Thursday, December 21, 2006

قناعة أب





الزواج مشكله هالأيام من كثرة المشاكل الماديه و التعصب الفكري بين الرجل و المرأه ، كل من له شخصيته و كل من له رايه بالهدنيا .

قاعدين ويا جماعه أصحابنا ، زوج وزوجته و بنتين علي ويه زواج .

الزوج نص كويتي و نص أجنبي

الزوجه بنت خالته و أجنبيه بس صارت كويتيه

الزوج عمره بنهايه الأربعين ، بس ماشاء الله عليه قمه بالتفائل ، له أسلوب بالحياة غريب و عجيب ، من أقعد وياهم أكره عمري تالييي

ههههههههههه

الله يهني على هالتفاؤل

( بيني و بينكم قتله عن سالفه القاري بالكويت – تدرون شنو رد عليي؟؟ - قاللي تبين إتسوقين قاري بهلجلحه و بين إللي يسوي و إللي ما يسوي بين صبيان و عمال؟؟ لا أنا ما أرضي عليج ! لا يبا أوعدج إتتين عندنا و أنا إللي أشتريلج القاري و أخليج إتمشين بين الورد و الحدايق إنتي و زوجج و عيالج )فا إقتنعت مابي قاري خلاص يسوه النطرة .

أرجع لموضوعي

قاعدين إنتكلم عن السن المناسب للزواج و قعد يسألنا إشلون زوجي و أنا تزوجنا بسن صغير نوعا ما و سنا كان 22 سنه .

علي جنب خذتني زوجته و قعدت إتقوللي عن واحد متقدم حق بنتها و إن البنت إتحب هالولد .

لييش أقول ولد؟ لأن عمرة 25 سنه

و الأبو رافض إن بنت من بناته تاخذ ريال أقل من سن الثلاثين ، و المشكله الحين الأبو معند علي هالسالفه؟

قلت حق الأم ترا أبوها عنده وجهة نظر ، ما إتشوفين الكويت هالأيام الطلاق سهل

الشباب مو نفس أول يتحملون المسؤوليه .

سن الثلاثين في ميزة يمكن ما إتلاقينها عند إللي أصغر ( و هذا مو تعميم و لكن من وجهة نظري )

شاب الثلاثين يعي تماما علي أي قرار يقوله و يكون ملتزم في ، و بنفس الوقت متحمل نتيجه هالقرار ، و حتي بينه و بين نفسه ما يدور في باله أفكار يمكن الزوجه لو تدري عنها راح تنحاش من بيتها.

جيل الشباب قام يعاني من وقت فراغ بسبب إنشغال الزوجه عنه ، فأصبح منهم نوعين :

الدين و إللي يخاف ربه : إتلاقي متواجد بالصيف بالبحر و الدواوين و بالشتا إتلاقونهم بالبر

إللي نص و نص : إتلاقيهم يا ويا ربعه بشقق و ما يندري أي نوعيه إتييلهم ، و إلا النادي و إلا الدواوين إللي لا إتودي و لا إتييب

مو معقوله بجابل مرته 24 ساعه/ 7 أيام بالأسبوع.

( عشان إتصدقوني لما أقول ماكو نشاطات مشتركه بين الزوجين بالكويت )

طريقه حياتنا تختلف الريال ما يحب لا مطاعم و لا سوق ، فا وييين بيروح؟؟

نقطه ثانيه أحب أثيرها بهالموضوع.

ليش الرجل ليه صار فوق الثلاثين و لما ألحين ما تزوج يكون قرار زواجه هم صعب؟

الخبرة و المواقف إللي صادفته بالحياة خلته يتصور و يشوف حياته إشبتكون بعد الزواج.

زوجه بيداريها

عيال بأمن مستقبلهم و دراستهم

حياته بروحه و إشلون راح يتغير هالشي بيوم و ليله

الأم و الأبو كلهم بحيرة ، هل يزوج بنته و بعد سنتين يلاقيها عنده؟

الريال زين و من عايله محترمة و البنت إتحبه

بس عيبه إن صغير بالسن بالنسبه حق الأبو

بيني و بينكم ، أنا إشوي تعاطفت و يا الأبو يوم قال إن الريال في هالسن يدوب قاعد يبني حياته و بيكون لاهي بمستقبله و هذي فرصته لأن سن الشباب ما يتعوض، الشاب مهندس و بشركه خاصه و دق صبح و عصر ، يعني مشغول حده

زائد إن عنده مسؤوليات إتجاه والدته لأن وحيد أمه و أبوه .

ما أدري إشلون أختم هالبوست

بس أنا قمت أأيد زواج الرجل فوق الثلاثين

20 comments:

ikhalifa said...

الصراحة انا مستغرب من الأبو
الريال يبي يتزوج و البنت تبيه
و إذا ما تزوجها بيتزوج غيرها و هو عمره 25

ليش العصلقة؟

يعني إللي عمره 30 بيكون جاهز ، وايد منهم لعبوا بفلوسهم و ما كونوا نفسهم

إذا أخلاقها زينه ، ما يرده

shakshaka said...

walla mo shar6 yaama reyayeeel foog il 35 lakin yitsaraf chena lail7eeen 3omra 20 mayit7amal mas'oooliyat 3umra 3ashan yit7amal masooliyat bait wo zooja wo 3yal wil 3aks sa7ee7 lakin 25 mu sgheer ok yemken mo methel ele makhith khibra akthar bes layyyam jedamah wetha min kalamich ohwa kila mashghool thats why a7es yabee yesteqer yabi yakhith ele e7ebha wo 3ashan 7ata e3yalhum may9eer fe farg baina wo bainhom wayid

بنت الشاميه said...

الموضوع جدا صعب وخصوصا اللي عندها الاولاد
ما هو السن المناسب للزواج)) طبعا ))
هو يعتمد علي شخصية الشاب ودرجة نضوجه .
راي الشخصي لازم الشاب يكون علي ابواب الثلاثين مو اكبر لان كلما كبر صار القرار صعب عليه ولا اصغر من ذلك لان الزواج مسؤلية ويحتاج صبر وسعة صدر
وكذلك عندي عمر الزوجة مهم جدا هالايام لازم تكون 25 وما فوق مو اصغر عشان تعين الزوج في بناء الاسرة وتكون شريك ناضج ومؤثر في الاسرة

KQ8 said...

انا بصراحة أييد الزواج من بوثلاثين

اول شي ان كان عادي بيكون مستقر وقادر على انه يتفح بيته وعركته الحياة شوي

وان كان راعي خرابيط بيكون تقريبا مل وشبع

وبعدين انا ما ابي ادبس بنتي مع صغار السن من طقة 12-22 وبعد جم شهر او جم سنه القاه مل منها وقطها عندي

لا يبا..الليت يتزوج صغير يمل من مرته هاذي المشكله لما يكبر

cozy said...

wallah ya rema el wagt taghayar wel age mo kel shay el mohem el 3agel +el tafkeer sar ghair ya3nee mathalan fee year 1980 kan obo el 30 ghair 3an al7een eb 2007 sar bo el 30 akthar shabab o fee 7ayat o yemken tafa'ol o ham eb nafs el wagt yemken ekoon 3agla esgheer o 3ala goltech men shega lain shega o 3ad al7een 7adeth wala 7araj kel shay sar "3adi" i hate this word etha el banat gamaw ele3boon bedhom weryoolhom fama balech el shabab !? wallah yaster 3ala el jemee3 bs again el age kelesh mo megyas al7een...

لطيف said...

إذا فوت المتقدم الحالي
من يضمن أنه سيأتيك
صاحب المواصفات المطلوبة
إذا راح هذا؟

شنواللي بيخلي
بو ثلاثين أحسن من بو خمس وعشرين؟

أنا شفت في حياتي بوخمسين ما عنده
!!إمكانيات بوعشرين ولا عقله

لا توجد قاعدة عمرية ثابته تستند عليها في قبولك للمتقدم للزواج

المفروض كل حالة تفحص على حدا
يعني لمل يجيك معرس تشوف هل هو أهل ومقنع وحسب ما تقتنع فيه تتخذ القرار

الموضوع يطول الخوض فيه

Purplecious said...

انا اشوف ان العمر مو مقياس

واذا الاب الحين في اواخر الاربعين معناه انه تزوج قبل الثلاثين اذا ماني غلطانه

بعدين احسن انه يكزن مشغول

المرة مهما كان ما تبي ريال يجابلها 24 ساعه



الموضوع الثاني (صعوبة زواج الثلاثيني)ر

برد احط تعليقي السابق على لوير و بما انها ما ردت عليه فبحطه لان نفس الكلام


الريال كل ما كبر كل ما صار اصعب ان يتخذ قرار التغير لان الزواج مثل ما تعرفون خطوة وايد مهمة والانسان بطبيعته يخاف من التغير

يعني واحد صارله 30 أو 35 عايش على نمط حياه معين و مرتاح مو ناقصه شي ليش يغيره؟؟

حتى لو فكر مجرد تفكير انه يتزوج الريال نظرته بعيدة يعني عنده القدرة انه يتوقع شنو ممكن يصير

غير المره اللي تربيتها من و هي صغيرة اهلها حاطين براسها انها مالها الا الزواج و مردج تتزوجين و تسوين اللي تبين مع ريلج

فشي طبيعي تكون البنت مقبلة على فكرة الزواج أكثر من الريال

و المره بطبيعتها تضحي و ما ننسى غريزة الامومة بعد لها دور

ولما البنت تشوف كل رفيجاتها تزوجوا و هي للحين قاعده شعورها مو نفس شعور الريال اللي كل ربعه تزوجوا الريال ما يهمه.. بس اكيد الحين البنت تعتمد على روحها و مو محتاجه احد بس يظل شعور قد يراودها من فترة لفترة

الريال لما يسمع سوالف المتزوجين و البلاوي و المشاكل اللي تصير أكيد بكون عنده ردة فعل و هي الاضراب عن الزواج

و اتوقع اللي قرر الزواج بعمر متأخر مو معناه انه اقتنع بالفكرة .. ولكن يخاف يكبر و محد يرضى فيه أو انه يبي عيال يشيلون اسمه

وبالنهايه المسأله نسبيه و على حسب الريال و البيئه اللي عاش فيها و الربع اللي حوالينه

3ajayeb said...

مع إحترامي لراي أبو البنت أحب اقول :
شنو الفرق بين الريال اللي عمره 25 او 30 سنه ؟
دام إن الريال مخلص دراسته ومتوظف ومقبل بنفسه على الزواج وعلى تحمل المسؤوليه ... شنو اللي يمنع !؟
ياما ناس صغار بأعمارهم ولهم القدره الهائله على تحمل المسؤوليه أحسن من اللي أعمارهم كبيره ....
وبعدين ليش الواحد يخاف من تزويج بناته لواحد عمره 25 سنه ....
في وقتنا هذا قاعدين نسمع عن حالات طلاق تحدث بين أزواج صار لهم أكثر من 25 سنه زواج !!!؟
علموني وين العقل والنضج في حلات الطلاق اللي تصير عقب 25 - 30 سنه زواج ؟
خلهم يتزوجون بسن العشرينات دام إن الريال قادر يتحمل مسؤولية زوجه وأولاد شنو المانع !؟
وبعدين كل ما الواحد كبر بالسن وين تكون عنده طاقه وقوه وحيل على تربية عياله !!؟
لكل قاعده شواذ ... ولكن عمر السن ما كان سبب مانع للزواج خصوصا إن عمر 25 عمر شاب مو صغير أبداً للزواج ...
وبعدين شنو يعني إن الريال لازم يكون جاهز !!!؟ شدعوه الريال شقه وإلا بيت علشان يكون جاهز للسكن .... الزواج مسؤوليه و مشاركه مشاركه مشاركه بكل ما تعني الكلمه من معنى ...الزواج إحترام متبادل بين الزوجين , إحترام لرغبات , إحترام مشاعر , إحترام أهل الطرفين وإذا نبي الحياة
تسمتر لابد من التضحيه ( من الطرفين
ولازم يكون في تنازلات ... من الطرفين ..
وإلا شلون الأوليين عاشوا واستمروا ؟
مع إنهم كانوا يتزوجون في سن وايد صغير
الزواج ما يمشي بالعناد والزواج مو حرب بين إثنين يعني لازم واحد يكون غالب والثاني مغلوب .....

Hassan Q Al Qallaf said...

مرحبا

انا بعتقادي ان المسألة نسبية و تعتمد على الحالات المختلفة عند الناس

يعني اذا الواحد ما استانس اب شبابه ... متى يستانس!!! عيل ليش ليلحين قاعد ((أحاجي نفسي)) مممم

نصيب .. و التوفيج سواء عمر الريال 25 30 35 أهم شي و اللي الكل يتمنونه

nachla said...

عجيبة بوستاتك هالايام !!!!!!
ماني قادرة افهم وين المشكلة
وليش ناس يعرفونك قصتهم في بلوق
تتوقعين انهم حابين ياخذون راي ناس غيرك في مواضيع خاصة جدا
..........................
اذا كان حبهم قوي راح يصمد في وجه الكل ، وراح اييك يوم وتقولين انا كنت غلطانة
............................
هذي علاقة مو مشروع حسابات وعمر ومراحل تربوية

Amal said...

عزيزتي,,
لم يكن العمر يوما مقياسا للنضوج,,

فأحيانا يكون أبن العشرين,,
أنضج من ابن الاربعين!!!

أنما قد تكون قناعة عند الأب,,
ولا أحد ممكن,, يرده عن هذا التفكير,,
ان كان مؤمنا به,,


تحياتي,,

ام الحفيز said...

ريما

حبيبتي الزواج قسمه ونصيب هذه وحده
وطاعت الوالدين واجبه هذه الثانيه
واحساس الوالدين بعيالهم وبالاخطار الي هي مترقبه يحسون فيها بالفطره خصوصا اذا كانوا الوالدين اقراب من عيالهم

فالاب اكيد شايف شي ومو عاجبه بالولد والبنت اشعرة يووووووووفه ما يفرط فيها....فالموضوع كله مو مختص بالاعمار الموضوع هوووو هل دش هالولد قلب والدين البنت لو لا واشلون يدش؟؟
بسمعته وسمعة اهله
تصرفاته
اصدقائه والمثل يقول قل لي من تصادق اقولك من انت
عند كريزماااااه ولا امسبـــــه
وايد اشياء والكتاب ينقرا من عنوانه اغلب الاحيان
وانا اتزوجة وعمري 16 وريلي عمره 33 العمر ماله موقع بالاعراب طالما التجانس الفكري والادبي والاجتماعي وحتى الاقتصادي...يعني محد ماخذ احد على طمع
بعد هالايام بعض الحريم يدورون لبناتهم على ريايل عيال هوامير بس حق البيزات
شنهي شخصيته ثقافته سلك اهله
مو مهم المهم الرصيد اعيوووني

ام الحفيز said...

وبعدين هالبنت المنزوووعه شكوووو حبيني واحبك....شنو غوترااااه
واشعرفها بالولد عمره 25 ومافقس بالدنيا الا تووو بس اول من طق الباب قلت اقلط الثقل الثقل وانا اختج قولي لها والنصيب من اختيار الوالدين ماله مثيل ابد...خصوصا الام

وسلامتكم وتعيشون

Unknown said...

قوة :)

شوفى الحب وخرابيط قبل الزواج حلوة ما نقول لا
بس العمر لا يمكن يكون مقياس النضج وتحمل المسؤولية هذى شغلات من التربية ومالها شغل بالعمر
يمكن فرقية العمر ان في خبرة
بس مو معناه ان احسن

القاعدة الاساسية
الطيبون للطيبات والخبيثون للخبيثات

SomeOne said...

عايز كل الناس تعرف مدونتك
عايز اصحابك يوصلوا لمدونتك بسهولة
ضيف نفسك في ارشيف المدونات العربية


http://arabblogs.blogspot.com/
ارسل لنا اسم مدونتك و عنوناها و اسمك
في ايميل او كومنت على
http://arabblogs.blogspot.com/2006/12/blog-post.html
ابعت نفس الرسالة دي لكل اللي تعرفهم

سالفة قلب said...

باعتقادي على حسب نضج الولد والبنت
ومع وجود الكفاءه فيما بينهم

حاليا اللي نشوفه يخرع قمنا مانفرح بالملجه ..والسبه قلة الوعي وعدم احترام ميثاق الزواج وعدم استيعابه
مع قلة الصبر والاتكاليه وعدم المسؤليه

هذي العوامل كلها ادت الى ارتفاع نسبة الطلاق
انا مع الزواج المبكر بشرط وجود الرغبه الجامحه عند الولد مع دراسة أسس الزواج والحقوق والواجبات
يعني يكون واعي للمرحله اللي مقبل عليها

Dr. Saleh said...

العمر ليس بمقياس في عملية الزواج
وعلى سبيل المثال زواجك وكثير من الأصدقاء الذين تزوجوا في العشرينات وأقل من العشرينات
هناك أمور كثيرة تلعب دور كبير في نجاح الزواج وأحدها النضوج وتحمل المسئولية والتربية والأهم الدين
أنا مع إن الزوج يكون أكبر من الزوجة عمرا، لتكون أكثر شبابا من الزوج مع تقدم العمر، وكلما كانت الزوجة في 18 أو 19 كان أفضل. وهذا ما تؤيده كثير من الأمهات

Kuw_Son said...

يقول الرسول صلى الله عليه و سلم:" إذا أتاكم من ترضون أمانته و خلقه فزوجوه، إلا تفعلوا تكن فتنة في الأرض و فساد كبير"

شالمانع من ان يزوجه الابو بنته !! شكو العمر !؟ الريال مهندس ما شاء الله و يندق صبح و ليل و يعرف شنو المسئولية ..
و العمر في النهاية ماهو مقياس و سبب يخلي الأب يرفض زواج بنته !!

الحجيه said...

السلام عليكم جميعا
ريم
ودي أول اُعرف الزواج
------------------------
الزواج هو العقد والميثاق الذي على أساسه تقوم رابطة الأسرة ويلتقي الرجل والمرأة ليكونا هذه المؤسسة الاجتماعية الخطيرة الشأن وقد اعتبر الإسلام هذه العلاقة بين الرجل والمرأة قائمة على

الرحمة والمودة : وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً

أساس اختيار الزوج لأبناتنا
------------------------
كانت أم المؤمنين عائشة- رضي الله عنها- تقول: "النكاح رق فلينظر أحدكم عند من يسترق كريمته" (أي ابنته)، ولما سُئل الحسن: "من أزوّج ابنتي؟ قال: زوّجها التقي فإنه إن أحبها أكرمها وإن أبغضها لم يهنها".
وروى الترمذي بإسناد حسن عن أبي حاتم المزني أن رسول الله -صلى الله عليه وسلم- قال: "إذا أتاكم من ترضون دينه وخلقه فأنكحوه، إلاّ تفعلوا تكن فتنة في الأرض وفساد كبير".. قالوا يا رسول الله: وان كان فيه؛ قال: "إذا جاءكم من ترضون دينه وخلقه فأنكحوه-ثلاث مرات-ومن زوّج ابنته من فاسق فكأنما قطع رحمها".

أهم صفه حريصا عليها في زوج ابنتي التقوى
-----------------------------------------
التقوى هي أساس سعادة الإنسان وسعادة من معه
وكان رسول الله صلى الله عليه وسلم يدعو: ” اللّهُمّ إني أسألُكَ الهُدى والتُقى والعفاف والغنى , رواه مسلم من حديث عبد الله بن مسعود رضي الله عنه

مكان التقوى هو القلب ، لكن الدليل على ما يضمره القلب هو الأعمال الظاهرة على الجوارح
والسبيل إلى التقوى هو مراقبة النفس ومنعها عن إتباع أهوائها بما يناقض أوامر الله تعالى ولكي تنقاد إلى ما أمر به وعدم الغفلة سواء في حالة الإنقياد الى أمر الله أو إجتناب نواهيه ، قال تعالى: ” إنّ الّذينَ اتَّقوا إذا مَسَّهُم طائِف مِنَ الشيطانِ تَذَكَّروا فإذا هُم مُبصِرون ” سورة الأعراف الآية 201

بعد هذه المقدمة ودي أوضح أن الرجل أو المرأة ما يقيمان بالعمر ولكن بدينهما وصلاحهما بعقلهما وأفعالهما وحكمتهما
ووصلهما لأهلهما دليل على البر ومن يبر أهل بكون حنون وبار على رفيق دربه .

اللهم ارزق بناتنا وبنات أخوان المسلمين والمسلمات أزواج صالين أتقياء انق ياء يخافون الله ويتبعون سنة نبيه محمد صلى الله عليه وسلم .

Q80Batman said...

من يبي الدح قال أح
من هذا المثل تنعلم أن مايختارة الانسان في حياتة يتحمل نتيجة إختيارة بتالي أختيار شريك الحياة أو شريكة الحياة قرار صعب لان المستقبل يعتمد على هذا القرار و المشكلة في مجتمعنا ان النسان يتلون مثل السحلية فتجده بلون مع الأهل ولون مع الاصدقاء ولون خاص في حالة البحث عن زوجة أو زوج لذالك نجد هذة المشاكل في مجتمعتتنا لان ما بني على باطل فهو باطل ماعدي الأقلية أذا أختيار شريك الحياة يجب أن يكون بقناعة ليس للإرضاء الاهل او اطماع مادية لتجنب حالة الندم و الملل في المستقبل