in kuwait NOW !

at marina mall NOW


krispy kreme Doughnuts

your baby grow up

اليوم: الأثنين :10 أكتوبر 2006

المكان: منزل والدي الكريم

كان والدي الله يطول لنا بعمره عازم بالبيت صديق قديم و هو الحين قنصل في إحدي الدول، الرجل من أرقي الناس إللي قعدت وياهم و زوجته ماشاء الله من أهدى و أمتع الناس ، وبنته الله يخليها لهم من أرقي البنات لصغار .

ليش بتكلم عن هذي العزيمة بالذات، لاحظت أن العزايم إللي تكون بين عايلتين من أمتع الأشياء عندي بالدنيا، لييش أقول هالكلام، لأن الحديث و أسلوب طرح المواضيع يكون جدا راقي و مفيد و بحكم وجود الرجال بينا إحنا يالحريم يكون صوت الحريم واطي، كل وحدة تستمع للثانية عدل، الكبير يسمع لصغير ، الصغير يتعلم من لكبار إللي قاعدين حواليه.

موقف محرج و مضحك بنفس الوقت:

صديق الوالد شكله مو كبير وايد و ما سألت جم عمرة بس أكبر ولد عندة كان عمرة 19 سنه، و أصغر بنت عمرها 5 سنين ، دخلت و سلمت علي زوجته وبنته و يوم وصلت حق بوخالد جان يقوللي أبوي ، سلمي علي عمج و القصد من السلام المصافحة باليد، و قمت و صافحته بس إللي تنحت عند كلمة عمج !؛

ما أدري حسيت زوجته إهيا إللي تنحت وياي هاهاهاهاها ، الله يهداه أبوي صج إنه رفيجك بس مو معناته إني أقوله عمي و أنا مرا إشكبري !

ملاحظات علي نفسي جديدة:

دار النقاش و لقيت نفسي لا شعوريا أندمج مع سوالف والدي العزيز و صديقة، ذكرياتهم أول و الحديث من العيار الثقيل، تداركت نفسي و درت ويهي للصوب الثاني و إلا والدتي و أم خالد قاعدين يتكلمون عن الديكور بحكم إن أم خالد كانت نازله بيت جديد ، طبعا يازلي الحديث بحكم إني دخلت دورة تصميم داخلي ، فعندي خلفيه إشويه عن وين أحسن مجلة و من وين الأثاث الزين و نظرية ثيم الألوان و بدي الحديث ينتقل من أمي ليه عندي فا أم خالد إندمجت وياي إشوي، بس الوالدة الله يهداها كل إشوي مقاطعة المرا و لا هذا سعرة مبالغ فيه و هذا يقصون علينا ، و أنا قاعدة أقول بيني و بين نفسي صراع الأجيال و أمي مو معترفة برايي إني كبرت و قمت أفهم.

البنت حبيبة أبوها:

بعد ما طلعوا الضيوف ، قعت ويا الوالد و أسولف وياه سوالف بعيدة كل البعد عن سوالف مجتمعنا المريض، فتكون قعدتي وياه من أمتع القعدات عندي بالدنيا، و دايما يسألني ها إشلون موقعج إللي تكتبين فيه و شنو آخر مواضيعج، وطبعا أبوي ما يعرف بلوقي و إستسمحته العذر إني أغبي عنه ، عشان آخذ راحتي بالكتابة و المواضيع المطروحه في.

أمي راحت بدلت و إنزلت تحت و أول ما إقعدت بطلت التلفزيون طولت علي الصوت !

أقولها يما بلييييز ممكن إتقصرينه إشوي قاعدة أكلم أبوي، تقوللي قومي قعدي يم أبوج أنا بتابع المسلسل ، و فعلا قعدت يم أبوي.

أبوي من النوع إللي إذا كنت موجودة و زايرتهم يعطيني كل إهتمامه و يحسسني إني فعلا كبرت و لي وضعي لأن يدري إشكثر أحب إللي أسولف وياه يكون مو مشغول إلا بسالفتي، المهم أندمج ويا الوالد بالسوالف و فجئة بدون مقدمات أمي كل ساعة بين فاصل الدعايات تقطع الحوار بسالفة ممثله و الله يهداهم ليييش يحطون برمضان جذيه و ليه هذا الدور مو لايق علي الممثلة، و إحنا طبعا فعلا إنكون مو وياها بس نسمع و نسكت لما إتخلص.

نرجع إنكمل الحوار و أقوم أقول حق أبوي يبا يوعان تبي تاكل شي؟

طبعا كل الأكل إللي أمي حطته حق الناس ما ذقت منه إلا قلاسين ماي و قهوة تركية عشان أقدر أتسحر عدل، لأني لو بخربط بتروح علي وجبة السحور و عندي إهيا من أمتع الوجبات إللي آكلها برمضان.

أمي : وااااي ريما بسج كل ساعة تتكلمين عن الأكل، والله بطنج بيحوشه شي من كثر ما تاكلين من برة، ما جني أمج ، أنا ما أواطن أكل برة و كل دهن و مو مفيد كلش.

ريما: يما لازم أتعرفين شغلة أساسية فيني ، أنا التغيير جزء أساسي بحياتي و الأكل مو مهم عندي يكون صحي و إلا نظيف وايد و أدري إن المطاعم كلها وسخة، بس شسوي متعتي بالمطعم.

قمت و دقيت تليفون علي زوجي كان معزوم علي سحور و إلا أشوه مو ماكل ، حبيبي بعد عمري فييييك الشراتون؟

يالله أنا مشتهي القوزي من زمان و مرقة البامية مالتهم، إنتي وينج؟

أنا في بيت أهلي ألحين أيي البيت و إنروح ويا بعض.

أمي : راسج يابس ماكو فايدة و طول عمرج ما تسمعين كلامي .

ريما : يما ليييش؟

أمي: في مرا سنعة إتطلع ريلها من البيت الساعة 12 عشان إتروح تاكل هالحزة!؛

ريما: واااي يما إرمضان عادي! و الشراتون يسكر الساعة 2:30 باليل

أمي: و إنتي ما وراج عيال و دوام طالعة هالحزة،

ريما : يما والله صدقيني لو زوجي ماله خلق جان قاللي مالي خلق عادي

أمي: والله ريلج حليييو ، لو مو حلييييو جان ما وداج حق بطنج الساعة 12

ريما: ( وللييييييييييييييييين – أبي أبوووووييييي )

أبوي: إشفيييج أم محمد الله يهديييج خليهم علي راحتهم

أمي: إشقلت أنا الحين بعلمها السنع

ريما: يما والله الريال مشتهي قوزي الشيراتون، والله زوجي لو مو مشتهي جان مالج أمل نطلع هالحزة.

أمي و بعد إقتناع: خلاص خلاص كيفج أنا شعلييي سوي إللي تبينه، خو إنتوا عيال هالوقت ما تبون أحد يقولكم إدنو علي ورا.

ريما: يما أنا صارلي 10 سنين متزوجة الله يهداج أي نصيحة بعد هالعمر و عقب ما فهمت ريلي . يالله عن إذنكم ، لازم أروح تأخر الوقت.

المهم طلعت ورحت الشيراتون و أثنينه كنا كاشخين بحكم إن كل واحد ياي من عزيمة، و يوم رحت الشيراتون حسيييت نفسي جني عروس ، ما أدري ليش ياللي هالشعور، ليييش إني أول مرة أطلع هالحزة برمضان من سنين، رجنا البيت بالثنتين بالليل، و أنا هالحزة كل أكون نايمة أو علي وشك أني أنام.

حلو التغييير و حلو إن أهالينا يقبلون التغيير فينا بعد

إنتقام إمرأة

بقولكم سالفتي ويا الطبخ برمضان، أول ما تزوجت و يايبه اليهدة و كل يوم طبق أسوي و يوم طبقين مالح و شغل عدل ، كانت خالتي ما يعجبها شغلي، مو عشان أكلي مو حلو؟ لأ ، لأنها ما إتحب غير الأكل القديم، هريس ، تشريب ويا رقاق شغل بيت مو ما ل جمعيات،المهم لمدة 30 يوم تبيني أتعلم صب القفشة لأن عايلتنا الكريمة مشهورين من عمر الدنيا بهالخلطة السرية، وأقولها خالتي، ما أحب أسوي شي لازم أسوي واحد واحد منه، تقوللي كااا أمج أحسن وحدة تطبخ و مهتمه في بيتها و تشتغل و ما بقا كتاب طبخ إنجليزي قبل العربي عندها بالمكتبة.

أقولها خالتي أمي غير و أنا غير، أنا زوجي ما يحب إلا الحلو إللي داخل فيه سارالي كيك ، والأكلة لازم يكون فيها سوس و الباستا أكلته المفضلة، فكل مرا علي إللي يحبه ريلها.

تقولي، إيييه و أمه ماله خاطر عندج إتسويلي قرص عقيلي وإلا بلاليط وبيض وإلا محمر و إلا كريم كراميل،و إلا الكيكة إللي فيها هيل إللي أمج إطرشلي إياه حق القموس ويا الشاي حليب.

أقولها خالتي والله ما أستطعم هالأكلات من جذيه ما راح أعرف أطبخهم.

تقول ، أشووووف إتسويين ستيكات و باستات و لا يبقي كريمة حمرة ما إتحطين ، إسمالله عليييه ولييدي زاد وزنه من أول ما خذاج.

بقلبي ( لا حول ولا قوة إلا بالله ، شسوي ألحين ).

فقررت أطبخ ، و أصريييت أطبخ إللي يحبه ريلي حبيبي.

كل يوم في الثلاثين يوم بالشهر الفضيل تعليقات من نوعين، زوجي و حماي يصعدون أكلي فووووووووووووووووق السما و يا حلوة و يا زينة.

وخالتي الله يهاداها إتبط فيني بالقاع ، هذا ما ينإكل و ثقيييل و أحد ياكل هالأكل برمضان.

الحلو و ما أدراك ما الحلو، شنو هالأكل، و لييييش مو حلو كويتي، غريبة و إلا بلح الشام و إلا لقيمات.

هالكلام من 5 سنين، و قررت إني أطبخ بسكات حق ريلي بس ، عشان ما ينكسر خاطري ، وصية أبوي دايما حق ريلي ( حتي إذا الأكل مو حلو قووول حلو عشان إتشجع و تدخل المطبخ مرة ثانية، و إنت من وراها إمسحلك خبزة و يا جبن و إكل- هههههههههههه )

الزبدة:

بعد إنقطاع دام 5 سنين أعود بإنتقام بأكلة الله يعافيها كيتي حاطة لنا الوصفة، لييييش بنتقم؟ لأن لمدة 5 سنين قمت أسمع إني مو سنعة عشان ما أطبخ برمضان.

إشسويييييت؟

شريت 12 مارس و 2 سارالي و 2 قيمر و بدت خطة الإنتقام لأن هالحلو راح ينزل تحت، طلعت خروجية من الدوام عشان يمديني أسويييه و أنام بعدها.

الساعة 5:30 و الحلو نزل تحت ، تفطرنا و صلينا و وصل دور الحلو، جان أقوووم أقرف حق نفسي و أجابل القهوة التركية و أهيييييييم كما يهيم العاشق لمحبوبته.

في حلقة مفقودة، منو إللي مسوي الحلو، و أنا عمك أصمخ جنه مو لي، هااااو من ماعونة، ( كنت بسمع التعليق ) و فجئة تم الهجوم علي طبقي، يا حلوة بس ثقيل و ياكلوون ، ناطع بس يبيلة قلاااااس جاي بدون شكر يمحر، يييه دوووري وااااي يا حلوة جنة مال شوكولات بار ، يبيلة كاباتشينو.

يا أخي هالخدام ما يعرفون يسألون من ماعونة هذا !

خالتي؟ هذا ماعوني و هذا شغلي إشرايج فيييه؟

و أنا قشيانة من داخلي لأني سمعت كل التعليقات و بدون مجاملات المدح قبل الذم و هذا حدة أثلج صدري، عقب ما خلصنا جان أنادي اليهال ياكلونه لأن متعتهم الكاكاو.

أخليكم ويا الطبق ، صورته لكم، و الله يعيني علي تعليق إختي لوييير لأنها لاحظت شي فيني، ويوم صورت الصورة إتضحت الرؤيه ألا وهي، إن معاعيييني كلهم بيييييض و لازم الأزرق داخل فيهم .

مو عشان يمشي و يا ثييييم بلوقي

إعجاز القرآن الكريم

معلومة وقفت عندها، و جعلتني أتمعن كيف أن القرآن الكريم نستطيع أن نستخدمه كحجة لمن يقول أن القرآن الكريم قد جمع العلوم و الأديان جميعا، فلم يأتي بجديد .

سمعت هذه القصة أن مستشرق أراد أن يشكك بإعجاز القرآن الكريم، فكان الرد من عالم الدين كالآتي:

رسالة الرسول أستمرت 23 عام ، فكيف لأبن البادية أن يجمع كل هذه العلوم في مدة زمنية قصيرة ، فنجد أن القرآن جمع علوم الفيزياء والأحياء، علوم الشرع، العلوم الإنسانية،فن التعامل مع البشر ، التربية، الأخلاق.

فكيف لبني آدم أن يأتي بكل هذه العلوم و يجمعها بفن و بلاغة و بتسلسل.إن لم تكن وحي من الله سبحانه وتعالي.

الحمد الله أننا مسلمين

from my e-life

ودي أقولكم سالفة و أبي رايكم فيها ، عندي صديق صدوق بالنت من عمر أنا وياه، مشكلته وياي إن أهوا كبر و قام يستتفه إللي قاعدة أسويه بالنت، إسمالله عليه كبر و صار دكتور فما أشوفه بالنت من كثر مشاغلة بالمستشفي.

هالأيام مسافر في دراسة تخصص من التخصصات النادر وجودها بالكويت و بحكم وجودة بمكان بعيد و فرق التوقيت فقمت أشوفة بالنت وايد .

ماكان يدخل البلوق و يقرا بحكم وقته، بس هالأيام قاعدلي قعدة و قام ينبش في بوستاتي القديمة، أمس صار لي موقف وياه يقووول

إنتي ليه متي أخبارج كلها بالنت، لييه متي بتضلين تكتبين عن يومياتج إللي ماله داعي الناس إتعرف عنها؟

طبعا ما حبيت أناقشه لأنه أهوا مو بلوقير و أهوا حريص علي وضعة ومتحفظ إشوي.

إللي بفهمه و يمكن أكون أنا غافلة عنه، صج كتاباتي بالنت إتحسووون إن ماله داعي تنكتب؟؟، مع إني ما أشوف إنا ما فيها أي شي و فكرة البلوق ما هي إلا مذكرات الكترونيه تعكس روح صاحب البلوق، أفكارة و قراءاته و طرحه، أو بعض المواقف إللي صارتله.

لما دخلت في هالعالم حسيييت إني تعرفت علي خوات و أخوان أتشرف بمعرفتهم وايد من خلال تعليقاتهم، والله ما أقص عليكم إني أحبهم من كل قلبي وودي أزور و أعلق و أضحك و أضغط فلان و أطفر فلان ، و أتهاوش ويا فلان و أييببب ويا فلانه .

البراءة وييينها ، و ليييش الناس تنظر لهالنوعية من الكتابات على إنها فضايح و تطفل منا إحنا البلوقرز علي حياة الناس الثانية.

لو الشخص ما يبي يقول شي جان ما إنشره، و أدري في وايد ناس يعرفوني ، بس والله ما همني لأن الأشخاص إتروح و تيييي و يبقي روحك بالبلوق.

أنا وحدة ما أحب أتشيحط و أقول قريت هالكتاب و ناقشت فلان بهالموضوع الجاد أو بتكلم بمواضيع دسمة بالبلوق، لأني علي قناعة إنا المواضيع السياسية والجادة حيل ما إتأثر وايد بسبب إن إحنا مو أصحاب القرار فيها.فا يا كلامك يأثر ، يا دورلك شي ثاني تقوله. كلام و فعل مثل ما سووها أصحاب نبيها خمسة .

فكان توج الكتابة عندي عن الوقفات إللي إتصادفنا بالحياة و قد تكون هالنوعية من المواقف مارة علي وايد ناس، ويمكن ما مرت و يخزنها الواحد و يعمل لها حساب تالي.

لما أتكلم عن الزواج أو العلاقات الإنسانية بين الأفراد ، فهالشي قريب من وايد ناس، ويحسس بقرب العلاقة بين كتاباتي و بين القارئ لصفحتي.

أتمني إني بينت وجهة نظري والهدف إللي عشانة أنا لما ألحين مستمرة، لأني صج و أكررها ، أحب كل من يزورني و يقرا و يعلق من قلب .

أضحك من قلبي و قاعد يعطيني دافع إنني أدور المواضيع البسيطة و إللي إتمس الناس، لأنا بهالمجتمع الكويتي ، صار الواحد ماله خلق يسمع أو يشارك .

فأعتبر البلوق مرآه لمجموعة ناضجة تقرا و إتناقش

الله يعطيكم الصحة والعافية يا رب

و أشكر الدكتور لأنه ألهمني بكتابة موضوعي

a story of a ring

فكرة القصة حقيقية وصاحبها أراد إنا إنوصل قصته للناس وطبعا مع الإحتفاظ بسرية بطل القصة ، فأحب أشكرك أولا لأعطائنا الثقة للدخول بحياتك و أحب أشكر أختي قبل لا تكون صديقتي لوير علي إجتماعها القمة وياي لمناقشة أحداث القصة ومن ثم صياغة أحداثها.

و أرجو أن تستمتعوا بالقراء كما أستمتعت بأحداثها.

القصة:

في ثاني يوم رمضان

كالعاده انا و امي و خواتي الي اصغر مني

نروح نبارك للاهل ..متنقلين من بيت لي بيت من منطقه لي منطقه

و تحديدا في شارع دمشق

لمحته داخل الروضه ورانا

انا كملت سيدا و اهو اخذ فوق وتحت و دخل صوب شارع جمال عبدالناصر

وقتها كان يدق قلبي وايد

تعكر مزاجي

تغيرت ملامحي

باركنا حق خاله امي

و طلعنا من الروضه لي العديليه

و تحديدا عند الدخله الي يم نادي كاظمه!!

اصادفته مرا ثانيه في نفس اليوم!!

يا ما اشوووووفك يا اشوفك مرتين في اليوم

اهو شافني

عطاني نظرا و كمل

يومها كله و انا افكر فيه

و افكر في نفسي اكثر و الي قاعد يصير فيني من بعده

خلوني احطكم في الصوره أول

عشان تكونون مركزين وياي

انا بنت عمري 24 سنه

اشتغل

اكبر خواتي

امي وكيله

و ابوي دكتور

ابوي من فصيله الناس الي يسمونهم الورك هوليك

يعني مدمن ابحاث

سفر

مؤتمرات

البيت كله و التربيه على امي

كل شي امي تقرر

لبسنا اكلنا

مدارسنا

حياتنا

تخصصنا

كل شي امي

و بما اني ربيت و كبرت و شفت امي اهي الكل في الكل و علمتني

على الاعتماد على النفس في كل شي

سافرت في بعثه خارج البلد

درست في بريطانيا

سنتين و رجعت كملت في الكويت

انا بنفسي قررت

محد قرر عني

باختصار انا بنت مستقله بكل شي

تعرفت على شاب

اكبر مني

عمره 30 سنه

خوش ريال

محترم

خلوق

كل شي مبهر في البدايه

تصرفاته

و رجولته

الي كنت فاقدتها في بيتنا

غيرته الي اول مرا اشعر فيها

و كانت وايد حلوه

تعرفنا على بعض بهدف الزواج

و تقدرون تقولون كنا مخطوبين لبعض لمده خمس شهور

شفت فيها وايد شغلات حلوه و يديده معاه

الشي اليديد هو ان الرجل رجل

يعني اهو من بيئه موجود فيها الرجل بمكانه الطبيعي

اما انا العكس

بس ماكنت احس ان احنا فيناشي غلط لاني كنت اظن ان احنا طبيعين

في البدايه

كان يتصل علي يسألني

وينج اقوله طالعه ويا رفيجاتي

يدق علي يسألني وينج بعدها

اقوله بدش سينما او يمكن اروح انام في بيت رفيجتي انتيمع هناك

كان يقولي دقيتي على ابوج قلتيله ؟؟

اقوووووله لألألأ

يقولي ليش.؟؟

اقوله لان عمري ما قلت حق ابوي !!

انا الحين بقولكم المواقف و انتو شوفوا

مرا من المرات اتصل علي

قالي انتي وينج قلت له انا ويا الصباغين اعلمهم

اشلون يخلطون الالوان الي ابيها !!

يرد علي !!؟؟

شنووووووو صباغين

انتي قاعده ويا الرياييل !!

ارد عليه ايه انا قاعده ويا الصباغين

يقولي وين ابوج اقوله ابوي مسافر

يسألني و ليش ادخلون ريايل بيتكم و ابوج مو موجود!!

موقف ثاني

يتهاوش وياي فيه ليش بودي سيارتي الوكاله و ليش ما احد من الرياييل يوديها

و اشلون ادش كراجات شويخ !!

و كان دايم يبي يصر علي بانه يغير من تصرفاتي

مع انه غلط من وجهه نظري

لانه ما كلف نفسه يفكر اختلاف بيئتي و بيئته

و اذا انا بمشي على مزاجه منو الي بودي سيارتي

او من عندي يجابل الصباغين

او

او

او

من وين بييب ريال يقوم بواجبات و دور الرجل

يعني على منو اتكل !!

و كنت دايما ايي على نفسي علشان ارضيه

مع الايام

صرت اتغير شوي شوي

مو عشان انا ابي اتغير

لكن عشان مشروووع الزواج ما ابيه يطير

و لاني بديت احبه

بعد فتره خمس شهور من تمثيل دور الفتاه المطيعه

حسيت اني بنفجر

فعلا بنفجر

لان بدا يحبني

بس مو انا

بدا يحب البنت الي تسمع

و تطيع

و هذي مو انا

هذي بنت انا مثلتها

و انا ما اقدر اكون اهي

لاني بتعب وايد

اتصلت عليه و صارحته

و انفجرت بكاءا

و قلت له ترا ما اقدر اقص عليك اكثر

انا زينه و كل شي

بس انت وايد شخصيتك قويه

تبي كل شي بكيفيك

و تبي تمشي كل شي مثل ما انت تبي

لكن انا ما اقدر اكون خاضعه لك

ما تعلمت اني اتلقى اوامر من احد

و ما تعلمت و تعودت اني اكون مطيعه

و اني اطمس شخصيتي

او امسحها

عشان اعجبك

لاني انا انا

مو انا لك انت !!

هذي قصتي باختصار

و بخليكم ويا عبدالله الحين

سمعوا منه

القصه

يعني سمعوا القصه من الطرف الثاني

عبدالله :

في ثاني يوم رمضان

لمحت سيارتها و اهي طالعه من الفيحا

لين الروضه

نفس السياره

و نفس الارقام

و نفس طريقتها

تطق اشاره من قبل اللفه ب 200 متر

لمحتها

و تذكرت جذبها علي

و تعوذت من بليس

لاني كلش ما ابي اتنكد

تو الناس وراي جم ديوانيه

طلعت من الروضه

و انا بدش العديليه من عند شارع دمشق

شفتها

كانت متغيره

يمكن محلوه !!

اي عادي عشان رمضان

بس ماله داعي هالمكياج

لو انا لي الحين وياها

جان ما خليتها تطلع جذي

المهم

يمكن سمعتوا منها الي صار

لكن السالفه وايد غير

من وجهه نظري

انا ريال حسيت ان ما بني على باطل فهو باطل

اهي جذبت علي مره

يمكن تجذب علي 100 مرا

و اهي الحين قاعد تحاول اتدخل ناس بينا

عشان اترد

لكن مستحيل ارد لها

مو عشان اهي اتحسسني اني غبي و قصت علي

لألألألأ

انا عاذرها

لكن عشان اهي الحين حبتني ولهانه علي

الحين اهي تبي تخضع لكل شروطي

عشان اقعدت ويا نفسها و فكرت

و طارت منها فكره الزواج و عقب فتره حست لي الحين مايياها الي نفس مواصفاتها

ولانها اتحبني

فقالت ارد و امري لله!!

لكن انا مستحيل اوافق

تدرون ليش

لانها الحين اهي في حاله يأس

باجر اذا تمكنت

بترد علي نفس سالفه

اني انفجرت من شخصيتك و بترد

لطبيعتها

انا ريال

طبيعي

فيني غيره

شخصيتي قويه

ما احب اللف و الدوران

احب كل شي يمشي حسب الاصول

احنا لنا دين

لنا عادات و تقاليد

الصح صح و الغلط غلط

ماعندي شي اسمه تمدن و خرابيط

مو من حقي و انا رجل اني امسك زمام امور بيتي واقرر شلون حياتي بالمستقبل تكون

من وجهه نظري البسيطه

ربانين في السفينه يغرقها!

و انا ما ابي ابني بيت على اساس مهدود

مادري بس انتو اشرايكم

؟؟

هل اعطيها فرصه ؟؟

او هل شخصيه الرجل القويه صارت عيب في هالزمن؟؟

story of a friend

أمس كانت عندي يمعة من اليمعات سمعت خبر حلو عن زواج إحدي صديقاتي البعاد، و طبعا كعادتنا تم فتح باب التشره لييش إن جهازي مغلق و بينت الأسباب إني ما كنت موجودة بالديرة في هذيك الفترة

و إللي أهم من هذا كله إني فرحت لها وايد وايد.

سألت السؤال المعتاد : من خذيتي؟
صديقي : أخذت واحد إتعرفينة .
ريما : أنا ! إشلوون و منو؟ شنو يصيرلي؟
صديقتي: لا ما يصيرلج بس يعرفج عدل بالجامعة، ويوم قتله بنروح يمعة صاحباتي و من بينهم فلانة لفلانية جان يقوول إيييي أعرفها عدل .
ريما : واااي منو قووولي
صديقتي : فلان لفلاني
ريما ( فلاش باك) : حلفييييييييييي ، صصصصصصصصصصصصصج
صديقتي: ما قلتلج إنج إتعرفينه
ريما وبحاول أتدارك الموقف : إيييي إييي وياي 4 سنين وبنفس التخصص ، بس ترا ماصار أي كلام ولا إحتكاك مباشر وياه ، مجرد إني أعرف شكله و إسمه .
وبيني و بينج شكله مميز.
صديقتي: إإإيييي قاللي نفس الشي عنج و كنتي من البنات الصعبين
ريما: شنوووو! صعبة! إشيقصد !
( لاحظوا قاعدة أحاتي عمري بأثر رجعي ، ههههههه )
صديقتي: ما يقصد شي ، بس يقول كنتي شاطرة و ماكان همج الشباب وفلان وعلان
ريما: إييييي أشوة ، ما قصر والله
( قاعدة أقول بقلبي – وااااي كان ريلها عينة زايغة الله يعينها عليه ، من الناس إللي كل بالصالحية أول و جم مرة أصادفه و لما الحين بالقهاوي )
صديقتي: إشفيييج وييين سرحتي
ريما: ما سرحت ، بس مو جنه كان متزوج من فلانة لفلانيه.
صديقتي: إيييي كان متزوج عدل كلامج ، طلق مرته، بس إشدراج
ريما: ما أدري والله بس سمعت ما أدري ما أذكر التفاصيل
( حسيت إني لا شعوريا تليقفت – بس البنت صديقتي إتينن! ما أدري من وين الله طيحها في و بسرعة بسرعة خذته – أهوا حرام ما شفت منه شي مباشر أو موقف – يمكن كنا ظالمينه – بس مشكلتي ماني قادرة أذكر الموقف إللي وياه – بس أذكر إن حاول وحاول بس ماكو فايدة فيني – ل-هالسبب ماني قادرة أنسي خشته )

طبعا مدحته جدامها و قتلها ديري بالج عليه و إنتي في بداية حياتج و أدري إن شخصيتها جدا قويه و البنت مو صغيرة ، أقصد صديقتي .

بس ما أدري قلبي مو مرتاح ، بس إنشاء الله ربي يهدي سرهم ، و يكون الريال عقل و هدفه الإستقرار .

السؤال؟
يا أخي ليش تفضح عمرك و أعرفها و يبين حق مرته إن أهوا كان وااااااااو بالجامعة؟

طبعا أنا ما دخلت بتفاصيل الحوار بيني و بينها، كان موجز ، بس والله صج
ليييش الريال يحب يبين حق مرته إن ترا أهوا له جمهور وكانوا البنات ركضه وراه.

كذا واحد سمعته يقول هالكلام حق مرته ، و أول واحد كان يقوللي هالكلام زوجي ،و كنت أدري إنه واااو لمواصفات معينه ، أغلبها ماديه أكثر من إنها ثقافيه.

هل يبي إن مرته تكون ستاند باي دايما و إتحس إن الريال مو دايم لها.

المقارنه بين الزوجة وباجي الحريم ، ماني عارفة السبب من وراها .

من وجهت نظري المقارنه إتحر و إتزعزع الثقة ، ويبيلها مواصفات بنت وبداخلها ريال عشان إتعدي من هالمرحلة الصعبة.

وقصدي مرحلة المقارنات في بداية كل زواج