بس راحت أيام الجو الحلو و القعدات اللي بره
فقلت أعيد أيام بلوقي العزيز و أقولكم قصه
هالسنه صايرة التعيينات عندنا سبيل
من كثر التعيين صار كل 3موظفين بمكتب واحد
أهم من هذا كله الخلطه تغيرت علينا
شلون؟
كنت قاعدة على مكتبي لا لي ولا علي
و إلا أسمع شي يفح يمي؟؟؟
هوا بس مو كلام
إستغربت ، و إلا بنت يديده معينينها تبي مني شغله
نعم اختي؟
( هدووووء ) ما تسمعون إلا هوا
أختي ! ما أسمع شفيج علي حسج!!
( فلم الصوت الناعم)
أختي ترا هم ما أسمع!
وليييييين شسوي بهالموديل اليديد بعد!
المشكله بالموضوع إن الصوت وايد ناعم لدرجة إنت ما تسمع و لا تثبت شتبي تقول
و أهم من هذا كل إنك لما تشوفونها ما تقولون إن صوتها جذي! و بدون الدخول بتفاصيل لبسها المحتشم جدا جدا ( صج محتشم مو طنازة ) ووزنها الحلو جدا جدا ( هذي طنازة )
لو أنا موظف مثلا مو موظفه و أشوف جذي ... شبقول؟؟؟
لو أنا رئيس قسمها:
شلون راح أثق فيها و أسلمها شغل؟؟
إذا بناقشها بنقطه شلون راح تشرحلي؟؟ كل شوي بقولها حسج ما أسمع!
هذي شلون أدش وياها إجتماع؟؟؟
قلنا نعموا الصوت بس مو تسوولي كونفلكت بمخي!؛ و تحسسوني إني صمخه!
