد غروب الشمس وفي يوم السبت 19 سبتمبر يغرب القمر بعد غروب الشمس بـ 10 دقائق ويكون على ارتفاع درجتين فوق الأفق وقت الغروب وعمره بحدود 20 ساعة و14 دقيقة فالرؤية ممكنة ذلك اليوم وان كانت صعبة لاقترابه من الأفق وقت الغروب بأقل من 5 درجات.وأضاف ، أما الرؤية في باقي دول الخليج فهي كالتالي: في مكة المكرمة يمكث الهلال 17 دقيقة وفي المدينة المنورة 14 دقيقة والرياض 13 دقيقة وفي دبي 12 دقيقة أما في أبو ظبي يمكث 13 دقيقة وفي البحرين 11 دقيقة وقطر 12 دقيقة ومسقط 8 دقائق وفي صنعاء 20 دقيقة وعدن 22 دقيقة مما يجعل الرؤية ممكنة لارتفاع القمر 5 درجات عن الأفق.

عيدكم مبارك

Friday, September 11, 2009

i am addict to farm ville !




من رديت من إجازتي و أنا مجابلتلكم هالنت

الجو حر برة

و بيني و بينكم نفسيتي قامت تتأزم من تشوف أشكال يايه من مادري وين

فشخص الله يفتحها عليه دنيا و آخرة شار علي بشي

قاللي بما إنج نايمة بالنت هاليومين ليش ما تلعبين هاللعبه؟

أنا أشوف الأمة كلها بالفيس بوك عندها مزرعه بس طبعا ما أدري شالطبخه!!!

والله وأدش بالمعمعه!

تشاااااااااااااااااااااااااااااااااااااااااااااااااااااااااااااااااااااااااااااااااااان

أدمنها!

أمبيه مو طبيعيه اللعبه!

أول شي تشغل مخك و تحاول إن الربح يكون أكبر من المصاريف

و هذا اشلون اتحققه إنك تصبر شوي

مو شغل اعيلة بس تبي تلعب و خلاص بعد ساعتين و إلا المحصول خالص و جنيتا!

لأ لأ لأ

الصبر يا جماعه

بس لعبة مو طبيعيه

أهم شي الضحك اللي يصير بعدين بين اللاعبين

( تدز مسج – يالله من مال الله هديه شجرة تفاح عشان أكمل الكوليكشن

لو سمحتوا أبو بقر و صخيلات هدايا أرخص لي ياتلك هديه و لا تدفع لها 300 هههههه)

و طبعا في شارات ملونه اللعبه و هالشارات لازم تيمع 4 ألوان

و كل شارة لها عدد معين من الشروط

جان زرت و نظفت مزارع الجيران لك شارة بيضه

وجااان تبنيت 10 حيوانات تايه لك شارة حمرة

و إذا زينت مزرعتك ب 50 ديكوريشن لك شارة صفرة

يالله جربوها و قولولي رايكم

بس لحد يدعي علي إذا أدمنها

هههههههههههههههههه



Saturday, September 05, 2009

كلام بيني و بين نفسي الجزء الأول - الوزارة

أقوم الساعة 7 و أستعد للدوام و أطلع

8 أطق الكرت و ليتني أطق شي ثاني وياه بالطريج

( لما الحين ما يثقون فينا أو ماكو سيطرة على الموظفين اللي ماعندهم لا ذمة و لا ضمير ) لازم مراسل يشوفك و إنت تطق الكرت و يسجل رقمك

سؤال؟

ليش حاطين لنا كروت و متعبين حالكم و مصاريف دام الموظف يراقب دوامانتا؟

نقعد بالمكتب

الوو بابو جيييب ماي حااار مو مغلي! حااار بس!

تبطل ايميلك و تشوف فيس بوكك و تصبح على الجميع اللي حالهم ردي مثل حالك و ماكو شغل و إذا في شغل فهو مو من ضمن اختصاص القسم و لا مر عليك بحياتك الدراسيه.

و إلا تثاثثيت بالشغل و سويته خذا منك 5 دقايق

الساعة الحين 9 لما الحين ما سويت شي مفيد بحياتك إلا البلعة

تبدي تتمشي شوي بس مليت من الكرسي مرزوع فيه ساعة ريولك تخدرت!

تتمشي؟؟

لا ممنوع التجمعات ولا الدواوين

لازم تقعد بالمكتب تبتكر أشياء و ابداعات ( اللي ماردها بدرج مديرك عشان ما يبي يكتشف إن أثول من سنين الروتين اللي حط نفسه فيه و إنك فطين أزيد منه و يمكن بالمستقبل مديرو الكبير يحبك و يحطك بداله )

الكمبيوتر اللي بالكتب

من 2004 و غير في ناس قبلي كمبيوتراتهم أقدم مني بعد أنا كان عندي واسطه ( انباق ال cbu مالي خلال فترة اجازة الوضع و لهالسبب وفرولي كمبيوتر يديد ( مال الوكيل ) بس الشاشه و الماوس و الكيبورد قديمة مال الكمبيوتر المبيوق – ليش ما تبدلونه؟ لأ لأن مسجل بعهدتج لما انلاقي الكمبيوتر المبيوق يالله نسجل الكل بإسمج)

هالكلام أقولكم إياه و أنا أشتغل بوحدة تابعة لمكتب وكيل ها؟؟؟

يعني المفروض واصلين و كل شي بالتلفون يمشي

خلصنا؟

تجميد الأفراد الكبار يطلع على راسنا إحنا يالموظفين

من بعد مؤتمر كبير شاركنا فيه بسنة 2007

وحياتكم لي يومكم ما مرت علينا ورقه انسويها عليها القيمة إلا ورقه احتياجات عفش أو مستلزمات مكتبيه ( قلم دباسة ...الخ )

استقالة عقليه ذكيه و يؤسفي أقولها بسبب قرار شخصي ( ما أقدر أقول الأسباب ) أدي إلي تعطيل جزء مهم بالوزارة.

( إنشاء الله أشوفك وزير و تنفضهم كلهم والله محد عارف لهم إلا إنت )

مشاكل إداريه أدت إلي :

انشغال الرؤساء بريوق الموظفين لما يروحون الكافتيريا

أنشغال الرؤساء بابتكار لجان عشان يستفيدون منها

قضايا تنرفع عشان والله فلان ما خذا حقه بالوزارة و ما عطوه رئاسة القسم

تحركات سريه و تنقلات و تلاعب على المسميات و فجأه من موظفه لين مراقب اشلون ما تدري لأنها كفء. ( وين التدرج الوظيفي و ليش ما صارت رئيسة قسم بالأول؟ )

المهم بنهاية اليوم ما تدري شنو فعلا سويت عشان تحلل معاشك.

المصيبة الأعظم :

سالفة الحش و تنقل الكلام والإشاعات

و التجسس على الكلام والتنبش من ورانا و إنت ما تدري شالطبخه

طبعا تلاقيها عند ( اشباه الرياييل اللي عندنا بالوزارة )

عبالكم خلصنا؟

تعال شوف نماين البنات اللي تضحك لها ضحكتين حق مسؤولها المباشر و يضبط لها الدوام والتقييم و المرضيات .

غير الرياييل اللي يسون سوالف تضحك حق مسؤلينهم أو يقرا عليه ما أدري والله أو يربيله لحيه نفسه و تلاقيه بكل اجتماع أو لجنه أو زياره أو مهمة رسميه خارج البلاد وياه.

إذا مو عاجبك الوضع وودك تنتقل ، ما تقدر ليش؟

خلاص اكتمل العدد ماكو مكان ولا أكو توسعه يديدة بالوزارة

مكان صارلي فيه من 96 فتحت عيني على البنات و تعودت عليهم مالك خلق تروح و تتعرف على ناس غرب ماتدري من أي بيئات يايه و شنو نفسياتهم عساك اتعابل باليدد اللي يايبينهم و مفروضين عليك فرض!

تتكلم ، يقولون ، صبروا الوضع راح يتحسن

قام يصير من ردي لي أردي

طلعت استقالة و رديت ، نفس الشي بس المسؤولين صايلين يدخنون أزيد و عاقدين النونه و ما يسلمون .

لا جديد

نفسيات الموظفين تعبانه من المسؤولين

التفرقه واضحه وضوح الشمس

والناس السنعة اللي ما يحبون لخشوم و لا لها لسان ضايعين بالطوشه