who is the real blogger

يمكن أغلب الربع و يصادف إنهم مدونين بنفس الوقت يتكلمون وايد عن الشخصيات الموجودة بعالم البلوقات ، وطبعا أنا وحدة منهم و لي ربع مدونين نحلل فلان و فلانة سواء بطريقة كتابتها أو طريقة تعليقه عند فلان وفلنتان.

و لكم بعد تحليلاتنا : أغلبها تحليلاتي ، لأني ما أذكر شنو قالوا.

المدونين مثل ما تكلمت أنواع ، من يتكلم لمجرد الكلام

و من يتكلم ليعبر عن شي فاقد إن يتكلم عنه بالصج و أقصد مو لاقي من اللي حوالينه من يفهمه.

والبعض طبعا من له ميول سياسية و دينيه لا نريد الخوض فيها لأن أغلب هذه الشخصيات كانت لها ميول للتحدث بهالمواضيع قبل ظهور البلوقات.

الحين شلون تكشف الجانب الآخر من شخصية أي مدون؟

ساعات تحس هالشخص محترم جدا ببلوقه و ملتزم و ثابت و مو قشمرجي ، وحتي بطريقة رده على التعليقات يتكلم و يرد بكل حذر.

المدون عندي ما أحلل شخصيته من كتاباته

المدون عندي هي شخصيته و رده فعلة تجاه أي موضوع ينكتب بأي مدونه أخري ، وعلى فكرة كل مدون يديد يبدي مثلا يعلق عندي بكثافه و أنا ما أعرفه شخصيا ، أحاول إني أراقب كتاباته و تعليقاته بمدونات صديقه أخري ، عشان نشوف مايته .

و طبعا إتييلك الكارثه ، واااايد يصدمونا أشخاص قمة بالإحترام و تلاقيه مثلا يسب جدام الكل و ما يحشم.

أو بعض التعليقات تعطيك إنطباع إن نحييييس و محتر من طريقة طرحه للأسئلة

أو إن يكون الموضوع وايد قوي و يفشل إن الواحد يعلق عنه تلاقيه أول الموجودين بالكومنت.

( الحين توك تكانه شللي قلبك)

هذا الشي يكششنا وايد

الجزء الثاني و المهم سالفة الإيميلات:

فجأة و بدون مقدمات تييلك نوعين فقط من الرسائل ، يا مدح قوي ، يا سب قوي

و على فكر الأثنين تلاقيهم ما يمونون على .

المدح القوي عندي له دلالة وحده إن يبي يقرب العلاقة، إيميل ثم مسنجر و فجأه يصير صديق من أٌقرب المقربين .

أو إن تنصدم فيه إن يبي يروح لأبعد من صديق بالمسنجر و يتم البلوك و الديليت و تنتهي قصته وياك.

اللي يسب الحين :

تلاقي صج الشخص مستشر و أغلب اللي يطرشون إيميلات ما يكونون مصرحين عن هوياتهم بالبلوقات و مطرشلك إيميل من مكان ثاني، بس لما تاخذ و تعطي بعدين وياهم عشان تبي تعرف ليش هالشر اللي في تجاهك ( و كأن السالفة شخصيه و ماخذ من جيب أبوه ) تلاقيه طبعا ما عنده رد ، يبي يحارش لأن ما تعود أحد إن يجعمه و إلا يفشله أو يرد عليه رد يخليه بيزة ما يسوه ، طبعا ما أسويها مع أي أحد لأن مو شغلي أربي عيال الناس .

الخلاصة :

أغلب المدونين تستطيع تكشفهم من التعليقات

فديروا بالك على كلامكم و المواضيع اللي تعلقون عندها

إبدوها ويا نفسكم

شوفوا شنو المواضيع اللي حبيتوها بينكم و بين نفسكم

راح تلاقون إن فى كل واحد فينا واحد شيطان و زقزمبي

;)