غير صلاتك

إعلان بجريده استوقفتني مفرداته التي تدغدغ المشاعر

" كيف تتلذذ بالصلاة؟ "

أوكي؟؟

صفنت شوي و بديت أقرا شنو اللي مكتوب فى الإعلان بعد:

جمل تحاكي عقول على قدر قليل من الثقافة .

العصر دقيت على الوالدة واللا بتروح المحاضرة

والوالدة اسم الله عليها على علم وافر بأمور الدين

يما ليش بتروحين؟؟

والله مو أحسن من قعدتي بالبيت و تفرفر هالتلفزيون؟؟

صاااجه يما ، و قوليلي بعدين شنو صار.

اليوم الصبح أول ما أصبحت بصوتها

ها يما شصار؟

صج تلذذتي ، حسيتي صلاتج غير؟

أمي: أول شي أنا ماني جاهله و لا وحدة ما أعرف أصلي

ما أضاف شي يديد ، أغلب كلامه تنبيه و تذكير

النقاط الأساسيه : استحضار الروح للصلاة

استشعار الكلام بالآيات

تكلم عن السجود و أثره و أن سر الصلاة تكون بالسجود.

و أن الإذلال هو أعز شي للبني آدم إن يقدمة لرب العالمين

و حذر من الغرور والكبر فى أن نقول أننا خاشعين فى الصلاة

و آخر نقطه تكلم عنها حسن الوقوف بين يدي الله.

الوالدة :

ورانا بعد الصور من الإنترنت

الريال شكله بنغالي ميت بالمسيد و أهوا راكع يا بخت عينه .

ورانا عن النمر رحمته

شلو الله وزع رحمته حتي على الحيوانات

أسلوبه يركز على الجانب الروحي أكثر من االجانب التعبدي بالصلاة

ريما: انزين يما ، وين التلذذ؟؟ ما ياب طاري؟

والدتي: أصلا العنوام غير و اللي قاعد يقوله غير

و بعدين انتي ليش تسإليني مو عادتج يعني؟؟

الريال زين منه مسوي هالمحاظرة مو أحسن من التفرفر ؟؟

ريما: ما قلت شي ، بس بقيت أعرف ، الفضول قاتلني ، العنوان كبير و غريب ، النسب اللي حاطينها 94% تغيرت صلاتهم بعد المحاضرة الأولي، هقيت بقول شي يديد و غير ما هقيت كلها معلومات من النت و أي قارئ بسيط يعرفها، توقعت الحضور من الشباب لصغار

مو ملتحين !

بهالنسبه 94 % شنو الفئات العمريه؟؟

وزع استبيان على 20 ألف مصلي ؟

معقوله كبار وواصلين لسن معين بعدهم ما يعرفون يصلون ويخشعون؟؟

محيرني الموضوع!

بيني و بينكم الوالده آخر شي تقوللي : المحاضرة مو واااااو ، بس هذا الإتجاه الحالي بالدعوة

الوالده طبعا ما تدري اني بكتب بوست في جميع استفساراتي

انتوا شرايكم لما يكون المبالغه الإعلامية بسبب منشتات بالجرايد؟؟

إنشاء الله الله يقدرني و أقدر أحضر المحاضرة اليايه ودي أشوفه بالطبيعه

بالنهايه أنا أقول أهوا ماله ذنب جزاه الله الف خير

اعتراضي على الطريقه التسويقيه المتبعينها وياه

تذكرون لعفاسي شلون بدا و ما بقى قهوة ما قعد فيها و لا شركه اتصالات ما سوقت ؟؟

ما يخليكم تفكرون ليش؟ و اشحقه؟؟

والناس بس كل ما ييه أحد يديد هبوا فييه و صعدوه قبل لا يشوفون شقول؟